Talanoaina o le Soifua Maloloina Faalemafaufau

E ui ina sa fiafia lo matou aiga i faamanuiaga silisili a o savavali fiafia i le ala o feagaiga, ae sa matou feagai foi ma faigata silisili o le olaga. Ou te fia faasoa atu nisi o aafiaga patino e faatatau i gasegase faalemafaufau. O nei mea e aofia ai faama’i o le atuatuvale, popolevale matuia, faaletonu o le mafaufau, ADHD—ma o nisi taimi o se tuufaatasiga o na mea uma. Ou te faasoa atu nei aafiaga agamalu ma le faamaoniga a i latou na aafia ai.

I le taimi o la’u galuega, sa ou feagai ai ma le faitau selau o tagata taitoatasi ma aiga na i ai aafiaga faapena. O nisi taimi ou te mafaufau ai pe o le “gasegase faataumaoi” ua ufitia ai le laueleele e pei ona ta’ua i tusitusiga paia e ono aofia ai gasegase faalemafaufau.¹ O le lalolagi atoa, e aofia ai konetineta uma ma aganuu, ma aafia ai tagata uma—talavou, matutua, mauoa, ma matitiva. Sa aofia ai ma tagata o le Ekalesia.

I le taimi lava e tasi, ua a’oa’o mai ai i tatou e la tatou a’oa’oga faavae ia tauivi e avea e faapei o Iesu Keriso ma ia faaatoatoaina ia te Ia. E lagiina e a tatou fanau, “O loo ou taumafai e avea e pei o Iesu.”² Tatou te moomoo ia atoatoa e pei lava ona atoatoa lo tatou Tama Faalelagi ma Iesu Keriso.³ Ona o gasegase faalemafaufau e mafai ona faalavelave i la tatou vaaiga i le atoatoa, e tumau ai lava i le tele o taimi o se tapu. O se taunuuga, ua tele na’uā le valea, tele na’uā mafatiaga lē leoa, ma ua tele na’uā le faanoanoa. O le toatele, sa lagonaina le lofituina ona ua latou lē ausia tulaga faatonuina sa iloaina, ua talitonu sese e leai so latou nofoaga i le Ekalesia.

Ina ia faafetauia sea taufaasese, e taua le manatua “e alofa le Faaola i fanau taitasi a Lona Tama. E malamalama atoatoa o Ia i tiga ma tauiviga lea e aafia ai le toatele a o latou ola ai i le tele o ituaiga o lu’itau eseese o le soifua maloloina faalemafaufau. Na Ia mafatia i ‘tiga ma puapuaga ma faaosoosoga eseese uma; … ia [mafai ai] e ia ona ave i ona luga tiga ma ma’i o ona tagata’ (Alema 7:11; faaopoopo le faamamafa; tagai foi i le Eperu 4:15–16; 2 Nifae 9:21). Ona e Na te malamalama i puapuaga uma, e Na te silafia le ala ‘e faamaloloina ai le lotonutimomoia’ (Luka 4:18; tagai foi i le Isaia 49:13--16).”⁴ O lu’itau e masani ona faailoa mai ai se mana’oga mo ni meafaigaluega faaopoopo ma se lagolago ma e lē o se faaletonu o uiga.

Faataga a’u e faasoa atu ni nai matauga na ou faia a o ui atu lo’u aiga i ni tofotofoga.

Muamua, e toatele tagata o le a faanoanoa faatasi ma i tatou; latou te lē faamasinoina i tatou. Ona o osofaiga ogaoga o le fefe, popolevale, ma le atuatuvale, sa toe foi mai ai lo ma atalii i le fale mai lana misiona i le mavae ai o le na o le fa vaiaso. I le avea ai ma ona matua, sa faigata ia i maua ona taulimaina le lē fiafia ma le faanoanoa ona sa ma’ua tatalo tele mo lona manuia. E pei lava o matua uma, tatou te mananao ia manuia ma fiafia a tatou fanau. Sa faamoemoe e avea se misiona o se matāti’a taua lea mo lo ma atalii. Sa ma mafaufau foi po o a ni manatu o isi tagata.

Ma le ma leiloaina, o le toe foi mai o lo ma atalii sa matuai sili atu ona lofituina mo ia. Ia manatua sa alofa o ia i le Alii ma sa manao e auauna atu, ae sa le mafai ona o mafuaaga na ia tauivi e malamalama i ai. E le’i umi ae oo o ia i se tulaga o le leai o se faamoemoe atoa, tauivi ai ma se ta’usalaga matuitui. Sa ia le’i toe lagonaina le taliaina ae sa gase faaleagaga. Sa oo ia te ia ni mafaufauga faifai pea o le oti.

A o i ai i lenei tulaga faigata, sa talitonu lo ma atalii e na o le pau le faatinoga na totoe o le pule lea i lona lava ola. Sa manaomia ai le Agaga Paia ma le anoanoai o agelu i itu uma e lua o le veli e laveai o ia.

A o tauivi o ia mo lona ola ma i lea taimi faigata tele, sa faia e lo matou aiga, taitai o le uarota, tagata o le au paia, ma uo mea silisili e lagolago ma auauna mai ai ia i matou.

Ou te le’i lagonaina lava se alofa inā maoae e pei o lena. Ou te le’i lagonaina lava se malosi sili atu ma i se auala patino i le uiga o le faamafanafanaina o i latou e manaomia le faamafanafanaga. O le a faafetai pea lo matou aiga mo lena alofa inā maoae.

E le mafai ona ou faamatalaina vavega lē mafaitaulia na ō mai faatasi ma nei mea na tutupu. O le mea e faafetai ai, na faasaoina lo ma atalii, ae na umi se taimi ma le tele o le tausiga faafomai, togafitiga, ma le tausiga faaleagaga mo ia e faamalolo ai ma ia taliaina o ia e alofagiaina, faatauaina, ma manaomiaina.

Ou te iloa e le o faafitauli uma faapena e faamutaina e pei o o matou faafitauli. Ou te faanoanoa faatasi ma i latou ua vave tele ona maliliu ē pele ma ua tuua nei ma lagona o le faavauvau faapea foi ma fesili e le’i taliina.

O le isi a’u matauga e sosoo ai, e mafai ona faigata mo matua ona iloa tauiviga a a latou fanau, ae e tatau ona tatou a’oa’o i tatou lava. E mafai faapefea ona tatou iloa le eseesega i le va o faigata e fesootai ma le atina’ega masani ma faailoilo o gasegase? I le avea ai ma matua, ua ia i tatou le tiute paia e fesoasoani i a tatou fanau e faatautaia luitau o le olaga; peitai, e to’alaiti i tatou o ni tagata tomai faapitoa o le soifua maloloina faalemafaufau. Ae ui i lea e tatau ona tatou tausia a tatou fanau e ala i le fesoasoani atu ia i latou e a’oa’o ia faamalieina i a latou taumafaiga faamaoni a o latou tauivi e faafetaia’ia faamoemoega talafeagai. E tofu iloa e i tatou mai i o tatou lava vaivaiga patino o le tuputupu a’e faaleagaga o se faagasologa faifai pea.

Ua tatou malamalama nei “e leai se vaifofo faigofie mo le manuia faalelagona ma faalemafaufau. O le a tatou oo i le atuatuvale ma le fememea’i ona o loo tatou ola i se lalolagi pa’ū faatasi ma se tino pa’ū. E le gata i lea, e tele mafuaaga i mea e ono taitai atu i le aafiaga o le gasegase faalemafaufau. E tusa lava po o le a lo tatou manuia faalemafaufau ma le faalelagona, o le taulai atu i le tuputupu ae e maloloina nai lo le faamemelo i o tatou vaivaiga.”⁵

Mo ma’ua ma lo’u toalua, o le mea e tasi sa fesoasoani ia i ma’ua i taimi uma o le tumau latalata lea i le Alii i le mea e mafai ai. I le vaai atu i ai, ua tatou vaaia nei le ala na a’oa’oina ai ma le onosai i tatou e le Alii i taimi o le lē mautonu tele. O Lona malamalama na taialaina i ma’ua i lea laasaga ma lea laasaga i itula sili ona pogisa. Sa fesoasoani mai le Alii ia i ma’ua ia iloa o le taua o se agaga patino e sili atu ona taua i le fuafuaga e faavavau nai lo soo se galuega po o se ausiaga faalelalolagi.

Ma le isi, o le a’oa’oina o i tatou lava e uiga i gasegase faalemafaufau e saunia ai i tatou e fesoasoani ia i tatou lava ma isi atonu o loo tauivi. O se talanoaga faasamasamanoa ma faamaoni o le tasi ma le isi o le a fesoasoani i lenei autu taua ia maua ai le gaua’iga e tatau ai. E moni lava, o faamatalaga e muamua mai i musumusuga ma faaaliga. O nei lu’itau uma e tele ina lē vaaia e mafai ona aafia ai soo se tasi, ma a tatou feagai ma i latou, e foliga mai e le mafaato’ilaloina.

O se tasi o mea muamua e ao ona tatou iloa o le mautinoa lea e le o tuua lava na o i tatou. Ou te valaaulia outou e suesue i le autu o le soifua maloloina faalemafaufau i le vaega Fesoasoani o le Olaga i le polokalama o le Gospel Library. O le a’oa’oina o le a taitai atu ai i le malamalama atili, taliaina atili, mutimuti alofa atili, ma le alofa atili. E mafai ona faaitiitia ai faalavelave a o fesoasoani ia i tatou e ati a’e ma pulea faamoemoega maloloina ma fegalegaleaiga maloloina.

O la’u matauga faai’u: e manaomia ona tatou leoleoina e lē aunoa le tasi ma le isi. E tatau ona tatou alofa i le tasi ma le isi ma ia faaitiitia le faamasino atu—aemaise lava pe a le vave ona ausia o tatou faamoemoega. E tatau ona tatou fesoasoani i a tatou fanau ma le autalavou ia lagonaina le alofa o Iesu Keriso i o latou olaga, e tusa lava pe o latou tauivi ia lagonaina patino le alofa mo i latou lava. O Elder Orson F. Whitney, o lē sa auauna atu o se uso o le Korama a Aposetolo e Toasefululua, sa ia fautuaina matua i le auala e fesoasoani ai i fanau o loo tauivi: “Tatalo mo a outou … fanau; uumau ia i latou ma lou faatuatua.”⁶

E masani ona ou mafaufau loloto i le uiga o le taofi mau ia i latou faatasi ma le faatuatua. Ou te talitonu e aofia ai ni faatinoga faigofie o le alofa, agamalu, agalelei, ma le faaaloalo. O lona uiga o le faatagaina o i latou e ati a’e i lo latou lava saoasaoa ma tuuina atu le molimau e fesoasoani ai ia latou lagonaina le alofa o lo tatou Faaola. E manaomia ai lo tatou mafaufau atili ia i latou ae itiiti ifo ia i tatou lava po o isi. E masani lava o lona uiga o le faaitiitia o le tautala ae ia matua faatele atu le faalogo. E tatau ona tatou alolofa ia i latou, faamalosi i latou, ma viia soo i latou i a latou taumafaiga ia manuia ma faatuatua i le Atua. Ma le mea mulimuli, e tatau ona tatou faia mea uma i lo tatou malosi e faalatalata atu ai ia i latou—e pei lava ona tatou faalatalata atu i le Atua.

Mo i latou uma o e aafia patino i gasegase faalemafaufau, pipiimau i au feagaiga, e tusa lava pe e te lē lagonaina le alofa o le Atua i lenei taimi. Fai soo se mea o i ai i lou malosi ona “tutu [lea] ma le mautinoa atoatoa … e vaai i le faaolataga a le Atua, ma mo lona aao e faaali mai.”⁷

Ou te molimau atu o Iesu Keriso o lo tatou Faaola. Na te silafia i tatou. E alofa o Ia ia i tatou, ma o le a Ia faatalitali mai mo i tatou. I taimi o tofotofoga o lo matou aiga, ua ou iloa ai Lona latalata mai. E moni Ana folafolaga:

O le iloaina o le mausali o lo tatou faavae, tau lava ina ia tatou tautino atu ma le olioli:

I le suafa o Iesu Keriso, amene.