Tu na Kuh ke Pacl Pahkah

Tamuhlwel ac tahmtahel sacohk wiyuck, kuht ahkinsewowoyeyuck mihsenge in lohng sin mwet kuhlwacnsap luhn God ke elos use kahs in kahsruh nuh sesr uh. Kais sie sesr, lah kuht oasr oyac, etuh lah kuht muhta ke pacl ma ma upac uh arulacna yohkyohkwelihk uh. Pruhe luhk uh pa nga kuh in kahsre kom in tu na kuh ke pacl pahkah uh tuhkuh sun kuht uh, ke sie insiac mihslac.¹

Acn se ma kuht enenuh in muhtwacwacack kac uh pa in esam lah kais sie sesr tuhlihk sacohk nuhtin God ac oasr mwet kuhlwacnsap Lal ma El muhta kol. Mwet kuhlwacnsap luhn God inge liye tari pacl ma kuht oasr kac ingena inge. Mwet Sap Paul el sihm nuh sel Timothy ac fahk, “Etuh pac ohinge, lah ke lwen sahflah uh pacl upac e tuhkuh.”²

Oacna sie mwet ma oasr muhtah in liye akucl ke pacl inge ac insrac in lohng kahs luhn mwet pahluh etuh lah ma inge pwacye. Ma upac uh tuhkuh nuh sesr ke ma koluk uh. Ma koluk inge yohkwelihk. Pwacnwacng ac upaclah, ac tiac fihsrwacsruh, in liyacacng akwuck muhtahl ma kuht enenuh in oraclah ac liyacacng in moulkihn wosasuc luhn Jisus Kraist.

Nuh sesr suc elyah kacsr sifacna ac ke mwet kuht luhngse uh, oasr finsrak ke olwelah ma God El tuh oraclah ke sie acn ma sef liki pahkah uh.

Pa inge sie petsac ke kahs ke acn se ingacn. Mwet pahluh uh kalweni na in ahkuhtweyac ke acn se inge. Ke sie srikasrak an, oacna ke sihmlac lun Puk luhn Mormon, pahpah moklweyuck ac luhngseyuck se fahk nuh sin tuhlihk nahtuhl lah elos ac ahkfokokoyaclos fuhkah in tu na kuh ke pacl pahkah tuhkuh met luhkwelos uh: “Ac inge, wen nuhtihk, esam, esam lah ke fin yot luhn Mwet in Molwelah lasr, suc pa Kraist, Wen nuhtin God, pa kowos enenuh in muhsahelah pwelucng lowos; tuh ke devil el ac suhpwaclah eng upac lal, ahok, sikucl lal nuh ke eng for uh, ahok, ke aes kwekwe raun nuhkwewa lal ac pahkah upac lal fah srihngihl kowos, ma inge ac fah wacngihn kuh la fowos in iskowosi nuh ten nuh ke inahlok luhn suhpwacr ac ongaiyac ma wacngihn sahflahiyac, ke srihpen yot se ma kowos muhsahyak fac, suc pa sie pwelucng pwacye, … ma fin mwet uh muhsah fac elos tiacna kuh in puhtatlac.”³

Suhpwacr wacngihn sahflahiyac ma el sramsramkihn uh pa ma tuhkuh ke ma koluk lasr fin kuht tiacna auliyak pwacye uh. Pahkah upac uh pa mwe sruhf ac mwe lain yohkwelihk lal Satan. Yohk srihpac na upac ingena in kahlwem kac lah ac muhsah fuhkah fin pwelucng pwacye se inge. Nuh sihk, wacngihn acn wo in suk we oacna ke mwe luti sahflah lal Tohkohsrah Benjamin, ma oacyacpac sihmlac ke Puk luhn Mormon.

Kahs in pahluh lal Tohkohsrah Benjamin fal nuh sesr mihsenge. El etwaclah sel sifacna ma upac ke mweun uh. El karihngihn mwet lal ke mweun, ke el luhlahlfongi ke kuh luhn God. El liye na pwacye kuh koluk lal Setuhn in srihfe, srihke in kuhtanglah, ac ahkmuhnahsye tuhlihk nuhtin God.

El sule mwet lal ac kuht in muhsah fin yot kuh se, suc pa Mwet in Molwelah lasr uh. El oraclah in kahlwem lah kuht sukohsohk in sulaclah inmahsrlon ma wo ac koluk ac kuht tiac kuh in kahingkihn ma ac sikyak ke srihpen sulaclah lasr uh. El sramsram suwohswohs ac ke puhsra muhlat ke srihpen el etuh suhpwacr se ma e tuhkuh nuh sin mwet ma e tiac lohng kahs in sensen lal.

Pa inge ahkuhtweyac lal ke ma ac sikyak ma kuht sulaclah lah kuht ukwe kolyuck luhn Nguhn kuh kuht ukwe kolyuck koluk sel Setuhn, suc srihpac lal pa in srihfe kuht ac kuhnaoskuhtlac.

“Tuh liye, oasr sie ma koluk sruhmuhnyuck kacl suc tuyak in ahkos nguhn [koluk] sacn; tuh el fin tahkuhnlah in ahksol, ac muhta na ac misac ke ma koluk lal, el na nihm koluk nuh ke moul lal sifacna; tuh el eis molo se kalyeiyuck ne tok ma pahtpaht, ke tahfonglac ke masap luhn God siena liki etuh lal sifacna. …

“Ohinge fin mwet sacn tiac auliyak, ac muhta ac misac oacna sie mwet lokoalok luhn God, ma toasr ke nuhnuhnkuh muhtahl ac okaswack nguhnan moul kawihl lal in etuh ke ma koluk lal sifacna, suc oruh elan lokweni ye muhtuhn Leum, ac nwacklah iniwacl ke mwactan ma koluk, ac waek, ac kweok, suc oacna sie e wacngihn sahflahiyac, suc fihrihr la sowack nuh lucng ne tok ac ma pahtpaht.”

Tohkohsrah Benjamin el tahfwelah in fahk: “O, kowos mwet mahtuh nuhkwewa, ac oacyacpac mwet fuhsr, ac kowos tuhlihk srihsrihk suc kuh in kahlwem ke kahs luhk, tuh nga sramsram in kahlwem nuh suwos tuh kowos in kahlwem, nga pruhe tuh kowos in acsmak in esam ke ohiyac koluk lalos suc puhtatyang nuh ke tahfonglac.”⁴

Nuh sihk, kuh ke kahs in sensen in auliyak inge oraclah sie petsac ke pacl se ma kom ac nga ac tuhfah tulac ye muhtahl Jisus tukun moul se inge. Kuht kena ke insiacsr kwewa in tiac sahngweng tuhsruhk in ngwetwack nuh sel, liye elan isrwacsr, ac lohng ke el fahk, “Suhmaht, kom oraclah wo ac mwet kuhlwacnsap fokoko se: … utyak nuh [loac].”⁵

Tohkohsrah Benjamin el oraclah kahlwem lah kuht ac fuhkah eis finsrak in lohng kahs inge fin kuht sokwack inkacnek ke moul se inge in eklac ke Iwaclah lal Jisus Kraist. Pa inge inkacnek se fanna kuht kuh in muhsahelah pwelucng fokoko kuht in muh kuh in tu na kuh pacl mwe sruhf luhn pahkah ac ma upac uh tuhkuh. Tohkohsrah Benjamin el ahkuhtweyac eklac se lasr inge ke sie puhpuhlyuck na wolacna ma insiuck arulacna fwefwelac kac. Orekmakihnyuck sin mwet pahluh ke yac tausin ac sel Leum sifacna pac. Pa inge ahkuhtweyac sac: kuht enenuh in eklac oacna sie tuhlihk—tuhlihk srihsrihk se.

Ac tiac fihsrwacsr nuh sin kuhtuh mwet uh in eis eklac se inge. Inkaiyacsr mwet uh kena tuh kuht in fokoko. Kuht kuh in liye muh in oacna sie tuhlihk el muhnahs. Inkaiyacn ninac ac pahpah uh rahrahlac nuh ke lwen se ma tuhlihk nahtuhlos uh ac tilac elahn tuhlihk srihsrihk uh. Tuhsruhk Tohkohsrah Benjamin el kahlwem kac lah meac kalmacn fokoko ac puhlaik ac el ahkuhtweyac in kahlwem lah in oacna sie tuhlihk srihsrihk tiac pa in elahn tuhlihk. Kalmac pa in oacna Mwet in Molwelah lasr, suc pruhe nuh sin Pahpah tuhmwacl in fokoko in kuh in oruh luhngse lal ac kihsackuhnuhlah nuh ke ma koluk nuhkwewa luhn tuhlihk nuhtin Pahpah na ac oraclah. Ohiyac in mwet lasr enenuh in eklac in oacna sie tuhlihk srihsrihk in eis kuh se ma kuht enenuh in eis in tu na kuh ac mislac ke pacl upac uh.

Pa inge ahkuhtweyac lal Tohkohsrah Benjamin lah fuhkah tuhkuh luhn eklac se inge: “Tuh mwet luhngse ma luhn facluh el sie mwet lokoalok nuh sin God, ac nuh oasr na e ke puhtatlac lal Adam, ac e fah, ne tok ac ma pahtpaht, sahyacn el lohacng nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist, ac eklac oacna sie tuhlihk srihsrihk, fihlpacp, fakpacp, mongfihsrwacsr, muhtweng, sesseslah ke luhngse, kena ahkostwen nuh ke ma nuhkwewa suc Leum El liye fal in oruh nuh sel, oacna ke sie tuhlihk fuhsr el ahkos pahpah tuhmwacl.”⁶

Kuht eis eklac se inge ke kuht oraclah ac ahksasucye olwelah lasr nuh sin God. Ma inge use kuh ke kihsackuhnlah lal Kraist in lwelah insiacsr in eklac. Kuht kuh in puhla pacl nuhkwewa kuht eis kuhfa luhn Leum, oruh orekma lun tempuhl luhn mwet misac lasr, fahkwack luhlahlfongi lasr kacl Jisus, kuh karihngihn sie mwet enenuh.

Ke ma inge, kuht eklac oacna sie tuhlihk ma luhngse ac ahkos. Kuht tuhkuh tu fin pwelucng pwacye. Luhlahlfongi lasr ke Jisus Kraist lwelah kuht in auliyak ac liyacacng masap Lal. Kuht ahkos, ac kuht eis kuh in lain mwe sruhf, ac kuht eis mwe sang luhn Nguhn Muhtahl.

Ohiyac lasr eklac oacna sie tuhlihk, ahkostwen nuh sin God ac yohkwelihk luhngse. Eklac se inge e tuhfah use nuh sesr kuht in kuh in puhlakihn mwe insewowo ma tuhkuh sin Nguhn Muhtahl me. In fohlohk, Nguhn Muhtahl e tuhfah ahkkweye, kol, ac ahkfokokoye kuht.

Nga lotwelah kalmacn kuhtuh ma Tohkohsrah Benjamin el fahk ke el fahk lah kuht kuh in eklac oacna tuhlihk srihsrihk ye muhtahl God. Nga lotwelah ke ma sikyak nuh sihk lah Nguhn Muhtahl el sramsram inkaiyacn pacl uh ke sie puhsra srihsrihk, ma fihsrwacsr in lohngyuck ke pacl se ma insiacn sie mwet el puhsisacl oacna tuhlihk uh. Pwacyeiyac, pruhe se ma orekma uh pa “Nga luhngse muhkwena ma Kom luhngse uh. Fahkma na nuh sihk lah meac se. Nga fah oraclah.

Ke pahkah luhn moul uh tuhkuh, kom kuh in tu na kuh ke srihpen kom tu fin yot in luhlahlfongi lom kacl Jisus Kraist. Luhlahlfongi se inge ac pwen kom in auliyak lwen nuhkwewa ac liyacacng olwelah lom. Esamuhl pacl nuh kwewa. Ke pahkah luhn sruhnga ac ma koluk, kom ac tuhfah puhla kuh ac finsrak.

Yohk liki na, kom ac tuhfah kahsrelah mwet sahyac in wi kom tu fin yot sacn. Pacl nuhkwewa luhlahlfongi ke Jisus Kraist ac kol kom nuh ke finsrak yohk ac luhngse nuh sin mwet sahyac, suc pa luhngse pwacye luhn Kraist.

Nga fahkwack ke luhlahlfongi pwacye luhk lah Leum Jisus Kraist El suli kom in fahsr nuh Yohrohl.⁷ El suli kom, ke luhngse Lal nuh sum ac nuh selos suc kom luhngse, in fahsr nuh Yohrohl nuh ke mihslac ke moul se inge ac ke moul ma pahtpaht ke facluh se tok uh. El etuh na pwacye ke pahkah ma kom ac sun inge lah ipin plwacn nuh ke engan ma pahtpaht.

Nga ngihsre kowos eis solsol luhn Leum. Oacna sie tuhlihk puhsisacl ac luhngse, eis kahsruh lal. Oraclah ac liyacacng olwelah ma El usot ke Alu luhn Jisus Kraist luhn Mwet luhlahlfongi ke Lwen-sahflah. Elos ac fah ahkfokokoye kom. Leum El etuh pahkah ac acn wo som nuh yen in monglac nuh yurin Pahpah tuhmasr Inkuhsrao uh. El etuh inkacnek uh. El pa inkacnek uh. Nga fahkwack ke ine muhtahl luhn Jisus Kraist, amen.