Oyoho Akwa Mbet Iba
Akwa idaraesit nnyin oto nte nnyin inwamde ndito-eka iren ye iban.
Ndima ndito eka mi iren ye iban, esosongo ke se mbufo enamde ndibok Israel ke nkang veil mbiba, ndisosongo ufok mbufo, ye ndidiong uwem mbon emi enanade. Esosongo ke ndidu uwem nte ata mme anditiene Christ.1 Mbufo emefiok enyung ema ndinam ikpo mbet Esie iba, ndima Abasi nyung mma mbohoidung mbufo.2
Ke ofiong itiokiet emi ebede, Sister Nelson ye ami ima isobo ye mme tosin Ndisana owo ke Central ye South America, mme isuo Pacific, ye mme nsionsio obio ke United States. Nte nnyin isangade idorenyin nnyin edi ndisongo mbuotidem mbufo . Edi nnyin isinyong idi ye mbuotidem nnyin emi mbon ufok Abasi ye mme ufan emi isobode enamde esong. Eyeyak mbuana ye mbufo mkpo ita emi nyenede mmimmi?
Ke May, Sister Nelson ye ami ima isanga ye Elder Gerrit W. ye Sister Susan Gong ika South Pacific. Ke ini ikidude ke Auckland, New Zealand, ima isobo ye mme imam iba ke mosque iba ke Christchurch, New Zealand, emi edide ke ofiong iba emi ebede, ema ewot mme owo emi ekedude ke edu ukpono ke ata idiok usung.
Nnyin ima iseme ye ndito eka nnyin emi emi enyenede mbuotidem efen inyung isongo uduak nnyin ndiyak mme owo ekpono se mmo emade.
Ima inyung inam utom nwa-idem inyung ino ekpri okuk ndifiak mbop mosque mmo. Mbono nnyin ye mme ada usung Muslim emi okoyoho ye ima.
Ke August, Elder Quentin L. ye Sister Mary Cook, Sister Nelson ye ami ima isobo ye mme owo ke Buenos Aires, Argentina—ediwak mmo ikidighe mbon ufok Abasi nnyin—emi uwem mmo ekenemde oto mme wheelchair emi Latter-day Saint Charities nnyin okonode. Ama enem nnyin nte mmo ekedarade ye mbufa mkpo isang mmo.
Oyoho ediye ini ita ama odu ke urua ifang emi ekebede mi ke Salt Lake City. Okoto inem nwed emi ami nkobode ke usen emana mi nto nkaiferi—isua 14 emi ami ndikotde Mary.
Mary ekewet abanga mme mkpo emi enye ye ami ibuanade: “Afo enyene ndito Duop. Nnyin inyene ndito Duop. Afo esem Mandarin. Ndito duop ke ufok mi, ye ami ke esit, eketo China, ke ntre Mandarin edi akpa usem nnyin. Afo edi doctor esit. Esiak eyen eka mi anwan esit ikaba. Afo emema ufok Abasi eke hour iba. Nnyin imima ufok Abasi eke hour iba. Afo enyene edinem uyo. Eyen eka mi enyene edinem uyo nko. Enye edi nnan nte ami.”
Mme iko Mary ama otuk mi eti eti, owut akwa spirit esie nko ye nwa-idem ete ye eka esie.
Mme Latter-day Saint, ye mme anditiene Jesus Christe fen, esiyom usung kpukpru ini ndinwam, ndimenere, ye ndima mbon efen. Mmo emi eyomde ete ekot mmo ikot Obong “eyom ndinwam kiet eken, … ndifuho ye mmo emi efuhode; … ye ndidong mmo emi eyomde idongesit esit.”3
Mmo eyom ndidu akpa ye udiana ikpo mbet ke akpaniko. Ke ini nnyin imade Abasi ye ofuri esit nnyin, Enye onwongore esit abanga mfon mbon efen ke ediye, eti usung.
Eyesong ndibat ibat utom emi mme Latter-day Saint enamde ofuri usen ke ofuri isua ke ererimbot, edi edi mmem mmem ndibat eti mkpo emi ufok Abasi nte eboho anamde ndidiong iren ye iban—mkparawa ye mme nkaiferi—emi eyomde unwam.
Ekesiak nkok unwam ufok Abasi ke isua 1984. Ke ini oro em etre udia ke ofuri ufok Abasi man eko okuk ndinwam mbon akang okomumde ke edem usiaha utin ke Africa. Mbon ufok Abasi ema etip million $6.4 dollars ke usen utre udia kiet oro.
Ndien ema edong Elder M. Russell Ballard ye Brother Glenn L. Pace ete eka Ethiopia ekese nte edibiatde okuk nwa-idem emi. Edinam emi ekedi ntongo se edifiokde nte Latter-day Saint Charities.
Ntongo ke ini oro, Latter-day Saint Charities eno mbon enanade se ikande billion dollar iba nte unwam ke ofuri ererimbot. Eno mme owo unwam emi owo isehe ufok Abasi mmo, ebiet mmo etode, idut, se mmo efiokde, se mmo edide, mme ekikere ukara mmo.
Emi idighe kpukpru. Man enwam mbon ufok Abasi Obong emi edude ke mfina, nnyin imima inyung inim mbet utre udia eke eset4 Nnyin itie biong man inwam mmo emi biong odongde. Usen kiet ke ofiong, nnyin itie biong inyung ino se udia oro akpade (mme se iwakde ikan oro) man enwam mmo emi enanade.
Ami ndifreke akpa ini nkekade West Africa ke 1986. Mbon ufok Abasi ema eworo edi ke ediwak ibat. Okposukedi ke mmo ikinyeneke ediwak nkpo, ediwak ekesine ata nsasana afia ofong.
Ami mma mbup stake president nte enye eke akande ese mkpo abanga mbon emi minyeneke mkpo. Enye ama oboro ete ke mme bishop mmo ema etim efiok gospel mmo. Edieke mbon ufok Abasi ekande edia mkpo ikaba ke usen, owo inyomke unwam. Edi edieke edide ini kiet mme ikpikpu—tutu ke ini mbon ufok enwamde—mme bishop eno udia, emi otode okuk utre udia. Ndien enye adian utibe iko emi: okuk utre udia mmo esikpon akan se mmo ebiatde. Eno mbon efen emi enanade ekan mmo se isuhode. Mme ikpo owo Africa emi ema ekpep mi akamba ukpepnkpo ebanga odudu mbet ye spirit utre udia.
Nte mbon ufok Abasi, nnyin iminyene ebuana ye mbon emi ebode ufen ke usung ndomo kiet.5 Nte ndito iren ye iban Abasi, kpukpru nnyin idi ndito eka iren ye iban. Nnyin imida item eke Akani Testament emi odohode ete: “Afo eyetat ubok fo ono eyen eka fo, ono ubuene, ye owo unana.”5
Nnyin nko imidomo ndinam mme ukpepnkpo Obong Jesus Christ nte ewetde ke Matthew 25:
“Koro ami nkokopde biong, ndien mbufo eno mi ndia: itong akasat mi, ndien mbufo eno mi mmong: nkedi esen, ndien mbufo eda mi eka ufok:
“Nkedi iferi, ndien mbufo esine mi ofong: nkododongo, ndien mbufo edi edise mi. …
“…Adanga nte mbufo ekanamde mkpo emi eno kiet ke otu ndito ete mi, mbufo ekanam eno mi.”7
Yak ami nwut uwut mkpo ifang nte Ufok Abasi enamde mme ukpep mkpo Andinyanga emi.
Man ekpan biong, Ufok Abasi enyene ebiet ubono mkpo bishop 124 ke ofuri ererimbot. Oto ke mmo, eno mbon emi enanade mkpo nte ekebe udia 400,000 ke isua kiet ke ofuri ererimbot. Ke mme itie emi mme ebiet ubono mkpo miduhe, mme bishop ye mme branch esio okuk utre udia Ufok Abasi eda eno mbon unana mmo udia ye mme mkpo eken.
Edi, biong iduhe ke Ufok Abasi ikpong ndien enye ke aka iso otot ke ofuri ererimbot. Biong enehede okpon ke ererimbot. Nwed emi United Nations ewetde owot ete ke mbon emi biong odongde ke ererimbot ebe million 820—ekpri osuho ke ndidi kiet ke owo usukkiet emi edude ke ererimbot.8
Nsuto enyene ndik ibat! Esit enem nnyin abanga mme eno mbufo. Otode ke eno ima esit mbufo, million mme owo ke ofuri ererimbot eyebo udia, ofong, ebiet nna, mme wheelchair, ibok, edisana mmong, ye awakde akan oro.
Ediwak udongo ke ofuri ererimbot oto ndedehe mmong. Mfin emi, utom unwam ke Ufok Abasi anyanga ndino nsasana mmong ke ediwak efak ke mme obio 76.
Utom kiet ke Luputa, ke Democratic Republic eke Congo edi akwa uwut mkpo. Ye mme owo emi ewakde ekan 100,000, obio oro ikinyeneke mmong. Akana nte mme owo esanga ata anyan isang man ebo mmong asanade. Mmong otode obot emi oyomde usung ke itiat 18 (29km), mbon edungde ke ufot obio ikanke ika kpukpru ini ikibo mmong.
Ke ini mme missionary unwam nnyin eke ekopde ebanga emi, mmo ema enam utom ye mme ada usung ke Luputa ke ndino mme mkpo utom ye ukpep mkpo man eda mmong esok mbon ufot obio. Mbon Luputa ekeda isua ita etibi obube metre kiet emi ekebede ke itiat ye akai. Ke ndinam utom ye esit kiet, usen idara ama edi ke ini edisana mmong okode ono kpukpru owo ke obio oro.
Ufok Abasi nko enwam mbon eyode ke esen idut, mme oto ekong, mme mkpo ntibe obot, mme ukobo otode edu ukpono. Mme owo emi ekande million 70 enana ufok mmo.9
Ke isua 2018 ikpong, Ufok Abasi ama ono obio 56 mme unwam ini mkpo ntibe. Ke ndidian do, ediwak mbon Ufok Abasi ema ewa ini mmo ke mfon ndinwam mbon eyode ke esen idut ndifiak ndu ke emem. Nnyin imikom mbufo kiet kiet emi ekenwamde mme owo efiak enyene ebiet idung.
Ke otode eno ntat-ubok emi enode mme nkok Deseret Industry ke United States, ebo mme million ofong enyung edeme mmo ke isua ke isua. Ke ini mme bishop edade ata ediwak eno emi enwam mbon unana mmo, eno mme nka unwam efen se isuhode se iwakde ikan ete edeme ke ofuri ererimbot.
Ndien ke isua emi ebede ikpong, Ufok Abasi ama ono mbon ewakde ekan 300,000 ke obio 35 usobo enyin, enwam mme tosin iban uman ye ndito onwong ke obio 39, enyung eno mme owo emi edungde ke nsionsio obio wheelchair ewakde ekan 50,000.
Efiok Ufok Abasi nte ada iso mme andinwam ke ini unomo. Nko mbemiso oyobio edi, mme ada usung ke Ufok Abasi ye mme anam utom ke mme ebiet oro esikok ibuot nte edidemede mkpo ye nte edinwamde mbon emi mfina oro otukde.
Ke isua emi ebede mi ikpong, Ufok Abasi ama anam ikpo utom unwam emi ewakde ekan 100 ke ofuri ererimbot, ndinwam mbon enyenede mfina eto oyobio, ikang, unyenge isong, ye mme mfina efen. Ke ini ekande, mbon Ufok Abasi nnyin emi esinede utouto ofong Helping Hands esiworo ke akwa ibat ekenwam mbon emi enyenede mfina. Uto utom emi, emi ediwak mbufo enamde, edi akpan ntak utom unwam.
Ndima ndito eka iren ye iban, mme mkpo emi ami ntingde mbanga mi edi ekpri ubak ke utom unwam eke Ufok Abasi Jesus Christ eke mme Ndisana-owo ke Ukpere-edem Ini.10 Ndien mbufo edi mbon emi enamde mme mkpo emi etibe. Ke ntak uwut mkpo ke uwem mbufo, eti esit mbufo, ye unwam ubok mbufo, ediwak obio ye mme ada ukara etoro utom mbufo.11
Tongo nkedi President Ufok Abasi, idem akpa mi abanga ibat mme president, mme prime minister, ye mme ambassador emi ekomde mi ke ntak utom unwam emi inamde ino ikot mmo. Ndien mmo nko enemesit ebanga ifik emi nti mbon ufok Abasi nnyin esinde ke obio mmo nte mbon emi enamde mkpo ke obio.
Idem akpa mi nko nte mme ada ibuot ke ererimbot edide edise First Presidency ye idorienyin ete ke eyesiak Ufok Abasi ke obio mmo. Ke ewe ntak? Koro mmo efiokde ete ke mme Latter-day Saint eyenwam ndibop nti ufok emana ye obio, enam uwem ofon ye mbon efen ke ebiet ekededi emi mmo edungde.
Ke misehe ebiet emi nnyin ikotde ufok, mbon Ufok Abasi ekere eti abanga Abasi nte Ete ye mme owo nte ndito ete. Ke ntre, idaresit nnyin oto nte nnyin inwamde ndito eka iren ye iban, isehe ebiet emi nnyin idungde ke ererimbot emi.
Ndinwam mbon efen—ndida ini nkere mbanga mbon efen mme akande oro nte ikerede ibanga idem nnyin—edi idaresit nnyin. Akpan akpan, yak ndian do, ke ini mifonke ye nnyin ke idem ye ke ini adade nnyin oworo okpong ebiet imade. Ndidu oyoho akwa mbet ibat oro edi akpan ke ndidi eti mbet Jesus Christ.
Ndima ndito-eka mi iren ye iban, mbufo edi nti mfri uwut mkpo emi otode nditiene mme ukpep mkpo Jesus Christ. Mekom mbufo! Mema mbufo!
Ami mefiok nte ke Abasi odu uwem. Jesus edi Christ. Ema efiak eda Ufok Abasi Esie edi ke ukperedem usen emi man enam ndisana uduak esie. Ami nting iko ntiense emi ke enying Jesus Christ, amen.