“Mei, me Moltirakl er Ngak.”
A Jesus Kristo a siotai er kid el mo merael er sel rael er a telbiil el lemuut el mo er a Chedam me a Chedil er a Babeluades me bo dobengterir tirkel betik er a rengud.
Betik er a renguk el rodam me a rodos er ngak, ngak me a bechik er a Wendy a dmeu a rengmam el lobengkemiu er tial tuatu er a Sandei. Ng kmal betok a mla duubech er sel mlo merek el klou el ongdibel. Beches el templo a milchedaol er a Concepción, Chile; Barranquilla, Colombia; me a Rome, Italy. Me kid a mlo chemau er a klengeltengat er a Chedaol Reng er sel de ngara ikal cheledaol el tekoi.
A kuldanges er a rebetok el redil (me a resechal) el tir a dirk mlo merek el chiuii a Babier er a Mormon me te miltik a deureng me a mekreos el tekoi. Ng mlo ungil a renguk se er a bo kudengei a ongasireng el diluubech.
Ak chemat er a teruich me a ta rekrir el ngeasek el resechal el tir, er a chelechang a deacon, el klikiid e oldars er a sakrament er a bek el Sandei. Te mo er a templo lobengterir tirkel teruich me a ta rekrir el ngeasek el redil, el tir a semeriar el mesuub e olngeseu el Beehives. Tirkal ngeasek el resechal me a rengeasek el redil a olsisechakl er a klemerang ebangkelio loba bleketakl me a mesisiich el teletael.
A kuutkeu er a rengalek me a rengeasek el tir a olngeseu el olsisechakl er a ebangkelio er a chelsel a keblirir se el oureor tir ma rechad er a blirir el loltirakl er sel omuchel er a blai, me a ngesou er a Ikelesia er sel curriculum.
Aki ngiluu tia el siasing er a eua rekil el Blake, el ngii, sel tutau e ra Sabadong, eng nguu sel hong er a Ikelesia e dmul uasei, “Ngak a kirek el mekelii a chedaol blekerdelek!”
Blake, ng kmal ungil a rengmam el kirem me a rebebil el melilt el mo omekang a chedaol blekerdeliu sel mo urrekodel a klemerang er a mla moluut el ebangkelio er a Jesus Kristo. E dmeu a rengmam sel ki modengei el kmo te betok rechad a melai er sel klisichel a Dios el me er a chelsel a klengar er tir se el loluluuch e olngeseu er a templo.
Ng betok er kemiu e medengei el kmo, a telungalek er kemam a mlo chemau a ringel er a ikal mlo merek el edei el buil el se er a ngelekam er a Wendy a le bo el dibus er tial klengar er a beluulechad. Me sel chelsel a ikel merkong el sils er ngii loldechakl er tial kasinoma, e ak mlo ngeltengat er a techall el mlo sebechek el mengedecheduch er ngii.
A kurekedii a chimal e uluuchais er ngii er a beltkil a renguk el mo er ngii e mereng a saul el ngak a mle demal. Ak dilu: “Kau a mlo bechiil er a templo e mle blak a rengum el mengull aikel telbilem. Kau me a bechim a mlo er ngii a reteuid el rengelkiu e ulmekeroul er tir el mo kedung el meisungel a Jesus Kristo, e mesisiich el chad er a Ikelesia, e ungil chad er a bouai. E tir a mla metik er a becherir el di osisiu a omerolir el uai tir. A demam a kmal, lulis el smiich a rengul er kau. Kau a milskak a klou el deureng!”
Ng milkokil a ngerel e ulenger, “Ke mesulang e Chedam.”
Tiang sel mle medemedemk, e mekngit a rengmam er ngii el taem. Chelsel okolem me a euid el rak er ngii, e a kidilak el oureor, dmak el mengitakel, e mle belchoel el dmak el mo ou ski. Engdi tial kesus, ea ki milsaod a tekoi el ngii a klou a ultutelel, el uai a telbiil, chedaol ruoll, oltirakl, klaumerang, telungalek, keldung, beltik el reng, me a diak a ulebengelel klengar.
Aki meral loureng er ngkal ngelekam el redil. Engdi, eleng sel mla moluut el ebangkelio er a Jesus Kristo, eng diak kim bekikl el kirel. Mesel ki molemolem el mengull a telbilam lobengkel a Dios, e aki mad el tmuil el lemuut el mo obengkel ngkal ngelekam. Ma le uaisei, e kamam a meruul a urelel a Rubak er tiang e ngii a meruul a urerel a Rubak er sei—el beluu er a baradis.1
Me a leuaisei, e ngak me a bechik a mlo oldingel er a Baradis—Baradis, California, tiakid. Me leuaisei, ea uriul er a okeuang el sikang er a ngelekam el riid er tial beluulechad eng mocha temel a omerolam el mo er sel beluu. Aki, ulbengkel a Elder Kevin W. Pearson me a bechil er a , June, e bai mlo mesisiich lokiu er a Resanto er a Chico California Stake. Ak siluub a klou el klaumerang er tir, ngelsuir, me a sel ongasireng el diluubech er sel ringel blelchau er ngii sera le ngar ngii sel kot el mle klou el selbs el ngara reksii er a California.
Me a kim ngarsei, ea ki milngedecheduch er a ngeasek el bulis el, John, el ngii a mle ta er tirkel betok el blak a rengrir el responders. Ngii a milbedebek er sel okrokl el ilekolk el mla er a bebul a Baradis er sera November 8, 2018, el ngau me a bas lorael bedul tial beluu, el melemall er ngii me a kloklir tirkal chad el di mlo diak a medechell ngbai di chebchab me a ikel blil a chat a ngar ngii.
Meng teruich me a eim el sikang, ea John a omekall er a chelsel tial ilekokl el betok a kengaol el bas er ngii el olngeseu er a ta me a ta el chad, me a retelungalek melchiis me bo el selbechakl—el klengar er ngii a ngara omekodall. Meng chelsel tial kengaol el omeruul, e sel milktektii a John a sel ker: “Te ngar ker a telungalek er ngak?” Uriul er a betok e kemanget, e kdekudel el sikang er a dakt, e ngii a mocha medengei el kmo te chiliis e dimlak el mekesakl.
Tial cheldechedechal a John se er a lebekikl el kirel a telungalek er ngii a rirelak me a uchul eng soak el mo mengedecheduch el mo er tirkel klengar er tir a mochu er a ulebongel me to oker, “Te ngar ker a telungalek er ngak?” Mesel mermang sel sils el mrekui sel temem er a beluulechad e msoisb er a beluu er a redeleb, e kau a mo mekngit a rengum e mo chemau tial ker: “Te ngar ker atelungalek er ngak?”
A Jesus Kristo a olsisechakl er a rael doiak er ngii el mo er a diak a ulebengelel blid. Ngii a ungil medengelii sel moktek er a Demad er a Babeluades er a diak a ulebengelel omerael er a bai ngidil ta er kid. Meng rokui, Ngii a chedul a rokui. Ngii a Osobeled, e Ngii omekungil er kid.
Sera Adam me a Eve el tobed er sel Sers er a Eden, ea Jesus el Kristo a mle odars a chimal el mo olngeseu er tirkel mla ngiltii el mo oltirakl er Ngii. Ng omelekl, ea chedaol llechukl miluches el kmo a rokui el bedengel a klengit el mla er a rokui el bedengel a rechad, ea Chimal a dirk blerk el mo olngeseu er kau.2
Sel chedaol teletael el ngar chelsel a dersta er kid a oureng el kirel a beltik el reng er a telungalek me el di el ngar ngii el mo cherechar. A ikel chelitakl er a beltik el reng a mekdebechii sel blulak el reng er a oureng el kmo ngdi ta el beltik el reng a omousbech er ngii alskeum soam el dmak el mo er cherechar. E ngar ngii a rebebil el diak el melemalt a klaumerang er tir el kmo a Okiis er kodall er a Jesus Kristo a yaskok el kmo a rokui el chad a mo obengeterir tirkel betik er a rengrir er a uriul er a kodall.
Sel klemerang, ea bai Osobel a mle ungil meketeklii el kmo alta ea Okiis er a Kodellel a menglou a rengud el kmo rokui el chad el mla kiei a mo mekiis er a kodall e kiei el mo cherechar,3 eng di ngbetok a reuoll alsekum kid a soad el mo nguu sel ngarbab el kengri er a diak a ulebengelel klengar . A mo suobel a tekoi el mo er a ta me a ta el chad, engdi ngarbab el deureng a tekoi el mo er a telungalek.
Morenges a ikal tekoi el Rubak el Jesus Kristo a milekoi el mo er a profet er Ngii: “A rokui el telbiil, contract, omerenged, yaksok, omeruul, kangkei, chelechad, malechub eng moktek, el diak el meruul el soiisb er a omerenged el yaksok er a Chedaol Reng … a mo diak el bedochel, keldung, malechub eng morim er uchei me a uriul er a okiis er a kodall; ea rokui el contract el diak el meruul el uai tiang a mo diak a belkul sel rechad a lemad.”4
Meng, ngerang kirel a telungalek el meruul mebo le nguu a diak a ulebengelel klengar? Kid a sebeched el nguu sel kengri sel doruul a telbiil lobengkel a Dios, e oltirakl aikal telbiil, e melai a klou a belkul chedaol ruoll.
Tiang a mle klemerang er a uchelel a taem. Adam me a Eve, Noah me a bechil, Abraham me a Sarah, Lehi me a Sariah, me a rokui el mekedung el oltirakl er a Jesus Kristo—el se er a beluulechad lobeob— a rirelii a osisiu el tebliil lobengkel a Dios. Te ngiluu a osisiu el chedaol ruoll el kid ,el chedal a mloluut el Ikelesia er a Rubak er a chelechal taem a mla remuul: aikel telbiil sel denguu a techolbechelid me a sel de bora chelsel a templo .
A Osobel a siotai er a rokui el oltirakl er Ngii el mo soisb er a ralm er a techolbechelid, ea chelsel a taem, e bolruul a lemuut el bebil er a telbiil lobengkel a Dios er a chelsel a templo e mo ngmai e mo kedung loltirakl a lemuut el meklou a belkul el chedao ruoll er a ngar medad el taem. A ikal rokui a kirel reuoll alsekum eng soad el mo obengkel a telungalek er kid me a Dios el mo cherechar.
Sel dektelel a renguk a sel betok el rechad el betik a renguk er tir, e chemat er tir, e menguul er tir a diak el kengei er sel siotai er a Rubak. Te oumechad er tir er sel ongtil a Jesus Kristo se er a lomekedong er tir, “Mei, me moltirakl er ngak.”5
Ak medengei el kmo ngera uchul me a Rubak a lilangel.6 Ak dirrek el lemangel el mo er a resechelik me a rechedak. Tireka kmal ungil resechal me a redil, el blak a rengrir el mo er a telungalek me a ngerchelir er a bouai. Te mengoit a mekreos el temir, klisichir, me a klekedall. Ea beluulechad a ungil er a urerir. Engdi te mla tibir el diak el bo loruul a telbiil lobengkel a Dios. Ng dirrekak el ngai a ikel chedaol ruoll el ngii a mo olsobel er tir lobengekel a telungalek er tir e mo merenged er tir el mo cherechar.7
Ng meral soak el mo oldingel er tir e siotai er ti el mo meringel lomtab a klisichel a llechul a Rubak. A kumedasou el kmo ngera ak mo kmung er tir mebol sebecherir el medengelii a beltkil a rengul a Osobel el mo er tir me a beltkil a renguk el mo er tir me bo lometab el kmo ng mekerang tirkel redil me a resechal meruul a telbiil a bo lenguu a “mui el deureng.”8
Ng kirir el mo medengei el kmo ma alta e ngar ngii a basio el bo er ngii uriul—el lobengterir a rungil el resechal me a redil el tir a tilbir el diak el bo loruul a telbiil lobengkel a Dios—e tiang a diak el sel basio el telungalek a mo kebetech e mo nguu a kengki el mo kiei e outekangel el mo cherechar. Tiang a diak el sel renged el bo lodengelii sel mui el deureng—er a diak a ulebengelel omerael me a ungilreng.9 A di tal rolel ea ikal ngarbab el klengeltengat a mo er ngii sel bom kiei el cherrungel lobengkel a Dios, el Diak a Ulebengelel el Chedam; me a Ngelekel Sechal, el Jesus Kristo; me a tirkel el ungil, klikiid, el chedal a telungalek er kid el tir a mla muterekokl.
Ng soak el dmu er tirkel resechelik el sekemerur:
“Chelsel tial klengar, e kau kmal diak moruul a kmu ngerang klel el ngii a ongerung el ungil. Engdi, sel moltngakl er a oluutel ebangkeklio er a Jesus Kristo, e kau a melilt er sel ongerung lungil el ngii a diak el kot.
“A Osobel dilu, ‘A blil a Demak a betok a delemerab er ngii.’10 Engdi, se el omtibir el diak moruul a telbiil lobengkel a Dios, e kau a di soam a kora di ngidil chadou el omderngem el diak a ulebengelel.”
Ng soak el lemuut el melekoi el mo er tirkel sekemerur el resechelik:
“Mochotii a rengum el mo er a Dios. Moker er Ngii alsekum aikal tekoi a klemerang. Msikii a taem el mosuub a Tekingel. El meral mesuub! Alsekum ngmeral betik a rengum er a telungalek er kau e meral ngar ngii a rengum a mo cherrungel lobengterir el mo cherechar, e bo moruul aikal tekoi—el blak a rengum el mesuub e ngar ngii a rengum el meluluuch—me bo modengei aikal diak a ulebengelel klemerang e bo moltirakel.
“Alsekum ngdiak modengei el kmo koumerang er a Dios, e momuchel er tiang. Bo modengei el kmo a lak a teletael el mla duubech lobengkel a Dios, eng sebechem loumedednger er a Dios. Ma leuaisei, e momuchel el meruul a teletael Lobengkel. Bol ngariou a rengum. Moluluuch bol sebechem el mes a chimal a Dios er a klengar er kau malechub aikel meliuekl er kau. Moker er Ngii mel subedau alsekum Ngii a meral ngar ngii—alsekum Ngii a medengelkau. Moker er Ngii el kmo Ngii ngera uldesuel el kirem. E bo, morenges.”
Ngar ngii a chimong el sechelik el dimlak a kmal teletael el mla duubech er ngii lobengkel a Dios. Engdi kmal di oureng el mo obengkel a bechil el ngii a mlo dibus. Ngii a ulengit er ngak el mo ngosukii. Ak mengelechel er ngii mebol kebetech lobengterir a remissionari mebo lodengei a osisecheklel a Kristo e bo losuub a telbiil er a ebangkelio, chedaol ruoll, me a klengeltengat.
Meng rirelii. Engdi ngulmelchesuar a tekingir el kirel ngii a mo omekngodech a betok el teletael er a klengar er ngii. Ng dilung, “A llechul a Dios me a telbiil a kmal meringel er ngak a mo meruul. Ng dirrek, el diak el sebechek el harau a ongeltacher, e me a diak a temek el lolngeseu er a Ikelesia.” Meng ngoker er ngak, “Se el kmad, e kulengit er kau me bo mruul aikel meklou a belkul el ureor er a templo el kirel a bechik me a ngak me bo el sebecham el lemuut el mo dmak.”
A kuureng a saul, el ngak a diak ngkel meritel er ngikal chad. Engdi ak kuleker er sel bedochel el proxy ureor er a templo el mo er a chad el mla er ngii a techelel el mo metecholb er a chelsel tial klengar—e mo mechedaol el mo er a priesthood e mo nguu a klengeltengat er a templo el ngar tial klengar—engdi mla er ngii a rengul e tibir el mo kotouar er tial tekoi.
Betik a renguk el rodam me a rodos er ngak, a Jesus Kristo a siotai er kid el mo merael er sel rael er a telbiil el lemuut el mo er a Chedam me a Chedil er a Babeluades me bo dobengterir tirkel betik er a rengud. Ngii a siotai er kid el kmo “mei, me moltirakl er ngak.”
Chelechang, eak President er a Ikelesia er Ngii, ea kulengit er kau el mla choridau er a Ikelesia me a kau el kora dirrekak mosiik el mo medengei el kmo a Ikelesia er a Osobel a mla moluut. Bo moruul a chedaol ureor mebo el dil kau el medengei, e kulengit me mrelii er a chelechal taem. A taem a di merael mo nguemd.
Ak kuuchais el kmo a Dios a ngar! A Jesus a Kristo. A Ikelesia er ngii me a mui el ebangkelio er Ngii a mla moluut el mo omekngeltengat a klengar er kid loba deureng, el mer tiang me a uruil el klengar. Ak kuuchais el ngara ngklel a Jesus Kristo, amen.