Ang Korum: Lugar sang Pagkalakip
Ang Ginuo maluyag nga magpahamtang kamo sang mabakod nga korum. Sa pagtipon Niya sang Iya mga anak, kinahanglan nila sang lugar nga malakip sila kag makatubo.
Sang 2010, si Andre Sebako isa ka young man nga nagapangita sang kamatuoran. Bisan wala pa gid sia nakapangamuyo sing hugot sang una, nagdesisyon sia nga magtilaw. Wala madugayi, nasugata niya ang mga misyonero. Ginhatagan sia nila sang kard nga may larawan sang Libro ni Mormon. May nabatyagan si Andre kag nagpamangkot kon ibaligya sa iya sang mga misyonero ang libro. Siling nila, libre lang ang libro kon magsimba sia.1
Si Andre nagtambong nga isahanon sa sadto bag-o lang natukod nga Mochudi Branch sa Botswana, Africa. Pero ang branch isa ka mapinalanggaon kag suod nga grupo nga may mga 40 ka miyembro.2 Gin-abiabi nila si Andre sing mainit. Ginbaton niya ang mga leksyon sang mga misyonero kag ginbunyagan. Manami gid ini!
Pero ano dayon? Paano si Andre magpadayon nga aktibo? Sin-o ang mabulig sa iya nga mag-uswag sa dalan sang kasugtanan? Isa ka sabat sa sinang pamangkot amo ang iya korum sa priesthood!3
Ang tagsa ka priesthood holder, bisan ano ang iya kahimtangan, makapulos sa isa ka mabakod nga korum. Mga bataon ko nga kauturan nga nagakapot sang Aaronic Priesthood, ang Ginuo luyag nga magpasad kamo sang mabakod nga korum, lugar sang pagkalakip para tagsa ka young man, lugar nga yara ang Espiritu sang Ginuo, lugar nga ang tanan nga miyembro sang korum ginaabiabi kag ginapakamahal. Sa pagtipon sang Ginuo sang Iya mga anak, kinahanglan nila sang lugar nga malakip sila kag makatubo.
Ang tagsa sa inyo nga mga miyembro sang pangulohan sang korum magpamuno sa hilikuton samtang nagapangayo kamo sang inspirasyon4 kag magpatubo sang pagpalangga kag paghiliutod sa tunga sang tanan nga mga miyembro sang korum. Hatagi ninyo sang pinasahi nga pagtamod ang bag-o nga mga miyembro, ang mga indi aktibo, ukon ang may pinasahi nga mga panginahanglan.5 Paagi sa gahum sang priesthood, nagapasad kamo sang mabakod nga korum.6 Kag ang mabakod, nagahiugyon nga korum makahimo sang bug-os nga kinalain sa kabuhi sang isa ka young man.
Sang ang Simbahan nag-anunsyo sang bag-o nga tutok sa pagtuon sang ebanghelyo sa panimalay,7 ang pila nagpanumdum sa mga miyembro pareho kay Andre kag nagpamangkot, “Paano na lang ang mga bataon nga halin sa pamilya nga ang ebanghelyo wala ginatun-an kag wala sing gindak-an nga kaalam kag pagpangabuhi sang ebanghelyo? Mabilin bala sila?”
Indi! Wala sing pwede mabilin! Palangga sang Ginuo ang tagsa ka young man kag young woman. Kita, bilang mga priesthood holder ang mga kamot sang Ginuo. Kita ang suporta sang Simbahan sa nakasentro-sa-panimalay nga mga paghimakas. Kon ang suporta sa panimalay limitado, ang mga korum sang priesthood kag iban pa nga mga lider kag mga abyan nagabantay kag nagasuporta sa tagsa ka indibidwal kag pamilya kon ginakinahanglan.
Nakita ko nga nangin epektibo ini. Naeksperiyensahan ko ini. Sang anum ako katuig, ang akon ginikanan nagdiborsyo kag ginbayaan sang akon amay ang akon iloy kag lima ka magagmay nga kabataan. Ang akon iloy nagsugod sa pag-obra agud buhion kami. Nagkinahanglan sia sang isa pa ka obra sa sulod sang pila ka tion, kag sang dugang nga edukasyon. Diutay lang gid ang iya tion para mag-atipan. Pero ang mga lolo kag lola, mga tiyo kag tiya, mga bishop, kag mga home teacher naggiho sa pagbulig sa maayo ko nga iloy.
Kag may korum ako. Mapasalamaton gid ako sa akon mga abyan—akon mga utod—nga nagpalangga kag nagsuporta sa akon. Ang akon korum lugar sang pagkalakip. Ang pila seguro nagkabig sa akon nga wala tsansa kag kubos tungod sang sitwasyon sang akon pamilya. Ayhan amo ako sadto. Pero ang akon mga korum sa priesthood nagbag-o sang mga tsansa nga matabo ato. Ang akon korum nagbulig sa akon kag nagbugay sang akon kabuhi sing daku gid.
May mga wala tsansa kag mga kubos sa palibot naton. Ayhan bisan paano, kita tanan amo sina. Pero ang tagsa sa aton diri may korum, isa ka lugar nga makabaton kag makahatag kita sang kabakod. Ang korum “tanan para sa isa kag isa para sa tanan.”8 Lugar ini sa diin ginatudloan naton ang isa kag isa, ginaalagaran ang iban, kag ginapabakod ang paghiusa kag paghiliutod samtang nagaalagad kita sa Dios.9 Lugar ini sa diin ang mga milagro nagakatabo.
Luyag ko kamo sugiran sang pila ka mga milagro nga natabo sa korum ni Andre sa Mochudi. Samtang ginapaambit ko ining ehemplo, tandai ang mga prinsipyo nga nagapabakod sa tagsa ka korum sang priesthood nga nagadapat sini.
Pagkatapos nga nabunyagan si Andre, nag-upod sia sa mga misyonero sa ila pagtudlo sa apat ka iban pa nga young men, nga ginbunyagan man. Karon, lima na ka young men. Nagsugod sila sa pagpabakod sa isa kag isa kag sa branch.
Ang ika-anum nga young man, si Thuso, ginbunyagan. Si Thuso nagpaambit sang ebanghelyo sa tatlo niya ka mga abyan, kag wala madugay, siyam na sila.
Ang mga disipulo ni Jesucristo sa masami ginatipon sa sini nga paagi—tagdiutay-diutay, sa pangagda sang ila mga abyan. Sadto, sang nakita ni Andres ang Manluluwas, dali-dali sia nga nagkadto sa iya utod nga si Simon kag “gindala sia kay Jesus.”10 Sa amo man, wala madugay pagkatapos si Felipe nangin sumulunod ni Cristo, gin-agda niya ang iya abyan nga si Natanael nga mag “sunod sa akon.”11
Sa Mochudi, ang ika-napulo nga young man sa wala madugay, nagbuylog sa Simbahan. Nasalapoan sang mga misyonero ang ika-onse. Kag ang ika-dose nga young man ginbunyagan pagkatapos nga nakita niya ang epekto sang ebanghelyo sa iya mga abyan.
Ang mga miyembro sang Mochudi Branch nalipay kaayo. Ining young men “nahaylo sa Ginuo, kag … natingob sa simbahan.”12
Ang Libro ni Mormon may importante nga papel sa ila pagbag-o.13 Madumduman ni Thuso, “Nagsugod ako basa sang Libro ni Mormon … sa tagsa ka tion nga libre ako, sa balay, sa eskwelahan, bisan diin.”14
Si Oratile naganyat sa ebanghelyo bangud sang ehemplo sang iya mga abyan. Paathag niya, “Daw nagbag-o sila sa isa lang ka pisok. … Sa panumduman ko … may labot ini sa gamay … nga libro nga ginadaladala nila … sa eskwelahan. Makita ko kon nangin ano sila kaayo nga mga tawo. … Luyag [ko] man magbag-o.”15
Tanan sang 12 ka young men natingob kag nabunyagan sa ulot nga indi magsobra duha ka tuig sang kada isa. Ang kada isa isahanon lang nga miyembro sang Simbahan sa iya pamilya. Pero ginsuportahan sila sang pamilya sa Simbahan, kalakip ni President Rekwela,16 nga ila branch president; ni Elder kag Sister Taylor,17 nga senior missionary couple; kag iban pa nga mga miyembro sang branch.
Si Brother Junior,18 isa ka lider sa korum, naghagad sang young men sa iya balay kada Dominggo sang hapon kag gintudloan sila. Ang young men ululupod nga nagtuon sang balaan nga mga kasulatan kag naghiwat sang mga home evening sing masami.
Gindala sila ni Brother Junior sa pagbisita sa mga miyembro, mga tawo nga ginatudloan sang mga misyonero, kag iban pa nga kinahanglan bisitahan. Ang tanan sang 12 ka young men nagapila sa likod sang trak ni Brother Junior. Ginabilin niya sila sa mga puluy-an sing tinagduha ukon tinagtatlo kag ginasugat sila pagkatapos.
Bisan pa nga ang young men nagasugod pa lang tuon sang ebanghelyo kag sa ila pamatyag indi pa madamo ang ila nahibal-an, si Brother Junior nagpaisog sa ila nga magpaambit sang isa ukon duha lang ka butang nga ila nahibal-an sa mga tawo nga ila ginabisitahan. Ining bataon nga mga priesthood holder nagtudlo, nagpangamuyo, kag nagbulig sa pagbantay sa Simbahan.19 Gintuman nila ang ila priesthood nga mga responsibilidad kag naekperiyensiahan ang kalipay sang pag-alagad.
Si Andre nagsiling, “Ululupod kami nga naghampang, nagkadlaw, naghibi kag nangin isa ka paghiliutod.”20 Sa pagkamatuod, ginatawag nila ang ila mga kaugalingon nga “Hubon sang mga Mag-utod.”
Ululupod sila nga naghimo sang tuyo nga tanan sila mamisyon. Bangud nagaisahano sila nga miyembro sa ila mga pamilya, madamo sila sang mga upang, pero nagbuligay sila nga makalampuwas.
Isa-isa, ang young men nakabaton sang ila mga tawag sa misyon. Ang mga nakauna, nagsulat sa mga nagahanda pa lang, nga nagapaambit sang ila mga eksperiyensia kag nagapaisog sa ila nga mag-alagad. Onse sang young men ang nag-alagad sa misyon.
Ining young men nagpaambit sang ebanghelyo sa ila mga pamilya. Ang mga iloy, mga utod, mga abyan, kag amo man mga tawo nga ila gintudloan sa misyon, nahaylo kag ginbunyagan. Ang mga milagro natabo kag indi maisip nga mga kabuhi ang nabugayan.
Mabatian ko ang pila sa inyo nga nagapanumdum nga ayhan ang amo sina nga milagro matabo lang sa isa ka lugar nga pareho sang Africa, isa ka mabungahon nga patag sa diin ang pagtipon sang Israel ginapadasig. Apang, nagasaksi ako nga ang mga prinsipyo nga gindapat sa Mochudi Branch matuod sa bisan diin. Bisan diin kamo, ang inyo korum makatubo paagi sa pagpabalik sang mga miyembro kag pagpaambit sang ebanghelyo. Kon bisan isa lang ka disipulo ang magdab-ot sa isa ka abyan, ang isa sarang mangin duha. Ang duha sarang mangin apat. Ang apat sarang mangin walo. Kag ang walo sarang mangin dose. Ang mga Branch sarang mangin mga Ward
Ang Manluluwas nagpanudlo, “Kon sa diin ang duha ukon tatlo [ukon masobra pa] nagatipon sa akon ngalan, … tan-awa, yara ako sa tunga nila.”21 Ang Amay nga Langitnon nagahanda sang mga hunahuna kag mga tagipusuon sang mga tawo sa palibot naton. Mahimo kita magsunod sa mga pagpabatyag, magtanyag sang kamot sang pag-updanay, magpaambit sang kamatuoran, mag-agda sa iban sa pagbasa sang Libro ni Mormon, kag magpalangga kag magsuporta sa ila sa ila pagkari agud makilala ang aton Manluluwas.
Malapit na 10 ka tuig halin sang ang Mochudi nga Hubon sang mga Mag-utod nagsugod sang ila biyahe sing ululupod, kag sa gihapon, hubon sila sang mga mag-utod.
Si Katlego nagsiling, “Ayhan ginahamulag kami sang distansya, pero ara kami sa gihapon para sa isa kag isa.”22
Pangamuyo ko nga batunon naton ang pangagda sang Ginuo nga mag-isa sa Iya sa aton mga korum sa priesthood agud nga ang tagsa ka korum mangin lugar sang pagkalakip, lugar sang pagtipon, lugar nga nagatubo.
Si Jesucristo ang aton Manluluwas kag Iya ini buluhaton. Nagasaksi ako sini sa ngalan ni JesuCristo, amen.