L’agruwi Motochiyel ni rib Ga’fan

Nggu tabab ko n’en nike fil Yesus ni fare bin l’agruwi motochiyel ni rib ga’fan.

“Nge tu’uf Somoel ni Got rom, u lan gumircha’em, nga gubin e ya’el rom, nge gubin lanin’um.

“Iraray e bin somm’on nge bin falel’ e motochiyel.

“Bin migid e boed, Nge tu’uf e yoror rom ni boeded.”⁴

Biney e be yoeg ni kan noeg ngoe=daed ni ngad tu’ufeged gubin e gidii’, ma fare yaat rok Yesus ni mornga’agen fare Samaritan nib mangil e be fil ni gubin e gidii’ ma ba chugur ngodaed.⁵ Machane falfalen’ rodaed ni ngad fol gaed ko bin l’agruw e motochiyel e ri dabi n’anggin daed ngad pagtilined e bin somm’on, ni nge tu’uf Got rodaed u gubin polo’ i gumircha’en daed, ya’el, nge tafney. Gadaed be dag e binem e tu’ufeg ni gadaed be “fol ko pi motochiyel [Rok].”⁶ Ba adag Got ni ngad fol gaed ko pi motochiyel Rok ya kari mus ni dakean e fol, nib mu’un e kalngan’uuy ngay, e rayog ni ngad suloed nga pow’chen man manga’ang ni bod rogon Ir.

U lan fare numon rok ni dani n’uw nap’an ko Galasia,, me President Russell M. Nelson e weliy e n’en nike yoeg e “tha’ nib gel u thilin e tu’ufeg rok Got nge motochiyel Rok.”⁷ Re motochiyel ni baga’ ni be oloboch nag e pi’in nib LGBT e motochiyel rok Got ni mabgol nge falan e dowef. L’agruw mab ga’fan u lane wo’en e thap rok e Chitamangdaed nu Tharmiy ni fan ko pifaak. President Nelson e ke fil ni ga’ar, “Motochiyel rok Got e baga’ nibe yib u fithik e tu’ufeg Rok ni fan ngodaed ni ba adag ni ngad manged rogon nib mangil.”⁸

Ke fil President Nelson: “Bo’or e pi nam … ke thilyeg e motochiyl nifan e mitnem e mabgol. Gadaed chonggin e Galasia, e gadaed ma tay fan e motochiyel ko naam … , nib mu’un e mabgol ngay. Machane, n’en nib riyul’, ma ko somm’on … ma mabgol e Got e ir e ke ngongliy! Nge taw ko re rran ney ma Ir e ke yoeg ni thilin e pumo’on nge ppin. Dawori thilyeg Got e motochiyel Rok ni mornga’agen e mabgol.”

Be yul’yul’ President Nelson: “Got dawori thilyeg fare motochiyel Rok ni falan e dowef. Tin nib tu’uf ni ngan rrin’ u m’on ni ngan yan nga temple e dawori thil.”⁹

Ke pogran President Nelson ngodaed ni “murwel romaed ni Apostle e dariy ban’en ni nggu machib niged ma kemus ni tin riyul’. Binem e murwel e gathi be pi’ mat’won maed ni nggu thilyegned e motochiyel nib thothup.”¹⁰ Ere, pi walageg nib ppin, pi toygang’ ko Galasia e gubin ngiyal’ ma ngari machib nag e n’en nib ga’fan ko mabgol u thilin e pumo’on nge ppin nge n’en nib sar fan ko falan e dowef.

Fare murwel ko Fare Galasia rok Yesus Kristus ni fan ko Gidii’en Got ko Tin Tomur e Rran e baga’ nibe leam nag ni nge fal’eg rogon pifaak Got ni fan ko bin gil’ilungun e celestial, nge n’en ni rib fa’ riy, falfalen’ fa yafas nib manemus. Binem ni tha’abi tolang e kemus ni rayog u dakean e mabgol ninge manemus.¹¹ Yafas nib manemus e mu’un e n’en ni kemus ni rayog ni nge buch u thilin e pumo’on nge ppin¹²—n’en ni bin bi’ech e yi’iy e yima yoeg ngay e “bitir nibe yo’or nib machalbog.”¹³

Ulan e non rok, President Nelson ke fil, ”Napan ni ngam fol e pi motochiyl rok Somoel ra damiiteg nigem napan ngam maen nga fla’ab”¹⁴—ere, ni ngam mang boed Got, ni bay e yafos nib manechubog nge mon’og nib thothup ku fare Galibthir nu Tharimey. Binem e n’en ni gadaed ni fan ko pi’in nib tu’uf rodaed. Bachane tu’ufeg rodaed, ma dabyog ni ngad paged e re tu’ufeg nem ni nge kireb nag e pi motochiyel nge tunom nge murwel rok Got, ni gadaed manang ni ra pi’ e falfalen’ nib ma’ang’ang ngak e pi’in nib tu’uf rodaed.

Machane ba’ boech e pi’in nib tu’uf rodaed, nib mu’un boech niba’ fare gospel nikan fulweg roraed, ni dar mich u wan’ riy fa ke mel’eg ni dabi fol ko pi motochiyel rok Got ni mornga’agen e mabgol nge falfan e dowef. Ma yaed?

Machib rok Got e be dag ni gadaed gubin ma gadaed e bitir Rok ma ke sunmiy daed ni ngeyog e falfalen’ ngodaed.¹⁵ Bin chiney e yi’iy e be fil ni ke pi’ Got e tunom ni fan ko gidii’ ni gubin ma rayog ni nge mel’eg ni nge fol nge gay e tin falel’ e tawa’ath fa nge mel’eg e tin ni ra fekey ko tin gili’ilunguy nib sobut¹⁶ Bachane tu’ufeg rok Got ni fan e pifaak ni gubin, ma pi gil’ilungun nem nib sobut e kab mangil ko rogon ni be leam nag e gidii’.¹⁷ Fare Bayul rok Yesus Kristus e ke n’anggin ke yag gubin e pinn’ey, napan Ni “Pi’ gubin ban’en ngak e Chitamangiy, me thapeg gubin e gidii’ ko murwel u pa’.”¹⁸

Ku weliy mornga’agen e bin somm’on e motochiyel, machane ma bin l’agruw? Bu’uw rogon ni ngad fol gaed ko motochiyel ni ngad tu’ufegned e picha’an niba’ u to’ben daed? Gamaed be gay rogon ningan noeg ko chonggin e galasia ni pi’in nike mange lesbian, gay, bisexual, fa pi’in nike thilyeg ir nge mithmith roraed e ngad sap ngoraed u fithik e tu’ufeg nike yoeg e Tathapeg rodaed ni ngad daged ko gubin e gidii’. Ere, napan fare United States keyog rayog ko mitnem e mabgol, fare Bin Somm’on e Presidency nge Ulungi ko Ragag nge La’agruw ke yoeg: “Fare gospel rok Yesus Kristus ma fil thingarda t’ufeg gubin gidii’—dariyfan e dabum fa danga’. Gamaed be yoeg ni pi’in nibe fol ko motochiyel fa tin u court nibe pi’ mat’won e mitnem e mabgol e dabini dariy fan niged.”¹⁹

Ma, ri dabini kireb niged e pi’in ni dani ta’aborogon e mich rodaed nge m’ag rodaed.²⁰ Fithik e kirbaen’, ma ba’ boech e gidii’ nibe yan u fithik e biney ni kube thamiy ni yibe dariy fan nag raed nike n’ag raed boech e gidii’ nge toygang’ u lane tabinaew rodaed, ward, nge stake. Ngarin athamgil gaed ni ngad gol gaed ma gadaed gidii’.

Ke yoeg bo’or e fan ni dad nanged fan chiney, bay bo’or mit e sikeng rodad u yafas ney. Machane gadaed manang ni ra ayuweg daed Got ngad gel gaed ko pi sikeng ney fa’anra gadaed ra ning e ayuw Rok. Tomuren ni kad gafgow gaed ni kad kalngan’ gaed ko pi motochiyel ni kad kireb niged, ma gadaed gubin ma ba’ kanawo’en daed ko gil’ilungun u tharmiy. Bin tomur e pufthin e ra yib rok Somoel, ni kemus ni ir e ba’ e llowan’ rok, gonop, nge runguy ni nge pufthin nag daed.

Machane, ngarin athamgil gaed ngad fol gaed ko re gal motochiyel ney. Gadaed ra rrin’ ma gadaed be yan u thilin e motochiyel nge tu’ufeg nib fal’ rogon—pi motochiyel ni yibe fol riy ma yibe yan ko kanawo’ nib mat’aw, ma ka gadaed be tu’ufeg e gidii’ u to’ben daed Biney e yaen e ba tu’uf ngodaed ni ngad ninged e ayuw u tharmiy ko mange ngad ayuwegned nge mange dabin fol gaed riy nge rogon ni ngad tu’ufeged e gidii’ man motoyil u fithik e tay fan nge machib. Yan rodaed e dabin achig nag rogon e motochiyel machane ngarin dag ni ri yibe nang fan nge fithik e tu’ufeg. Yan rodad thingar ningad koel’ed chiya’ ni fan e bitir ni dawur nanged fan e sexual orientation roared, machane nib kireb ningad kuniuy nge pii’ ngay nib papay, ko bitir, e balyangaen’ nira thimur tomuren boech e ningyal’.²¹ Yan rodaed e dabun ban’en nibe chuweg ney ko fare kanawo’ nib mat’aw, ma dabun ninge ayuweg e pi’in nibe gagyeg nag e gidii’ nge palog rok Somoel. Gubin e pinn’ey ma ngad nanged ni ke micheg Got e athap nge falfalen’ nge taw’ath ngak gubin e pi’in nibe fol ko motochiyel Rok.

Pi nina’ nge papa’ nge gadaed gubin e ba mil fan ngodaed ni ngad filed fare gal motochiyel. Nifan fapi ppin ulan e Galasia, President Spencer W. Kimball ke weliy marunga’agen biney ulangin biney e thin: “Bo’or e tugul nib ga’ ko Galasia ulan bin tomur e rran ra buch bachane bay yo’or e ppin nib fel’ ku fayleng … ra ba’adag ni nge yib nga Galasia. Biney e ra buch ni ppin ko Galasia e ran guy raed ni yaed ba sug ko mat’aw nib yul’yul’ u lane yafas roraed nge ngiyal’ ni ppin ko Galasia e ran guy raed ni ri yaed ba thil … ko gubin e ppin u fayleng. … Ere ppin e ke mang e wo’ ko Galasia ni ra ga’fan ko rogon nibe ga’ ma be gel e Galsia u lane tin tomur e rran.”²²

Yi’iy ni yibe weliy, me President Russell M. Nelson e weliy ni fare “fare rran nike guy President Kimball e ir e daba’. Gimed e pi ppin nike guy!”²³ Boech’uw i gadaed nike runga’ag e re thin nem nike yan 40 e duw e pi ppin nem ko re Galasia ney e ra ayuweg e tafagar roraed nge tabinaew nike l’ag ko tin fayleng ban’en nge tin kireb ban’en rok. Meybil rog nge taw’ath rog e gimed ra fil man rrin’ e re thin nem nikan noeg, u dakean fithngan Yesus Kristus, amen.