Sarang Kita Maghimo sing Mas Maayo kag Mangin Mas Maayo

Pinalangga kong mga kauturan, makainspirar ang magtulok sa sining dako kaayo nga kongregasyon sang batalyon sang Ginuo nga nagakapot sang priesthood. Daw ano ka mabaskog nga pwersa para sa sa kaayohan kamo! Palangga namon kamo. Nagapangamuyo kami para sa inyo. Kag labing mapinasalamaton kami sa inyo.

Sang sini lang, naganyat ako sa panulin sang Ginuo nga ginhatag paagi kay Propetang Joseph Smith: “Wala ka sing iban nga itudlo luwas sa paghinulsol sa sining henerasyon.”¹ Ini nga pahayag masami nga ginasulit sa bug-os nga balaan nga kasulatan.² Nagasudyot ini sang maathag nga pamangkot: “Ang tanan-tanan bala kinahanglan maghinulsol?” Ang sabat, huo.

Tuman kadamo sing mga tawo ang nagakabig sang paghinulsol bilang silot—isa ka butang nga dapat likawan luwas sa pinakaseryoso nga mga sirkumstansya. Apang ini nga balatyagon nga ginasilotan gintuga ni Satanas. Ginatinguhaan niya nga punggan kita sa pagtulok kay Jesucristo,³ nga nagatindog nga bukas ang mga butkon,⁴ nagalaum kag handa magpang-ayo, magpatawad, magtinlo, magpabakod, magpaputli, kag magpakabalaan sa aton.

Ang tinaga nga paghinulsol sa Griego nga Bag-ong Katipan amo ang metanoeo. Ang prefix nga meta nagakahulugan nga “pagbag-o.” Ang suffix nga -noeo may kaangtanan sa Griego nga mga tinaga nga nagakahulugan nga “hunahuna,” “ihibalo,” “espiritu,” kag “ginhawa.”⁵

Gani, kon si Jesus magpangabay sa imo kag sa akon nga “maghinulsol,”⁶ ginaagda Niya kita nga bag-uhon ang aton panghunahuna, aton ihibalo, aton espiritu—bisan pa ang aton pangginhawa. Ginapangabay Niya kita nga bag-uhon ang aton pamaagi sa paghigugma, pagpamensar, pag-alagad, paghinguyang sang aton panahon, pagtratar sa aton mga asawa, pagtudlo sa aton mga kabataan, kag bisan pa sa pag-atipan sa aton mga lawas.

Wala na sing labi pa nga makahilway, makapadungog, ukon labi pa kaimportante sa aton indibidwal nga pag-uswag sangsa tayuyon, adlaw-adlaw nga pagtutok sa paghinulsol. Ang paghinulsol indi isa ka butang nga umalagi lamang, isa ini ka proseso. Ini amo ang yabi sa kalipay kag kalinong sa hunahuna. Kon updan sing pagtuo, ang paghinulsol magapatigayon sang gahum sang Pagbayad-sala ni Jesucristo.⁷

Kon kamo man maukod nga nagapadayon sa banas sang kasugtanan, nagbiya sa banas sang kasugtanan, ukon indi makakita sang banas sa inyo subong ginatindogan, nagapangabay ako sa inyo nga maghinulsol. Batyaga ang nagapabakod nga gahum sang adlaw-adlaw nga paghinulsol—sa paghimo kag pagmangin mas maayo sa kada adlaw.

Kon ginapili naton nga maghinulsol, ginapili naton nga magbag-o. Ginatugotan naton ang Manluluwas nga bag-uhon kita sa pinakamaayo nga bersyon sang aton mga kaugalingon. Ginapili naton nga magtubo sing espirituhanon kag magbaton sang kalipay—ang kalipay sang pagtubos Niya sa aton.⁸ Kon ginapili naton nga maghinulsol, ginapili naton nga mangin subong kay Jesucristo!⁹

Mga Kauturan, kinahanglan naton nga maghimo sing mas maayo kag mangin mas maayo tungod yara kita sa isa ka inaway. Matuod-tuod ang pagpakig-away batok sa sala. Ang kaaway nagapanikasog sing apat ka pilo agud saparon ang mga panaksihon kag punggan ang hilikuton sang Ginuo. Ginapanamingan niya ang iya mga alagad sing mabaskog nga mga armas agud indi kita makaambit sa kalipay kag paghigugma sang Ginuo.¹⁰

Ang paghinulsol amo ang yabi sa paglikaw sa kapiot nga ginatuga sang mga paon sang kaaway. Ang Ginuo wala nagapaabot nga mangin perpekto kita sa sini nga tion sa aton wala katapusan nga pag-uswag. Apang nagapaabot Sia sa aton nga padayon nga mangin putli. Ang adlaw-adlaw nga paghinulsol amo ang dalan sa pagkaputli, kag ang kaputli nagadala sing gahum. Ang personal nga kaputli sarang maghimo sa aton nga gamhanan nga mga galamiton sa mga kamot sang Dios. Ang aton paghinulsol—aton kaputli—magahatag sa aton sang gahum sa pagtipon sang Israel.

Ang Ginuo nagtudlo kay Propetang Joseph Smith “nga ang mga kinamatarong sang pristhud indi mahamulag sa mga gahum sang langit, kag ang mga gahum sang langit indi sarang gamiton ukon ipatuman kundi suno lamang sa mga prinsipyo sang pagkamatarong.”¹¹

Nakahibalo kita kon ano ang makahatag sa aton sing mas dako nga pag-agom sang mga gahum sang langit. Nakahibalo man kita kon ano ang magaupang sang aton pag-uswag—ano ang aton dapat untaton sa pagbuhat agud magbaskog ang aton pag-agom sang mga gahum sang langit. Mga kauturan, tinguhai sing mainampuon nga maintiendihan kon ano ang nagaupang sa imo paghinulsol. Hibal-a kon ano ang nagapugong sa imo sa paghinulsol. Kag dayon, magbag-o! Maghinulsol! Tanan kita sarang maghimo sing mas maayo kag mangin mas maayo sangsa una.¹²

May yara sang pat-od nga mga pamaagi sa diin posible kita nga mag-uswag. Ang isa amo ang pamaagi sa pagkabig naton sang aton mga lawas. Nahalawhaw ako sa milagro sang lawas sang tawo. Isa ini ka matahum nga tinuga, kinahanglanon sa aton amat-amat nga pag-uswag padulong sa aton diosnon nga ikasarang. Indi kita mag-uswag kon wala ini. Sa paghatag sa aton sang dulot sang isa ka lawas, ang Dios nagtugot sa aton nga maghimo sang isa ka importante nga tikang padulong sa pagmangin mas kaangay sa Iya.

Si Satanas nakahangop sini. Nainit sia sa kamatuoran nga ang iya pagrebelde sa premortal nga kabuhi permanente nga nagdumili sa iya sa sining pribilihiyo, nga nagbilin sa iya sa dalayon nga kahimtangan sang kahisa kag kaakig. Gani madamo, kon indi man kalabanan, sang mga pagsulay nga iya ginabutang sa aton banas nagatulod sa aton sa pag-abusar sang aton mga lawas ukon mga lawas sang iban. Tungod miserable si Satanas nga wala sing lawas, luyag niya kita nga mangin miserable man bangod sang aton lawas.¹³

Ang imo lawas amo ang imo personal nga templo, gintuga agud puy-an sang imo wala katapusan nga espiritu.¹⁴ Importante ang imo pag-atipan sang sina nga templo. Karon, pamangkuton ko kamo mga kauturan, mas interesado bala kamo nga magbiste kag magpamustura agud mangin manami sa kalibutan sangsa pahamut-an ang Dios? Ang inyo sabat sa sining pamangkot nagadala sang direkta nga mensahe sa Iya parte sa imo mga balatyagon nahanungod sa Iya diosnon nga dulot sa inyo. Sa sining pagtahod sa aton mga lawas, mga kauturan, sa banta ko kaya naton maghimo sing mas maayo kag mangin mas maayo.

Isa pa ka paagi nga sarang man kita maghimo sing mas maayo kag mangin mas maayo amo ang kon paano naton ginatahod ang mga babayi sa aton mga kabuhi, sumugod sa aton mga asawa kag mga bata nga babayi, aton mga iloy kag mga utod nga babayi.¹⁵

Mga nagligad nga binulan, nakabaton ako sing masubo nga sulat halin sa isa ka pinalangga nga sister. Sia nagsulat: “[Ako kag ang akon mga anak nga babayi] daw nagapakigkompetensya sa 24/7 nga mga update sa isports, mga video games, mga update sa stock market, [kag] sa wala katapusan nga pag-analisar kag pagtan-aw sang mga hinampang sang tagsa ka [mahunahuna] nga isport para sa bug-os nga atensyon sang amon mga bana kag mga anak nga lalaki. Sa pamatyag namon daw indi na kami importante sa amon mga bana kag mga anak nga lalaki tungod ang ila prayoridad amo ang mga [isports kag mga hinampang].”¹⁶

Mga kauturan, ang inyo nahauna kag pinakaimportante nga katungdanan bilang isa ka manugkapot sang priesthood amo ang magpalangga kag mag-atipan sang inyo asawa. Mangin isa sa iya. Mangin kaupod niya. Himoa nga mahapos para sa iya nga magustuhan niya nga imo sia. Wala sing iban pa nga interes sa kabuhi ang magpangibabaw sa pagpasad sang wala katapusan nga kaangtanan sa iya. Wala sang yara sa TV, cell phone, ukon computer ang mas importante sangsa iya kaayuhan. Mag-imbentaryo sang kon paano ninyo ginahinguyang ang inyo panahon kag kon sa diin ninyo ginatuon ang inyo enerhiya. Ina ang magasugid sa inyo kon sa diin ang inyo tagipusuon. Magpangamuyo nga ang inyo tagipusuon magsanto sa tagipusuon sang inyo asawa. Tinguhai nga mapalipay sia. Pangayoa ang iya laygay kag pamatii. Ang iya mga opinyon magapauswag sang inyo mga hinimuan.

Kon ginakinahanglan ninyo nga maghinulsol tungod sa pamaagi sang inyo pagtrato sa mga babayi nga pinakamalapit sa inyo, suguri na subong. Kag dumduma nga inyo responsibilidad ang pagbulig sa mga babayi sa inyo kabuhi nga makabaton sang mga bugay nga nagaabot tungod sa pagtuman sang layi sang kaputli sang Ginuo. Indi pagtuguti nga kamo ang mangin rason nga ang isa ka babayi indi makabaton sang mga bugay sang templo.

Mga kauturan, kinahanglan naton tanan nga maghinulsol. Kinahanglan naton untatan ang paghimo sang mga temporal nga bagay, kag himuon ang mga epirituhanon. Tion na sa pagsuksok sang bug-os nga hinganib sang Dios agud mahimo naton ang pinakaimportante nga buluhaton sa kalibutan. Tion na nga “iduso ang [aton] mga garab, kag mag-ani sa [aton] bug-os nga ikasarang, hunahuna, kag kusog.”¹⁷ Ang mga pwersa sang malain nangin mas masingkal sa karon nga panahon. Bilang mga alagad sang Ginuo, indi puwede nga katulog kita samtang nagalala ining inaway.

Ang inyo panimalay nagakinahanglan sang inyo pagpanguna kag pagpalangga. Ang inyo korum kag sila nga yara sa inyo ward ukon branch nagakinahanglan sang inyo kusog. Kag ang tanan nga inyo makilala nagakinahanglan nga makahibalo kon ano ang dagway kag panggiho sang matuod-tuod nga disipulo sang Ginuo.

Pinalangga kong mga utod, ginpili kamo sang aton Amay nga magkari sa duta sa sining importante nga panahon tungod sang inyo espirituhanon nga kaisog sa premortal nga kabuhi. Kalakip kamo sa ila nga mga pinakamanami, pinakamaisog nga mga lalaki nga nagkari sa duta. Si Satanas nakakilala sa inyo kag kon sin-o kamo sa premortal nga kabuhi kag nakahangop sia sang buluhaton nga kinahanglan himuon antes magbalik ang Manluluwas. Kag pagligad sang pila ka milenya nga paghikot sang iya malimbungon nga mga pamaagi, ang kaaway sagad na kag indi na magbag-o pa.

Mapasalamat kita nga ang priesthood nga aton ginakaptan mas labi nga mabaskog sangsa mga panglimbong sang kaaway. Ginapangabay ko kamo nga mangin mga lalaki kag bataon nga mga lalaki nga among ginakinahanglan sang Ginuo nga kamo mangin. Himoa nga importante kaayo sa inyo kabuhi ang inyo pagtutok sa adlaw-adlaw nga paghinulsol sa bagay nga magamit ninyo ang priesthood nga may mas dako nga gahum kaysa sang una. Amo lamang ini ang paagi nga matipigan ninyo ang inyo kaugalingon kag ang inyo panimalay nga luwas sing espirituhanon sa makahalangkat nga palaabuton.

Ang Ginuo nagakinahanglan sang di-makinaugalingon nga mga lalaki nga ginauna ang kaayuhan sang iban sangsa ila. Nagakinahanglan Sia sang mga lalaki nga hungod nga nagapangabudlay agud mabatian ang tingug sang Espiritu nga may kaathag. Nagakinahanglan Sia sang mga lalaki nga yara sa kasugtanan nga nagatipig sang ila mga kasugtanan nga may integridad. Nagakinahanglan Sia sang mga lalaki nga determinado sa pagtipig sang ila mga kaugalingon nga matinlo sa sekswal nga aspeto—mga takos nga lalaki nga matawag sa gilayon sa paghatag sang mga bendisyon nga may puraw nga mga tagipusuon, matinlo nga mga panghunahuna, kag handa nga mga kamot. Ang Ginuo nagakinahanglan sang mga lalaki nga nagakalangkag sa paghinulsol—mga lalaki nga may kapagsik sa pag-alagad kag mangin kabahin sang batalyon sang Ginuo sang takos nga mga nagakapot sang priesthood.

Ginabendisyunan ko kamo nga mangin kaangay sinang mga lalaki. Ginabendisyunan ko kamo sang kaisog sa paghinulsol adlaw-adlaw kag sa pagtuon sa paggamit sang lubos nga gahum sang priesthood. Ginabendisyunan ko kamo sa pagpaalinton sang gugma sang Manluluwas sa inyo asawa kag mga kabataan kag sa tanan nga nakakilala sa inyo. Ginabendisyunan ko kamo nga maghimo sing mas maayo kag mangin mas maayo. Ginabendisyunan ko kamo nga sa inyo paghimo sining mga paghimud-os, maeksperiensyahan ninyo ang mga milagro sa inyo kabuhi.

Nagapakigbahin kita sa buluhaton sang Dios nga Makagagahum. Si Jesus ang Cristo. Ila kita mga alagad. Nagasaksi ako sa ngalan ni Jesucristo, amen.