Pahkomuhta luhn Mwet Lahngo

Sie mwe luti loal suc ma lutiyuck sin Mwet Lahngo ke orekma Lal fin facluh ah pa yohk srihpaciyacn pahkomuhta nuh sin mwet sahyac. Lwelah kuht in ngwetlah liye mwe luti se inge ac moulkihn yac uh ke sie ip yohk ke muhtwacta lal Jisus nuh in lohm sel Simon sie mwet Pharisee.

Wosasuc lal Luke el sruhmuhn ke sie muhtwacn, suc ma tuniyuck muh sie muhtwacn koluk, el utyak ke lohm sel Simon ke pacl se ma Jisus El oasr loac. Ke auli luhlahp, muhtwacn se inge fahsryak nuh yohrohl Jisus, ohllah niyacl ke sronin muhtahl, elah niyacl ke aunsifacl, ac ngok niyacl ac akmuhsraelah ke mwe akmuhsra na kweng.¹ Mwet se lohm sac, suc ma fuhlwact nuhnkwacl, suc nuhnkuh kacl muh el wo liki muhtwacn sac, nuhnkuh nuh sel sifacna ke ahngyang ac insefuhlwact, “Fin mwet palu na pwaye se pa inge, el ac etu lah su mutan se kahlul inge, oayapa ouiyen moul lal lah el sie mutan koluk.”²

Nuhnak se lal muh el wo liki mwet ngiac koluhl elan oraclah nuhnuhnkuh sesuwohs nuh sel Jisus ac muhtwacn se. Tuhsruhk ke kahlwem yohk Lal, Mwet Lahngo El etuh nuhnak lal Simon ac, ke lahlmwetmwet yohk lal, lain srahngwesroa lal Simon, ac oacyacpac kael ke suhkwac nuhnak lal ke el eis mwet kacto nuh in lohm sel pa nuh kacl Mwet Lahngo. Pwacye lah, kaiyuck suwohs lal Jisus nuh sin Pharisee sac el sie mwe lohoh lah oasr mwe sang luhn palye sel Jisus ac muhtwacn se inge ke inse puhsisacl ac welac lal, el auliyak ac nuhnakmuhnahsyeyuck ma koluk lal.³

Oacpacna nuh ke ma puhkantwen na sikyak ke lusen moul lal Jisus, ohiyac se inge el sifil ahkpwacyeiye lah Jisus el ahkkahlwemye pahkomuhta nuh selos nuhkwewa ma ac fahsr nuh yohrohl—tiac srisri—ac yohkna nuh selos suc enenuh emet kahsruh Lal. Auli pwacye ac luhngse muhtahl ma ahkkahlwemyeyuck sin muhtwacn sac nuh sel Jisus el mwe ahkpwacyeiye auliyak pwacye ac kena lal in elah ma koluk lal. Tuhsruhk, nuhnak insefuhlwact lal Simon, weacng inse kwekwe lal,⁴ kosracllah elan ahkkahlwemye etatwen nuh sin sie moul suc ma auliyak, ac oacyacpac kahlwem mukwikwi lal nuh sin Mwet Lahngo lah pihlacsr ac srangwesroa. Fohngfong lal ahkkahlwemye lah ohiyacn moul lal uh wacngihn kalmac mwena luhmah ac liyacacng masap ac luhlahlfongi lal mwena sukok fuhlwact ac wacngihn muhtahl kac.⁵

Kuhlwacnsap ac pahkotwen lal Jisus ke ma se inge oakiyac sie srikasrak suwohs kuht in orekmakin sie sin sie nuh mwet lili wiyacsr. Puhkantwen kain in srihkasrak ma sruhmuhnyuck ke ma suhmuhslah ke Mwet Lahngo, el mokleyuck ke pahkotwen loal ac kawihl, ke el asruoki nuh sin mwet in lwen Lal ac kahsrwelos suc kweok ac elos suc “muhlallah, ac oaclihk nuh ke acn nuhkwewa, oacna sheep ma wacngihn shepherd lal.”⁶ El ahsrelah pahkotwen Lal nuh selos suc enenuh kahsruh nuh ke srenac toasr lalos, kwewana ke moul in mahno ac nguhn.⁷

Ohiyac pahkotwen luhn Jisus el okahn luhngse,⁸ pa nuh ke, luhngse nwacsnwacs ac suwohs Lal, suc pa kuhiyen iwaclah Lal. Mukwikwi ke pahkotwen el ohiyac yohk srihpac se nuh selos suc insacnweacng nuh ke ahkmuhtahlyeyuck ac akohnohki nuh ke ohiyac sahyac luhn Kristin pa nuh ke ahsor yurin mwet ahsor ac in oasr nuhnak in etatwen, pahkotwen, ac kuhlwacng.⁹ Ahkkahlwemyeyacn pahkomuhta nuh sin mwet sahyac, pwacyelah, pa koanon wosasuc luhn Jisus Kraist ac el akihlenhyac fototo luhn nguhnasr ac puhla lasr nuh sin Mwet Lahngo. In weacng pac, el ahkkahlwemye kuhiyen orekma la ma El oruh nuhke ohiyen moul lasr uh ac el fahkwack luhpan nguhnasr.

Yohk kalmac in liye lah orekma pahkotwen lal Jisus el tiac mwena wiwi pacl ac ma sapkihnyuck, wiwina ma tahklac kuneyucki in ahkfahsryeyucklac, tuhsruhk lwen nuhkwewa ohiyac inge sikyak ke srihpen luhngse nwacsnwacs Lal nuh sin God ac tuhlihk Nahtuhl ac Kena Yohk Lal in kahsrelos.

Jisus El tuh kuh in akihlen enenuh luhn mwet finne El tu loessalah luhkwelos. Ke ma inge, tiac mwe ahklut se, oacna nuh ke, tukun na unweyucklac sie mwet kuhlwacnsap luhn sie solse fuhlwact,¹⁰ Jisus el fuhfahsryucsr liki acn Capernaum nuh ke siti pahngpahng Nain. Pa ingacn acn se ma Jisus El oruh sie ma usrnguck kuhlwacng emeet ke muhtwacwaciyen kuhlwacnsap Lal ke El sapsap nuh sin sie mukul fuhsr misac, wen sefanna nuhtin sie ninac katinmas, in tuyak ac eis moul. Jisus El tiac puhlakihn muhkwena kweok upac luhn ninac sac tuhsruhk moul upac ac kwacoh ke moul lal, ac El pwacnwacng Elan mokleyuck ke pahkomuhta pwacye nuh sel.¹¹

Oacpacna muhtwacn koluk sac ac katinmas se fin acn Nain ah, mwet pucspucs in moul lasr suk ahkwo, lohacng, in wi ma orek uh, ac oacna kain in kahsruh ma kuht kuh in sang nuh selos. Kuht nuhkwewa kuh in mwe orekma luhn Leum ac oruh pahkotwen lasr nuhselos suc enenuh kahsruh, oacna ke Jisus El oruh.

Nga etuh sie tuhlihk muhtwacn suc isuslac ac inngoasrol mihsaclihk na tuhkuh. El enenuh elan eis laslas ac tuhta ke lwen ahk luo lal fin facl se. Mokleyuck ke pahkomuhta pwacye nuh selos suc puhtatyang nuh ke kain in elyah se inge, tuhlihk muhtwacn se inge ac pahpah ninac kiyacl suk in sang taptap, kahlwem, ac kahs in kahsruh nuh selos suc sun kain in elyah upac se inge. Elos suhmuhslah nuh sihk tuhfahna tari ac akacsruhi: “Ke elyah luhn tuhlihk muhtwacn se nahtuhsr inge, oacyacpac pacl wowo lasr in ohsun nuh sin mwet wowo ma enenuh kahs in ahkwo, taptap, ac ahkkweye. Ke kuhtuh pacl somlah ah, tuhlihk muhtwacn se nahtuhsr inge, suc yac 11 ingena, el sramsram nuh sin sie siyacnyacn ma ahwowo nahtuhlos isuslac pac ke kain elyah se inge. Ke elos sramsram, muhtwacn se nahtuhsr inge eslah mahs se liki infwacl ac inwacluhl suc ma akwuck in orekmakihnyuck ke corona se inge siyacnyacn se inge in liye lah srwackna oasr finsrak, finne ahwowo se nahtuhlos inge ac sislah pacl kuh yac puhs in ahkwoyelah elyah se ke inngoasrol inge. Kuht arulacna srui ke pacl wowo in tahfwelah kahlwem lasr nuh selos suc kweok, oacna ke Mwet Lahngo El oruh nuh sesr. Kuht puhla muh kuht ahkfihsrwacsrye ngal lasr ke kuht ahksrihkye ngal luhn mwet sahyac.

Mwet kawuck sacohk luhk, ke kuht sifacna insacnweacng in sang ohiyen pahkomuhta nuhke ohiyen moul lasr, oacna ke moulkihnyuck sin Mwet Lahngo, ac yohkwaclihk puhla kuh akihlen lasr ke enenuh luhn mwet uh. Ke yohkwelihk akihlen lasr, puhla in loacng ac luhngse pwacye ac fah kahlwem ke mukwikwi nuhkwewa lasr. Leum El ac fah akihlen insacnweacng lasr, ac kuht ac fah ahkinsewowoyeyuck ke pacl wowo in ekihn kuhfa in orekma ke Pahol in ahkfihsrwacsrye ac use kahsruh nuh selos suc wacngihnlac finsrak lalos.¹²

Kaiyuck lal Jisus nuh sel Pharisee Simon oacyacpac oruh kahlwem lah kuht enenuh in tiac oruh nuhnuhnkuh isrlwacl ac koluk nuh sin mwet lili wiyacsr, mweyen kuht nuhkwewa enenuh kahlwem ac pahkotwen sin Pahpah Tuhmwacsr suc luhngse nuh ke suhfas lasr. Yac tiac pa inge ma Leum El luti ke sie pacl sahyac ke El fahk, “Efu ku kom liye kutkut srisrik ma oan luin mutun mwet lim, ac tia lohang nu ke polosak lulap luin motom uh?”¹³

Kuht enenuh in nuhnkuh lah tiac fihsrwacsr in kahlwem ke ma sik nuhkwewa in pwacnwacng ohiyac kuh mukwikwi luhn sie mwet. Ma kahlwem ke luhkuhn mwet se kuh in kiyacpwelah ac kwacna tiac pwacye ma srihkeyucki kuh fwacklac ke elah lal. Christ El tiac oacna kom ac nga, El kuh in liye kahlwem ke srihpac nuhkwewa ma pwacnwacng sik luhn kais sie ohiyac.¹⁴ Finne El etuh mwe muhnahs lasr kwewa, Mwet Lahngo El tiac ingacn na nuhnuhnkwe kuht tuhsruhk El tahfwelah in wi kuht orekma nuh kac sislah pacl yohk, in kahsrwe kuht in eslah pohloh sahk liki ahtron muhtahsr. Pacl nuhkwewa, Jisus El liye insiacsr tiac luhkuhsr.¹⁵ El sifacna fahk, “Tiac nuhnuhnkuh ke ma kom liye ke luhkuh an.”¹⁶

Inge, nuhnkuh ke mwe luti lahlmwetmwet luhn Mwet Lahngo nuh sin mwet tuhma lutlut singucul luo luhn mwet Nephites ma kuhpahsr nuh ke kihsensiyuck soko inge:

“Ac kowos etuh lah kowos fah nuhnuhnkuh mwet inge, in fal nuh ke nuhnuhnkuh ma Nga fah usot nuh suwos, ma fah suwohs. Ke ma inge, ohiyac fuhkah luhn mwet uh kowos enenuh in oacna? Pwacyena Nga fahk nuh suwos, finne in oacna Nga.”¹⁷

“Ke ma inge Nga kena tuh kowos in suwohs finne in oacna Nga, kuh in oacna Pahpah tomowos suc oasr inkuhsrao El suwohs.”¹⁸

Ke mwe luti se inge, Leum El oruh nuhnuhnkuh se inge nuh selos suc eis nuh faclos in nuhnuhnkuh kwacohlah luhn mwet sahyac ke sesuwohs. In sifacna nahwe kuhtlac in oruh nuhnuhnkuh suwohs, kuht enenuh in insacnweacng in oacna Mwet Lahngo ac liye suhfas luhn kais sie ke pahkomuhta, finne ke Muhtahl. Fin kuht nuhnkuh kuht srwackna loessalah like suwohs, sahp ac wo fin kuht pihtucki ke niyacl Jisus ac kwacfe ke pahkotwen nuhke sesuwohs lasr, oacna ke muhtwacn auli sac oruh ke lohm sin Pharisee sac, ac tiac sislah pacl yohk kuh kuhiyacsr nuhke tuniyacn muhnahs kuh suhfasiyacn mwet sahyac.

Mwet kawuck sacohk wiyuck, nga fahkwack lah fin kuht insacnweacng in sang srihkasrak in pahkomuhta luhn Mwet Lahngo nuh ke moul lasr, kuh lasr in kaksakihn ma wo luhn mwet tuhlan lasr ac yohkwaclihk ac puhla lasr in nuhnuhnkuh sesuwohs lalos ac srihkeni. Akohnohki lasr nuh sin God ac kapkapwack, ac pwacyena lah moul lasr ac eklac mihs, puhla lasr ac fihsrwacsrlah, ac kuht ac fah sokwack engan kawihl. Ac fah etweyuck kuht muh kuht mwet in ahkmihs,¹⁹ suc kahs la uh fihsrwacsr oacna ohu in litutacng.

Nga pruhe tuh kuht in eklac mongfihsrwacsr in kweok ac kahlwem ke mwet lili wiyacsr ac tuh pahkotwen luhn Leum, ke fakpacp puhsisacl, in ahkfihsrwacsrye semuhtweng lasr ke suhfas luhn mwet ngiac. Pa inge suliyuck luhn Mwet Lahngo nuh sesr. Nga fahkwack lah Jisus El moul. El pa srikasrak suwohs se nuhke moulkihnhyen pahkotwen ac mongfihsrwacsr. Nga fahkwack luhlahlfongi luhk ke ma pwacye inge ke ine muhtahl luhn Jisus Kraist, amen.