Nger er a Nglunguuch

A klou a belkul e ongelaod el osisechakl er a ebangkelio er a Jesus Kristo a kmo a Demad er a Babeluades a oba cherrungel el beltikereng el mo er a Rengelekel. Tiaikid el cherrungel el beltikereng a uchul, e Ngii omekngeltengat er kid el diak el iior er a soad me a ngelsengesed ng bai ultuil er a ngarbab el Llemesel. El uaia tekingel a profet Nephi el kmo, “Ak medengei el kmo a [Dios] a betik a rengul er a rengelekel.”¹

A ta er a telengtengil tial cherrungel el beltikereng a sel urerel a Chedam er a Babeluades er a bek el mekekerei el tekoi er a klengar kid, luldimukl aikel diak dutab malechub eng diak dodengei. Sel dongull a telbiled e dolasm el mo uaia Osobel, e kid a sebeched el blechoel ngmai a chedaol ulekrael lokiu odbechel a Chedaol Reng. Sel dongull a telbiled e dolasm el mo uaia Osobel, e kid a sebeched² el blechoel ngmai a chedaol ulekrael lokiu odbechel a Chedaol Reng.

A chedaol llechukl osischeklid el kmo: A Chedam a medengei a ngelsengesem me a omousbech, ruchei er a omolengit er ngii,”³ e Ngii a “medengei a rokui el tekoi, le rokui el tekoi a berrokel er [Medal].”⁴

A profet Mormon okesiul tial teletael: Ng dimlak le kiei el mo mes a rdechel a urerel. Eng di ng mle medengei el kmo a Rubak a mle blechoel lomekrael er ngii. Sera lomelchesiu el kirel lodak aikel mekekerei el tibereberk el sintsyu lulluches a Nephi el mo obengkel a kuk reksi er ngii, e a Mormon a milluches el kmo: “Ak meruul er tiang el kirel a ungil moktek; le ngor ouchais er ngak, el ngor lultuil er a urerel a Reng er a Rubak el ngara ngak. Le ngak, a diak kudengei a rokui el tekoi; eng di a Rubak a medengei a rokui el tekoi el mo duubech; a leuaisei, e ngii oureor lobengkek el meruul er sel ngii a soal.”⁵ Ng uaisei el Mormon a dimlak lodengei el kmo a ta er a klebesei e a ikel 116 el llel a babier a mo remiid, eng di Rubak a mle medengei e kildmeklii a rael el mo sumecheklii ruchei er a ldubech tial teletael.

A Chedam a medengelkid, medengei a ngelsengesed, e mo ngosukid. A lebebil er a taem e a ngesou a mereched el mei malechub a le sal meoud eng uriul er a dolengit chedaol ngesou. A le bebil er a taem e a ikel kma soal a rengud me a ongtid a diak el monger er sel ngii a urunguled el kirel, eng di kede mo metik el kmo a Dios a mla kudmokl a lmuut el ngarbab el klengeltengat el medechel el kired. E a, le bebil er a taem, e a melemalt el ongtid a diak dengai a nger ngii er tial klengar. Ak mo meketeklii lokiu a keldei el kakerous el cheldecheduch a teletael el Demad er a Babeluades a sebechel longer a meral ngara reng longit el mo er Ngii.

A kot el kekerei el ngelekam el sechal a mlokedong el mo misionari er a France Paris Mission. Me a ki mlengedmokl er ngii el mo er a omesiou, me a ki mlo mechar a chelchedal a bail, me a mekemanget a chimal bail, nektai, saks, me a bail er a kerrasm. Eng di ng chelebuul, le bail er a kerrasm el mle soal er sel klungel el ngii ousbech er ngii a dimlak er a stouang. Eng di, ngika loureor er a stouang a dilu el kmo tial bail er a kerrasm a mei er a chelsel a sesei el sandei e sebechir lodureklii el mo er a missionary training center er a Provo ruchei er a lorael ngika el ngelekam el mo er a France. Me a ki mocha harau er ngii e merolang e dimlak ki momdasou el kirel.

Ngika el ngelekam a mlo er a missionary training center er a Ongelolem el buil, e tial bail a mlong er a sesei el klebesei ruchei er a lorael er a Ongeai el buil. Ng dimlak lotebedii e lesang e lesemii tial bail ng di ulereched el nguu loiia er a torengkel lobengkel a bilel me a bebil er a kloklel.

A lorolang el mocha temel a kelekolt er a beluu er a Paris, e ngika el ngelekam a mla er ngii, eng milluches el mei er kemam el kmo ngultebedii tial bail e ra kerrasm, e milasm loubail er ngii, eng di dimlak el sebechel leng kmal kekerei. Aki mocha locha sesei er a udoud er a bank me bol sebechel mecherar a bilel er a kerrasm er a Paris, meng mlo uaisei. Meng ko er a uaia kulba telkib el ngasechereng, e melchesa el mo er ngii me lenguu tial bail el mesterir a rechad leng diak el sebechel lousbech er ngii.

Uriul e aki ngiluu a babilngel: “Ng kmal limis el mekelkolt er tie. … A eolt a uaia di lolokou er kid, eng di tial bilek er a kerrasm a kmal lungil e okrokr. … Ak ngiluu sel ta er a bail er a kerrasm el [msa ta er a misionari el ki mdak] leng meketeketang el meluluuch lolengit er a telkib el ungil bail er a kerrasm. Ng dirk tela el rak er a lobult el mo chedal a ikelesia e di tal delal … me a remisionari el milsa techolbechelid a olngeseu el mesiou er ngii er chelechal lengara mission me tial bail er a kerrasm a mle nger er a nglunguchel, meng kmal ungil a renguk el ngiluu el msang.”⁶

A Chedam er a Babeluades a mle medengei el kmo ngika el misionari el ngara omesiou er a beluu er a France el 6,200 el mile (10,000 kilometers) a cherridel er a blil a kmal lousbech er a beches el bail er a kerrasm leng kmal mekelekolt a beluu er a Paris eng di ngika el misionari a dimlak a ududel el mecherar a bilel. E a Chedam er a Babeluades a dirrek el mle medengei el kmo a ngelekam amo nguu a bail er a Provo, Utah, el ngii el bail er a kerrasm a kmal kekerei er ngii. Ngii a mle medengei el kmo tirkal teru el misionari a mo dmak el ngara omesiou er a beluu er a Paris me tial bail er a kerrasm a mle nger er a medemdemk e meral ngara reng el nglunguchel a misionari el kmal ousbech er ngii.

A Osobel a ulsisechakl:

“A teblo el charm ng diak locheraol? E a chimo er ngii a diak el rebet er a chutem a lak a Chedam.

“A bek el chui er a bdelum me ngulcherangel.

“A leuaisei e lak ko medakt, le kemiu a lmuut el ngaruchei a ultuteliu er a charm.”⁷

A kuk chelsel a bebil er a teletael, e a lsekum aikel soad el tekingel a beluulechad a diak dengai er sel ngii a urunguled el kirel, eng locha bai ungil mei er kid e klungioled ruriul. Okesiul tiang, a Joseph el ngelekel a Jacob a ble louketui e mechechei er ngii a robekul me te millib er a melai er a klengar ngii. Eng di, dimlak lokodir te bai ulterur e melengai el mo er a beluu er a Egypt.⁸ Omko ngarngii a chad lomdasou el kmo a nglunguchel a dimlak el monger er sel ngii a urungulel, eng locha bai Joseph. E a mera er ngii, e tial kerior el mlo er ngii a bai mlo uchul a klou el klengeltengat el mo er ngii e ulsebelii a telungalek er ngii er a bosech. Uriul, er a bocha le ngarbab a deruchellel el merreder er a Egypt, e nguleba mesisiich el klaumerang me a llomes e dilu er a robekul kmo:

“Chelecha e lak el mekngit a rengmiu, malechub el di el kemiu el kesib a rengmiu er kemiu, el ngilikak el mo melengaI: Le Dios a uldureklak loeak kuchei er kemiu el mo mekerreuii a klengar.

“Le ng mla mo eru el rak el ngarngii a bosech er a beluu: e dirk medechel a lmuut el eiim er a rak, el diak a kall malechub omeridm.

“A Dios a uldureklak loeak kuchei er kemiu el mo kerreuil a klengar er a beluu, e mo osebeliu lotebedemiu er a kerior.

“Me ng diak el kemiu a uldureklak el mei er tiang, ng bai Dios.”⁹

Sera le ngara daingak, e a kot el klou el sechal ngelekam a mlo oureor er a kmal ungil lurerir a rengalek er a skuul el kmal klou a techellel soiseb er a lmuut el ungil, e di mereko el urerel sel tobed er a skuul. Ng kmal mle blak a rengul loureor er tial lurerel el eua el rak, meng kmal mlo meduch er ngii, me tirkal ledak loureor el chad me a merredel er ngii a kmal ko er a chemat e mengull er ngii. Ng mocha er a ulebongel er a rak er ngii er a skuul, e uaia le ko er a mla metutk er a babeluades (tiaikid a mle uldesuel ngika el ngelekam) e tial ureor a mlo chaiter e ngika el ngelekam a kmal mle klou a techellel soiseb, e kmal mle ansing e mui el medengei el kmo, ngii a mengai.

Eng di, ng dimlak el mengai. Ng dimlak a ta er kemam el medengelii a uchul. Ng kmal mle ungil a kedmeklel kirel, me a interview er ngii a mle ungil, e ngii a mle kot el lungil er a rokui el chad, e mla ngara nglunguuch e uaia lodengei el kmo ngii a mo mengai! Ng kmal mlo iimis el mekngit a rengul kirel, e ngii el rokir el teletael a rirellemam el di mlo mengkas a bdelmam er a rraureng. Ngera uchul me a Dios a chilitii me tial melemalt el urungulel?

Ng dNg dimlak a medengei mol muut er a tela el rak ruriul e a nger a mle bleketakl el mei. Omko ngiluu tial kmal mle soal lureor ruriul er a ltobed er a skuul, eng locha miltom er a kmal chetituokel el techall er a klengar el ngii chelecha el taem eng mla mo bleketakl el melutk el kirel a diak a ulebengelel klungiolel me a klengeltengat el mo er ngii. A Dios a mle medengelii a rsel me a uchelel (le Ngii a dimla uaisei), e a chelsel tiaikid el teletael, e a nger er a betok e melemalt el nglunguuch a dimlak, me luchul e a lmuut el ngarbab el klungiaol bol motaut.

E a lebebil er a taem, e a nger er a nglunguched el desal meringel, e blak a rengud, losiik a diak dengai er tial klengar.

A Sister Patricia Parkinson a mlechell el ungil osengel, eng di ser a bocha leuid a rekil eng mocha mikou. Sera letiu a rekil, e a Pat a mlo er a ta er a ikel skuul er a Utah el kirir a Rmechad me a Rmikou el ngara Ogden, Utah, el kmeed el 90 mile (145 kilomeers) a cheridel e ra blil, meng mocha kirel mo kiei aikel blai er a skuul— me ngika el etui a rekil ngalek a mlo sabisi loureng er a rechad er a blil.

Sera bocha el teruich me a ta rekil eng kma dikea lomes. A Pat a liluut el mocha remei er a bocha el teruich me a eiim a rekil e siliseb er a high skuul. Ng millemolem el mo er a skuul er a daingak e tilobed loba babilengel er a tekoi er a omengedecheduch er a rsechudel me a psychology, e mle meringel el mengedechuul er ngii el muut soiseb er a ngarbab el skuul er a daingak, eng di ng mlo sebechel soiseb e tilobed loba babilengel er a master er a omesubel omelekoi me a cheldecheduch. Chelecha e a Pat oureor lobengkel a 53 el skuul er a elementary e oungerachel a kleua el teletael er a omelekoi er a ikel skuul el ngara basio le kiei er ngii. Ngarngii a blil me a mlil, el rsechelil me a rechad er a blil oltak er ngii el mo er ker me ker.

Sera le teruich a rekil e a Pat a mle kirel mo er a botk er a medal le ng di mirael mo diak lomes. A rechad er a blil a mle blechoel melekoi er ngii aikal mo duubech el kirel a ukeruul er ngii, eng di diak dodengelii a uchul e te dimlak louchais er ngii el kirel a botk er a medal. A rechad er a blil er a louchais er ngii ruriul el kirel a ulterekokl el sils el bo er a botk, e a Pat, a delal a melekoi, “a kmal ngilasech a rengul.” A Pat a rirurt el dmuu er a rum er ngii el telkib e tobedang el ko er a uaia le kesib a rengul e dula er a rechad er a blil el kmo, “Msall ek sbedemiu. Ak medengei, a Dios a medengei, meng bai ungil a bo modengei el dirrek. Ngak a dimereko el mikou el mo er a ulebongel er a klengar ngak!”

Sesei el rak er a memong, e a Pat a mlo er a California el mo oldingel er a rechad er a blil el kiliei risei. Te mla rikl ngii me a edei a rekil [ngelekel ochedal], eng dilu er ngii el kmo, “Anti Pat, ngera meng diak di molengit er a Chedam er a Babeluades me el beskau a beches el osengem? Alsekum e kolengit er a Chedam er a Babeluades, e Ngii a mo meskau aikel soam. Ng kirem el di olengit er Ngii.”

A Pat a millekoi el kmo ng ko er a mlo mechas a rengul er tial ker eng di ng dilu el kmo, “Oi, a lebebil er a taem e a Chedam er a Babeluades a diak loureor el uaisei. Bebil er a taem e Ngii a soal a desubii a kmo ngerang, meng diak di lomeskau aikel rokui el soam. Bebil er a taem eng kirem el mengiil. A Chedam er a Babeluades me a Osobel a ungil medengei a mo klungioled me a ikel dousbech. Meng, diak di le beskau aikel rokui el soam er a cheslel a taem el soam.”

Ng meketeketang el taem el kudengelii a Pat e dirk dilu er ngii el kmo ak chemat er a ungil blekerdelel el di blechoel dmeu a rengul. Ng dilu el kmo, “Ea ng dirkak mngara blik lobengkek me mesekak, ng uaisei? Ngarngii aikel kuk mekngit el taem er ngak. Ng betok el bla bol seselk a renguk, e betok el bla klangel.” Eng di, ngii a millekoi, “Sera kumuchel el mo diak kumes, eng mle ngodech, eng di ak mle medengei el kmo a Chedam er a Babeluades me a Osobel a ulebengkel a telungalek er ngak me a ngak. Aki milasm lotekur er sel sebechemam, e a kumdasou, e a ki ultekur er a ungil teletelel. Ng mocha sebechel ko er a ungil besuk el chad, e a mera er ngii ak di mla ngara deureng el chad. Ak dobedebekii a Chimal er a rokui el tekoi. Tirkel loker el kmo ng kesib a renguk le ngak el mikou, e a kunger el kmo: ‘Ng techa kesib a renguk er ngii? A Chedam er a Babeluades obengkek; ng diak cheloit. Ngii a di obengkek er a bek el taem.’”

Chelsel tiaikid el teletael, e sel rengul a Pat el soal muut el mo omes a diak bol motaut er tial klengar. Eng di a kerbai, el ngii a silubii e ra demal, a kmo “Tiang a mo mocheuekl.”¹⁰

A President Henry B. Eyring a millekoi el kmo, “A Chedam er chelechal taem a kmal medengelkau, aikel momelchesiu, me a ikel tekoi er a reng me a klechad el rechad el iliuekl er kau ousbech.”¹¹ Tial ngarbab e klemerang longelaod a sebeched el metik er ngii e ra chelsel aika el kldei el cheldecheduch el bla kuchais.

Rodam me a rodos, bebil er a taem e kede mereched el ngmai a nger er a nglunguched er sel ngii a doureng er ngii. E a lebebil er a taem, e a nglunguched a diak el monger er sel ngii a soad, eng di cherengel a taem e kede subii el kmo a Dios olab a lmuut el ngarbab el klengeltengat el kired er sel ble dekot lolsingch el kirel. E a kuk bebil er a taem e a melemalt el ongtid el mo er a Dios a diak bo dengai er tial klengar.¹² A Elder Neal A. Maxwell a dilu el kmo, “A klaumerang a uldimukl er ngii a oumerang er a temel a Dios.”¹³

Ng kired el medengei el kmo ngultuil er sel ngii a Soal me a Temel, e a Chedam er a Babeluades a mo omekngeltengat er kid e sumechokl aike el rokui el sebekereng, chelbirukel, me a klengitelreng el de ngarngii.

“Osisiu, ak dirrek loureng me bo momtab er tirkel ngeltengat e ngara deureng el chad le tir loltirakl a llechul a Dios. Oi, te ngeltengat er a rokui el tekoi, a tekingel a klechad me a reng; e a lsekum toutekangel el mo er a ulebongel e te mo soiseb er a babeluades, el mo kiei lobengkel a Dios el mo er a diak a ulebengelel deureng. Oi bo molbedebek, molbedebek el kmo aika el tekoi a klemrang; le Rubak el Dios a mla dmung.”¹⁴

Ak medengei el kmo a Dios a remenges a nglunguched.¹⁵ AK medengei el kmo ngike el medengei a rokui, el mui e ra beltikereng el Chedam, a Ngii onger a nglunguched, loltirakl er sel moktek me a Llemesel, er a chelsel a teletael el ngii a mo ngarbab el klungiaol e klengeltengat el mei er kid. Aika kdung el ngara ngklel a Jesus Kristo, amen.