ເອົາຊະນະໂລກ ແລະ ພົບຄວາມເຊົາເມື່ອຍ
ຊອກຫາຄວາມເຊົາເມື່ອຍຈາກຄວາມໜັກໜ່ວງ, ຄວາມບໍ່ແນ່ນອນ, ແລະ ຄວາມເຈັບປວດຂອງໂລກນີ້ ໂດຍການເອົາຊະນະໂລກ ຜ່ານທາງພັນທະສັນຍາຂອງທ່ານກັບພຣະເຈົ້າ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູທີ່ໄດ້ທັກທາຍທ່ານໃນເຊົ້າວັນຊະບາໂຕທີ່ຮຸ່ງໂລດມື້ນີ້. ທ່ານຢູ່ໃນຈິດໃຈຂອງຂ້າພະເຈົ້າສະເໝີ. ຂ້າພະເຈົ້າປະຫລາດໃຈທີ່ທ່ານເລີ່ມລົງມືເມື່ອໃດກໍຕາມທີ່ທ່ານເຫັນຄົນອື່ນຂັດສົນ. ຂ້າພະເຈົ້າປະຫລາດໃຈກັບສັດທາ ແລະ ປະຈັກພະຍານທີ່ທ່ານສະແດງເທື່ອແລ້ວເທື່ອອີກ. ຂ້າພະເຈົ້າຮ້ອງໄຫ້ເພາະຄວາມເຈັບປວດໃຈ, ຄວາມຜິດຫວັງ, ແລະ ຄວາມກັງວົນຂອງທ່ານ. ຂ້າພະເຈົ້າຮັກທ່ານ. ຂ້າພະເຈົ້າຮັບຮອງກັບທ່ານວ່າ ພຣະບິດາເທິງສະຫວັນ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ຮັກທ່ານ. ພວກພຣະອົງຮູ້ເຖິງສະຖານະການຂອງທ່ານ, ຄວາມດີງາມຂອງທ່ານ, ຄວາມຕ້ອງການຂອງທ່ານ, ແລະ ຄຳອະທິຖານຂໍຄວາມຊ່ວຍເຫລືອຂອງທ່ານ. ເທື່ອແລ້ວເທື່ອອີກ, ຂ້າພະເຈົ້າອະທິຖານເພື່ອໃຫ້ທ່ານຮູ້ສຶກເຖິງຄວາມຮັກຂອງພວກພຣະອົງທີ່ມີຕໍ່ທ່ານ.
ການປະສົບກັບຄວາມຮັກຂອງພວກພຣະອົງເປັນສິ່ງສຳຄັນ, ເພາະເບິ່ງຄືວ່າ ເຮົາຖືກລົບກວນດ້ວຍຂ່າວສານທີ່ໜ້າເປັນຫ່ວງໃນແຕ່ລະວັນ. ທ່ານອາດມີມື້ທີ່ທ່ານຢາກນຸ່ງຊຸດນອນ, ຕູ້ມຜ້າຫົ່ມນອນຂົດຢູ່, ແລະ ຂໍໃຫ້ໃຜຜູ້ໜຶ່ງມາປຸກທ່ານເມື່ອຄວາມວຸ້ນວາຍຈົບລົງ.
ແຕ່, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ມີສິ່ງອັດສະຈັນຢ່າງຫລວງຫລາຍຢູ່ຂ້າງໜ້າ. ໃນວັນຂ້າງໜ້າ, ເຮົາຈະເຫັນການສະແດງໃຫ້ປະຈັກອັນ ຍິ່ງໃຫຍ່ທີ່ສຸດ ຂອງອຳນາດຂອງພຣະຜູ້ຊ່ວຍໃຫ້ລອດ ທີ່ໂລກ ເຄີຍ ເຫັນມາກ່ອນ. ລະຫວ່າງເວລານີ້ ແລະ ເວລາທີ່ພຣະອົງສະເດັດກັບມາ “ດ້ວຍອຳນາດ ແລະ ລັດສະໝີພາບອັນຍິ່ງໃຫຍ່,”1 ພຣະອົງຈະປະທານສິດທິພິເສດ, ພອນ, ແລະ ການອັດສະຈັນ ຈົນນັບບໍ່ຖ້ວນໃຫ້ແກ່ຜູ້ທີ່ຊື່ສັດ.
ເຖິງຢ່າງໃດກໍຕາມ, ເຮົາກຳລັງອາໄສຢູ່ໃນຊ່ວງເວລາທີ່ຊັບຊ້ອນທີ່ສຸດ ໃນປະຫວັດສາດຂອງໂລກແທ້ໆ. ຄວາມຊັບຊ້ອນ ແລະ ການທ້າທາຍເຮັດໃຫ້ຫລາຍຄົນຮູ້ສຶກໜັກໃຈ ແລະ ໝົດແຮງ. ເຖິງຢ່າງໃດກໍຕາມ, ໃຫ້ພິຈາລະນາປະສົບການເມື່ອບໍ່ດົນມານີ້ ທີ່ອາດໃຫ້ຄວາມກະຈ່າງແຈ້ງ ເຖິງວິທີທີ່ທ່ານ ແລະ ຂ້າພະເຈົ້າສາມາດເຊົາເມື່ອຍໄດ້ແນວໃດ.
ລະຫວ່າງການເປີດຊົມພຣະວິຫານ ວໍຊິງຕັນ ດີຊີ ເມື່ອບໍ່ດົນມານີ້, ສະມາຊິກຄົນໜຶ່ງໃນຄະນະກຳມະການຕ້ອນຮັບແຂກ ໄດ້ເຫັນເຫດການທີ່ໃຫ້ຄວາມຮູ້ ຂະນະທີ່ລາວພານັກຂ່າວທີ່ມີຊື່ສຽງຫລາຍຄົນທ່ຽວຊົມທົ່ວພຣະວິຫານ. ມີຄອບຄົວໜຶ່ງໄດ້ຕິດໄປກັບກຸ່ມນັກສື່ຂ່າວແບບບໍ່ຮູ້ຕົວ. ນັກຂ່າວຄົນໜຶ່ງໄດ້ຖາມກ່ຽວກັບ “ການເດີນທາງ” ຂອງຜູ້ໄປເຮັດພິທີພຣະວິຫານ ເມື່ອເຂົາເຈົ້າເດີນຈາກຫ້ອງໜຶ່ງໄປຫາອີກຫ້ອງໜຶ່ງ. ລາວຢາກຮູ້ວ່າ ການເດີນທາງໃນພຣະວິຫານ ເປັນສັນຍາລັກຂອງການທ້າທາຍໃນການເດີນທາງຕະຫລອດຊີວິດຂອງບຸກຄົນຫລືບໍ່.
ທ້າວນ້ອຍຄົນໜຶ່ງໃນຄອບຄົວນັ້ນໄດ້ເລີ່ມສົນທະນາ. ເມື່ອກຸ່ມເຂົາເຈົ້າເຂົ້າໄປໃນຫ້ອງຮັບຂອງປະທານສັກສິດ, ທ້າວນ້ອຍໄດ້ຊີ້ໃສ່ແທ່ນບູຊາ, ບ່ອນທີ່ຜູ້ຄົນໃຊ້ຄຸເຂົ່າເມື່ອເຮັດພັນທະສັນຍາກັບພຣະເຈົ້າ, ແລະ ທ້າວນ້ອຍເວົ້າວ່າ, “ໂອ, ບ່ອນຫັ້ນງາມ. ບ່ອນນີ້ເປັນບ່ອນໃຫ້ຜູ້ຄົນ ເຊົາເມື່ອຍ ຈາກການເດີນທາງໃນພຣະວິຫານຂອງເຂົາເຈົ້າ.”
ຂ້າພະເຈົ້າບໍ່ຄິດວ່າ ທ້າວນ້ອຍຄົນນັ້ນຮູ້ວ່າການສັງເກດຂອງລາວເລິກເຊິ່ງພຽງໃດ. ລາວຄົງບໍ່ຮູ້ຈັກກ່ຽວກັບຄວາມເຊື່ອມໂຍງໂດຍກົງລະຫວ່າງການເຮັດພັນທະສັນຍາກັບພຣະເຈົ້າໃນພຣະວິຫານ ກັບຄຳສັນຍາອັນໜ້າງຶດງໍ້ຂອງພຣະຜູ້ຊ່ວຍໃຫ້ລອດ.
“ບັນດາຜູ້ທີ່ເຮັດການໜັກໜ່ວງ ແລະ ແບກພາລະໜັກ, ຈົ່ງມາຫາເຮົາ, ແລະ ເຮົາຈະໃຫ້ພວກເຈົ້າໄດ້ຮັບ ຄວາມເຊົາເມື່ອຍ.
“ຈົ່ງເອົາແອກຂອງເຮົາແບກໄວ້, ແລ້ວຮຽນຮູ້ຈາກເຮົາ; … ແລ້ວຈິດໃຈຂອງພວກເຈົ້າຈະໄດ້ພົບ ຄວາມເຊົາເມື່ອຍ.
“ດ້ວຍວ່າ ແອກຂອງເຮົາກໍພໍເໝາະ ແລະ ພາລະຂອງເຮົາກໍເບົາ.”2
ອ້າຍເອື້ອຍນ້ອງທີ່ຮັກແພງ, ຂ້າພະເຈົ້າເສຍໃຈກັບຜູ້ທີ່ໜີຈາກສາດສະໜາຈັກນີ້ໄປ ເພາະເຂົາເຈົ້າຮູ້ສຶກວ່າ ສະມາຊິກກະພາບຮຽກຮ້ອງຫລາຍເກີນໄປຈາກເຂົາເຈົ້າ. ເຂົາເຈົ້າຍັງບໍ່ໄດ້ຄົ້ນພົບວ່າ ການເຮັດ ແລະ ການຮັກສາພັນທະສັນຍາ ທີ່ແທ້ແລ້ວ ມັນເຮັດໃຫ້ຊີວິດງ່າຍຂຶ້ນ! ທຸກຄົນທີ່ເຮັດພັນທະສັນຍາຢູ່ທີ່ອ່າງບັບຕິສະມາ ແລະ ໃນພຣະວິຫານ—ແລະ ຮັກສາມັນ—ສາມາດເຂົ້າເຖິງອຳນາດຂອງພຣະເຢຊູຄຣິດຫລາຍຂຶ້ນ. ກະລຸນາໄຕ່ຕອງຄວາມຈິງທີ່ໜ້າງຶດງໍ້ນັ້ນ!
ລາງວັນສຳລັບການຮັກສາພັນທະສັນຍາກັບພຣະເຈົ້າ ຄືພະລັງຈາກສະຫວັນ—ພະລັງທີ່ເສີມກຳລັງໃຫ້ເຮົາ ເພື່ອຕ້ານທານກັບການທົດລອງ, ການລໍ້ລວງ, ແລະ ຄວາມເຈັບປວດໃຈ ໄດ້ດີກວ່າເກົ່າ. ພະລັງນີ້ເຮັດໃຫ້ເຮົາສະບາຍໃຈຂຶ້ນ. ຜູ້ທີ່ດຳລົງຊີວິດຕາມກົດທີ່ສູງກວ່າຂອງພຣະເຢຊູຄຣິດໄດ້ເຂົ້າເຖິງອຳນາດທີ່ສູງກວ່າຂອງພຣະອົງ. ດັ່ງນັ້ນ, ຜູ້ຮັກສາພັນທະສັນຍາຈຶ່ງມີສິດໄດ້ຮັບ ຄວາມເຊົາເມື່ອຍ ທີ່ມາສູ່ເຂົາເຈົ້າຜ່ານທາງຄວາມສຳພັນແຫ່ງພັນທະສັນຍາຂອງເຂົາເຈົ້າກັບພຣະເຈົ້າ.
ກ່ອນພຣະຜູ້ຊ່ວຍໃຫ້ລອດໄດ້ຍອມຕົນຕໍ່ຄວາມທຸກທໍລະມານຢູ່ທີ່ເຄັດເຊມາເນ ແລະ ພູກະໂຫລກຫົວ, ພຣະອົງໄດ້ປະກາດຕໍ່ອັກຄະສາວົກຂອງພຣະອົງວ່າ, “ໃນໂລກນີ້ພວກເຈົ້າຈະມີຄວາມທຸກລຳບາກ ແຕ່ຈົ່ງຊື່ນໃຈເທາະ; ເພາະຝ່າຍເຮົາ ໄດ້ຊະນະໂລກແລ້ວ.”3 ຕໍ່ຈາກນັ້ນ, ພຣະເຢຊູໄດ້ວິງວອນເຮົາແຕ່ລະຄົນໃຫ້ເຮັດເຊັ່ນດຽວກັນ ເມື່ອພຣະອົງກ່າວວ່າ, “ເຮົາ ຈະ ໃຫ້ ພວກເຈົ້າ ເອົາ ຊະນະ ໂລກ.”4
ອ້າຍເອື້ອຍນ້ອງທີ່ຮັກແພງ, ຂ່າວສານຂອງຂ້າພະເຈົ້າຕໍ່ທ່ານໃນມື້ນີ້ ແມ່ນວ່າ ເພາະພຣະເຢຊູຄຣິດໄດ້ເອົາຊະນະໂລກທີ່ຕົກນີ້, ແລະ ເພາະພຣະອົງໄດ້ຊົດໃຊ້ເພື່ອເຮົາແຕ່ລະຄົນ, ທ່ານກໍສາມາດເອົາຊະນະໂລກທີ່ເຕັມໄປດ້ວຍບາບ, ເຫັນແກ່ຕົວ, ແລະ ໝົດແຮງຢູ່ເລື້ອຍນີ້ໄດ້ຄືກັນ.
ເພາະພຣະຜູ້ຊ່ວຍໃຫ້ລອດ, ຜ່ານທາງການຊົດໃຊ້ອັນບໍ່ມີຂອບເຂດຂອງພຣະອົງ, ໄດ້ໄຖ່ເຮົາແຕ່ລະຄົນຈາກຄວາມອ່ອນແອ, ຄວາມຜິດພາດ, ແລະ ບາບ, ແລະ ເພາະພຣະອົງໄດ້ປະສົບກັບຄວາມເຈັບປວດ, ຄວາມກັງວົນ, ແລະ ຄວາມໜັກໜ່ວງທຸກຢ່າງ ທີ່ທ່ານເຄີຍມີ,5 ແລ້ວ ເມື່ອທ່ານກັບໃຈຢ່າງແທ້ຈິງ ແລະ ສະແຫວງຫາຄວາມຊ່ວຍເຫລືອຈາກພຣະອົງ, ທ່ານຈະສາມາດຢູ່ເໜືອໂລກທີ່ບໍ່ແນ່ນອນໃນປະຈຸບັນນີ້ໄດ້.
ທ່ານສາມາດເອົາຊະນະໄພພິບັດທາງວິນຍານ ແລະ ທາງອາລົມຂອງໂລກນີ້ໄດ້, ລວມທັງຄວາມຈອງຫອງ, ຄວາມທະນົງຕົວ, ຄວາມໃຈຮ້າຍ, ການຜິດສິນທຳ, ຄວາມກຽດຊັງ, ຄວາມໂລບ, ຄວາມອິດສາ, ແລະ ຄວາມຢ້ານກົວ. ເຖິງແມ່ນສິ່ງລົບກວນ ແລະ ການບິດເບືອນໝຸນວຽນຢູ່ຮອບຕົວເຮົາ, ແຕ່ທ່ານສາມາດພົບ ຄວາມເຊົາເມື່ອຍ—ທີ່ແທ້ຈິງ ໝາຍເຖິງການບັນເທົາທຸກ ແລະ ຄວາມສະຫງົບ—ແມ່ນແຕ່ທ່າມກາງບັນຫາທີ່ໜ້າລຳຄານທີ່ສຸດຂອງທ່ານ.
ຄວາມຈິງທີ່ສຳຄັນນີ້ກະຕຸ້ນຄຳຖາມພື້ນຖານສາມຂໍ້:
ຂໍ້ທຳອິດ, ການເອົາຊະນະໂລກໝາຍຄວາມວ່າແນວໃດ?
ຂໍ້ທີສອງ, ເຮົາຈະເຮັດແນວໃດ?
ຂໍ້ທີສາມ, ການເອົາຊະນະໂລກເປັນພອນໃຫ້ແກ່ຊີວິດຂອງເຮົາແນວໃດ?
ການເອົາຊະນະໂລກໝາຍຄວາມວ່າແນວໃດ? ໝາຍເຖິງການເອົາຊະນະການລໍ້ລວງທີ່ຈະໃຫ້ສົນໃຈເລື່ອງຂອງໂລກນີ້ຫລາຍກວ່າເລື່ອງຂອງພຣະເຈົ້າ. ໝາຍເຖິງການໄວ້ວາງໃຈໃນຄຳສອນຂອງພຣະຄຣິດຫລາຍກວ່າປັດຊະຍາຂອງມະນຸດ. ໝາຍເຖິງການຍິນດີໃນຄວາມຈິງ, ປະນາມການຫລອກລວງ, ແລະ ກາຍເປັນ “ຜູ້ຕິດຕາມທີ່ຖ່ອມຕົວຂອງພຣະຄຣິດ.”6 ໝາຍເຖິງການເລືອກທີ່ຈະຫລີກເວັ້ນຈາກທຸກສິ່ງທີ່ຂັບໄລ່ພຣະວິນຍານໃຫ້ໜີໄປ. ໝາຍເຖິງການເຕັມໃຈທີ່ຈະ “ປະຖິ້ມ” ແມ່ນແຕ່ບາບທີ່ເຮົາໂປດປານ.7
ບັດນີ້, ການເອົາຊະນະໂລກບໍ່ໄດ້ໝາຍຄວາມວ່າ ຈະຕ້ອງສົມບູນແບບໃນຊີວິດນີ້, ແລະ ບໍ່ໄດ້ໝາຍຄວາມວ່າບັນຫາຂອງທ່ານຈະຫາຍໄປຢ່າງໜ້າອັດສະຈັນ—ເພາະມັນຈະບໍ່ເປັນເຊັ່ນນັ້ນ. ແລະ ມັນຈະ ບໍ່ ໝາຍຄວາມວ່າ ທ່ານຈະບໍ່ເຮັດຄວາມຜິດອີກ. ແຕ່ການເອົາຊະນະໂລກໝາຍຄວາມວ່າ ການຕໍ່ຕ້ານບາບຂອງທ່ານຈະມີເພີ່ມຂຶ້ນ. ໃຈຂອງທ່ານຈະອ່ອນລົງ ຂະນະທີ່ສັດທາຂອງທ່ານໃນພຣະເຢຊູຄຣິດເພີ່ມຂຶ້ນ.8 ການເອົາຊະນະໂລກໝາຍເຖິງການເຕີບໂຕທີ່ຈະຮັກພຣະເຈົ້າ ແລະ ພຣະບຸດທີ່ຮັກຂອງພຣະອົງ ຫລາຍກວ່າທ່ານຈະຮັກຄົນໃດ ຫລື ສິ່ງອື່ນໃດ.
ແລ້ວ, ດ້ວຍວິທີໃດ, ເຮົາຈະເອົາຊະນະໂລກໄດ້? ກະສັດເບັນຢາມິນໄດ້ສິດສອນວິທີໃຫ້ເຮົາ. ເພິ່ນໄດ້ກ່າວວ່າ “ມະນຸດທີ່ມີຈິດໃຈທຳມະດາເປັນສັດຕູກັບພຣະເຈົ້າ” ແລະ ຈະເປັນຕະຫລອດໄປ “ເວັ້ນເສຍແຕ່ ເຂົາຈະຍອມຕໍ່ການຊັກຈູງຂອງພຣະວິນຍານສັກສິດ, ແລະ ປະຖິ້ມມະນຸດທີ່ມີຈິດໃຈທຳມະດາ ແລະ ກາຍມາເປັນໄພ່ພົນຂອງພຣະເຈົ້າໂດຍການຊົດໃຊ້ຂອງອົງພຣະຄຣິດ.”9 ທຸກເທື່ອທີ່ທ່ານສະແຫວງຫາທີ່ຈະເຮັດຕາມການກະຕຸ້ນຂອງພຣະວິນຍານ, ທຸກເທື່ອທີ່ທ່ານເຮັດສິ່ງໃດກໍຕາມທີ່ດີ—ສິ່ງທີ່ “ມະນຸດທີ່ມີຈິດໃຈທຳມະດາ” ບໍ່ເຮັດ—ທ່ານກຳລັງເອົາຊະນະໂລກ.
ການເອົາຊະນະໂລກບໍ່ແມ່ນເຫດການໃດໜຶ່ງທີ່ເກີດຂຶ້ນໃນມື້ໜຶ່ງ ຫລື ສອງມື້. ມັນເກີດຂຶ້ນຕະຫລອດຊີວິດ ເມື່ອເຮົາຮັບເອົາຄຳສອນຂອງພຣະອົງຊ້ຳແລ້ວຊ້ຳອີກ. ເຮົາປູກຝັງສັດທາໃນພຣະເຢຊູຄຣິດ ໂດຍການກັບໃຈທຸກວັນ ແລະ ການຮັກສາພັນທະສັນຍາທີ່ມອບພະລັງໃຫ້ເຮົາ. ເຮົາຢູ່ໃນເສັ້ນທາງແຫ່ງພັນທະສັນຍາ ແລະ ໄດ້ຮັບພອນດ້ວຍພະລັງທາງວິນຍານ, ການເປີດເຜີຍສ່ວນຕົວ, ການມີສັດທາຫລາຍຂຶ້ນ, ແລະ ການປະຕິບັດຂອງເຫລົ່າທູດ. ການດຳລົງຊີວິດຕາມຄຳສອນຂອງພຣະຄຣິດສາມາດເຮັດໃຫ້ເກີດແບບແຜນທີ່ມີພະລັງ ແລະ ຄຸນນະທຳ, ທີ່ກໍ່ໃຫ້ເກີດແຮງຜັກດັນທາງວິນຍານໃນຊີວິດຂອງເຮົາ.10
ເມື່ອເຮົາພະຍາຍາມທີ່ຈະດຳລົງຊີວິດຕາມກົດທີ່ສູງກວ່າຂອງພຣະເຢຊູຄຣິດ, ໃຈຂອງເຮົາ ແລະ ທຳມະຊາດທີ່ແທ້ຈິງຂອງເຮົາຈະເລີ່ມຕົ້ນປ່ຽນແປງ. ພຣະຜູ້ຊ່ວຍໃຫ້ລອດ ຍົກ ເຮົາຂຶ້ນເໜືອແຮງດຶງດູດຂອງໂລກທີ່ຕົກນີ້ ໂດຍການໃຫ້ພອນເຮົາດ້ວຍຄວາມໃຈບຸນ, ຄວາມຖ່ອມຕົວ, ຄວາມເອື້ອເຟື້ອເພື່ອແຜ່, ຄວາມເມດຕາ, ການບັງຄັບຕົນ, ຄວາມສະຫງົບ, ແລະ ຄວາມເຊົາເມື່ອຍ ຫລາຍຂຶ້ນ.
ບັດນີ້, ທ່ານອາດຄິດວ່າ ສິ່ງນີ້ຟັງແລ້ວຄືເປັນວຽກງານໜັກທາງວິນຍານຫລາຍກວ່າ ຄວາມເຊົາເມື່ອຍ. ແຕ່ນີ້ຄືຄວາມຈິງທີ່ຍິ່ງໃຫຍ່: ໃນຂະນະທີ່ໂລກຢືນຢັນວ່າອຳນາດ, ຊັບສົມບັດ, ຄວາມນິຍົມ, ແລະ ຄວາມສະໜຸກສະໜານຂອງເນື້ອໜັງ ນຳຄວາມສຸກມາໃຫ້, ແຕ່ມັນບໍ່ເປັນເຊັ່ນນັ້ນ! ມັນບໍ່ສາມາດເຮັດໄດ້! ສິ່ງທີ່ມັນຜະລິດໄດ້ແມ່ນພຽງແຕ່ເປັນການທົດແທນທີ່ວ່າງເປົ່າສຳລັບ “ສະພາບອັນເປັນພອນ ແລະ ຄວາມສຸກ ຂອງ [ຜູ້ທີ່] ຮັກສາພຣະບັນຍັດຂອງພຣະເຈົ້າ.”11
ຄວາມຈິງກໍຄື ການສະແຫວງຫາຄວາມສຸກໃນບ່ອນທີ່ທ່ານຈະ ບໍ່ມີວັນ ຫາພົບ ທ່ານຈະ ເມື່ອຍຫລາຍ ກວ່າ! ເຖິງຢ່າງໃດກໍຕາມ, ເມື່ອທ່ານທຽມແອກຂອງທ່ານກັບພຣະເຢຊູຄຣິດ ແລະ ເຮັດວຽກງານຝ່າຍວິນຍານທີ່ຈຳເປັນຕໍ່ການເອົາຊະນະໂລກ, ແລ້ວພຣະອົງ, ແລະ ພຣະອົງພຽງຜູ້ດຽວ, ຈະມີອຳນາດທີ່ຈະຍົກທ່ານຂຶ້ນເໜືອການດຶງດູດຂອງໂລກນີ້.
ບັດນີ້, ການເອົາຊະນະໂລກເປັນພອນໃຫ້ແກ່ຊີວິດຂອງເຮົາແນວໃດ? ຄຳຕອບແມ່ນຊັດເຈນ: ການເຂົ້າສູ່ຄວາມສຳພັນແຫ່ງພັນທະສັນຍາກັບພຣະເຈົ້າ ຈະຜູກມັດເຮົາເຂົ້າກັບພຣະອົງ ໃນແບບທີ່ເຮັດໃຫ້ ທຸກສິ່ງ ກ່ຽວກັບຊີວິດງ່າຍຂຶ້ນ. ກະລຸນາຢ່າເຂົ້າໃຈຜິດຂ້າພະເຈົ້າ: ຂ້າພະເຈົ້າ ບໍ່ ໄດ້ກ່າວວ່າ ການເຮັດພັນທະສັນຍາເຮັດໃຫ້ຊີວິດ ງ່າຍຂຶ້ນ. ຕາມຄວາມຈິງແລ້ວ, ໃຫ້ຄາດຫວັງການຕໍ່ຕ້ານ, ເພາະຜູ້ປໍລະປັກບໍ່ຢາກໃຫ້ທ່ານຄົ້ນພົບອຳນາດຂອງພຣະເຢຊູຄຣິດ. ແຕ່ການທຽມແອກຂອງທ່ານກັບພຣະຜູ້ຊ່ວຍໃຫ້ລອດໝາຍຄວາມວ່າ ທ່ານໄດ້ເຂົ້າເຖິງຄວາມເຂັ້ມແຂງ ແລະ ອຳນາດແຫ່ງການໄຖ່ ຂອງພຣະອົງ.
ຂ້າພະເຈົ້າຂໍຢືນຢັນຄຳສອນທີ່ເລິກເຊິ່ງຂອງປະທານເອສະຣາ ແທັບ ເບັນສັນ ວ່າ: “ຊາຍ ແລະ ຍິງຜູ້ມອບຊີວິດໃຫ້ແກ່ພຣະເຈົ້າ ຈະພົບເຫັນວ່າ ພຣະອົງສາມາດພັດທະນາຊີວິດຂອງພວກເຂົາໄດ້ຫລາຍກວ່າທີ່ພວກເຂົາສາມາດເຮັດໄດ້. ພຣະອົງຈະເຮັດໃຫ້ຄວາມຊື່ນຊົມຂອງພວກເຂົາເລິກເຊິ່ງ, ຂະຫຍາຍວິໄສທັດຂອງພວກເຂົາ, ເຮັດໃຫ້ຄວາມຄິດຂອງພວກເຂົາແຈ່ມແຈ້ງ, … ຍົກລະດັບທາງວິນຍານຂອງພວກເຂົາ, ທະວີຄູນພອນຂອງພວກເຂົາ, ເພີ່ມໂອກາດຂອງພວກເຂົາ, ປອບໂຍນຈິດວິນຍານຂອງພວກເຂົາ, ເພີ່ມເພື່ອນຝູງ, ແລະ ຖອກເທສັນຕິສຸກລົງມາ.”12
ສິດທິພິເສດອັນຫາທີ່ປຽບບໍ່ໄດ້ເຫລົ່ານີ້ຕິດຕາມຜູ້ທີ່ສະແຫວງຫາການສະໜັບສະໜູນຈາກສະຫວັນ ເພື່ອຊ່ວຍພວກເຂົາໃຫ້ເອົາຊະນະໂລກນີ້. ດ້ວຍເຫດນີ້, ຂ້າພະເຈົ້າຈຶ່ງຂໍຮຽກຮ້ອງສະມາຊິກທັງສາດສະໜາຈັກ ຢ່າງດຽວກັນກັບທີ່ໄດ້ຮຽກຮ້ອງຜູ້ໃຫຍ່ໜຸ່ມ ໃນເດືອນພຶດສະພາຜ່ານມານີ້. ຂ້າພະເຈົ້າໄດ້ຊັກຊວນເຂົາເຈົ້າໃນເວລານັ້ນ—ແລະ ຂ້າພະເຈົ້າ ອ້ອນວອນ ທ່ານໃນເວລານີ້—ໃຫ້ດູແລປະຈັກພະຍານຂອງທ່ານເອງເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ພະຍາຍາມທີ່ຈະມີມັນ. ບຳລຸງລ້ຽງມັນເພື່ອວ່າມັນຈະເຕີບໂຕ. ລ້ຽງດູມັນດ້ວຍຄວາມຈິງ. ຢ່າເຮັດໃຫ້ມັນເປິເປື້ອນດ້ວຍປັດຊະຍາເທັດຂອງບັນດາຊາຍ ແລະ ຍິງທີ່ບໍ່ເຊື່ອ. ເມື່ອທ່ານສືບຕໍ່ເສີມສ້າງປະຈັກພະຍານຂອງທ່ານເຖິງພຣະເຢຊູຄຣິດໃຫ້ເປັນລຳດັບຄວາມສຳຄັນທີ່ສູງສຸດ, ໃຫ້ເຝົ້າເບິ່ງສິ່ງມະຫັດສະຈັນເກີດຂຶ້ນໃນຊີວິດຂອງທ່ານ.13
ຂ້າພະເຈົ້າອ້ອນວອນທ່ານໃນເຊົ້າມື້ນີ້ ໃຫ້ຊອກຫາ ຄວາມເຊົາເມື່ອຍ ຈາກຄວາມໜັກໜ່ວງ, ຄວາມບໍ່ແນ່ນອນ, ແລະ ຄວາມເຈັບປວດຂອງໂລກນີ້ ໂດຍ ການເອົາຊະນະ ໂລກ ຜ່ານທາງພັນທະສັນຍາຂອງທ່ານກັບພຣະເຈົ້າ. ໃຫ້ພຣະອົງຮູ້ຜ່ານທາງການອະທິຖານຂອງທ່ານ ແລະ ການກະທຳຂອງທ່ານ ວ່າທ່ານຈິງຈັງກ່ຽວກັບການທີ່ຈະເອົາຊະນະໂລກ. ທູນຂໍພຣະອົງໃຫ້ຄວາມສະຫວ່າງແກ່ຄວາມຄິດຂອງທ່ານ ແລະ ສົ່ງຄວາມຊ່ວຍເຫລືອທີ່ທ່ານຕ້ອງການມາໃຫ້. ແຕ່ລະມື້, ໃຫ້ບັນທຶກຄວາມຄິດທີ່ມາສູ່ທ່ານ ຂະນະທີ່ທ່ານອະທິຖານ; ແລ້ວເຮັດຕາມນັ້ນຢ່າງພາກພຽນ. ໃຊ້ເວລາຫລາຍຂຶ້ນໃນພຣະວິຫານ, ແລະ ສະແຫວງຫາຄວາມເຂົ້າໃຈ ເຖິງວິທີທີ່ພຣະວິຫານສິດສອນທ່ານ ໃຫ້ຢູ່ເໜືອໂລກທີ່ຕົກນີ້.14
ດັ່ງທີ່ຂ້າພະເຈົ້າໄດ້ກ່າວມາກ່ອນ, ການເຕົ້າໂຮມອິດສະຣາເອນເປັນວຽກງານທີ່ສຳຄັນ ທີ່ສຸດ ຊຶ່ງກຳລັງດຳເນີນຢູ່ໃນໂລກທຸກວັນນີ້. ອົງປະກອບທີ່ສຳຄັນຢ່າງໜຶ່ງຂອງການເຕົ້າໂຮມ ຄືການກະກຽມຜູ້ຄົນທີ່ສາມາດ, ພ້ອມແລ້ວ, ແລະ ມີຄ່າຄວນທີ່ຈະຮັບເອົາພຣະຜູ້ເປັນເຈົ້າ ເມື່ອພຣະອົງສະເດັດມາອີກ, ຜູ້ຄົນທີ່ເລືອກເອົາພຣະເຢຊູຄຣິດເໜືອໂລກທີ່ຕົກ, ຜູ້ຄົນທີ່ປິຕິຍິນດີກັບອຳເພີໃຈຂອງເຂົາເຈົ້າ ທີ່ຈະດຳລົງຊີວິດຕາມກົດທີ່ສູງກວ່າ, ສັກສິດກວ່າຂອງພຣະເຢຊູຄຣິດ.
ຂ້າພະເຈົ້າວິງວອນທ່ານ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃຫ້ກາຍເປັນຄົນຊອບທຳເຊັ່ນນີ້. ທະນຸຖະໜອມ ແລະ ໃຫ້ກຽດແກ່ພັນທະສັນຍາຂອງທ່ານເໜືອຄຳໝັ້ນສັນຍາອື່ນໆທັງໝົດ. ເມື່ອທ່ານໃຫ້ພຣະເຈົ້າໄຊຊະນະໃນຊີວິດຂອງທ່ານ, ຂ້າພະເຈົ້າສັນຍາກັບທ່ານວ່າ ຈະມີຄວາມສະຫງົບ, ຄວາມໝັ້ນໃຈ, ຄວາມຊື່ນຊົມ, ແລະ ແມ່ນແລ້ວ ຄວາມເຊົາເມື່ອຍ ຫລາຍຂຶ້ນ.
ດ້ວຍອຳນາດຂອງການເປັນອັກຄະສາວົກທີ່ສັກສິດທີ່ຂ້າພະເຈົ້າດຳລົງຢູ່, ຂ້າພະເຈົ້າຂໍອວຍພອນທ່ານໃນການສະແຫວງຫາທີ່ຈະເອົາຊະນະໂລກນີ້. ຂ້າພະເຈົ້າອວຍພອນທ່ານໃຫ້ເພີ່ມພູນສັດທາຂອງທ່ານໃນພຣະເຢຊູຄຣິດ ແລະ ຮຽນຮູ້ວິທີທີ່ຈະດຶງເອົາອຳນາດຂອງພຣະອົງໄດ້ດີກວ່າເກົ່າ. ຂ້າພະເຈົ້າອວຍພອນທ່ານໃຫ້ສາມາດຫລິງເຫັນຄວາມຈິງ ຈາກຄວາມຜິດ. ຂ້າພະເຈົ້າອວຍພອນທ່ານໃຫ້ສົນໃຈເລື່ອງຂອງພຣະເຈົ້າຫລາຍກວ່າເລື່ອງຂອງໂລກນີ້. ຂ້າພະເຈົ້າອວຍພອນທ່ານໃຫ້ເຫັນຄວາມຕ້ອງການຂອງຄົນທີ່ຢູ່ອ້ອມຮອບທ່ານ ແລະ ເພີ່ມຄວາມເຂັ້ມແຂງໃຫ້ແກ່ຄົນທີ່ທ່ານຮັກ. ດ້ວຍວ່າພຣະເຢຊູຄຣິດໄດ້ເອົາຊະນະໂລກນີ້, ທ່ານກໍສາມາດເຮັດໄດ້ເຊັ່ນກັນ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.