E na Kairiira Aio Nakea?
Ti karaoi rinerine ao babaire aika a raraoi ngkana ti tarai anga tabeua ao ni iangoia bwa a na kairiira nakea.
Ana euangkerio Iesu Kristo are e kaokaki e kaungaira bwa ti na iango ibukin taai aika a na roko. E kabwarabwara te kantaninga ibukin te maiu ae mamate ao koauan te maiu are imwiina. E reirei iango aika korakora ibukin taai aika a na roko ni kairii baike ti karaoi ngkai.
Ni kaitaraana, ti ataiia aomata ake a iangoa kanoan te bong aei, a mwakurii ngkai, a kukurei iai ngkai, ao akea iangoan taai aika a na roko.
E na kakukurei kanoan taai aika ngkai ao aika a na roko ngkana ti aki toki ni iango ibukin taai aika a na roko. Ngkai ti karaoi babaire ngkai, ti na aki toki n titiraki, “E na kairiira aio nakea?”
I.
Tabeua babaire bon te rinerine imarenan karaoan te bwai teuana ke aki karaoan te mwakuri. I ongo teuana te katooto ae aekakin te rinerine aei n te maungatabu n te titeiki i Amerika n ririki aika a nako.
Te tabo bon aon te kaembwati n te kura n reirei ae tikiraoi aona. Koraki ni kairake ae ataein te reirei a bane n tekateka iaon te uteute. Te tia taetae are e kabwarabwara te bwai ae e riki aei e taku bwa a mamatakuakina te man ae te squirrel ae moan te tikiraoi ma bukina ae bubura, n takakaro ni katobibia oin te kai ae te hardwood. N tabetai e mena i aontano, tabetai i eta ao n ruo ni katobibia oin te kai. Ma e aera ngkai te bwai ae e rangi n nonoraki anne e katika mataia ataei aikai?
Ni wene i aon te uteute ni kaan bon te kamea ae te Irish setter. Bon ngaia ae a miakinna ataein te reirei, ao te squirrel bon ngaia ae e nano iai te kamea. Ni katoa tai are e raba te squirrel n ana tai ni mimitoiaki i oin te kai, e kerake ni karaurau te kamea tabeua te inti ao e a manga bakaea te aki ataibwai n te bwai ae e riki. Aio te bwai are a bon miakina ataein te reirei. A aki karongoa ao n aki kakamwakuri, a katokai mataia iaon te bwai ae e na riki are a bon ataia bwa tera mwiina.
N tokina, e a rangi ni kaan te kamea ni kona n eweka te squirrel ao e a raweia inanon wina. E nako te takarua ni maaku, ao a kiba koraki n ataei akanne ni kanakoa te man are e uarereke mai iroun te kamea, ma e bon rangi n oimwi. E a mate te squirrel.
E na iai mai ibuakoia koraki n taai akanne ae e na kaman tia ni kaongoa te squirrel ni katiotioa baina ke n takarua, ma bon akea. A bae ni mataku ngkai te bwai ae bon ataaki mwiina bwa e na riki e a kaan ao ni kaan. Akea ae e titiraki, “E na kairiira aio nakea?” Ngkana te bwai ae e a kaman ataaki bwa e na riki e bon riki, e boo te kiba n tuka te kanganga are e na riki, ma e a bon rangi ni rimwii. Bon ti te rannimata n nanokawaki are a kona n anga.
Te karaki ae e koaua kanga ai aron te kaikonaki. E kananonaaki nakon bwaai ake ti nori inanon maiura, ao ni maiu inanon waaki ake a riki i rarikira. Ngkana ti nora te kanganga n roko iroun te aomata ke bwaai ake ti rangi n tangirii, iai ara kona n rineia bwa ti na taetae ke ni karaoa te mwakuri ke n aki karongoa. E na raoiroi ngkana ti titirakinira, “E na kairiira aio nakea?” Ngkana mwiin te bwai are e karaoaki e waekoa n roko ao n rangi ni kakaiaki, ti bon aki kona n ae ana akea te bwai ae ti na karaoia. Ti na riai ni kanakoa te kauring ae e riai ke n anga te ibuobuoki ae e bon riai n totokoa reken te kanganga ngkai a reke ara tai ni karaoia.
Te babaire ae I a tiba tia ni kabwarabwara e irekereke ma te rinerine imarenan karaoan te mwakuri ke n aki karaoan te mwakuri. Ae e ataaki riki bon taian rinerine imarenan karaoan te mwakuri teuana ke teuana. Rinerine akanne bon imarenan te raoiroi ao te buakaka, ma ae e rangi ni okioki riki bon te rinerine imarenan uoua bwaai aika a raraoi. Ikai naba are e tamaroa ngkana ti titiraki bwa e na kairiira aio nakea. Ti karaoi rinerine aika a mwaiti imarenan uoua raoiroi, n aki toki ni irekereke ma arora ni kabongana ara tai. E aki bure te takakaro n takakaron te witeo ke te tekiti ke te mamataku n te TV ke te taetae iaon te tareboon. Ma aikai a kaairaki ma te bwai ae aranaki bwa “te tai ae bua” nanona bwa ngkana ti kabanea ara tai ni karaoan te bwai teuana, e bua ara tai ni karaoan are teuana. I kakoauaa bwa ti kona n noria ae ti riai n taraia raoi ma te karaurau bwa tera ae ti kabuaa inanon te tai are ti kabane ara tai ni karaoa te waaki teuana, e ngae ngke e bon tamaroa naba karaoana.
Tabeua te tai n nako I anga te marooro ae atunaki “E Raoiroi, E Tamaroa, moan te Tamaroa.” N te marooro anne, I taekina bwa “tao ibukina bwa te bwai teuana e tamaroa bon tiaki bukina ae e nang karaoaki naba. Mwaitin bwaai aika tamaroa ake ti kona ni karaoi e riaon riki te tai ae e tau ibukin katiaaia. Tabeua bwaai a tamaroa riki nakon ake a raoiroi, ao aikai bwaai ake a na taraaki riki inanon maiura. … Ti na riai ni katikui bwaai tabeua aika a raraoi bwa ti aonga n rinei bwaai tabeua aika a tamaroa ke a rangi n tamaroa.”1
Taraia bwa ana teraa mwiin am rinerine. Tera ae e na reke nakon arora nakon taai aika a na roko man ara babaire ake ti karaoi ni bong aika ngkai? Uringa kakawakin karekean te reirei, kamatebaian te euangkerio, kabouan ara berita ma kanakin te toa, ao te nanakon te tembora.
II.
“E na kairiira aio nakea?” e bon kakawaki naba n aron tarakira ibon iroura ke ni iangoia bwa a uara arora. Ae e kakawaki, ngaira n tatabemaniira bon natin te Atua ae iai te kona ni karekea te maiu ae akea tokina. Aron taraakira riki tabeua, ni ikotaki ma nakoara n ara tabo ni mwakuri, ara reti, tein rabwatara ke kamoamoakira, a bon aki teimaan ke akea bonganaia n aron te maiu ae akea tokina. Tai rinea ae ko na kinaaki ke ni iangoiko nakon bwaai ake ana anga tian am kouru nakon are ko bon kona ni karekea.
Tariu, ao mwaneu ake a na nora ke ni wareka te bwai ae I taekina ikai, Au kantaninga bwa ko mataata bwa e aera am taan kairiiri a anganiko reirei ao kairiiri ake a anga. Ti tangiriko, ao Tamara are i Karawa ao Natina, Iesu Kristo, a tangiriko. Aia babaire ibukira bon te “babaire ni kakukurei are e korakora” (Aramwa 42:8). Te babaire anne ao Aia tua ao otenanti ao berita a kairiira nakon te kukurei ae e korakora ao te kimwareirei n te maiu aei ao n nakon te maiu ae e na roko. Ngkai ana toro te Tama ao te Nati ngaira, ti reirei ao n anga te kairiiri are A kairiira iai iroun te Tamnei ae Raoiroi. Akea te bwai ae ti tangiria riki nakon taekinan te koaua ao ni kakorakorai ngkami ni karaoa te waaki are A tia ni kaotia ae te kawai nakon te maiu ae akea tokina ae, “ana kabanea ni korakora ni bwaintangira te Atua” (Reirei ao Berita aika Tabu 14:7).
III.
Aio riki te katooto n rotakin te waaki ibukin taai aika a na roko man te babaire are ti karaoi ngkai. Te katooto aei e irekereke ma karaoan te anga karea ngkai ni kakoroa nanon te kouru ae e kakawaki ibukin taai aika a na roko.
N te maungatabu n te titeiki i Cali, Colombia, te titita temanna e taekina arona ma ana kabae n tangiria ni mareaki n te tembora, ma n te tai anne te tembora ae e kaan e rangi n raroa bwa i Peru. Inanon te tai ae maan ti kaikoa ara mwane ibukin kantokara n te bwati. N tokina, ti a tokara te bwati n nako Bogota, ma ngke ti a roko ikekei, ti kunea bwa a bane ni kebo kaitekatekan te bwati n nako Lima, Peru. A kona n okira mweengaia n aki mareaki ke ana mareaki ma tiaki n te tembora. Te kakukurei, iai riki angana teuana. A kona n tokara te bwati nako Lima ngkana a kukurei n tekateka i aontano n te bwati inanon te maan ae nimaua te bong ao nimaua te ngaina. A rineia bwa ana tekateka i aontano n te bwati. E taekina bwa e bon rangi ni kanganga, e ngae ngke tabeman raoia ni mwananga a kariaia bwa ana tekateka n aia kai n tekateka tabeua te tai ngkai e kaeti rangaia.
Te bwai ae e anaa nanou n ana marooro bon ana taeka te titita aio are e taku bwa e rangi ni karabwarabwa ngkai ngaia ao kainabana a kona n nako n te tembora n aroia aei, ibukina bwa e bita aron aia namakin ibukin te euangkerio ao e bita naba aia namakin ibukin te mare n te tembora. E a tia te Uea ni kakabwaiaia ma te rikirake ae e roko man te anganano. E noria naba neiei bwa te mwananga ae nimabong bongina n nakon te tembora e kakoroa nanon te bwai ae mwaiti ni karikirakean maiuia n tamnei nakon taian mwananga nakon te tembora ake akea iai te nano n anganano.
Inanon ririki ngke I a tia n ongo te koaua aei, I bon iango bwa ana teraa te kaokoro nakon maiuia tanga n ataei aikai ngke aron bwa a karaoa te rinerine ae e kaokoro—n aki karaoa te anganano ae e riai bwa ana mareaki n te tembora.
Taari, ti karaoi rinerine aika a mwaiti n te maiu aei, aika a bubura ao tabeua aika a uarereke. N iangoi rinerine ake ti a tia ni karaoi ti kona n nora te kaokoro ae korakora mai imwiin tabeua ara rinerine inanon maiura. Ti karaoi rinerine ao babaire aika a raraoi ngkana ti tarai anga tabeua ao ni iangoia bwa a na kairiira nakea. Ngkana ti karaoi, ti na kona ni ira ana reirei Beretitenti Russell M. Nelson ni moana karaoan te bwai n ataia bwa teraa mwina.2 Iroura, te toki boni iaon kawain te berita rinanon te tembora n te maiu are akea tokina, te kabanea ni kakawaki mai ibuakon ana bwaintangira te Atua.
I kakoaua Iesu Kristo ao Ana Mwakuri ni Kamaiu ae iai mwiina nakoira ao koauan Ana euangkerio ae akea tokina, n aran Iesu Kristo, amen.