Ol Witnes, Ol Aronik Prishud Kworom, mo Ol Klas blong Ol Yang Woman
Ol jenis ia we mifala i stap anaonsem naoia, oli blong helpem ol yang man mo ol yang woman blong developem ol tabu paoa blong olgetawan we oli save kasem.
Ol brata mo sista. I gud tumas blong stap wetem yufala bakegen long jeneral konfrens ia. Eli long wik ia, oli bin mekem ol anaonsmen long ol memba blong Jos abaot ol jenis blong polisi, long saed blong hu nao i save stap olsem ol witnes blong ol baptaes mo ol siling odinens. Mi wantem haelaetem ol trifala poen ia:
-
Witnes blong wan proksi baptaes long bihaf blong wan we i ded, hem i eniwan we i holem wan tempol rekomen we i laef i stap, o eniwan wetem wan limit yus tempol rekomen.
-
Eni memba we i endao wetem wan tempol rekomen we i laef, i save stap olsem wan witnes blong ol siling odinens, blong wan we i laef, o tru long proksi.
-
Eni memba blong Jos we i baptaes, i save stap olsem wan witnes blong baptaes blong wan we i laef i stap. Jenis ia i blong evri baptaes aotsaed long tempol.
Ol jenis long polisi ia, oli ol fasin blong wok nomo. Doktrin mo ol kavenan we oli stap sapotem hemia, oli no jenis. Oli wok semmak long evri odinens. Ol jenis ia, oli sapos blong mekem se famli i tekpat moa long olgeta odinens ia.
Mo tu, mi wantem toktok long yufala naoia blong presentem ol jenis ia we bae i tajem ol yut blong yumi mo ol lida blong olgeta.
Bae yufala i tingbaot se mi bin invaetem ol yut blong Jos Ia blong Jisas Kraes blong Ol Lata-dei Sent blong joenem yut ami blong Lod blong tekpat long bigfala wok blong wol ia tedei—blong karem Isrel i kam tugeta.1 Mi bin givim invitesen ia long ol yut blong yumi from se, olgeta nao oli gat presen ia blong go aot blong luk ol narawan, mo serem wanem oli biliv long hem long wan wei we i save winim tingting blong man. Wok blong mekem ol pipol oli kam tugeta i wan impoten pat blong stap helpem wol ia blong i rere from Seken Kaming blong Lod.
Long wanwan wod, yut ami blong Lod, bisop nao i lidim, we hem i wan wokman blong God we i givim taem mo tingting blong hem. Fas mo bigfala responsabiliti blong hem, i blong kea long ol yang man mo ol yang woman blong wod blong hem. Bisop mo ol kaonsela blong hem oli lidim wok ia blong ol kworom blong Aronik Prishud, mo ol klas blong Ol Yang Woman insaed long wod.
Ol jenis ia we mifala i stap anaonsem naoia, oli blong helpem ol yang man mo ol yang woman blong developem ol tabu paoa blong olgetawan we oli save kasem. Mifala i wantem tu blong mekem ol kworom blong Aronik Prishud mo ol klas blong Yang Woman oli kam strong moa, mo blong givim sapot long ol bisop mo ol nara adalt lida, taem oli stap givim seves long jeneresen ia we i stap kam antap.
Elda Quentin L. Cook bae i toktok raon naoia long ol jenis ia we oli go wetem ol yang man. Mo tunaet, long jeneral sesen blong ol woman, Sista Bonnie H. Cordon, Yang Woman Jeneral Presiden, bae i toktok raon long ol jenis we oli go wetem ol yang woman.
Fas Presidensi mo Olgeta Twelef oli wan blong apruvum ol wok ia blong mekem ol yut blong yumi oli kam strong moa. !O, mifala i lavem mo stap prea from olgeta! Oli “hop ia blong Isrel, ami blong Saeon, ol pikinini blong dei ia blong promes.”2 Mifala i talemaot se mifala i trastem fulwan ol yut blong yumi, mo talem tangkyu long olgeta. Long tabu nem blong Jisas Kraes, amen.