Yaalalil aajeleb’ ru—lix aajelil ru naq took’anjelaq
Li Xb’een K’utb’esink ut li Profeet aj Jose Smith ke’xk’e chi k’utmank chaq li na’leb’ ut li yaal li aajeleb’ ru re qasahilal chiru li yu’am a’in ut li qataqenaqil loq’al rik’in li Dios.
Naq wan chaq wuqub’ chihab’ we, kinpatz’ re lin na’, “Naq laa’at ut laa’in tookamq ut tooxik sa’ choxa’, ma toj laa’aqat inna’?” A’an ink’a’ naxyo’oni naq tinpatz’ raj a’an. A’b’an kixsume chi chaab’il jo’ kiru chiru ut kixye: “Ink’a’, sa’ choxa’ qas qiitz’inaqo. Moko tinwanq ta choq’ aana’.” Moko a’an ta li sumenk kiwaj raj rab’inkil.
Moqon chik chirix a’an, wiib’ li saaj winq ke’wulak chiru li rokeb’aal li qochoch. Kama’ jun sachb’a-ch’oolej, lin yuwa’ kixkanab’eb’ chi ok. Ke’xye naq a’aneb’ misioneer re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.
Eb’ li elder a’in, jo’ kiqatzol xb’oqb’aleb’, ke’xyoob’ xtzolb’al li qajunkab’al. Toj nanaq chi us sa’ inch’ool li sahilal naqeek’a’ naq neke’wulak chaq sa’ li qochoch. Ke’xye qe naq jun saaj winq xko’o chi tijok sa’ jun k’iche’ re xpatz’b’al re li Dios b’arwan reheb’ li iglees li tz’aqal yaal ut naq kirileb’ ru li Dios ut li Jesukristo.1 Eb’ li elder ke’xk’ut chiqu jun xjalam-uuch li k’utb’esinb’il matk’ a’an ut naq kiwil, kinnaw chi yaal naq laj Jose Smith kirileb’ ru li Dios li Yuwa’b’ej ut li Jesukristo. Eb’ li misioneer ke’xye naq xb’aan li k’utb’esinb’il matk’ a’in, lix Iglees li Jesukristo tz’aqal yaal wan jun sut chik sa’ xb’een li ruchich’och’.2
Eb’ li misioneer ke’xk’ut ajwi’ chiqu lix k’uub’anb’il na’leb’ li Dios re sahil ch’oolejil ut ke’xsumeheb’ lix patz’om li qajunkab’aal chirix li paab’aal. Ke’xk’ut chiqu naq eb’ li junkab’al te’ruuq chi yaal te’wanq sa’ komonil chirix li yu’am a’in, jo’ yuwa’b’ej, na’b’ej, ut alalb’ej k’ajolb’ej.
Li qajunkab’al ke’kub’e xha’. Li b’e re xjalb’al qanajter na’leb’, xtz’eqtaanankil li k’aynaqo wi’ chixb’aanunkil, ut li ok choq’ komon li neke’xk’e xch’ool sa’ li Iglees wan naq kich’a’ajko’ b’ayaq. A’ut, b’antiox re li rusilal ut lix rahom li Dios ut rik’in lix tenq’ naab’aleb’ aj jolominel ut komon, koonume’ sa’ xyaalal chiruheb’ li xb’eenil chihab’ li ch’a’ajeb’ b’ayaq.
K’iila millon li ak okenaqeb’ sa’ li Iglees, jo’ ajwi’ li naab’aleb’ li yookeb’ chi jalaak xch’ool ut chi kub’eek xha’ rajlal xamaan, neke’xk’ul xnawom xch’ool chirix li Xb’een K’utb’esink. Li Santil Musiq’ej naru naxjultika qe chi k’iilasutinb’il li nawom a’an naq naqayal qaq’e chixyu’aminkileb’ li saqen ruhil yaal re lix evangelio li Jesukristo.
Li Xb’een K’utb’esink ut li Profeet aj Jose Smith ke’xk’e chi k’utmank chaq xkomon chik li na’leb’ ut li yaal li aajeleb’ ru re qasahilal chiru li yu’am a’in ut li qataqenaqil loq’al rik’in li Dios. Tinyaab’asi oxib’ reheb’ li yaal a’in li kiqak’ul chaq ut li tento taqak’anjela xb’aan naq jun saaj winq kiwiq’la chi tijok chi anchal xch’ool.
Li Dios naxb’oqeb’ profeet re toohe’xb’eresi ut te’xk’am qab’e
Jun li yaal aajel ru naqatzol xb’aan li Xb’een K’utb’esink ut li Profeet aj Jose Smith, a’an naq li Dios naxb’oqeb’ li profeet,3 aj ilol na’leb’, ut aj k’utb’esinel re te’xk’e qana’leb’, te’xk’am qab’e, toohe’xtij, ut toohe’xb’eresi.4 Eb’ li winq a’in a’aneb’ xtz’uumal re li Dios sa’ li ruchich’och’,5 rik’in li wankilal k’eeb’il reheb’ re aatinak ut k’anjelak sa’ xk’ab’a’ li Qaawa’.6 Naq taqataaqe chi tiik lix na’leb’eb’, toowanq chi kolb’il qix ut taqak’ul li osob’tesink sik’b’ileb’ ru chiru li qab’eenik sa’ ruchich’och’.
Naq yookin chaq chi tzolok sa’ li nimla tzoleb’aal Brigham Young jo’ jun ch’ajom sutq’ijenaq chaq sa’ xmision ut maji’ sumsu, kinwulak chaq sa’ jun jolomil ch’utam re li tijonelil re li jolomil ch’utub’aj-ib’ sa’ li Tabernaculo sa’ li Manzana re li Templo. Li Awa’b’ej Ezra Taft Benson, li wan chaq choq’ Awa’b’ej re li Iglees sa’ li kutan a’an, kixk’e xb’oqb’al chixjunileb’ li ak sutq’ijenaqeb’ chaq sa’ xmision naq te’xk’oxla chi us li sumlaak ut naq te’xk’e a’an jo’ xb’eenil sa’ xyu’ameb’.7 Chirix li ch’utam, kinnaw naq kinb’oqe’ chixjalb’al ink’a’uxl ut naq tento tinyu’ami lix na’leb’ li profeet.
Jo’kan ut, kink’ulub’a naq tinxik sa’ intenamit, Brasil, re xtawb’al wixaqil. Rub’elaj naq xkohin chaq aran Brasil chiru wiib’ po, kinb’oq inna’ ut junjunqeb’ li wamiiw ut kiqana’leb’a jun hu tz’iib’anb’il wi’ xk’ab’a’eb’ junaq lajeeb’ chi saaj ixq—li junjunq reheb’ naru tana’ taawanq choq’ wixaqil.
Naq wankin chaq aran Brasil, chirix naab’al li k’oxlak ut tijok, kinnaw ru jun reheb’ li saaj ixq, koo’ok sa’ li noviazgo, kiqak’e qib’ sa’ aatin, ut kiqak’e xkutankil li qasumlajik. Moko junpaat ta a’an jo’ neke’xb’aanu li ani neke’tzolok aran Provo, Utah, a’b’an aran Brasil jwal junpaat naq kik’ulman chixjunil a’in.
Junjunqeb’ po chirix a’an, kinsumla rik’in li xElaine. A’an lin rahom sa’ inyu’am ut jun sik’b’il ru osob’tesink.
Moko yookin ta chixyeeb’al naq chixjunileb’ te’xb’aanu jo’ kinb’aanu laa’in, a’b’an yookin chixyeeb’al—maare b’ayaq chik chiru yal xyeeb’al—naq junelik taqab’aanu li neke’xye li qayo’yookil profeet.
Lix profeet li Dios anajwan a’an li Awa’b’ej Thomas S. Monson ut too’osob’tesiiq naq naqataaqe lix na’leb’ a’an chi tz’aqal re ru.
Xnawb’al chi tz’aqal chanru wan li Dios chi yaal
Jun chik li yaal naqatzol xb’aan li Xb’een K’utb’esink ut li Profeet aj Jose Smith, a’an chanru wan li Dios chi yaal. K’oxlahomaq junpaataq, k’a’jo’ naq osob’tesinb’ilo rik’in naq naqanaw naq li Dios wan jun xxaqalil li tibʼ ut bʼaq okenaq jo’ li qe,8 naq naru naqaloq’oni jun li Dios li yo’yo ut yaal, li naru taqataw ru, ut li kixk’utb’esi chaq rib’ jo’ ajwi’ li Ralal chiruheb’ lix profeet—jo’ li najter profeet jo’ re li profeet sa’ roso’jikeb’ li kutan a’in.9 A’an jun li Dios li narab’i ut naxsume’ li qatij;10 jun li Dios yoo chaq chiqilb’al sa’ choxa11ut junelik wan xk’a’uxl ma us wanqo sa’ musiq’ej ut sa’ tib’elej; jun li Dios li naxk’e chaq qe xtaql qach’ool re xsik’b’al ru qajunes qib’ chixtaaqenkil a’an ut chixpaab’ankileb’ lix chaq’rab’ chi ink’a’ minb’il qu;12 jun li Dios li nokorosob’tesi ut nokoxkanab’ chixyalb’al qaq’e chiru li ch’a’ajkilal re naq tooruuq chi k’iik ut chi wulak jo’ chanru a’an.
A’an jun Dios aj rahonel li kixk’e chaq jun k’uub’anb’il na’leb’ re taaruuq toowanq sa’ sahilal sa’ li yu’am a’in ut sa’ li junelik qe’ kutan.
Li Jesukristo a’an aj Kolol qe
Xb’aan li Xb’een K’utb’esink ut li Profeet aj Jose Smith, naqak’ul qanawom chirix lix yaalalil ut lix loq’al lix k’anjel li Qaawa’ Jesukristo, li wan choq’ li xnimal ru pek sa’ xxuk li qapaab’aal.
Xb’an naq ki’ok li kamk sa’ li ruchich’och’, jo’ naq wan qayu’am anajwan, chiqajunilo tookamq sa’ jun kutan. Jun li eechej re li kamk a’an naq maajun wa chik taawanq raj qajunxaqalil sa’ tib’elej; maak’a’ raj taaruuq taqab’aanu re xxokb’al wi’chik. Jok’an ajwi’, xb’aan naq chiqajunilo nokomaakob’ chiru qab’eenik sa’ ruchich’och’, maajun wa tooruuq raj chi sutq’iik rik’in li qaChoxahil Yuwa’.
Ma naru nekek’oxla lix taak’ulmanq raj wi ta ink’a’ chik tooruuq chi wank rik’in li Dios ut maajun wa chik taawanq qajunxaqalil?
Ki’ajman ru jun laj Kolonel ut aj Tojol-ix re qach’ab’ankil chiru li kamk ut li maak. Rub’el lix b’eresihom li qaChoxahil Yuwa’, li Jesukristo kik’ulun sa’ li ruchich’och’, kixk’ul li rahilal, kikam chiru krus, ut kiwakli chi yo’yo’ re naq laa’o ajwi’ tooruuq chi wakliik chi yo’yo’ ut, rik’in xjalb’al qak’a’uxl chi anchal qach’ool ut xk’uub’ankileb’ ut xk’uulankileb’ loq’laj sumwank, tooruuq chi sutq’iik chiru rilob’aal li Dios.
Laj Jakob’ kixch’olob’, “ Aay, kʼaʼjoʼ xchaabʼilal li qa Dios, li nakawresink re jun li bʼe re tooʼeeleliq chaq chiru lix chapleb ʼ li xuwajel josqʼ aj xul aʼin; relik chi yaal, li josqʼ aj xul re li kamk ut li xbʼalbʼa, aʼan lix kamik li tzʼejwalej ninye re, joʼ ajwiʼ xkamik li musiqʼej.”13
Li Jesus a’an li yeechi’inb’il Mesias, aj K’ehol chaq’rab’, lix Santil Dios laj Israel, li Qaawa’, aj Kolol qe, aj Tojol qix, li qaRey, li qaChixjunil.
Nintz’aama naq chiqajunilo yooqo chi k’anjelak a’ yaaleb’ li yaal ut nawom a’in aajelb’ ru, xq’axtesinkil li qapaab’aal chiru li Dios ut lix Raarookil Ralal. Sa’ xk’ab’a’ li Jesukristo, amen.