Era iVakadinadina, Kuoramu ni Matabete i Eroni kei na Kalasi ni Goneyalewa

Kemuni na taciqu kei na ganequ, sa ka taleitaki na tiko vata tale kei kemuni ena koniferedi raraba. Ena itekivu ni macawa oqo, a kacivaki vei ira na lewe ni Lotu na veisau ni lawatu baleta o koya e rawa ni ivakadinadina ena cakacaka vakalotu ni papitaiso kei na veivauci. Au vinakata meu cavuta na tolu na tikina oqori.

1. Na papitaiso vakaveisosomitaki me baleta e dua na tamata sa mate e rawa ni ivakadinadina kina e dua ga e vakaivolatara bula ni valetabu, okati kina na ivolatara yalani.

2. Sa rawa vua e dua na lewenilotu sa edaumeni oti ka tiko nona ivolatara bula me ivakadinadina ena cakacaka vakalotu ni veivauci vei ira na bula kei na veisosomitaki.

3. E dua ga na lewenilotu sa papitaiso oti e rawa ni ivakadinadina ena nona papitaiso e dua na tamata bula. Na veisau oqo e baleta na papitaiso kece sara ena taudaku ni valetabu.

Na veisau ni lawatu eso oqo e baleta walega na kena iwalewale. Na ivunau kei na veiyalayalati e kovuti kina e sega ni veisau. E tautauvata na kedrau bibi ena vei cakacaka vakalotu kece sara. Na veisau kece oqo e dodonu me na vakavuqataka na nodra vakaitavi na matavuvale ena veicakacaka vakalotu oqo.

Au vinakata talega meu veivosaki vata kei kemuni ena gauna oqo meu vakamacalataka na veisau e baleti ira na noda itabagone kei na nodra iliuliu.

Ko ni na nanuma niu a sureti ira na itabagone ena Lotu i Jisu Karisito ni Yalododonu Edaidai me ra mai curu ki na mataivalu ni Turaga me ra vakaitavi ena inaki cecere duadua e vuravura edaidai—na vakasokumuni kei Isireli.¹ Au sureti ira na noda itabagone baleta ni tu vei ira na isolisoli matalia me ra dolele yani vei ira na tani ka wasea na veika era vakabauta ena iwalewale veirawai. Na inaki ni vakasokumuni sa dua na tiki bibi ni kena vakarautaki na vuravura kei ira na lewena baleta na iKarua ni nona Lako Mai na Turaga.

Ena veitabanalevu yadua, e liutaka na mataivalu itabagone ni Turaga e dua na bisopi, e dua na italai vakatabui ni Kalou. Taumada ka bibi duadua ena nona itavi me qaravi ira na cauravou kei na goneyalewa ni nona tabanalevu. Na bisopi kei rau na nona daunivakasala eratou liutaka na nodra cakacaka na kuoramu ni Matabete i Eroni kei na kalasi ni Goneyalewa ena tabanalevu.

Na veisau sa kacivaki oqo e kedra inaki me ra vukei na cauravou kei na goneyalewa me ra tara cake na nodra dui cavacava tabu yadudua. Sa vinakati talega me da vaqaqacotaka na veikuoramu ni Matabete i Eroni kei na kalasi ni Goneyalewa ka veitokoni vei bisopi kei ira na iliuliu itabaqase ni ra qaravi ira na itabatamata tubucake tiko.

Sa na vosa oqo o Elder Quentin L. Cook baleta na veisau e baleti ira na itabagone. Ena bogi nikua, ena soqoni raraba ni marama, ena vosa kina o Sister Bonnie H. Cordon, na Peresitedi Raraba ni Goneyalewa baleta na veisau e baleti ira na Goneyalewa.

Era sa duavata na Mataveiliutaki Taumada kei na Le Tinikarua me ra tokona na sasaga oqo me ra vaqaqacotaki na noda itabagone. Isa, sa dua na ka na neimami lomani ira ka masulaki ira! Era sa “Nuinui nei Isireli, tabagone edaidai.”² Keimami vakaraitaka na neimami nuitaki ira na itabagone kei na neimami vakavinavinaka vei ira. Ena yacana tabu o Jisu Karisito, emeni.