Pinalangga nga mga Anak nga Babayi
Sa sentro sang tanan nga ginahimo naton sa Young Women amo ang handum nga mabuligan kamo nga makaangkon sang mabakod nga pagtuo sa Ginuong Jesucristo.
Mahal kong mga sister, nalipay ako nga makaupod kamo! Mga saksi kita sa pagbubo sang rebelasyon nga alangay nagainat sang kalag kag makakulunyag.
Sa aton pagsugod, luyag ko ipakilala sa inyo ang pila ka mga abyan; young women sila nga may pinasahi nga mga talento, kustombre, kag personal kag pangpamilya nga kahimtangan. Ang kada isa, pareho sa inyo tanan, nagbihag sang akon tagipusuon.
Una, ini si Bella. Mabakod sia nga nagatindog bilang isahanon nga young woman sa iya branch sa Iceland.
Ini ang debotada nga si Josephine sang Africa, nga nagpamat-od liwat nga tun-an ang Libro ni Mormon adlaw-adlaw. Nadiskubrihan niya ang gahum kag mga bugay nga maangkon halin sining simple, matinuohon nga buhat.
Kag sa katapusan, ini ang mahal ko nga abyan nga si Ashtyn, isa ka dalayawon nga young woman nga napatay pagkatapos sang anum-katuig nga pagpakigbato sa kanser. Ang iya panaksihon sa Pagbayad-sala ni Jesucristo nagabalik-balik pa sa akon tagipusuon.
Kamo tanan dalayawon nga young women. Pinasahi kamo, kada isa nga may inyo kaugalingon nga mga dulot kag mga eksperiyensia pero palareho sa tagsa ka importante kag walay katapusan nga mga paagi.
Matuod-tuod kamo nga espiritu nga mga anak nga babayi sang Langitnon nga mga Ginikanan, kag wala sing may makahamulag sa inyo sa Ila gugma kag sa gugma sang Manluluwas.1 Sa inyo pagpalapit sa Iya, bisan nga nagahimo lang sang pinakagamay nga panugod nga mga tikang pasulong, madiskubrehan ninyo ang nagapadayon nga paghidaet nga nagaluntad sa inyo kalag bilang matutom nga disipulo sang aton Manluluwas nga si Jesucristo.
Si Pangulong Russel M. Nelson, ang aton pinalangga nga propeta, nagpangabay nga ipaambit ko ang pila sang inspirado nga mga pagbag-o nga makabulig sa inyo sa “pagpauswag sang [inyo] sagrado nga personal nga ikasarang”2 kag dugangan ang inyo matarong nga impluwensiya. Mahambal ako parte sa apat ka mga pagbag-o sini nga gab-i
Tema sang Young Women
Una, sa sentro sang tanan nga ginahimo naton sa Young Women amo ang handum nga mabuligan kamo nga makaangkon sang mabakod nga pagtuo sa Ginuong Jesucristo3 kag sing malig-on nga ihibalo sang inyo diosnon nga pagkatawo bilang mga anak nga babayi sang Dios.
Sini nga gab-i, luyag ko ianunsyo ang isa ka pagbag-o sa tema sang Young Women. Nagapangamuyo ako nga mabatyagan ninyo ang Balaan nga Espiritu nga nagasaksi sa kamatuoran sining mga pulong samtang ginasambit ko ang bag-o nga tema:
Pinalangga ako nga anak nga babayi sang langitnon nga mga ginikanan,4 nga may diosnon nga kinaiya kag walay katapusan nga kapalaran.5
Bilang disipulo ni Jesucristo,6 nagahimakas ako nga mangin pareho sa Iya7 Nagatinguha ako nga mag-akto sa personal nga rebelasyon8 kag mag-alagad sa iban sa Iya balaan nga ngalan.9
Magatindog ako bilang saksi sang Dios sa tanan nga tion kag sa tanan nga butang kag sa tanan nga lugar.10
Nagahimakas ako nga mangin kabagay sa pangkahitaasan11 ginapakamahal ko ang dulot sang paghinulsol12 kag nagatinguha nga mag-uswag kada adlaw.13 Nga may pagtuo,14 pabakuron ko ang akon puluy-an kag panimalay,15 maghimo kag magtipig sang sagrado nga mga kasugtanan,16 kag magbaton sang mga ordinansa17 kag mga bugay sang balaan nga templo.1818
Talupangda ang pagbaylo sang “kita” sa “ako.” Ining mga kamatuoran nagakaigo sa inyo sing indibidwal. Pinalangga ka nga anak nga babayi sang Langitnon nga mga Ginikanan. Disipulo ka sang kasugtanan sang aton Manluluwas nga si Jesucristo. Ginaagda ko kamo nga tun-an kag pamalandongan ining mga pulong. Nakahibalo ako nga sa inyo paghimo sini, makaangkon kamo sang panaksihon sang kamatuoran sang mga ini. Ang paghangop sining mga kamatuoran magabag-o sang mga paagi sang inyo pag-atubang sa mga hangkat. Ang pagkilala sang inyo pagkatawo kag katuyuan magabulig sa inyo sa pagpasanto sang inyo pagbuot sa Iya sang Manluluwlas.
Ang Paghidaet kag paggiya maagom ninyo sa inyo pagsunod kay Jesucristo.
Mga Klase sa Young Women
Ang ika-duha nga pagbag-o nagaapekto sang mga klase sang Young Women. Si Elder Neal A. Maxwell nagsiling, “Sa masami ang daku nga kinahanglanon sang mga tawo amo ang palasilungan sa mga bagyo sang kabuhi sa santuaryo sang pagkalakip.”19 Ang aton mga klase dapat mangin santuaryo sa mga bagyo, malig-on nga mga lugar sang pagpalangga kag pagkalakip. Sa pagtinguha nga magpasad sing labi pa gid nga pag-isa, magpabakod sang mga pag-abyanay kag magdugang sinang balatyagon sang pagkalakip sa sulod sang Young Women, magahimo kita sang mga pagbag-o sa istruktura sang klase.
Sa masobra isa ka siglo, ang young women natunga sa tatlo ka mga klase. Sugod sa gilayon, ginaagda namon ang mga lider sang Young Women kag mga bishop sa pagbinagbinag sing mapangamuyuon sang mga panginahanglan sang tagsa ka young woman kag organisahon sila suno sa edad nga nagakaigo sa kahimtangan sang ward. Yari ang pila ka mga halimbawa kon paano himuon ini.
-
Kon diutay lang ang inyo young women, pwede nga isa lang ang inyo klase sa Young Women nga ululupod ang tanan sa miting.
-
Mahimo man nga may daku kamo nga grupo sang young women nga nagaedad 12 kag dayon gamay nga grupo sang young women nga mas magulang. Pwede kamo magdesisyon sa paghiwat sing duha ka klase: Young Women 12 kag Young Women 13-18.
-
Ukon, kon may daku kamo nga ward nga may 60 ka young women nga nagatambong, pwede kamo maghiwat sang anum ka klase, isa sa tagsa ka edad nga naorganisa suno sa tuig.
Paano man naorganisa ang inyo mga klase, kamo young women importante gid sa pagpasad sang pag-isa. Mangin kasanag sa mga yara sa inyo palibot. Mangin taghatag sang pagpalangga kag pag-ulikid nga inyo ginapaabot nga mabaton halin sa iban. Nga may pangamuyo sa inyo tagipusuon, magpadayon sa pagdab-ot kag mangin kusog para sa kaayohan. Sa inyo paghimo sini, ang inyo kabuhi mapuno sang pagkamaluluy-on. Mas makaangkon kamo sing mas maayo nga balatyagon tuhoy sa iban kag magasugod nga makita ang ila kaayo bilang kabaylo.
Mga Ngalan sang Klase sa Young Women
Ikatatlo, upod sining bag-o nga pag-organisa sang klase, ang tanan nga mga klase pagatawgon sa nagaisa nga ngalan nga “Young Women.”20 Indi na naton paggamiton ang mga ngalan nga Beehive, Mia Maid kag Laurel.
Pabakuron ang mga Pangulohan sang Klase
Ang katapusan nga parte nga luyag ko hambalan amo ang importansya sang mga pangulohan sang klase. Bisan paano man naorganisa ng mga klase sa Young Women, ang tagsa ka klase dapat may pangulohan!21 Suno ini sa diosnon nga disenyo nga ang young women ginatawag nga magpanguna sa ila pagkalamharon.
Ang papel kag katuyuan sang pangulohan sang klase ginpabakod kag mas ginklaro. Ang buluhaton sang kaluwasan isa sining importante nga mga responsibilidad, kapin pa sa mga bahin sang ministering, pangmisyonaryo nga buluhaton, hilikoton sa pagpaaktibo, kag bululaton sa templo kag family history.22 Huo, ini ang paagi nga matipon naton ang Israel23—isa ka mahimayaon nga buluhaton para sa tanan nga young women bilang mga miyembro sang youth battalion sang Ginuo.
Sa tagsa ka lebel sang Simbahan, nagatawag ang Ginuo sang pangulohan nga magpanguna sa Iya katawhan. Young Women, ang mangin miyembro sang pangulohan sang klase mahimo mangin ang inyo una nga oportunidad sa pagpasakop sa sining inspirado nga sulundan sang liderato. Mga hamtong nga mga lider, himoa ang pagtawag sang mga pangulohan sang klase nga prayoridad kag dayon magpanguna sa ila tupad, nga nagatudlo kag nagagiya sa ila agud nga magmadinalag-on sila.24 Ano man ang lebel sang eksperiyensia sa liderato sang isa ka pangulohan sang klase, magsugod kamo kon diin sila kag buligi sila nga maangkon ang abilidad kag kompiansa nga magabugay sa ila bilang mga lider. Mangin yara sa tupad nila pero indi magbulos. Ang Espiritu magagiya sa inyo samtang ginagiyahan ninyo sila.
Agud ipakita ang importante nga papel sang mga ginikanan kag mga lider bilang mga manunudlo, istoryahan ko kamo. Si Chloe gintawag nga mag-alagad bilang pangulo sang klase. Ang maalam niya nga mga lider sang priesthood nagpaisog sa iya nga magpangayo sang bulig sang Ginuo sa pagrekomendar sang mga ngalan para sa iya pangulohan. Nagpangamuyo si Chloe kag madasig nga nakabaton sang inspirasyon kon sin-o ang irekomendar bilang iya mga manuglaygay . Sang padayon sia nga nagapanumdum kag nagapangamuyo parte sa sekretarya, ang Espiritu liwatliwat nga nagdala sa iya igtalupangod sang young woman nga sa iya kakibot—isa nga talagsa lang nagasimba ukon nagatambong sa mga kahiwatan.
Nga indi segurado sa pagpabatyag, si Chloe nakighambal sa iya iloy nga nagpaathag nga isa sang mga paagi nga makabaton kita sang rebelasyon amo ang paagi sa nagabalikbalik nga panumduman. Nga may bag-o nga kompiansa, nagbatyag si Chloe nga irekomendar niya ining young woman. Gintanyag sang bishop ang tawag kag ginbaton sang young woman. Pagkatapos nga napain sia, ining manami nga sekretarya nagsiling, “Kahibalo ka, wala gid ako nakabatyag nga may lugar ukon kinahanglanon ako bisan diin. Wala ako nakabatyag nga nagakabagay ako. Pero sa sining tawag, nabatyagan ko nga ang Amay nga Langitnon may tuyo kag lugar para sa akon.” Paggwa ni Chloe kag sang iya iloy halin sa miting, nagsiling si Chloe sa iya iloy nga may luha sa iya mga mata, “Matuod gid ang rebelasyon! Husto gid ang rebelasyon!”
Mga pangulohan sang klase, gintawag kamo sang Dios kag nagsalig nga pangunahan ninyo ang isa ka grupo sang Iya mga anak nga babayi. “Kilala kamo sang Ginuo. … Ginpili Niya kamo.”25 Kamo ginpain sang isa nga may awtoridad sang priesthood; buot silingon sini nga sa inyo paghimo sang mga tulumanon sang inyo tawag, ginagamit ninyo ang awtoridad sang priesthood. May importante kamo nga buluhaton. Mangin sensitibo kag mag-akto sa mga pagpabatyag sang Balaan nga Espiritu. Kon ginahimo ninyo, makaalagad kamo nga may kompiyansa, kay wala kamo nagaalagad nga isahanon!
Mga pangulo sang klase, kinahanglan namon ang inyo kaalam, tingug kag kapagsik sa bag-o nga ward youth council nga gin-anunsyo ni Elder Quentin L. Cook sini nga adlaw. Importante kamo nga bahin sang solusyon sa pagsabat sang mga kinahanglanon sang inyo mga utod.26
Ining mga pagbag-o sa organisasyon kag liderato sang klase mahimo magsugod sa gilayon kon ang mga ward kag mga branch handa na pero dapat plastado na sa Enero 1, 2020.
Mahal kong mga sisters, nagapamatuod ako nga ining mga pagbag-o nga ginhambal ko subong mga inspirado nga direksyon halin sa Ginuo. Sa aton matutom nga pagimplementar sining mga pagbag-o, kabay nga indi naton malipatan ang aton katuyoan: ang pagpabakod sang aton determinasyon nga sundon si Jesucristo kag buligan ang iban nga magpalapit sa Iya. Nagasaksi ako nga Iya ini simbahan. Mapasalamaton gid ako nga ginatugotan Niya kita nga mangin importante kaayo nga bahin sang Iya sagrado nga buluhaton.
Nagapangamuyo ako nga ang amo man nga Espiritu nga naggiya sining mga pagbag-o magagiya sa inyo sa inyo pagsulong sa dalan sang kasugtanan. Nagasaksi ako sini sa ngalan ni Jesucristo, amen.