Idorenyin ke Christ

Ndito eka iren ye iban, ke ini Easter emi nnyin ise ediye Eriset Obong ye Andinyanga nyin, Jesus Christ. Nnyin iti edima ikot Esie ”Edi etiene mi, kpukpru mbufo emi ekpade mba enyung ebiomde edidobi mbiomo, ndien Ami nyeno mbufo nduok odudu.

“Emen okpono mi ekongo ke itong mbufo, enyung ekpebe mi; koro mmenyene ifure-ifure ido nyung nsuhore idem ke esit; ndien mbufo eyekut nduok-odudu eno ukpong mbufo.

“Koro okpono mi ememem, mbiomo mi onyung efefere.”¹

Ikoot Andinyanga ete edi etiene Enye edi ikoot ono kpukpru owo idihe man etiene Enye kpot nko edi man ediduk Ufok Abasi Esie.

Ke ufang mbemiso itie ikot emi, Jesus ekpep nte enamde emi ke ndiyom nte etienede Enye. Enye odoho ete, “Baba owo kiet ifiokke Eyen ke mibohoke Ete; baba owo kiet inyung ifiokke Ete ke mibohoke Eyen, ye owo ekededi eke Eyen amade ndiyarare Enye nno.”²

Jesus oyom nnyin ifiok ite ke Abasi edi edima Ete ke Heaven.

Nnyin ndifiok ite ke Ete nnyin ke Heaven ama nnyin eyewam nnyin ndifiok owo emi idide inyung ifiok ite ke nnyin ito akamba nsinsi ufok emana.

Ibighike Mayo Clinic ama odoho ete: “Edi akpan ndinyene ifiok ite ke enyene ebiet idude. … Ofuri nkpo ke uwem nnyin okongo ke ndinyene ebiet emi idude.” Etop emi adian do ete, “Nnyin ikemeke ndidiangare ifiok ebiet emi idude mkpong nsongidem ke idem ye ke ibuot”³—ndien, ami nyedian, nsongidem eke spirit nnyin.

Mbubreyo usen kiet mbemiso ufen Esie ke Gethsemane ye mkpa ke cross, Andinyanga ama osobo ye mme mbet Esie ke Passover. Enye odoho mmo ete, “Ke ererimbot mbufo eyekut ukut:edi esong esit, Ami nkakan ererimbot.”⁴ Mbemiso usop utin ke edem usen, Jesus Christ ama okut ukut onyung “akpa [ke cross] ono mme idiok mkpo nnyin.”⁵

Ami mekere nte nti iban ye iren emi eketienede Enye ekedide ikpong ke Jerusalem nte utin osopde eyo onyung okut ndien ndik omum mmo.⁶

Kpa nte mme mbet ke eset mkpo nte isua 2,000 ekebede, ediwak mbufo nko eyedi ikpong ke ini ke ini. Ami mmedi ikpong tongo ke mkpa edima anwan mi, Barbara, ke akande isua iba ye ubak emi ebede. Ami mediongo se oworo ke mbon ufokemana, mme ufan, ye nsanga edikanare nkuk edi osuk okokop ndobo—koro nwan mi iduhe mi aba ke nkang mi.

Udongo COVID-19 etim ada ekikere ikpong emi osok ediwak owo. Edi, ke misehe mme mfina emi nnyin inyenede ke uwem, nnyin imikeme, kpa nte ke akpa usenubok Easter oro, ndidemere ke obufa uwem ke Christ, ye mme mbufa ufang ye ifet nte nnyin ikade itiene Jehovah iyom idorenyin.

Ami mokop ubiak nno mbon emi minyene ebiet emi ediande idem. Nte ami nsede mme mbuk-nkpontibe ke ererimbot, ami mokut ediwak owo emi etiede ekop ndobo-ikpong emi. Ami nkere nte, eke ediwak owo, oro edi koro mmo ifiokke ete ke Ete Heaven ama mmo ndien ke kpukpru nnyin isine ke nsinsi ufokemama Esie. Ndinim ke Abasi ama nnyin ndien ke nnyin idi ndito Esie odong nnyin esit.

Koro nnyin idide ndito spirit Abasi, kpukpru owo enyene edisana ebiet emi mmo etode, edisana obot ye ukeme. Nnyin kiet-kiet “idi ndima ndito eke ete ye eka ke heaven.”⁷ Emi edi idiongo inyene nnyin! Emi edi se nnyin idide!

Idiongo eke spirit nnyin okori nte nnyin ifiokde ediwak idiongo uwem nnyin, emi esinede idut, ido, mme edu obio.

Ifiok idiongo eke spirit ye ido, ima, ye ebiet itode ada idorenyin ye ima inyenede ino Jesus Christ edi.

Ami nting mbanga ima ke Christ idighe ikpikpu ekikere. Edi, ami nting mbanga idorenyin nte nkpo emi editibede. Uto idorenyin emi edi akpan ke ndikan se idiokde, ndino odudu ye nsongo ke spirit, onyung anam ifiok ke Ete ke Heaven ama nnyin ndien ke nnyin idi ndito Esie, emi itode ufokemana Esie.

Ke ini idoride enyin ke Christ, nnyin idifiok ite ke nte inamde inyung inimde ndisana ediomi, nti udong nnyin osu otoke Enye.

Eboho mme Apostle Duopeba ediana kiet eno item ke spirit akam ye udong ndikan nwam kpukpru owo emi edide ikpong mme ekere ke mimmo isineke. Nnyin imoyom ndinwam ofuri mbon emi eopde ndobo emi. Yak ami nsiak, akpan-akpan, mbon eke midɔhɔ-ndɔ idahaemi.

Ndito-eka iren ye iban, ediwak ikpo owo ke Ufok Abasi mfin emi enana ebe mme nwan, ndɔ asuana, mme midɔhɔ ndɔ kanga. Usuk edu ke mkpaidem ebanga ufang mmo enyenede ye itie mmo ke uduak Abasi ye ke Ufok Abasi. Ana nte nnyin ifiok ite ke nsinsi uwem idighe idaha ke ndo idahaemi edi edi nditiene nyung “nsongo ke iko ntiense Jesus.”⁸ Idorenyin mbon midoho ndo edi ukem ukem ye kpukpru mbon Ufok Abasi Obong emi ekefiakde emen edi—enyene mbom Christ eto ke “ndisuk-ibuot nno ewuho ye edinam Iko Abasi.”⁹

Yak ami nting ke odu mme akpan ukpepnkpo emi anade nte nnyin ifiok.

Akpa, mme nwed Abasi ye mme ukpep-mkpo mme prophet eyo mfin ewut ete ke owo emi anamde mme ediomi iko Abasi enyene ufang ndiboho. President Russell M. Nelson ekpep ete: “Ke usung ye ini Abasi, ndisana Ikot Esie eyebo edidiong mmo. Abasi eyekpe ikpe onyung ono owo kiet-kiet utip nte asangade ye udong esit ye ido esie.”¹⁰

Udiana, owo itingke ata ini ye ndaha eke edinode kpukpru mme edidiong edimenere emi, edi ka akpan iko eyeno mmo.¹¹ President Dallin H.Oaks anam anwanga ete ke “eyenehede ubak ndaha eke uwem isong enim ke Millennium, emi edide ini enode ofuri nkpo se mikemke ke akwa uduak inemesit ekem ono ofuri nti ndito eke Ete nnyin.”¹²

Emi iworoke ite ke esik kpukpru edidiong enim tutu ini Millennium; ema ebemiso ebo usuk, ndien eyeka iso ebo efen tutu usen oro.¹³

Ita, ndibet Abasi oworo ndika iso nkop item nyung nkori ke spirit ntiene Enye. Nditie-mbet Jehovah idihe ke ndibiat ini ntie mbet. Kukere ke idu ke ubet etiede ebet .

Nditie-mbet Abasi oyom edinam. Ami mmekpeb ke ediwak isua nte ke idorenyin nnyin ke Christ okori kini nnyin inamde-nkpo ino mbon efen. Ndinwam ke nte Jesus akanwamde, nnyin inehede inam idorenyin nnyin ke Enye okori.

Ndikori ke idem idahaemi ke ini ebetde Abasi ye mme enwongo Esie edi akpan akpan, edisana ubak uduak Esie ono nnyin kiet kiet. Enehede eyom se owo ekemede ndinam idahaemi man Ufok Abasi okori ke ererimbot enyung etang Israel ebook. Ndaha ndɔ inyeneke nkpo ndomokiet ndinam ye ukeme owo ke ndinwam. Abasi okpono mbon emi enamde mkpo eno enyung ebetde Enye ke ime ye mbuotidem.¹⁴

Inang, Abasi ono kpukpru ndito Esie nsinsi uwem. Kpukpru mbon emi enyimede eno-mfon erikabare-esit eke Andinyanga enyung enam ibet Esie eyebo nsinsi uwem, okposuk-edi ke mmo inyeneke kpukpru ido ye se ifonde-ima ke uwem. Mbon emi ekabare esit eyekut udong Abasi ndifen nno mmo, nte Enye odohode, “Ihn, kpa nte ediwak ini emi ikot mi erikabare esit ami nyefen mme ndudue mmo enamde mi.”¹⁵

Ke akpatre, ukeme, udong, ye mme ufang owo enyenede ke mme mkpo ndumek, ye ndidot ndinyene mme nsinsi edidiong, edi mme mkpo emi Abasi ikpong ekemede ndibiere.

Ition, uko nnyin ke osongo emi ɔwɔhɔ ke mbuotidem nnyin ke Jesus Christ, emi mfon Esie enehede kpukpru nkpo ke uwem isong enim.¹⁶ Enam ofuri enwongo oto ke Enye, emi, otode ke Erisio-isop Esie, “okosuhɔke-de akan ofuri nkpo”¹⁷ ndien onyung “akan ererimbot.”¹⁸ Enye “etie ke ubok nnasia Abasi, man obo oto Ete unen mbom esie emi enye enyenede ono ndito owo[;] … ; ke ntak oro enye ekpe-ubok abanga ndito owo.”¹⁹ Ke akpatre, “mme owo eyeyoho ye ubong esie, enyung ebo inyene mmo”²⁰ nte “mme adia-akpa ye Christ.”²¹

Udong nnyin edi ke mme ukpep-mkpo emi eyenwam kpukpru owo ndinyene idorenyin ke Christ.

Kufre ete ke afo edi eyen Abasi, Nsinsi Ete nnyin, ke emi ye ke nsinsi. Enye ama fi, ndien Ufok Abasi ama onyung oyom fi. In, nnyin imiyom fi! Nnyin imiyom uyo, ifiok, ubok-utom, mfon, ye edinen ido mbufo.

Ke ediwak isua, nnyin imiting iko ibanga “ndito ekponde ekem edi idoho ndo,” “mme ikpo-owo midoho ndo,” ye “mme ikpo-owo.” Mme enying oro eyenwam ke ndinam utom usuk ini edi ekeme ndikpuho nte nnyin isede mbon efen.

Ndi usung odu ndikpuho uwem emi emi ekemede ndidiangare nnyin ye kiet eken?

President Nelson odoho ete yak nnyin ikot idem nnyin mbon Ufok Abasi Jesus Christ Mme Ndisana Owo ke Ukpere Edem Usen. Oro esim kpukpru nnyin, idighe ntre?

Iko Abasi Jesus Christ enyene odudu ndidian nnyin kiet. Nnyin imibiet kiet eken ikan nte nnyin idide nsionsio. Nte mbon ufok emana eke Abasi, kpukpru nnyin idi ndito eka iren ye iban. Paul ama odoho ete,“Ndien [Abasi] anam kpukpru mme idut eto ke ekpuk kiet eworo edidung ke ofuri iso isong.”²²

Mbufo mme stake president, bishop, ye mme ada ibuot iren ye iban, medoho yak eda kpukpru mbon stake, ward, eboho, ye nka mbufo nte owo emi ekemede ndinwam nyung nnam utom ke ediwak usung.

Kpukpru owo ke eboho, nka, ward, ye stake nnyin enyene mme eno ye ifiok emi Abasi onode emi ekemede ndiwam ke ndibop obio-ubong Esie idahaemi.

Yak nnyin ikot mbon midoho ndo ete enwam, emenere, enyung ekpep. Duok nkani ido emi enamde mmo ekere ke idi ikpong ndien ke mmo edi isen-owo mme ke mmo ikanke inam utom.

Ami meno iko ntiense ke ini Easter emi mbanga Andinyanga, nnyin Jesus Christ, ye nsinsi idorenyin emi Enye onode mi ye kpukpru mbon emi ebuotde idem ke enying Esie. Ndien ami nsuhore-idem nnɔ ikɔ ntiense emi ke edisana enying Esie, kpa Jesus Christ, amen.