Ng Sebeched el Lemuut el Kmal mo Ungil

Rodam er ngak, ng dmeu a rengud lomes er tial klou seked er a roba priesthood er a Dios Ko meral klisichel a klungiaol a domes er kemiu! Ng betik a rengmam er kemiu. Aki meluluuch el kiriu. E kmal loba omereng el saul el kiriu.

Ak dirke mlo melbedebek a tekingel a Rubak el mo er a Profet Joseph Smith el kmo: “Ng diak a ngera el molekoi el mo er a tial telcheroll er chelechang ng di ouchel reng e merekong.”¹ Tiang el omelekoi a blechoel lomelekl er ngii er a chelsel a chedaol llechukl.² Ng uchul a odbechel a ker el dodengelii: “A rokui el chad ngkirir el mo ouchel a rengrir?” A nger a choi.

Betok el chad omdaosu el kmo a ouchel reng a omekringel er kid— e teletael el kired el mengeroid er kid er ngii le ng di mo er a ikel oberaod el klengit. Eng di a domes er ngii el uaia lomekringel er kid el tekoi e ngara Dibalong el mei. Ngii a melasm el melenget er kid meng diak domes el bedul a Jesus Kristo, ³ el ngii a dechor berrokel a chimal,⁴ loureng e semeriar el mo omekungil, ousubes, omekbeches, melisiich, mengikiid, e omekngeltengat er kid.

A tekoi el ouchel reng er a Beches el Renged er a Greek a belkul a kmo metanoeo. Sel uchelel kmo meta- a belkul a kmo “mengodech.” E sel rsel kmo -noeo a kmeed el mo uaia belkul a tekoi er a Greek el “uldasou,” “klemedengei,” “reng,” me a “outeliil.”⁵

A leuaisei, e a Jesus sel lolengit er kau me a ngak el mo “ouchel a rengud,”⁶ e Ngii a siotai er kid el mo melodech a uldesued, klemedengei er kid, me a rengud—luldimukl sel douteliil. Ngii olengit er kid el mo melodech a teleteled a doubeltikereng, domdasou, dosiou, usbechelled er a temed, blekerdeled el mo er a bechid, dolisechakl er a rengeleked, me a dirrek el urrekeuid el mo er a bedenged.

Ng diak a ngera losebelid, a lechub el chetengakl, malechub el klou a ultutelel el kirel a klechad er kid el uaia klou el ultutelel a moktek, er a bek el sils el mo ouchel a rengud. A ocuhel reng a diak el tekoi el di duubech er a tal taem, ng melemolem. Ng kiis el kirel a deureng me a budech er a uldesued. Sel dodekiar er a klaumerang, e a ouchelreng a mekengii a chesimer el kirel a Tngakireng er a Jesus Kristo.⁷

Mal ta eng blak a rengum el ngara rolel a telbiil, e mla touchakl er a rael er a telbiil, malechub eng kmal diak mesa tial rael er a telbiil er sel omngarngii er chelechang, e a kulengit er kemiu me bo mouchel a rengmiu. Bo betik er sel klisichel a ouchel reng—e mtelkib el mera el mo ungil er a bek el sils.

Sel dolilt el mo ouchel a rengud, e kede melilt el mengodech! Kede kongei er a Osobel el mo ngodechid el mo er sel kmal ungil kid. Kede melilt el mo mukeroul er a chedaol tekoi e mo nguu a deureng— sel deureng el mo suobel lokiu Ngii.⁸ Sel dolilt el mo ouchel a rengud, e kid a melilt el mo uaia Jesus Kristo!⁹

Rodam, ng kired el mo meruul a ungil e mo ungil le kid a ngara chelsel a mekemad. A mekemad el kirel a klengit a kmal merang. A cherarou a mla mengisois a klisichel el melemall a klaumera er kid e merrob er a urerel a Rubak. Ng kmal chemat er a rekesai el chedal lolab a klekedall el tomer kid meng diak bo denguu a rdechel a deureng me a beltikereng er a Rubak.¹⁰

A ouchel reng a ngii a dongu el sobecheklid er a olibesongel me a bedeklel a cherarou. A Rubak a diak longerchir er a recherrungel er chelechal taem el de ngara tial lomerael el bedul a diak a ulebengelel klengar. E ng di Ngii a mengerchir kid el merael mo klikiid. A ouchel reng er a bek el sils a ngii a rael el bedul a klikiid, e a klikiid a meskid a klisiich. A klikiid a sebechel rullid el mo mesisiich el dongu er a chimal a Dios. A ouchel reng—me a klikiid el klengar kid—a mo smisichid el mo olngeseu el mengidb er a Israel.

A Rubak a ulsisecheklii a Profet Joseph Smith el kmo “a llemalt er a priesthood a kabekbek ngii me a klisiich er a babeluades, e a klisiich er a babeluades a diak di lultuil malechub e di lurrekodel a osisechakl er a llemalt el merekong.”¹¹

Kede medengei el kmo ngera sel mo meskid a ngarbab el techall el ngmai a klisiich er a babeluades. Kede dirrek el medengei el kmo ngera sel mo torbengii tial ulkeruled—e ngera ikel kirel mo diak doruul meng mo sebechel klou a techelled el ngmai a klisiich er a babeluades. Rodam, bom ngara nglunguuch el mo medengei el kmo ngera ikel melichekl er kau er a ouchel reng. Bom ues aikel merrob er kau meng diak bo mouchel a rengum. E sola, bo molodech er kau! Mouchel a rengum! Kid el rokui el di sebeched el mo meruul a ungil e mo ungil.¹²

Ngarngii a tokubets el teletael el kid a sebeched el mo ungil. A chimo er ngii a teleteled el mo er a bedenged. Ng kmal mechas a renguk er a mengasireng el bedengel a chad. Ng klebokel el bleob, el klou a ultutelel kirel omerolled el mo er bab el mo er sel ngii a chedaol ultekelled. Ng diak el sebeched el melemolem a lak tial bedenged. Tial sengk er a bedenged el dobang, e a Dios a mla meskid a telbakes el ngii a klou a ultutelel el sebeched el mo uai Ngii.

A Diablong a medengelii tiang. Ng chetil sel klemera el tekoi el kmo a rebetel er sel klengar ruchei a rirelii el mlo diak el sebechel nguu tial techall, meng melemolem loba bechechelingaol reng me a ngasechereng. Meng uaisei, el betok, er a ikel ongetiakik el ngii a locha er medad a rullid el mo omekringel e melemall a bedenged malechub eng bedengir a rebebil. Ng kesib a rengul a Diablong le ngii el diak a bedengel er a tech, a uchul eng soal kid a bo doba ngasechereng el bedenged a uchul.¹³

A bedengem a templo er kau, lulbeob el blil a diak a ulebengelel delbengem.¹⁴ A ulekerreuim er tial templo a klou a ultutelel. Chelechang, ea kuker kemiu, a rodam kemiu kom semeriar lomail e olecholt a bedengiu el kirel a beluulechad a lechub eng kirel a Dios? A nger kemiu el mo er tial ker a ochotii a klemechiu el mo er Ngii er a ikel momelchesiu el kirel tial chetengakl sengk er Ngii el mo er kemiu. Me ngultuil er a omengull er kid el mo er a bedenged, e rodam, a kumdasou eng sebeched el lemuut el kmal mo ungil mekerreuii.

A lmuut el ta er a teletael el sebeched el kmal mo ungil a okiu omengull er kid el mo er a redil, lomuchel er a rebechid me a rengeleked el redil me a rochedad.¹⁵

Sesei el buil er a memong, e ak ngiluu a mekngit a rengud er ngii el babier el mla er a ta er a odos. Ng milluches el kmo: “[A rengelekek el redil me a ngak] a uaia ki mkausichai er a teletelir a rebechemam me a rengelekam el sechal, leng lluich me a eua el sikang er a bek el sils el di lomes a klekool, me a video game, me a chisel a makit er a beluulechad, [e] diak lolengull el di mesaod e omes a bek el [bedengel] a klekool. Ng uaia ki msal cheridang er a rebechemam me a rengelekam el sechal le te kmal mechesang el di chelebangel osengel a [klekool].”¹⁶

Rodam, sel kot el ngaruchei e klou a belkul ngercheled kid loba priesthood a mo oubeltikereng e omekerreu er a rebechid. Bom tang lobengkel. Bom kldemel. Mrelii el mo beot er ngii a semeriar lobengkem. Ng diak a ngii di el ngera er a klengar el mo ngaruchei er sel meleketek er a diak a ulebengelel deleuill lobengkel. Ng diak mngai osengel a tibi, dengua, malechub el computer el mo ngarucheie er ngii. Bo mungil lomdasou el kmo ngua ngera omousbech a temem me a klisichem ng mo er ker? Seikid a mo chotii el kmo a rengum ngar ker? Bom ngara nglunguuch me a rengum bo el tang ngii me a rengul. Mosiik a deureng el mo er ngii. Mosuub osischeklel, e morrenges. Aikel msuub er ngii a ngosukau er a ikel bo moruul.

Alsekum eng kirem el mo ouchel a rengum eleng blekerdelem el mo er a tirkel redil el kmeed er kau a uchul, e momuchel er chelechang. E bo modengei el kmo tiang a ngerchelem el mo olngeseu er a rebek el redil er a klengar kau el mo ngmai a klengeltengat lokiu otireklel a llechul a Rubak er a teletael er a deleboes. Lak bol kau a uchul e a redil a diak el bo el ngai a klengeltengat er a templo.

Rodam, kede rokui el kired el mo ouchel a rengud. Ng kirel mo diak di dedengchokl, e mo mechere remote, e bo douedikel e lak di dechelelakl. Ng mla mo taem el de bleiull er a kaba er a Dios me bol sebeched el mengedmokl er a kot el klou a belkul ureor er a beluulechad. Ng mla mo taem el “dedorm a kamelenged, e bo doridm loba rokir el [klisiched], uldesued, me a blakereng.”¹⁷ A klisichel a diablong a dirkak a ta me lesal mesisiich el uaia chelechal sils. Me kid el mesiungel a Rubak, a diak el sebeched el di chelellakl e a mekemad le ngarngii.

A telungalek er kau ousbech a ulekrael me a beltikereng er kau. A chelechad me tirkel ngara ward malechub a branch a ousbech a klisichem. Me tirkel rokui el bom kebetech a kirir el mo medengei el kmo ngua ngera meral loltirakl el chedal a Rubak.

Rodam er ngak, kemiu a milngilt er a Demad el mei er a beluulechad er chelechal chetituokel taem le kemiu el mle mesisiich er sel klengar ruchei. Kemiu a bebil er tirkel ngellitel, e kot el mesisiich el sechal el mla mei er a beluulechad. A Diablong medengel kemiu e medengei el kmo ng mle uangera teleteliu er sel klengar ruchei, e medengelii a ureor el kirel mekedmokl ruchei er a lemei Osobel. E a chelsel a telael rak longetikaik e longeblad, e ngii el cherarou a kmal mla mo meduch e diak el meterob.

Doureng a saul, le priesthood el dobang a lmuut el mesisiich er a bedeklel a cherarou. A kulengit er kemiu me bom tirkel sechal me a rengeasek el sechal el Rubak a soal. A moktek er kemiu bol ngara ouchel reng er a bek el sils el ngii a kmal klou a ultutelel er a klengar kemiu el sebechiu lousbech er a priesthood loba lmuut el ngarbab el klsiiich. Tiaikid a di chimo el rael el kau me a telungalek er kau a mo ngara selbechakl er a ikel merael mei el meringel el taem.

A Rubak ousbech er a remededaes a rengrir el sechal el tir a omdasou el kirir a rebebil e diak di lomdasou er tir. Ngii ousbech er a rsechal el ngarngii er a rengrir loureor lorrenges er a bleketakl el ngerel Chedaol Reng. Ngii ousbech er a rsechal er a telbiil el tir oltirakl a telbilir. Ngii ousbech er a rsechal el blak a rengrir el klikiid er a tekoi er a deleboes—el klikiid el sechal el sebechir el di mokedong er a ngii di el taem el mo omekngeltegnat loba klikiid el reng, klikiid luldasou, me a semeriar el chim. A Rubak ousbech er a rsechal el semeriar mo ouchel a rengrir—rsechal sorir el mesiou e mo chedal tial klsoldau er a Rubak el tir a klikiid loba priesthood er ngii.

A kumekngeltengat er kemiu me bom tirkakid el chad. A kumekngeltengat er kemiu me bol mesisiich a rengmiu el mo ouchel a rengmiu er a bek el sils e mosuub el mo ousbech er a mui el klisichel a priesthood. A kumekngeltengat er kemiu me bo molchotel a beltikereng er a Osobel el mo er a bechim me a rengelekem me tirkel rokui el kau a medengelterir. A kumekngeltengat er kemiu el mo ungil e bo mungil. E dirrek lomekngeltengat er kemiu el kmo sel molemolem el blak a rengmiu, e ko metik ongasireng er a klengar kemiu.

Kid a meruul a urerel a Mesisiich el Dios. A Jesus a Kristo. Kid a Mesiungir. A kuuchais el ngara ngklel a Jesus Kristo, amen.