Hɛn Nkitahodzi a Yɛnye Nyame wɔ

Tse dɛ Job a ɔwɔ Ahyɛmu Dadaw mu no, ɔhaw ber mu no binom botum adwen dɛ Nyankopɔn egya hɔn ekyir. Osiandɛ yenyim dɛ Nyankopɔn wɔ tum dɛ Osiw anaa Oyi atseetsee biara fi hɔ no, bia yebohwinhwin sɛ Ɔannyɛ a, bia yebisa dɛ, “Sɛ Nyankopɔn amma me mboa no a mobɔ ho mpaa no a, mibesi dɛn enya gyedzi wɔ No mu?” No nsɔhwɛ dzendzen ber bi mu no, ɔtseneneenyi Job see dɛ:

“Ɔnodze hom nhu dɛ Nyame ebutuw no ama me na ɔdze no boa etwa moho ehyia.

“Metsẽa mu dɛ, ‘ɔayɛ me bɔn!’ Musũ frɛ mboa mpo a; wɔnngye mo do, atsɛmbu bi nnyi hɔ.”

No mbuae ma Job no, Nyankopɔn bisa no dɛ, “Ibobu me fɔ, na ɔwo edzi bem?”² Anaa mebɛkã no dɛ, “Edze bɔn mpo bofura me? Ana ibobua me atsɛn ama ɔwo w’asɛm atsen?”³ Jehovah dze ndamyɛ kaa Job No tum kɛse na dɛ onyim adze nyina, na Job wɔ ahobrɛadze no bun mu no gye to mu dɛ onnyim hwee a ɔbɛn Nyame Ne nyimdzee, tum na tseneneeyɛ na onnkotum ebua Otumfo no atsɛn:

“Minyim dɛ ɔwo itum adze nyinara yɛ,” na ɔsee dɛ, “na dɛ wo tsirmpɔw biara worunntum nnsiw no kwan,

“… Mekã dza menntse ase yi; ndzɛmba a ɔyɛ nwanwa dodow ma me, a minnyim. …

“Dɛm ntsi na mopow moho, na munu moho wɔ dɛtse nso mu.”⁴

Ewiei no, ɔyɛɛ adom ma Job dɛ ohun Ewuradze, na “Ewuradze hyiraa Job n’ewiei ma ɔbor n’ahyɛse.”⁵

Ɔyɛ egyangyandze ma hɛn dɛ yɛdze hɛn honam enyiwa a onnhu adze nnkɔ ekyir no susu dɛ yebobua Nyame atsɛn, mfatoho, yɛadwen dɛ, “M’enyi nngye, ntsi otwar dɛ Nyame rennyɛ biribi yie.” Hɛn no, No honam mu mba a yɛwɔ wiadze a ɔahwe ase mu, a yennyim dza wɔabɛsen, dza ɔrokɔ do na ndaamba ho ketseketse no, Ɔpaa mu kã dɛ, “ Ndzɛmba nyina gu m’enyim osiandɛ minyim ne nyinara.”⁶ Jacob tu fo nyansa mu dɛ: “Mma hom mmper dɛ hom botu Ewuradze fo, na mbom dɛ hom bɛgye ne nsamu afotu. Na hwɛ, hom ankasa hom nyim dɛ otu fo wɔ nyansa na pɛrpɛr mu, na ehumbɔbɔr kɛse mu, wɔ no ndwuma nyinara mu.”⁷

Binom a wɔnntse Nyankopɔn anohoba no ase yie dwen dɛ yɛyɛ setsie ma no a ɔdze nsunsuando pɔkyee binom ba wɔ mber a wɔahyehyɛ no pɛpɛɛr mu. Wobotum adwen dɛ, “Sɛ mosom etuhoakyɛ asɛmpakã dwuma enyiber do a, Nyankopɔn dze awar pa na mba behyira me” anaa “Sɛ migyaa dɛ mereyɛ skuul adzesũadze Ahomgyeda a, Nyankopɔn dze adzesũa mu konyimdzi behyira me” anaa “Sɛ mutua ebupɛn du a, Nyankopɔn bɛma menya edwuma a mepɛ no.” Sɛ abrabɔ annda kwan yi do pɛpɛɛpɛ a, anaa dɛ mber a hɔn enyi da a, wobotum enya atsenkã dɛ Nyankopɔn apa hɔn. Naaso ndzɛmba nntse dɛm koraa wɔ ɔsor nhyehyɛɛ mu. Onnyi dɛ yɛdwen dɛ Nyankopɔn ne nhyehyɛɛ no yɛ ɔsorsor akyɛdze efir a (1) yeyi nhyira a yɛpɛ, (2) yɛdze ho ndwuma pa ɔfata hyɛ mu, na (3) ntsɛmara dza yebisaa no wɔdze abrɛ hɛn.⁸

Nyankopɔn bedzi N’ahyɛmudzi na anohoba horow no nyi ama hɛn mu kor biara. Onnyi dɛ yɛhaw wɔ ɔno ho.⁹ Jesus Christ no werdam tum —nyia osianee baa ndzɛmba nyinara ase na nkyii ɔfowee kɔr sor,¹⁰ na ɔwɔ ɔsor na asaase do tum nyina¹¹—hwɛ no yie dɛ Nyankopɔn botum na ɔbɛhyɛ N’anohoba horow no mã. Ohia tsitsir dɛ yedzi Ne mbra nyi na yedzi do, naaso ɔnnyɛ nhyira biara a ogyina setsie ma mbra do¹² na no su, nhyehyɛɛ, na mber tse dɛ hɛn enyidakwan. Yɛyɛ dza yebotum nyina mbom otwar dɛ yegyaa No ma Ɔhwɛ honandua na sunsum mu nyina nhyira no do.

President Brigham Young kyerɛkyerɛɛ mu dɛ nnyɛ nsunsuando anaa nhyira a woesi no pi do na ne gyedzi tsim do, mbom wɔ ne dasegye wɔ Jesus Christ ho nye Ne ntamu nkitahodzi. Ɔkãa dɛ: “Me gyedzi nngyina Ewuradze no dwuma wɔ po esupruw do, wɔ Ɔdze no nkorɔfo aba ha, … nna ɔnnyɛ adom a ɔdze ehyira nkorɔfo yi anaa dɛm nkorɔfo no do, nna ɔnnyɛ woehyira hɛn anaa wonnhyira hɛn, mbom me gyedzi tsim Ewuradze Jesus Christ do, na nyimdzee a meenya efi No hɔ,”¹³

Hɛn nnuho na setsie, hɛn som na afɔrbɔ horow ho hia. Yɛpɛ dɛ yɛkã hɔn a Ether kãa hɔn ho asɛm dɛ “daa wɔbor do wɔ ndwuma pa mu.”¹⁴ Mbom ɔnnyɛ dɛ wɔkan biribi to hɛn celestial fotow mu. Ndzɛmba yinom hia osiandɛ ɔma yɛdze hɛnho hyɛ Nyankopɔn edwuma mu na ɔyɛ kwan a yɛnye no bɔ mu dzi dwuma wɔ hɛnankasa hɛn nsakyeree fi honammunyi kɔ ɔhotseweefo.¹⁵ Dza Ɔsor Egya dze ma hɛn nye Ɔnoara Ankasa na Ne Mba, a ɔyɛ nkitahodzi a otsim yie a yedua, Jesus Christ, hɛn Pomfo adom na ntamugyina mu nye Hɔn nya no.

Yɛyɛ Nyame ne mba a, woeyi hɛn esi hɔ ama bɛkyebo asetsena na onnyiewiei nkwa. Hɛn nkrabea nye yɛbɛyɛ N’adzedzifo, “Christ afɛ-adzedzifo.”¹⁶ Hɛn Egya pɛ dɛ Ɔma hɛn mu kor biara kwankyerɛ wɔ N’ahyɛmu anamɔn kwan no do a Oesiesie anamɔntu ama hɛn dɛ yɛyɛ ankorankor na Ɔahyehyɛ Ne nhyehyɛɛ no ama hɛn ndaamba enyigye wɔ Ne nkyɛn. Yebotum enya enyidakwan wɔ awerɛhyɛmu a orinyin na gyedzi wɔ Egya na Ɔba no mu, na Hɔn dɔ ho atsenkã mbordo, na awerɛkyekye na kwankyerɛ a daa ofi Sunsum Krɔnkrɔn no hɔ.

Iyi mpo no, anamɔn kwan yi nnkɛyɛ mberɛw ama hɛn mu biara. Ohia nsiesie piigyan ama wɔaayɛ mberɛw. Jesus see dɛ:

“Emi nye nokwar wenyindua no, M’Egya nye okuafo no.

“Abaw biara a ɔnnsow aba no [Egya no] yi no, na abaw biara a ɔsow aba no, oyiyi ho, ma ɔasow aba pii.”¹⁷

Kwan a Nyame fa do dze yiyi ho na ɔtsew ho no, mbrɛ ɔbɛdan biara no, mber binom no ɔbɛyɛ akomatsew na yaw kɛse. Yɛrekaa Paul n’asɛnkã no, yɛyɛ “Christ afɛ-adzedzifo; sɛ yɛnye no hu amandze ama wɔaahyɛ yɛnye no enyimnyam a.”¹⁸

Ntsi, yɛwɔ namfo gya yi mu yi, nkyɛ hɛn bo bofuuw Nyame no, hom mma yɛmbɛn Nyame. Frɛ Egya no wɔ Ɔba no ne dzin mu. Nye Hɔn nantsew Sunsum mu, da biara. Ma Hɔn kwan ma Wɔnda Hɔn nokwardzi nkyerɛ wo. Bra nokwar mu ara dɛ irubohu Hɔn na nokwar mu ara ehu wo ho.¹⁹ Hom mma Nyankopɔn ndzi nyim.²⁰ Agyenkwa no ma hɛn awerɛhyɛmu dɛ:

“Hom ntsie nyia ɔyɛ dzimafo no wɔ Egya n’enyim, nyia ɔserɛ hom asɛm ma hom wɔ n’enyim no—

“Rese dɛ: Egya, hwɛ nyia ɔannyɛ bɔn no n’amandzehu na no wu, ɔno a ɔsɔ w’enyi no; hwɛ wo Ba no bɔgyaa a okyii no, nyia iyii no mae ama oeekyi no bɔgyaa aahyɛ wo enyimnyam;

Dɛm ntsi, Egya, gye mo nuanom [na me nkyerɛbaa] yinom a wɔgye me dzin dzi no, ama wɔaaba mo hɔ na woeenya daapem nkwa²¹

Hom nsusu mbarimba na mbaa anokwafo a wɔtwer Nyankopɔn hɔn fasusu, a wɔwɔ awerɛhyɛmu dɛ Ne nhyira a wɔabɔ ho anohoba bɔwɔ hɔn do wɔ nkwa ber yi mu anaa owu mu. Hɔn gyedzi enngyina dza Nyankopɔn yɛe anaa Ɔannyɛ wɔ gyinabew pɔkyee bi anaa mber pɔkyee bi mu mbom ogyina wonyin No dɛ hɔn Egya dɔfo na Jesus Christ dɛ hɔn Pomfo nokwafo.

Ber a nna Egyptnyi Elkenah sɔfo dze Abraham robɔbɔ afɔr ara no, osũi frɛɛ Nyame dɛ ɔngye no nkwa, na Nyame yɛe.²² Abraham tsenaa ase bɛyɛɛ anokwafo egya a ofi n’asefo mu na wobehyira asaase do ebusua ebusua nyina.²³ Mber kakra ntamu ara no, wɔ afɔrmbukyia noara do no, dɛm Elkenah sɔfo noara dze mbaabun baasa a “osian hɔn ɔbrapa ntsi; … [wɔamm]bɔ hɔn mu adze a[nn]som enyame a wɔyɛ dua anaa ɔbo”²⁴ no abɔ afɔr. Wowui wɔ hɔn gyedzi ho ntsi.

Tsetse Joseph, nankasa no nuambanyin tɔɔn no kɔr nkowaasom mu ne mbabun ber mu, n’ahohyehye mu no ɔdanee kɔr Nyame hɔ. Nkakrankakra no, ɔbaa kan wɔ enyimnyam mu wɔ no wura fie wɔ Egypt naaso nkyii wɔtseew mpontu yi do osian Potiphar ne yer no ɔtor asɛm ntodo ntsi. Nkyɛ Joseph botum adwen dɛ, “Ntsi mirisie ahosan mbra n’ewiei nye efiadze ha.” Mbom ɔdanee kɔr Nyame hɔ na ɔyɛɛ prɔmprɔm wɔ efiadze mpo. Joseph nyaa abagura yaayaw bio ber a duaduanyi bi a ɔfaa no nyɛnko, a n’anohoba dɛ ɔbɔboa Joseph nyina ekyir no, no werɛ fiir no ber a wɔsanee nye no baa ne dzibew mu wɔ Pharaoh ahemfie. Mber rugu mu no, dɛ mbrɛ hom nyim no, Ewuradze saan mu dze Joseph too dzibew a ɔkrɔn tsitsir a Pharaoh nko na ɔbor no tum do, a ɔmaa Joseph kwan ma ɔgyee Israel fifo. Nokwar, nna Joseph tum gye dase dɛ “hɔn a wɔdɔ Nyankopɔn no, ɔdze adze nyina bɔ mu yɛ edwuma ma hɔn yie.”²⁵

Nna Abinadi ne tsirmpɔw nye dɛ ɔbɛhyɛ no dwuma krɔnkrɔn no mã. Ɔkãa dɛ, “ Mewie m’asɛm kã; na afei onnhia beebi a mobɔkɔ, sɛ ɔba dɛ wɔagye me nkwa a.”²⁶ Wokuum no wɔ ne gyedzi ho ntsi, mbom nokwar ara wɔgyee no nkwa wɔ Nyame ahenman no mu, na ne nyimpa kor a ɔsom bo a ɔsakyeree, Alma, sesãa Nephifo abakɔsɛm dze kesi Christ Ne mbae.

Wɔgyee Alma na Amulek fii efiadze mu wɔ Ammonihah ɔnam hɔn ntotɔserɛ ho mbuae, na hɔn etsiafo no wui.²⁷ Naaso, ansaana no, dɛ etsiafo nyinom atow mbaa agyedzifo na hɔn mbofra akyɛn ogya framee mu. Alma rohwɛ ewurkadze yaayaw a ɔtse dɛm no Sunsum no peem no adze dɛ mma ɔmfa Nyankopɔn no tum “ngye hɔn mfi ogya framee no mu”²⁸ ama wɔagye hɔn wɔ Nyame nkyɛn wɔ enyimnyam mu.²⁹

Ber a Nkɔnhyɛnyi Joseph Smith da Liberty, Missouri efiadze rebrɛ, na onnyi tum biara dze boa Ahotseweefo ber a woruwia hɔn ndzɛmba na woritsiw hɔn efi hɔ efiefi awɔwber yaayaw mu. “O Nyankopɔn, ewɔ hen?” Joseph sũi. “Ibesianka wo nsa ekodu dabɛn?”³⁰ Mbuae no, Ewuradze bɔɔ anohoba dɛ: “W’akotorka na w’amandzehu na ɔnnkɛkyɛr; na afei, sɛ esɔw no yie a, Nyankopɔn bɛma wo do wɔ sor. … Innyae nnyɛɛ dɛ Job”³¹

Ewiei no, nna Joseph tum nye Job kã dɛ, “[Nyame] ruku me mpo a, mohwɛ ɔnoara.”³²

Elder Brook P. Hales kã Akyerɛbaa Patricia Parkinson, a wɔwoo no ɔwɔ enyiwa a ohu adze yie mbom odzii mfe 11 no nna oefura ho asɛm.

Elder Hales kãa dɛ: “Minyim Pat mfe pii mu na ndaansa yi mekãa kyerɛɛ no dɛ m’enyigye dɛ ber biara ɔtsew n’enyim na n’engyi gye. Obuaa dɛ, ‘Nyew, nnye monko ntsenaa fie, anaa? Mowɔ me mber. Menya abagura dzendzen mpɛn pii, na mesũ ara yie.’ Naaso, ɔdze kãa ho dɛ, ‘Fitsi ber a m’enyiwa hyɛɛ ase dɛ onnhu adze papa no, nna ɔyɛ nwanwa, naaso nna minyim dɛ Ɔsor Egya na Agyenkwa no kã emi na m’ebusua ho. … Hɔn a wobisa me dɛ sɛ mobo fuw osian m’enyifura ntsi a, mubua dɛ, ‘Woana na mo bo mfuw no? Ɔsor Egya kã mo ho; minnyɛ ankonam. Ɔkã moho aber nyina.’”³³

Ewiei no, ɔyɛ nkitahodzi a otsim yie a yɛnye Egya no na Ba no nya ho nhyira na yɛhwehwɛ. Ɔno na ɔdze nsonsonee ba na ɔfata no bo ɔsom daapem. Yɛnye Paul bɛgye dase dɛ “Na mubu no sesei [ɔnnkyebo] ber yi mu amandzehu nnsɛ dɛ wɔdze to enyimnyam a woribeyi no edzi ama hɛn no ho.”³⁴ Megye dase dɛ mbrɛ hɛn honandua mu sũahu bɛyɛ biara no yebotum yɛatwer Nyankopɔn na yenya enyigye wɔ No mu.

“Fa wo werɛ nyina hyɛ Ewuradze mu; na mma nntwer wankasa wo ntseasee.

“W’akwan nyina mu no kan no to mu, na ɔno na ɔbɛkyerɛ wo w’akwan.”³⁵

Jesus Christ ne dzin mu, amen.