Lapho Kukhona Ifu Nokukhanya Kwelanga, Nkosi, Hlala Nami!
Ngiyafakaza ukuthi “lapho kukhona ifu nokukhanya kwelanga” iNkosi izohlala nathi, ukuze “izinhlupheko zethu [zigwinywe] enjabulweni kaKristu.”
Enye yezingoma zethu esizithandayo izwakalisa ukunxusa ngokuthi, “Lapho kukhona ifu nokukhanya kwelanga, Nkosi, hlala nami!”1 Ngake ngaba sendizeni lapho isondela esiphephweni esikhulu. Ngilunguze ngefasitela, ngabona ingubo eminyene yamafu ngezansi kwethu. Imisebe yelanga elishonayo yabonakala emafwini, yawenza ukuba akhanye ngokukhanya okukhulu. Ngokushesha, indiza yehla phakathi kwamafu asindayo, kwathi masinyane sambozwawubumnyama obukhulu obasenza singakuboni ukukhanya okukhulu esasikubonile emizuzwini embalwa edlule.2
Amafu amnyama angaba khona futhi nasezimpilweni zethu, okungasenza singakuboni ukukhanya kukaNkulunkulu futhi kusenze sizibuze ukuthi ingabe lokho kukhanya kusakhona yini kithi. Amanye alawo mafu awukunyinyitheka, ukukhathazeka, nezinye izinhlobo zokugula ngokwengqondo nangomuzwa. Kungaphazamisa indlela esizibona ngayo thina, abanye, ngisho noNkulunkulu imbala. Zithinta abesifazane nabesilisa bayo yonke iminyaka kuzo zonke izingxenye zomhlaba.
Okulimaza ngokufanayo yifu lokungabaza elingathinta abanye abangakaze babhekane nalezi zinselelo. Njenganoma yiliphi ilunga lomzimba, ingqondo ingaba nokugula, ukuhlukumezeka, nokuphazamiseka kwamakhemikhali. Lapho izingqondo zethu zihlupheka, kuyafaneleka ukuba sifune usizo oluvela kuNkulunkulu, kulabo abaseduzane nathi, nakochwepheshe bezokwelapha nabezempilo ngokwengqondo.
“Bonke abantu—owesilisa nowesifazane—badalwe ngomfanekiso kaNkulunkulu. Umuntu ngamunye uyindodana noma yindodakazi ethandekayo yomoya ezalwa ngabazali basezulwini, futhi … ngamunye unobunjalo bukaNkulunkulu futhi kunokwenzeka babe njeNgaye.”3 NjengabaZali bethu abaseZulwini noMsindisi wethu, sinomzimba wenyama4 futhi siba nemizwa.5
Bodadewethu abathandekayo, kuyinto ejwayelekile ukuzizwa udabukile noma ukhathazekile ngezikhathi ezithile. Ukudabuka nokukhathazeka yimizwa yomuntu engokwemvelo.6 Kodwa-ke, uma sihlala sidabukile futhi uma izinhlungu zethu zivimba amandla ethu okuzwa uthando lukaBaba wethu oseZulwini kanye eNdodana Yakhe kanye nomthelela kaMoya oNgcwele, lapho-ke kungenzeka ukuthi sihlushwa ukunyinyitheka, ukukhathazeka, noma esinye isimo somuzwa.
Indodakazi yami yake yabhala yathi: “Kwakunesikhathi … [lapho] ngangikhathazeka kakhulu ngaso sonke isikhathi. Ngangihlala ngicabanga ukuthi ukudabuka kuyinto okufanele abantu babe namahloni ngayo, nokuthi kuwuphawu lobuthakathaka. Ngakho-ke ngakugcina kimi ukudabuka kwami. … Ngazizwa ngingelutho okwangempela.”7
Umngane wakuchaza lokhu ngalendlela: “Kusukela ngisemncane, bengilokhu ngilwa nemizwa yokuphelelwa yithemba, ubumnyama, isizungu, nokwesaba kanye nomuzwa wokuthi ngiphukile noma nginesici. Ngenza konke ukufihla ubuhlungu bami nokuba ngingalokothi nginikeze isithombe sokwenzekayo ngaphandle kokuthi ngiyachuma futhi nginamandla.”8
Bangani bami abathandekayo, lokhu kungenzeka kunoma ngubani kithi—ikakhulukazi uma, njengamakholwa esu lenjabulo, sizibeka imithwalo engenasidingo ngokucabanga ukuthi sidinga ukulunga ngokuphelele manje. Imicabango enjengalena ingasiqeda amandla. Ukuzuza ukulunga ngokuphelele kuyinto ezokwenzeka kuyo yonke impilo yethu yasemhlabeni nangale kwayo—futhi kuphela ngomusa kaJesu Kristu.9
Ngokuphambene nalokho, lapho siveza izinkinga zethu ezingomuzwa, sivuma ukuthi asilungile ngokuphelele, sinika abanye imvume yokwabelana ngezinkathazo zabo. Sisonke siyabona ukuthi likhona ithemba futhi akudingeki sihlupheke sodwa.10
Njengabafundi baJesu Kristu, senze isivumelwano noNkulunkulu sokuthi “sizimisele ukuthwalisana imithwalo omunye nomunye” futhi “sikhale nalabo abakhalayo.”11 Lokhu kungasho ukuthola ulwazi ngokugula okungomuzwa, ukuthola amacebo angasisiza ukubhekana nalezi zinkinga, futhi ekugcineni sizilethe thina nabanye kuKristu, onguMphilisi oMkhulu.12 Nakuba singazi ukuthi singahlobana kanjani nalokho abanye ababhekene nakho, ukuqinisekisa ukuthi ubuhlungu babo bungobangempela kungaba yisinyathelo sokuqala esibalulekile sokuthola ukuqonda nokwelashwa.13
Kwezinye izimo, imbangela yokunyinyitheka noma ukukhathazeka ingabonakala, kanti kwezinye izikhathi kungaba nzima ukukubona lokho.14 Imiqondo yethu ingahlupheka ngenxa yokukhathazeka15 noma ukukhathala okukhulu,16 kwesinye isikhathi okungaqedwa ngokwenza ushintsho ekudleni, ukulala, nokuvocavoca umzimba. Ngezinye izikhathi, ukwelashwa noma ukuthola imithi ngokuqondiswa wochwepheshe abaqeqeshiwe nakho kungadingeka.
Ukugula kwengqondo noma ngomuzwa okungalashiwe kungaholela ekuzehlukaniseni nabanye, ukungezwani, ubudlelwane obubi, ukuzilimaza, ngisho nokuzibulala imbala. Ngiyakwazi lokhu mathupha, njengoba nobaba azibulala eminyakeni eminingi edlule. Ukushona kwakhe kwakushaqisa futhi umndeni wami nami sadabuka kakhulu. Kungithathe iminyaka ukubhekana nosizi lwami, futhi muva nje ngifunde ukuthi ukukhuluma ngokuzibulala ngezindlela ezifanele empeleni kusiza ukukuvimbela kunokuba kukukhuthaze.17 Manje sengikhulume ngokusobala nabantwana bami ngokufa kukababa futhi ngabona ukwelashwa uMsindisi angakunikeza nhlangothini zombili nesisitho.18
Ngokudabukisayo, abaningi abahlushwa ukunyinyitheka okukhulu bayaziqhelelanisa nabaNgcwele ngoba benomuzwa wokuthi abahambisani nomuntu osezingqondweni zabo. Singabasiza bazi futhi bazizwe ukuthi nabo bangabethu ngempela. Kubalulekile ukuqaphela ukuthi ukunyinyitheka akuwona umphumela wobuthakathaka, futhi akuwona umphumela wesono.19 “Kuyakhula uma kufihliwe kunciphe uma sinozwelo kwabanye.”20 Ngokubambisana, singawadabula amafu okuhlukaniswa kanye nokucwaswa ukuze umthwalo wehlazo ususwe futhi kwenzeke izimangaliso zokwelashwa.
Phakathi nenkonzo Yakhe yasemhlabeni, uJesu Kristu welapha abagulayo nabahluphekile, kodwa umuntu ngamunye kwakudingeka abonise ukholo Kuye futhi enze okuthile ukuthola ukwelashwa Nguye. Abanye babehamba amabanga amade, abanye babelula izandla zabo ukuze bathinte ingubo Yakhe, kanti abanye kwakudingeka bayiswe Kuye ukuze belashwe.21 Uma kukhulunywa ngokuphiliswa, asimudingi yini kakhulu sonke na? “Asizona yini sonke iziceli na?”22
Masilandele indlela kaMsindisi futhi sandise ububele bethu, sinciphise injwayelo yethu ekwahluleleni, futhi siyeke ukuba ngabahloli bangokomoya kwabanye. Ukulalela ngothando ngesinye sezipho ezinkulu esingazinikeza, futhi singakwazi ukusiza ukuthwala noma ukususa amafu asindayo aminyanisa abantu nabangani esibathandayo23 ukuze, ngothando lwethu, babuye bawuzwe uMoya oNgcwele futhi bakubone ukukhanya okuvela kuJesu Kristu.
Uma uhlala uzungezwe “yinkungu yobumnyama,”24 phendukela kuBaba oseZulwini. Akukho ohlangabezane nakho okungashintsha iqiniso laphakade lokuthi ungumntwana Wakhe nokuthi Uyakuthanda.25 Khumbula ukuthi uKristu unguMsindisi noMhlengi wakho, futhi uNkulunkulu unguYihlo. Bayakuqonda. Babone beseduze nawe, bekulalele futhi bekusekele.26 “[Bazokududuza] ezinkathazweni zakho.”27 Yenza konke ongakwenza, futhi uthembele emuseni ohlawulayo weNkosi.
Izinkathazo zakho azibonisi umuntu onguye, kodwa zingakucwengisisa .28 Ngenxa “yeva enyameni,”29 ungase ube nekhono lokuba nozwelo kakhulu kwabanye. Njengoba uqondiswa nguMoya oNgcwele, yabelana ngendaba yakho ukuze “usize ababuthakathaka, uphakamise izandla ezibuthakathaka, futhi uqinise amadolo axegayo.”30
Kulabo bethu njengamanje abazabalazayo noma abeseka umuntu ozabalazayo, masizimisele ukulandela imiyalelo kaNkulunkulu ukuze uMoya Wakhe uhlale unathi.31 Masenze “izinto ezincane neziwubala”32 ezizosinika amandla angokomoya. Njengoba uMongameli uRussell M. Nelson asho, “Akukho okuvula amazulu njengokuhlangana kobumsulwa, ukulalela okuqotho, ukufuna ngobuqotho, ukuzitika ngamazwi kaKristu eNcwadini kaMormoni nsuku zonke, nesikhathi esanele sokuzinikela emsebenzini wethempeli nomlando womndeni.”33
Sonke masikhumbule ukuthi uMsindisi wethu, uJesu Kristu, “[uthwale] ubuthakathaka [bethu], ukuze izibilini zakhe zigcwaliswe ngesihawu, ngokwasenyameni, ukuze azi … ukuthi angasisiza kanjani ngokobuthakathaka [bethu].”34 Weza “ukuzobopha abanhliziyo ezaphukileyo, … ukuzoduduza bonke abalilayo; … ukubapha amaqhele esikhundleni somlotha, amafutha enjabulo esikhundleni sokulila, ingubo yokudumisa esikhundleni somoya odangeleyo.”35
Ngiyafakaza kini ukuthi “lapho kukhona ifu nokukhanya kwelanga” iNkosi izohlala nathi, ukuze “izinhlupheko zethu [zigwinywe] enjabulweni kaKristu,”36 futhi “ kungomusa ukuthi sisindisiwe, emva kwakho konke esingakwenza.”37 Ngiyafakaza ukuthi uJesu Kristu uzobuyela emhlabeni “enokuphilisa emaphikweni akhe.”38 Ekugcineni, “Uyozesula zonke izinyembezi emehlweni [ethu]; akusayikuba khona … ukudabuka.”39 Ngokuba bonke labo “abazoza kuKristu, futhi bapheleliswe kuye,”40 “ilanga alisayikushona; … ngokuba uJehova uyakuba ngukukhanya okuphakade [kithi], nezinsuku zokulila [kwethu] ziyakuphela.”41 Egameni likaJesu Kristu, amen.