ພຣະວິຫານ ແລະ ຮາກຖານທາງວິນຍານຂອງທ່ານ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ເມື່ອໃດກໍຕາມທີ່ມີຄວາມວຸ້ນວາຍໃດໆເກີດຂຶ້ນໃນຊີວິດຂອງທ່ານ, ບ່ອນທີ່ປອດໄພທີ່ສຸດຝ່າຍວິນຍານ ແມ່ນການດຳລົງຊີວິດຢູ່ພາຍໃນພັນທະສັນຍາພຣະວິຫານຂອງທ່ານ!

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າມີຄວາມກະຕັນຍູທີ່ໄດ້ຢູ່ກັບທ່ານໃນເຊົ້າມື້ນີ້ ເພື່ອແບ່ງປັນຄວາມຮູ້ສຶກໃນໃຈຂອງຂ້າພະເຈົ້າ.

ດັ່ງທີ່ທ່ານຮູ້, ພວກເຮົາກຳລັງດຳເນີນການບູລະນະພຣະວິຫານເຊົາເລັກແຫ່ງປະຫວັດສາດຢ່າງໃຫຍ່. ໂຄງການທີ່ຊັບຊ້ອນນີ້ ແມ່ນລວມທັງການເສີມຄວາມໝັ້ນຄົງໃຫ້ແກ່ຮາກຖານດັ້ງເດີມ, ຊຶ່ງໃຊ້ງານມາໄດ້ຫລາຍກວ່າໜຶ່ງສັດຕະວັດແລ້ວ. ພຣະວິຫານແຫ່ງນີ້ຈະຕ້ອງຕັ້ງຢູ່ດົນນານ. ໃນທ້າຍເດືອນພຶດສະພາ, ຂ້າພະເຈົ້າໄດ້ກວດສອບຄວາມຄືບໜ້າຂອງໂຄງການໃຫຍ່ນີ້. ຂ້າພະເຈົ້າຄິດວ່າ ທ່ານຈະປາບປື້ມ ທີ່ໄດ້ເຫັນສິ່ງທີ່ເວັນດີ ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ເຫັນ. ຂ້າພະເຈົ້າຄິດວ່າ ທ່ານຈະເຫັນວ່າ ເປັນຫຍັງເພງ “ພື້ນໝັ້ນຄົງໜັກໜາ”¹ ຈຶ່ງມີຄວາມໝາຍໃໝ່ຕໍ່ພວກເຮົາ.

ວິດີໂອຈາກສະຖານທີ່ພຣະວິຫານເຊົາເລັກທີ່ກຳລັງທຳການບູລະນະ: “ພວກເຮົາກຳລັງເບິ່ງຮາກຖານດັ້ງເດີມຂອງພຣະວິຫານເຊົາເລັກ. ຂ້າພະເຈົ້າກຳລັງຢືນຢູ່ກ້ອງບ່ອນທີ່ເຄີຍເປັນຫ້ອງອຸດທະຍານ. ຂະນະທີ່ຂ້າພະເຈົ້າກວດສອບເບິ່ງຝີມືຂອງພຣະວິຫານນີ້ໝົດທຸກບ່ອນ, ຂ້າພະເຈົ້າປະຫລາດໃຈກັບສິ່ງທີ່ຜູ້ບຸກເບີກໄດ້ເຮັດສຳເລັດ. ຂ້າພະເຈົ້າອັດສະຈັນໃຈຫລາຍເມື່ອຂ້າພະເຈົ້າພິຈາລະນາວ່າ ເຂົາເຈົ້າສ້າງພຣະວິຫານທີ່ງົດງາມແຫ່ງນີ້ດ້ວຍພຽງແຕ່ເຄື່ອງມື ແລະ ວິທີການສ້າງທີ່ມີໃຫ້ເຂົາເຈົ້າ ໃນສັດຕະວັດກ່ອນເທົ່ານັ້ນ ໄດ້ແນວໃດ.

“ເຖິງຢ່າງໃດກໍຕາມ, ຫລາຍທົດສະວັດຕໍ່ມາ, ຖ້າຫາກເຮົາກວດກາເບິ່ງຮາກຖານຢ່າງໃກ້ຊິດ, ເຮົາຈະສາມາດເຫັນຜົນກະທົບຂອງການກັດເຊາະ, ຊ່ອງວ່າງໃນຫີນດັ້ງເດີມ, ແລະ ລະດັບຄວາມໝັ້ນຄົງຂອງຫີນ ໃນແຕ່ລະໄລຍະ.

“ບັດນີ້ ເມື່ອຂ້າພະເຈົ້າໄດ້ເຫັນສິ່ງທີ່ວິສະວະກອນ, ສະຖາປະນິກ, ແລະ ຜູ້ຊ່ຽວຊານດ້ານການກໍ່ສ້າງສາມາດເຮັດ ເພື່ອເສີມຄວາມເຂັ້ມແຂງໃຫ້ແກ່ຮາກຖານດັ້ງເດີມ, ຂ້າພະເຈົ້າຈຶ່ງປະຫລາດໃຈຫລາຍ. ວຽກງານຂອງເຂົາເຈົ້າໜ້າອັດສະຈັນໃຈແທ້ໆ!

“ຮາກຖານຂອງອາຄານໃດໆ, ໂດຍສະເພາະໃຫຍ່ຂະໜາດນີ້, ຈະຕ້ອງໝັ້ນຄົງ ແລະ ທົນທານພໍທີ່ຈະທົນກັບແຜ່ນດິນໄຫວ, ການເຂົ້າຂີ້ໝ້ຽງ, ລົມແຮງ, ແລະ ການເຄື່ອນໂຍກທີ່ກະທົບກະເທືອນຕໍ່ອາຄານທຸກຫລັງ ຢ່າງຫລີກລ້ຽງບໍ່ໄດ້. ວຽກງານທີ່ຊັບຊ້ອນຂອງການເສີມຄວາມເຂັ້ມແຂງໃນເວລານີ້ ຈະເຮັດໃຫ້ພຣະວິຫານທີ່ສັກສິດໝັ້ນຄົງ ດ້ວຍຮາກຖານທີ່ໝັ້ນຄົງ ແລະ ຈະສາມາດທົນທານກັບການທົດສອບຂອງເວລາ.”

ພວກເຮົາກຳລັງເຮັດທຸກສິ່ງທຸກຢ່າງ ເພື່ອເສີມຮາກຖານໃຫ້ກັບພຣະວິຫານທີ່ເຄົາລົບແຫ່ງນີ້, ຊຶ່ງນັບມື້ນັບ ເກົ່າແກ່ລົງ, ເພື່ອວ່າມັນຈະສາມາດຕ້ານທານກັບພະລັງທຳມະຊາດໄດ້ ຈົນເຖິງຊ່ວງໜຶ່ງພັນປີ. ໃນແບບດຽວກັນ, ບັດນີ້ມັນເຖິງເວລາແລ້ວທີ່ເຮົາແຕ່ລະຄົນຈະໃຊ້ມາດຕະການພິເສດ—ບາງທີເປັນມາດຕະການທີ່ເຮົາບໍ່ເຄີຍໃຊ້ມາກ່ອນ—ເພື່ອເສີມຄວາມເຂັ້ມແຂງໃຫ້ແກ່ຮາກຖານ ທາງວິນຍານສ່ວນຕົວ ຂອງເຮົາ. ເມື່ອປະເຊີນກັບສະຖານະການໃໝ່ ເຮົາກໍຕ້ອງໃຊ້ມາດຕະການໃໝ່.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ນີ້ ແມ່ນ ຍຸກສຸດທ້າຍ. ຖ້າຫາກທ່ານ ແລະ ຂ້າພະເຈົ້າຈະສາມາດຕ້ານທານກັບສິ່ງອັນຕະລາຍ ແລະ ຄວາມກົດດັນໃນອະນາຄົດໄດ້, ຈຳເປັນທີ່ເຮົາແຕ່ລະຄົນຕ້ອງມີຮາກຖານທາງວິນຍານທີ່ ໝັ້ນຄົງ ຖືກສ້າງຂຶ້ນເທິງດານຫີນຂອງພຣະຜູ້ໄຖ່ຂອງເຮົາ, ພຣະເຢຊູຄຣິດ.²

ສະນັ້ນ ຂ້າພະເຈົ້າຂໍຖາມທ່ານແຕ່ລະຄົນວ່າ ຮາກຖານ ຂອງທ່ານ ໝັ້ນຄົງຫລາຍປານໃດ? ແລະ ທ່ານຕ້ອງໃຊ້ສິ່ງໃດແດ່ເພື່ອຊ່ວຍເສີມສ້າງປະຈັກພະຍານ ແລະ ຄວາມເຂົ້າໃຈເລື່ອງພຣະກິດຕິຄຸນຂອງທ່ານ?

ພຣະວິຫານເປັນສູນກາງຂອງການເສີມສ້າງສັດທາ ແລະ ຄວາມເຂັ້ມແຂງທາງວິນຍານຂອງເຮົາ ເພາະວ່າພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງເປັນສູນກາງຂອງພຣະວິຫານ. ທຸກສິ່ງທີ່ສິດສອນໃນພຣະວິຫານ, ຜ່ານທາງຄຳແນະນຳ ແລະ ຜ່ານທາງພຣະວິນຍານ, ຈະເພີ່ມຄວາມເຂົ້າໃຈຂອງເຮົາກ່ຽວກັບພຣະເຢຊູຄຣິດຫລາຍຂຶ້ນ. ພິທີການທີ່ຈຳເປັນຂອງພຣະອົງຈະຜູກມັດເຮົາໄວ້ກັບພຣະອົງ ຜ່ານທາງພັນທະສັນຍາຂອງຖານະປະໂລຫິດທີ່ສັກສິດ. ແລ້ວ, ເມື່ອເຮົາຮັກສາພັນທະສັນຍາຂອງເຮົາ, ພຣະອົງຈະມອບອຳນາດທີ່ປິ່ນປົວ ແລະ ເສີມສ້າງ ຂອງພຣະອົງ ໃຫ້ເຮົາ.³ ແລະ ໂອ້, ເຮົາຈະຕ້ອງການອຳນາດຂອງພຣະອົງຫລາຍເທົ່າໃດ ໃນວັນຂ້າງໜ້າ.

ເຮົາໄດ້ຖືກສັນຍາວ່າ “ຖ້າຫາກ [ເຮົາ] ຕຽມພ້ອມ [ເຮົາ] ຈະບໍ່ຢ້ານກົວ.”⁴ ການຮັບຮອງນີ້ມີຄວາມໝາຍເລິກໃນປະຈຸບັນ. ພຣະຜູ້ເປັນເຈົ້າໄດ້ປະກາດວ່າ ເຖິງແມ່ນຈະມີການທ້າທາຍທີ່ບໍ່ເຄີຍມີມາກ່ອນໃນທຸກວັນນີ້, ຜູ້ທີ່ສ້າງຮາກຖານຢູ່ເທິງພຣະເຢຊູຄຣິດ, ແລະ ໄດ້ຮຽນຮູ້ວິທີທີ່ຈະດຶງເອົາພະລັງຂອງພຣະອົງ, ບໍ່ຈຳເປັນຕ້ອງຍອມຕໍ່ຄວາມກັງວົນທີ່ແຕກຕ່າງ ໃນຍຸກນີ້.

ພິທີການ ແລະ ພັນທະສັນຍາໃນພຣະວິຫານມີມາແຕ່ບູຮານນະການ. ພຣະຜູ້ເປັນເຈົ້າໄດ້ແນະນຳອາດາມ ແລະ ເອວາ ໃຫ້ອະທິຖານ, ເຮັດພັນທະສັນຍາ, ແລະ ຖວາຍເຄື່ອງບູຊາ.⁵ ແນ່ນອນ, “ເມື່ອໃດກໍຕາມທີ່ພຣະຜູ້ເປັນເຈົ້າມີຜູ້ຄົນຢູ່ເທິງແຜ່ນດິນໂລກ ທີ່ຈະເຊື່ອຟັງພຣະຄຳຂອງພຣະອົງ, ພວກເຂົາໄດ້ຖືກບັນຊາໃຫ້ສ້າງພຣະວິຫານ.”⁶ ໜັງສືມາດຕະຖານເຕັມໄປດ້ວຍແຫລ່ງອ້າງອີງກ່ຽວກັບຄຳສອນ, ພາສາກ່ຽວກັບພຣະວິຫານ, ແລະ ອື່ນໆ.⁷ ທຸກສິ່ງ ທີ່ເຮົາເຊື່ອ ແລະ ທຸກ ຄຳສັນຍາທີ່ພຣະເຈົ້າໄດ້ເຮັດໄວ້ກັບຜູ້ຄົນແຫ່ງພັນທະສັນຍາຂອງພຣະອົງ ຈະລວມຢູ່ໃນພຣະວິຫານ. ໃນ ທຸກ ຍຸກທຸກສະໄໝ, ພຣະວິຫານໄດ້ເນັ້ນເຖິງຄວາມຈິງທີ່ປະເສີດວ່າ ຜູ້ທີ່ເຮັດພັນທະສັນຍາໄວ້ກັບພຣະເຈົ້າ ແລະ ຮັກສາມັນ ເປັນລູກໆແຫ່ງພັນທະສັນຍາ.

ດັ່ງນັ້ນ, ໃນບ້ານຂອງພຣະຜູ້ເປັນເຈົ້າ, ເຮົາສາມາດເຮັດພັນທະສັນຍາຢ່າງດຽວກັນນັ້ນກັບພຣະເຈົ້າ ທີ່ອັບຣາຮາມ, ອີຊາກ, ແລະ ຢາໂຄບໄດ້ເຮັດ. ແລະ ເຮົາກໍສາມາດໄດ້ຮັບພອນຢ່າງດຽວກັນນັ້ນ!

ຮູບພາບ

ພຣະວິຫານເຄີດແລນ ແລະ ນາວູ

ພຣະວິຫານເປັນພາກສ່ວນໜຶ່ງຂອງຍຸກສະໄໝ ນີ້ ນັບຈາກສະໄໝບູຮານ.⁸ ເອລີຢາໄດ້ມອບຂໍກະແຈແຫ່ງສິດອຳນາດຂອງການຜະນຶກໃຫ້ໂຈເຊັບ ສະມິດ ໃນພຣະວິຫານເຄີດແລນ. ຄວາມສົມບູນຂອງຖານະປະໂລຫິດໄດ້ຖືກຟື້ນຟູ ໃນພຣະວິຫານນາວູ.⁹

ຈົນກະທັ້ງເຖິງຕອນເພິ່ນຖືກສັງຫານ, ໂຈເຊັບ ສະມິດ ໄດ້ສືບຕໍ່ຮັບການເປີດເຜີຍ ທີ່ສົ່ງເສີມການຟື້ນຟູພິທີການຮັບຂອງປະທານສັກສິດ ແລະ ການຜະນຶກ.¹⁰ ເຖິງຢ່າງໃດກໍຕາມ, ເພິ່ນກໍຮັບຮູ້ວ່າ ຈຳເປັນຕ້ອງມີການປັບປຸງເພີ່ມເຕີມ. ຫລັງຈາກໄດ້ມອບຂອງປະທານສັກສິດໃຫ້ແກ່ບຣິກຳ ຢັງ ໃນເດືອນພຶດສະພາ ປີ 1842 ແລ້ວ, ໂຈເຊັບໄດ້ບອກບຣິກຳວ່າ, “ມັນບໍ່ເປັນລະບຽບ, ແຕ່ພວກເຮົາກໍໄດ້ເຮັດໃຫ້ດີທີ່ສຸດແລ້ວຕາມສະຖານະການເປັນຢູ່ຂອງພວກເຮົາ, ແລະ ຂ້ອຍຫວັງວ່າເຈົ້າຈະຮັບເອົາສິ່ງນີ້ ແລະ ຈັດລະບຽບ ແລະ ລະບົບພິທີການທັງໝົດ.”¹¹

ຫລັງຈາກການຕາຍຂອງສາດສະດາ, ປະທານຢັງໄດ້ດູແລການສ້າງພຣະວິຫານນາວູ¹² ແລະ ຕໍ່ມາໄດ້ສ້າງພຣະວິຫານຫລາຍແຫ່ງຢູ່ໃນເຂດຢູທາ. ລະຫວ່າງການອຸທິດຊັ້ນລຸ່ມຂອງພຣະວິຫານເຊັ້ນຈອດ, ບຣິກຳ ຢັງ ໄດ້ປະກາດຢ່າງໜັກແໜ້ນເຖິງຄວາມຮີບຮ້ອນທີ່ຕ້ອງສ້າງພຣະວິຫານ ເມື່ອເພິ່ນກ່າວວ່າ, “ເມື່ອຂ້າພະເຈົ້າຄິດກ່ຽວກັບເລື່ອງນີ້, ຂ້າພະເຈົ້າຢາກໃຫ້ລີ້ນຂອງສຽງຟ້າຮ້ອງທັງເຈັດ ຮ້ອງບອກຜູ້ຄົນໃຫ້ຕື່ນ.”¹³

ນັບຈາກເວລານັ້ນມາ, ພິທີການພຣະວິຫານກໍໄດ້ຖືກປັບປຸງເທື່ອລະເລັກເທື່ອລະນ້ອຍ. ປະທານແຮໂຣນ ບີ ລີ ໄດ້ອະທິບາຍວ່າ ເປັນຫຍັງຂັ້ນຕອນ, ນະໂຍບາຍ, ແລະ ແມ່ນແຕ່ການບໍລິຫານພິທີການພຣະວິຫານຈຶ່ງມີການປ່ຽນແປງຢ່າງຕໍ່ເນື່ອງ ໃນສາດສະໜາຈັກຂອງພຣະຜູ້ຊ່ວຍໃຫ້ລອດທີ່ຟື້ນຟູ. ປະທານລີໄດ້ກ່າວວ່າ: “ຫລັກທຳພຣະກິດຕິຄຸນຂອງພຣະເຢຊູຄຣິດແມ່ນສູງສົ່ງ. ບໍ່ມີໃຜປ່ຽນແປງຫລັກທຳ ແລະ [ຄຳສອນ] ຂອງສາດສະໜາຈັກ ຍົກເວັ້ນແຕ່ພຣະຜູ້ເປັນເຈົ້າ ໂດຍການເປີດເຜີຍ. ແຕ່ວິທີການຈະຖືກປ່ຽນແປງຕາມການຊີ້ນຳ ທີ່ໄດ້ຮັບການດົນໃຈ ຊຶ່ງມາເຖິງຜູ້ຄວບຄຸມ ໃນເວລາທີ່ເໝາະສົມ.”¹⁴

ໃຫ້ພິຈາລະນາວ່າ ການປະຕິບັດພິທີສິນລະລຶກໄດ້ປ່ຽນແປງແນວໃດ ໃນຊ່ວງຫລາຍປີຜ່ານມານີ້. ໃນສະໄໝກ່ອນ, ນ້ຳສິນລະລຶກໄດ້ຖືກມອບໃຫ້ຜູ້ຄົນທີ່ມາຮ່ວມປະຊຸມ ຢູ່ໃນຂັນໃຫຍ່ໜ່ວຍໜຶ່ງ. ທຸກຄົນກໍດື່ມຈາກຂັນໜ່ວຍດຽວກັນນັ້ນ. ບັດນີ້ພວກເຮົາໃຊ້ຈອກແບບກິນແລ້ວຖິ້ມ. ຂັ້ນຕອນໄດ້ປ່ຽນໄປ, ແຕ່ພັນທະສັນຍາຍັງເໝືອນເດີມ.

ຈົ່ງໄຕ່ຕອງຄວາມຈິງສາມຢ່າງເຫລົ່ານີ້:

ການຟື້ນຟູແມ່ນຂະບວນການ, ບໍ່ແມ່ນເຫດການໃດໜຶ່ງ, ແລະ ຈະສືບຕໍ່ຈົນກວ່າພຣະຜູ້ເປັນເຈົ້າສະເດັດມາອີກ.
ຈຸດປະສົງສູງສຸດຂອງການເຕົ້າໂຮມອິດສະຣາເອນ¹⁵ ແມ່ນເພື່ອຈະນຳພອນຂອງພຣະວິຫານມາໃຫ້ລູກໆທີ່ຊື່ສັດຂອງພຣະເຈົ້າ.
ເມື່ອເຮົາສະແຫວງຫາທີ່ຈະບັນລຸຈຸດປະສົງ ນັ້ນ ຢ່າງມີປະສິດທິພາບຫລາຍຂຶ້ນ, ພຣະຜູ້ເປັນເຈົ້າຈຶ່ງເປີດເຜີຍຄວາມຮູ້ເພີ່ມເຕີມ. ການຟື້ນຟູຢ່າງຕໍ່ເນື່ອງ ຈຳເປັນຕ້ອງມີການເປີດເຜີຍຢ່າງຕໍ່ເນື່ອງ.

ຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ມັກຈະທູນຖາມພຣະຜູ້ເປັນເຈົ້າ ຖ້າຫາກວ່າ ມີວິທີອື່ນທີ່ດີກວ່ານີ້ ເພື່ອນຳພອນຂອງພຣະວິຫານໄປໃຫ້ລູກໆທີ່ຊື່ສັດຂອງພຣະອົງ. ພວກເຮົາສະແຫວງຫາການຊີ້ນຳເປັນປະຈຳ ໃນເລື່ອງການຮັບຮອງຄວາມຖືກຕ້ອງ ແລະ ຄວາມສອດຄ່ອງໃນຄຳແນະນຳຂອງພຣະວິຫານ, ພັນທະສັນຍາ, ແລະ ພິທີການ ເຖິງແມ່ນຈະແຕກຕ່າງໃນພາສາ ແລະ ວັດທະນະທຳກໍຕາມ.

ພາຍໃຕ້ການຊີ້ນຳຂອງພຣະຜູ້ເປັນເຈົ້າ ແລະ ໃນການຕອບຕໍ່ຄຳອະທິຖານຂອງພວກເຮົາ, ກໍໄດ້ມີການປ່ຽນແປງໃນຂັ້ນຕອນເມື່ອບໍ່ດົນມານີ້. ພຣະອົງ ປະສົງໃຫ້ທ່ານເຂົ້າໃຈຢ່າງແຈ່ມແຈ້ງ ວ່າເປັນຫຍັງທ່ານຈຶ່ງເຮັດພັນທະສັນຍາ. ພຣະອົງ ປະສົງໃຫ້ທ່ານໄດ້ມີປະສົບການຢ່າງສົມບູນແບບ ໃນພິທີການສັກສິດ ຂອງພຣະອົງ. ພຣະອົງ ປະສົງໃຫ້ທ່ານເຂົ້າໃຈສິດທິພິເສດ, ຄຳສັນຍາ, ໜ້າທີ່ຮັບຜິດຊອບຂອງທ່ານ. ພຣະອົງ ປະສົງໃຫ້ທ່ານໄດ້ຮັບຄວາມຮູ້ ແລະ ຕື່ນຂຶ້ນທາງວິນຍານ ແບບບໍ່ເຄີຍເປັນມາກ່ອນ. ພຣະອົງປະສົງສິ່ງນີ້ສຳລັບຜູ້ຮັບພິທີການພຣະວິຫານ ທຸກຄົນ, ບໍ່ວ່າເຂົາເຈົ້າຈະອາໄສຢູ່ບ່ອນໃດກໍຕາມ.

ການປ່ຽນແປງຂັ້ນຕອນພຣະວິຫານໃນປະຈຸບັນ, ແລະ ຢ່າງອື່ນໆທີ່ຈະເກີດຂຶ້ນ, ເປັນຫລັກຖານຕໍ່ເນື່ອງວ່າ ພຣະຜູ້ເປັນເຈົ້າຊີ້ນຳສາດສະໜາຈັກຂອງພຣະອົງຢ່າງໃກ້ຊິດ. ພຣະອົງໄດ້ໃຫ້ໂອກາດເຮົາທຸກຄົນ ເພື່ອເສີມສ້າງຮາກຖານທາງວິນຍານຂອງເຮົາ ໃຫ້ມີປະສິດທິພາບຫລາຍຂຶ້ນ ໂດຍການໃຫ້ຊີວິດຂອງເຮົາຈົດຈໍ່ຢູ່ທີ່ພຣະອົງ ແລະ ຢູ່ທີ່ພິທີການ ແລະ ພັນທະສັນຍາພຣະວິຫານຂອງພຣະອົງ. ເມື່ອທ່ານນຳໃບຮັບຮອງເຂົ້າພຣະວິຫານ, ນຳຫົວໃຈທີ່ຊອກຊ້ຳ, ແລະ ນຳຈິດໃຈທີ່ສະແຫວງຫາ ມາຍັງບ້ານແຫ່ງການຮຽນຮູ້ຂອງພຣະຜູ້ເປັນເຈົ້າ, ພຣະອົງ ຈະສິດສອນທ່ານ.

ຖ້າຫາກໄລຍະທາງ, ບັນຫາເລື່ອງສຸຂະພາບ, ຫລື ສິ່ງອື່ນໆໄດ້ກີດກັນທ່ານຈາກການໄປພຣະວິຫານຊົ່ວໄລຍະໜຶ່ງ, ຂ້າພະເຈົ້າເຊື້ອເຊີນທ່ານໃຫ້ຫາເວລາເພື່ອທົບທວນໃນຈິດໃຈເຖິງພັນທະສັນຍາທີ່ທ່ານໄດ້ເຮັດຢ່າງສະໝ່ຳສະເໝີ.

ຖ້າທ່ານບໍ່ມັກໄປພຣະວິຫານ, ໃຫ້ໄປຫລາຍເພີ່ມຂຶ້ນ—ບໍ່ແມ່ນໜ້ອຍລົງ. ຂໍໃຫ້ພຣະຜູ້ເປັນເຈົ້າ, ຜ່ານທາງພຣະວິນຍານຂອງພຣະອົງ, ສິດສອນ ແລະ ດົນໃຈທ່ານຢູ່ທີ່ນັ້ນ. ຂ້າພະເຈົ້າສັນຍາກັບທ່ານວ່າ ເມື່ອເວລາຜ່ານໄປ, ພຣະວິຫານຈະເປັນສະຖານທີ່ປອດໄພ, ປອບໃຈ, ແລະ ໃຫ້ການເປີດເຜີຍ.

ຖ້າຂ້າພະເຈົ້າສາມາດເວົ້າກັບຜູ້ໃຫຍ່ໜຸ່ມທຸກຄົນໜ້າຕໍ່ໜ້າໄດ້, ຂ້າພະເຈົ້າຈະຮຽກຮ້ອງທ່ານ ໃຫ້ສະແຫວງຫາຄູ່ຄອງທີ່ທ່ານສາມາດຜະນຶກເຂົ້າກັນຢູ່ໃນພຣະວິຫານ. ທ່ານອາດສົງໄສວ່າ ສິ່ງນີ້ຈະສ້າງຄວາມແຕກຕ່າງແນວໃດໃນຊີວິດຂອງທ່ານ. ຂ້າພະເຈົ້າສັນຍາວ່າ ມັນຈະສ້າງຄວາມແຕກຕ່າງ ຫລາຍທີ່ສຸດ! ເມື່ອທ່ານແຕ່ງງານຢູ່ໃນພຣະວິຫານ ແລະ ກັບໄປເລື້ອຍໆ, ທ່ານຈະໄດ້ຮັບຄວາມເຂັ້ມແຂງ ແລະ ຖືກຊີ້ນຳໃນການຕັດສິນໃຈຂອງທ່ານ.

ຖ້າຂ້າພະເຈົ້າສາມາດເວົ້າກັບສາມີ ແລະ ພັນລະຍາທຸກຄົນ ຜູ້ ຍັງ ບໍ່ໄດ້ຖືກຜະນຶກເຂົ້າກັນຢູ່ໃນພຣະວິຫານເທື່ອ, ຂ້າພະເຈົ້າຈະຮຽກຮ້ອງທ່ານ ໃຫ້ເຮັດທຸກສິ່ງທຸກຢ່າງທີ່ທ່ານສາມາດເຮັດໄດ້ ເພື່ອຮັບເອົາພິທີການອັນສູງສຸດ ແລະ ປ່ຽນຊີວິດນີ້.¹⁶ ມັນຈະສ້າງຄວາມແຕກຕ່າງຢູ່ບໍ? ພຽງແຕ່ເມື່ອຖ້າຫາກທ່ານຢາກກ້າວໜ້າຕະຫລອດໄປ ແລະ ຢູ່ນຳກັນຕະຫລອດໄປ. ຄວາມປາດຖະໜາ ທີ່ຈະໄດ້ຢູ່ນຳກັນເທົ່ານັ້ນ ຈະບໍ່ເກີດຜົນ. ບໍ່ມີພິທີອື່ນໃດ ຫລື ພັນທະໃດ ຈະເຮັດໃຫ້ມັນເກີດຜົນໄດ້.¹⁷

ຖ້າຂ້າພະເຈົ້າສາມາດເວົ້າກັບຜູ້ຊາຍ ຫລື ຜູ້ຍິງທຸກຄົນ ທີ່ຢາກແຕ່ງງານ ແຕ່ຍັງບໍ່ພົບຄູ່ນິລັນດອນເທື່ອ, ຂ້າພະເຈົ້າຈະຊຸກຍູ້ທ່ານບໍ່ໃຫ້ລໍຖ້າຈົນກວ່າໄດ້ແຕ່ງງານ ຈຶ່ງຈະຮັບເອົາຂອງປະທານສັກສິດຢູ່ໃນບ້ານຂອງພຣະຜູ້ເປັນເຈົ້າ. ຈົ່ງເລີ່ມຕົ້ນໃນເວລານີ້ ເພື່ອຮຽນຮູ້ ແລະ ມີປະສົບການວ່າ ການຕິດອາວຸດດ້ວຍອຳນາດຂອງຖານະປະໂລຫິດນັ້ນ ໝາຍຄວາມວ່າແນວໃດ.

ແລະ ຕໍ່ທ່ານທຸກຄົນ ຜູ້ໄດ້ເຮັດພັນທະສັນຍາໃນພຣະວິຫານແລ້ວ, ຂ້າພະເຈົ້າຈະຮຽກຮ້ອງທ່ານໃຫ້ສະແຫວງຫາ—ດ້ວຍການອະທິຖານ ແລະ ດ້ວຍຄວາມສະໝ່ຳສະເໝີ—ເພື່ອຈະໄດ້ເຂົ້າໃຈພັນທະສັນຍາ ແລະ ພິທີການພຣະວິຫານ.¹⁸ ປະຕູທາງວິນຍານຈະເປີດຢູ່. ທ່ານຈະຮຽນຮູ້ວິທີແຫວກຜ້າກັ້ງລະຫວ່າງສະຫວັນ ແລະ ແຜ່ນດິນໂລກ, ວິທີທູນຂໍໃຫ້ເຫລົ່າທູດຂອງພຣະເຈົ້າຊ່ວຍເຫລືອທ່ານ, ແລະ ວິທີຮັບການຊີ້ນຳຈາກສະຫວັນໄດ້ດີກວ່າເກົ່າ. ຄວາມພາກພຽນພະຍາຍາມຂອງທ່ານໃນການເຮັດສິ່ງນີ້ ຈະເສີມສ້າງ ແລະ ເພີ່ມຄວາມເຂັ້ມແຂງໃຫ້ແກ່ຮາກຖານທາງວິນຍານຂອງທ່ານ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເມື່ອການບູລະນະພຣະວິຫານເຊົາເລັກສຳເລັດຮຽບຮ້ອຍ, ຈະ ບໍ່ມີບ່ອນໃດ ປອດໄພຫລາຍໄປກວ່າຂ້າງໃນຂອງພຣະວິຫານນັ້ນ ລະຫວ່າງແຜ່ນດິນໄຫວ ໃນຮ່ອມພູເມືອງເຊົາເລັກ.

ເຊັ່ນດຽວກັນ, ເມື່ອໃດກໍຕາມທີ່ມີຄວາມວຸ້ນວາຍໃດໆເກີດຂຶ້ນໃນຊີວິດຂອງທ່ານ, ບ່ອນທີ່ປອດໄພທີ່ສຸດ ຝ່າຍວິນຍານ ແມ່ນການດຳລົງຊີວິດຢູ່ ພາຍໃນ ພັນທະສັນຍາພຣະວິຫານຂອງທ່ານ!

ກະລຸນາເຊື່ອຂ້າພະເຈົ້າ ເມື່ອຂ້າພະເຈົ້າເວົ້າວ່າ ເມື່ອຮາກຖານທາງວິນຍານຂອງທ່ານຖືກສ້າງຂຶ້ນຢ່າງໝັ້ນຄົງເທິງພຣະເຢຊູຄຣິດ, ທ່ານ ບໍ່ຈຳເປັນຕ້ອງຢ້ານ. ເມື່ອທ່ານຈິງໃຈຕໍ່ພັນທະສັນຍາຂອງທ່ານ ທີ່ທ່ານໄດ້ເຮັດໃນພຣະວິຫານ, ທ່ານຈະຖືກເຮັດໃຫ້ເຂັ້ມແຂງໂດຍອຳນາດຂອງພຣະອົງ. ແລ້ວ, ເມື່ອແຜ່ນດິນໄຫວທາງວິນຍານເກີດຂຶ້ນ, ທ່ານຈະສາມາດຍຶດໝັ້ນຢູ່ຢ່າງ ເຂັ້ມແຂງ ເພາະວ່າຮາກຖານທາງວິນຍານຂອງທ່ານໝັ້ນຄົງ ແລະ ບໍ່ຫວັ່ນໄຫວ.

ຂ້າພະເຈົ້າຮັກທ່ານ, ອ້າຍເອື້ອຍນ້ອງທີ່ຮັກແພງທັງຫລາຍ. ຂ້າພະເຈົ້າຮູ້ວ່າສິ່ງເຫລົ່ານີ້ເປັນຄວາມຈິງ: ພຣະເຈົ້າ, ພຣະບິດາເທິງສະຫວັນຂອງເຮົາ, ປະສົງໃຫ້ ທ່ານ ເລືອກກັບຕ່າວຄືນບ້ານຫາພຣະອົງ. ແຜນແຫ່ງຄວາມກ້າວໜ້ານິລັນດອນຂອງພຣະອົງ ກໍບໍ່ສັບສົນ, ແລະ ໃຫ້ກຽດແກ່ອຳເພີໃຈຂອງທ່ານ. ທ່ານມີສິດທີ່ຈະເລືອກວ່າ ທ່ານຢາກເປັນຄົນແບບໃດ—ແລະ ຢາກຢູ່ກັບໃຜ—ໃນໂລກທີ່ຈະມາເຖິງ!

ພຣະເຈົ້າຊົງພຣະຊົນຢູ່! ພຣະເຢຊູຄືພຣະຄຣິດ! ນີ້ແມ່ນສາດສະໜາຈັກຂອງພຣະອົງ, ໄດ້ຖືກຟື້ນຟູເພື່ອຊ່ວຍທ່ານບັນລຸຈຸດໝາຍປາຍທາງແຫ່ງສະຫວັນຂອງທ່ານ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.