Luti Wosasuc luhn Mislac
Kunohkohn muhtahl se lasr in akacsruhi ke kuh se ac misalc luhn Jisus Kraist nuh sin mwet nuhkwewa ma ac fah lohng.
Tamuhlwel ac tahmtahel sacohk wiyuck, paing kowos nuh ke toeni luhlahp uh! Nga rahrahlac in tari sun lwen se inge. Nga tuh pruhe keiwos ac nuh ke srihpowos lwen nuhkwewa. Ke wik ekahsr na tari ah nga tuh pruhe tuh toeni se inge in sruhluhn pacl in nuhnak ac fwackyuck nuh selos nuhkwewa suc suk mwe insewowo.
Ke toeni luhlahp se tari ah fahfahsruh, ma upac uh tuhtahflah na in sikyak fin facluh. Mas se ma sikyak fin facluh nohfohn uh srwackna mokle moul lasr uh. Ac inge facluh kusrusryak ke mweun ma rahkinyac elyah nuh sin mukul miliacn, muhtwacn ac tuhlihk na wowo.
Mwet pahluh tuh liye pacl lasr uh, muh ac oasr mweun ac sramsram ke mweun, lah facluh nohfohn ac fohs ac insiyacn mwet uh ac tiacna orekma wo.1 Ke kuht fahsr tukun Jisus Kraist, kuht ngihsre yurin mwet kol ke acn luhlahp in sokwack top mihs nuh ke elyah lalos uh. Kuht pahng nuh sin mwet nuhkwewa yen nuhkwewa in pruhe kaclos suc enenuh kahsruh, in liye lah meac elos kuh in oruh nuh selos suc puhla elyah upac, ac in suk kahsruh sin Leum in ahkwacngihnyelah kuhtwena elyah uh.
Tamuhlwel ac tahmtahel, wosasuc luhn Jisus Kraist enenweyuck yohk liki na met ah. Akuhkuhin lain ma nuhkwewa ma Leum El tu kuh kac ac luti. Nga luhngse Leum Jisus Kraist ac fahkwack lah wosasuc Lal pa wosasuc se fanna ma kuh in kuhtanglah ac use mihslac uh. Wosasuc Lal pa wosasuc luhn mislac.2
Wosasuc Lal uh pa top se fanna ke pacl se ma insiacn mwet uh fototolac ke sripen sahngweng.3 Ma se inge srihsrngiyac yohk srihpaciyacn sap luhn Leum nuh sin mwet tuhma lutlut Lal in “som … nuh fin facluh nohfohn, ac luti wosasuc nuh sin mwet nuhkwewa.”4 Oasr kunohkohn muhtahl lasr in akacsruhi ke kuh se ac mihslac luhn Jisus Kraist nuh sin mwet nuhkwewa ma ac lohng ac lwelah God Elan kuhtanglah moul lalos.
Mwet nuh kwewa ma wuhlwelah nuh sin God olwelah muh elos ac karihngihn mwet sahyac ac kuhlwacnsuhpuh elos suc eneneuh. Ac kuht kuh in ahkolah in topuk mwet nuhkwewa ma siyuck ke “luhlahlfongi se an in [kuht].”5 Kais sie sesr oasr srihpac muhtahl la ke fahsrweni luhn mwet Israel uh.
Mihsenge nga ahkkweye na pwacye lah Leum El siyuck nohfohn mukul fuhsr ma nwacsnwacs in ahkolah nuh ke misrin. Nuhsin mukul fuhsr Luhlahlfongi ke Lwen-sahflah uh, kuhlwacnsap ke misrin uh el kunohkohn luhn pristut. Kowos mukul fuhsr sruokyucki nuh ke pacl se inge ke fahsrweni luhn Mwet Israel uh olwelah tari. Ke kom kuhlwacnsap ke misrin lom uh, kom oruh ma yohk kunom ke toeni na luhlahp se inge!
Nuh sin muhtwacn fuhsr ma kuh in wi an, misrin uh oacyacpac fokoko tuhsruhk luhngse lowos sifacna, in oruh kunohkohn se inge. Kuht luhngse muhtwacn ma oruh misrin lalos ac painguhlos ke insiacsr kwewa. Ma kom sang nuh ke orekma se inge el yohk ac wolacna! Pruhe in etuh lah Leum El kena kom in oruh misrin lom, ac Nguhn Muhtahl elac fah topuk kom ke insiyom ac nuhnak lom.
Kawuck fuhsr sacohk luhk, kais sie suwos yohk sripac nuh sin Leum. El sruokkowi ne ke pacl se inge kom in kahsruh oracni Mwet Israel. Sulwaclah lom in kuhlwacnsap ke misrin, lah kom ac forfor luti kuh oruh kuhlwacnsap ke misrin, ac fah ahkinsewowoye kom ac mwet puhs sahyac. Kuht oacyacpac paing siyacnyacn mahtuh ma kuhlwacnsap ke misrin ke pacl uh lwelah uh. Orekma lalos uh tiac kuh in aholyuck.
Nohfohnna misrinacri inge luti ac fahkwack ke Mwet in Molwelah lasr. Yohkwaclihk lohsrlah luhn facluh oruh enenweyuck kahlwem luhn Jisus Kraist in lihksrweni kahlmwelihk. Mwet nuhkwewa enenuh in etuh ke wosasuc luhn Jisus Kraist ma fohlohkyak uh. Mwet nuhkwewa enenuh in etuh lah elos ac sokwack oyac mihslac se ma “[yohk liki] ma mwet uh ku in kalem kac.”7
Lwelah tuh toeni se inge in sie pacl in mihslac ac muhtahl nuh sum. Lwelah tuh kom in suk ac eis fwackyuck lom sifacna ke toeni inge, nga pruhe ke ine muhtahl lal Jisus Kraist, amen.