ກະຕິກາສຳລັບການເປີດເຜີຍສ່ວນຕົວ
ເຮົາຕ້ອງເຂົ້າໃຈກະຕິກາ ຊຶ່ງໃນນັ້ນພຣະວິນຍານບໍລິສຸດດຳເນີນການ. ເມື່ອເຮົາດຳເນີນການພາຍໃນກະຕິກາ, ພຣະວິນຍານບໍລິສຸດສາມາດປົດປ່ອຍຄວາມຮູ້ທີ່ໜ້າອັດສະຈັນໄດ້.
ເຊັ່ນດຽວກັບພວກທ່ານຫລາຍຄົນ, ຂ້າພະເຈົ້າໄດ້ຮຽນຮູ້ຫລາຍຈາກແອວເດີ ດີເດີ ແອັຟ ອຸກດອບ ເປັນເວລາຫລາຍປີ. ສິ່ງນັ້ນອະທິບາຍ, ຢ່າງໜ້ອຍສ່ວນໜຶ່ງ, ໃນສິ່ງທີ່ຂ້າພະເຈົ້າກຳລັງຈະກ່າວເຖິງ.1 ສະນັ້ນ, ຈຶ່ງຂໍອະໄພທີ່ໃຊ້ເພິ່ນເປັນຕົວຢ່າງ …
ນັກບິນທີ່ຊ່ຽວຊານໃນການບິນຈະບິນພາຍໃນຄວາມສາມາດຂອງເຄື່ອງບິນ ແລະ ຕາມການຊີ້ນຳຈາກຜູ້ຄວບຄຸມການຈາລະຈອນທາງອາກາດ ກ່ຽວກັບການໃຊ້ທາງເດີນ ແລະ ເສັ້ນທາງການບິນ. ເວົ້າງ່າຍໆ, ນັກບິນດຳເນີນງານພາຍໃນກະຕິກາ. ບໍ່ວ່າເຂົາເຈົ້າຈະເກັ່ງ ຫລື ມີພອນສະຫວັນຫລາຍປານໃດກໍຕາມ, ການບິນຕາມກະຕິກາຈະສາມາດປົດປ່ອຍສັກກະຍະພາບອັນມະຫາສານຂອງຍົນ ເພື່ອບັນລຸຈຸດປະສົງອັນໜ້າອັດສະຈັນຂອງມັນ.
ໃນທຳນອງດຽວກັນ, ເຮົາໄດ້ຮັບການເປີດເຜີຍສ່ວນຕົວພາຍໃນກະຕິກາ. ຫລັງຈາກບັບຕິສະມາ, ເຮົາໄດ້ຮັບຂອງປະທານທີ່ສະຫງ່າງາມແຕ່ໃຊ້ໄດ້, ຂອງປະທານແຫ່ງພຣະວິນຍານບໍລິສຸດ.2 ຂະນະທີ່ເຮົາພະຍາຍາມຢູ່ໃນເສັ້ນທາງແຫ່ງພັນທະສັນຍາ,3 ແມ່ນ “ພຣະວິນຍານບໍລິສຸດ … [ທີ່] ຈະສະແດງທຸກຢ່າງທີ່ [ເຮົາ] ຄວນເຮັດໃຫ້ແກ່ [ເຮົາ].”4 ເມື່ອເຮົາບໍ່ແນ່ໃຈ ຫລື ບໍ່ສະບາຍໃຈ, ເຮົາສາມາດທູນຂໍໃຫ້ພຣະເຈົ້າຊ່ວຍເຫລືອ.5 ຄຳສັນຍາຂອງພຣະຜູ້ຊ່ວຍໃຫ້ລອດຈະບໍ່ສາມາດແຈ່ມແຈ້ງຫລາຍໄປກວ່ານີ້: “ຈົ່ງໝັ່ນຂໍ, ແລ້ວເຈົ້າຈະໄດ້ຮັບ; … ດ້ວຍວ່າ ທຸກຄົນທີ່ຂໍກໍຈະໄດ້ຮັບ.”6 ດ້ວຍຄວາມຊ່ວຍເຫລືອຈາກພຣະວິນຍານບໍລິສຸດ ເຮົາສາມາດປ່ຽນທຳມະຊາດແຫ່ງສະຫວັນຂອງເຮົາ ໄປສູ່ຈຸດໝາຍປາຍທາງນິລັນດອນຂອງເຮົາ.7
ຄຳສັນຍາຂອງການເປີດເຜີຍສ່ວນຕົວ ຜ່ານທາງພຣະວິນຍານບໍລິສຸດແມ່ນແຮງດົນໃຈທີ່ໜ້າປະຫລາດ, ເຊັ່ນດຽວກັບຍົນທີ່ກຳລັງບິນ. ແລະ ເໝືອນດັ່ງນັກບິນ, ເຮົາຕ້ອງເຂົ້າໃຈກະຕິກາ ການທຳງານຂອງພຣະວິນຍານບໍລິສຸດ ໃນການໃຫ້ການເປີດເຜີຍສ່ວນຕົວ. ເມື່ອເຮົາດຳເນີນການພາຍໃນກະຕິກາ, ພຣະວິນຍານບໍລິສຸດສາມາດປົດປ່ອຍຄວາມຮູ້, ການຊີ້ນຳ, ແລະ ການປອບໂຍນທີ່ໜ້າອັດສະຈັນໄດ້. ນອກກະຕິການັ້ນ, ບໍ່ວ່າເຮົາຈະສະຫລາດ ຫລື ມີພອນສະຫວັນຫລາຍປານໃດກໍຕາມ, ເຮົາສາມາດຖືກຫລອກ ແລະ ພັງ ແລະ ຖືກເຜົາໄດ້.
ພຣະຄຳພີເປັນອົງປະກອບທຳອິດຂອງກະຕິການີ້ ສຳລັບການເປີດເຜີຍສ່ວນຕົວ.8 ການຊື່ນຊົມຢູ່ດ້ວຍພຣະຄຳຂອງພຣະຄຣິດ, ດັ່ງທີ່ມີຢູ່ໃນພຣະຄຳພີ, ກະຕຸ້ນການເປີດເຜີຍສ່ວນຕົວ. ແອວເດີ ຣໍເບີດ ດີ ແຮວສ໌ ໄດ້ກ່າວວ່າ: “ເມື່ອເຮົາຢາກເວົ້າກັບພຣະເຈົ້າ, ເຮົາອະທິຖານ. ແລະ ເມື່ອເຮົາຢາກໃຫ້ພຣະອົງກ່າວກັບເຮົາ, ເຮົາຄົ້ນຄວ້າພຣະຄຳພີ.”9
ພຣະຄຳພີກໍຍັງສິດສອນເຮົາອີກເຖິງວິທີທີ່ຈະຮັບເອົາການເປີດເຜີຍສ່ວນຕົວແນວໃດ.10 ແລະ ເຮົາທູນຂໍສິ່ງທີ່ຖືກຕ້ອງ ແລະ ດີ11 ແລະ ບໍ່ແມ່ນສິ່ງທີ່ຂັດກັບພຣະປະສົງຂອງພຣະເຈົ້າ.12 ເຮົາບໍ່ “ຂໍຜິດ,” ດ້ວຍແຮງຈູງໃຈທີ່ບໍ່ເໝາະສົມ ເພື່ອສົ່ງເສີມລາຍການຂອງເຮົາເອງ ຫລື ເຕີມເຕັມຄວາມສຸກຂອງເຮົາເອງ.13 ເໜືອສິ່ງອື່ນໃດ, ເຮົາທູນຂໍພຣະບິດາເທິງສະຫວັນໃນພຣະນາມຂອງພຣະເຢຊູຄຣິດ,14 ໂດຍເຊື່ອວ່າເຮົາຈະໄດ້ຮັບ.15
ອົງປະກອບທີສອງຂອງກະຕິກາ ຄືການທີ່ເຮົາໄດ້ຮັບການເປີດເຜີຍສ່ວນຕົວພຽງແຕ່ພາຍໃນຂອບເຂດຂອງເຮົາເທົ່ານັ້ນ ແລະ ບໍ່ແມ່ນພາຍໃນອະພິສິດຂອງຄົນອື່ນ. ໃນອີກຄຳໜຶ່ງ, ເຮົາບິນຂຶ້ນ ແລະ ລົງຈອດໃນທາງເດີນທີ່ກຳນົດໄວ້ຂອງເຮົາເອງ. ຄວາມສຳຄັນຂອງທາງເດີນທີ່ຖືກກຳນົດໄວ້ເປັນຢ່າງດີ ໄດ້ຮຽນຮູ້ຕັ້ງແຕ່ຕອນຕົ້ນປະຫວັດສາດຂອງການຟື້ນຟູ. ໄຮຣຳ ເພຈ໌, ຜູ້ໜຶ່ງໃນພະຍານແປດຄົນຂອງພຣະຄຳພີມໍມອນ, ໄດ້ອ້າງວ່າຕົນໄດ້ຮັບການເປີດເຜີຍສຳລັບທັງສາດສະໜາຈັກ. ສະມາຊິກຫລາຍຄົນໄດ້ຖືກຫລອກ ແລະ ຕົກຢູ່ໃນອິດທິພົນທີ່ຜິດ.
ໃນການຕອບນັ້ນ, ພຣະຜູ້ເປັນເຈົ້າໄດ້ເປີດເຜີຍວ່າ “ບໍ່ມີຄົນໃດໄດ້ຮັບການແຕ່ງຕັ້ງໃຫ້ຮັບບັນຍັດ ແລະ ການເປີດເຜີຍໃນສາດສະໜາຈັກນີ້ ຍົກເວັ້ນແຕ່ຜູ້ຮັບໃຊ້ຂອງເຮົາ ໂຈເຊັບ ສະມິດ … ຈົນກວ່າເຮົາຈະກຳນົດຄົນອື່ນໃຫ້ເຮັດແທນລາວ.”16 ຄຳສອນ, ພຣະບັນຍັດ, ແລະ ການເປີດເຜີຍສຳລັບສາດສະໜາຈັກແມ່ນອະພິສິດຂອງສາດສະດາທີ່ມີຊີວິດຢູ່, ຜູ້ຮັບມັນຈາກອົງພຣະເຢຊູຄຣິດເຈົ້າ.17 ນັ້ນຄືທາງເດີນຂອງສາດສະດາ.
ເມື່ອຫລາຍປີກ່ອນ, ຂ້າພະເຈົ້າໄດ້ຮັບໂທລະສັບຈາກບຸກຄົນໜຶ່ງຜູ້ໄດ້ຖືກຈັບໃນຂໍ້ຫາການບຸກລຸກ. ລາວບອກຂ້າພະເຈົ້າວ່າ ລາວໄດ້ຮັບການເປີດເຜີຍວ່າ ມີພຣະຄຳພີເພີ່ມເຕີມທີ່ຖືກຝັງໄວ້ໃຕ້ພື້ນຊັ້ນທີໜຶ່ງຂອງອາຄານຫລັງນັ້ນທີ່ລາວພະຍາຍາມເຂົ້າໄປ. ລາວບອກວ່າເມື່ອລາວໄດ້ພຣະຄຳພີເຫລັ້ມນັ້ນແລ້ວ, ລາວກໍຈະຮູ້ວ່າ ລາວໄດ້ຮັບຂອງປະທານແຫ່ງການແປ, ຊຶ່ງຈະນຳພຣະຄຳພີໃໝ່ອອກມາ, ແລະ ດັດແປງຄຳສອນ ແລະ ການຊີ້ນຳຂອງສາດສະໜາຈັກ. ຂ້າພະເຈົ້າບອກລາວວ່າ ລາວຄິດຜິດ, ແລະ ລາວໄດ້ວິງວອນໃຫ້ຂ້າພະເຈົ້າອະທິຖານກ່ຽວກັບເລື່ອງນີ້. ຂ້າພະເຈົ້າບອກລາວວ່າ ຂ້າພະເຈົ້າຈະບໍ່ເຮັດ. ລາວເລີ່ມເວົ້າຈາຫຍາບຄາຍ ແລະ ວາງໂທລະສັບ.18
ຂ້າພະເຈົ້າບໍ່ຈຳເປັນຕ້ອງອະທິຖານກ່ຽວກັບການຮຽກຮ້ອງນີ້ດ້ວຍເຫດຜົນງ່າຍໆ ແຕ່ເລິກເຊິ່ງ: ພຽງແຕ່ສາດສະດາເທົ່ານັ້ນທີ່ໄດ້ຮັບການເປີດເຜີຍ ສຳລັບສາດສະໜາຈັກ. ມັນຈະ “ກົງກັນຂ້າມກັບແຜນຂອງພຣະເຈົ້າ”19 ທີ່ຜູ້ອື່ນຈະໄດ້ຮັບການເປີດເຜີຍເຊັ່ນນັ້ນ, ຊຶ່ງຕ້ອງຢູ່ໃນທາງເດີນຂອງສາດສະດາ.
ການເປີດເຜີຍ ສ່ວນຕົວ ເປັນຂອງບຸກຄົນຢ່າງຖືກຕ້ອງ. ທ່ານສາມາດໄດ້ຮັບການເປີດເຜີຍ, ຍົກຕົວຢ່າງ, ກ່ຽວກັບການອາໄສຢູ່ບ່ອນໃດ, ເສັ້ນທາງອາຊີບໃດທີ່ຈະຕິດຕາມ, ຫລື ແຕ່ງງານກັບໃຜ.20 ຜູ້ນຳຂອງສາດສະໜາຈັກອາດສິດສອນຄຳສອນ ແລະ ແບ່ງປັນຄຳແນະນຳທີ່ດົນໃຈ, ແຕ່ໜ້າທີ່ຮັບຜິດຊອບສຳລັບການຕັດສິນໃຈເຫລົ່ານີ້ແມ່ນຂຶ້ນຢູ່ກັບທ່ານ. ນັ້ນຄືການເປີດເຜີຍຂອງທ່ານທີ່ຈະໄດ້ຮັບ, ນັ້ນຄືທາງເດີນຂອງທ່ານ.
ອົງປະກອບທີສາມຂອງກະຕິກາຄື ການເປີດເຜີຍສ່ວນຕົວຈະຕ້ອງສອດຄ່ອງກັບພຣະບັນຍັດຂອງພຣະເຈົ້າ ແລະ ພັນທະສັນຍາທີ່ເຮົາໄດ້ເຮັດນຳພຣະອົງ. ໃຫ້ພິຈາລະນາຄຳອະທິຖານທີ່ເປັນໃນລັກສະນະນີ້: “ພຣະບິດາເທິງສະຫວັນ, ການນະມັດສະການທີ່ໂບດແມ່ນໜ້າເບື່ອ. ຂໍໃຫ້ຂ້ານ້ອຍນະມັດສະການພຣະອົງໃນວັນຊະບາໂຕຢູ່ເທິງພູ ຫລື ຢູ່ແຄມທະເລໄດ້ບໍ? ຂໍໃຫ້ຂ້ານ້ອຍຖືກຍົກເວັ້ນຈາກການໄປໂບດ ແລະ ຮັບສ່ວນສິນລະລຶກ ແຕ່ຍັງໄດ້ຮັບພອນທີ່ສັນຍາຂອງການຮັກສາວັນຊະບາໂຕໃຫ້ສັກສິດໄດ້ບໍ?”21 ໃນການຕອບຕໍ່ຄຳອະທິຖານເຊັ່ນນັ້ນ, ເຮົາຄົງຮູ້ວ່າພຣະເຈົ້າຈະຕອບແນວໃດ: “ລູກເອີຍ, ເຮົາໄດ້ເປີດເຜີຍຄວາມປະສົງຂອງເຮົາແລ້ວກ່ຽວກັບວັນຊະບາໂຕ.”
ເມື່ອເຮົາຂໍການເປີດເຜີຍກ່ຽວກັບບາງສິ່ງ ຊຶ່ງພຣະເຈົ້າໄດ້ໃຫ້ການຊີ້ນຳຢ່າງແຈ່ມແຈ້ງແລ້ວ, ເຮົາເປີດຕົນເອງເພື່ອຕີຄວາມໝາຍຄວາມຮູ້ສຶກຂອງເຮົາໃນທາງທີ່ຜິດ ແລະ ໄດ້ຍິນແຕ່ສິ່ງທີ່ເຮົາຢາກໄດ້ຍິນ. ຄັ້ງໜຶ່ງຊາຍຄົນໜຶ່ງໄດ້ບອກຂ້າພະເຈົ້າກ່ຽວກັບການດີ້ນລົນຂອງລາວທີ່ຈະເຮັດໃຫ້ຄອບຄົວຂອງລາວໝັ້ນຄົງທາງການເງິນ. ລາວຄິດທີ່ຈະຍັກຍອກເງິນເປັນຄຳຕອບ, ໄດ້ອະທິຖານກ່ຽວກັບເລື່ອງນີ້, ແລະ ຮູ້ສຶກວ່າ ລາວໄດ້ຮັບການເປີດເຜີຍຢືນຢັນວ່າ ລາວຄວນເຮັດ. ຂ້າພະເຈົ້າຮູ້ວ່າ ລາວຖືກຫລອກ ເພາະລາວໄດ້ສະແຫວງຫາການເປີດເຜີຍທີ່ຂັດກັບພຣະບັນຍັດຂອງພຣະເຈົ້າ. ສາດສະດາໂຈເຊັບ ສະມິດ ໄດ້ເຕືອນວ່າ, “ບໍ່ມີສິ່ງໃດທຳຮ້າຍລູກຫລານມະນຸດຫລາຍໄປກວ່າການຢູ່ພາຍໃຕ້ອິດທິພົນຂອງວິນຍານເທັດ, ເມື່ອພວກເຂົາຄິດວ່າ ພວກເຂົາມີພຣະວິນຍານຂອງພຣະເຈົ້າ.”22
ບາງຄົນອາດຊີ້ບອກວ່າ ນີໄຟໄດ້ລະເມີດພຣະບັນຍັດເມື່ອເພິ່ນຂ້າລາບານ. ເຖິງຢ່າງໃດກໍຕາມ, ຂໍ້ຍົກເວັ້ນນີ້ບໍ່ໄດ້ລົບລ້າງກົດ—ກົດທີ່ການເປີດເຜີຍສ່ວນຕົວຈະຕ້ອງສອດຄ່ອງກັບພຣະບັນຍັດຂອງພຣະເຈົ້າ. ບໍ່ມີຄຳອະທິບາຍງ່າຍໆໃດທີ່ເປັນໜ້າພໍໃຈກ່ຽວກັບເລື່ອງນີ້, ແຕ່ຂ້າພະເຈົ້າຂໍເນັ້ນໃນບາງດ້ານ. ເຫດການນີ້ບໍ່ໄດ້ເລີ່ມຕົ້ນດ້ວຍນີໄຟທູນຖາມຖ້າຫາກວ່າເພິ່ນສາມາດຂ້າລາບານຫລືບໍ່. ມັນບໍ່ໄດ້ເປັນສິ່ງທີ່ເພິ່ນຢາກເຮັດ. ການຂ້າລາບານບໍ່ແມ່ນເພື່ອຜົນປະໂຫຍດສ່ວນຕົວຂອງນີໄຟ ແຕ່ເພື່ອໃຫ້ພຣະຄຳພີແກ່ປະຊາຊາດໃນອະນາຄົດ ແລະ ຜູ້ຄົນແຫ່ງພັນທະສັນຍາ. ແລະ ນີໄຟໝັ້ນໃຈວ່າ ມັນແມ່ນການເປີດເຜີຍ—ຕາມຄວາມຈິງແລ້ວ, ໃນກໍລະນີນີ້, ມັນເປັນພຣະບັນຍັດຈາກພຣະເຈົ້າ.23
ອົງປະກອບທີສີ່ຂອງກະຕິກາຄື ການຮັບຮູ້ເຖິງສິ່ງທີ່ພຣະເຈົ້າໄດ້ເປີດເຜີຍແລ້ວກັບທ່ານເປັນສ່ວນຕົວ, ໃນຂະນະທີ່ເປີດຮັບການເປີດເຜີຍເພີ່ມເຕີມຈາກພຣະອົງ. ຖ້າພຣະເຈົ້າໄດ້ຕອບຄຳຖາມ ແລະ ສະຖານະການຍັງບໍ່ປ່ຽນແປງ, ເປັນຫຍັງເຮົາຈຶ່ງຄາດຫວັງໃຫ້ຄຳຕອບແຕກຕ່າງ? ໂຈເຊັບ ສະມິດ ໄດ້ສະດຸດກັບບັນຫາແບບນີ້ ໃນປີ 1828. ພາກສ່ວນທຳອິດຂອງພຣະຄຳພີມໍມອນໄດ້ຖືກແປ, ເມື່ອມາຕິນ ແຮຣິສ, ຜູ້ອຸປະຖຳ ແລະ ຜູ້ຂຽນຄົນກ່ອນ, ໄດ້ຂໍອະນຸຍາດຈາກໂຈເຊັບ ເພື່ອເອົາໜ້າທີ່ແປແລ້ວໄປໃຫ້ພັນລະຍາຂອງລາວເບິ່ງ. ໂດຍທີ່ບໍ່ແນ່ໃຈ ແລະ ບໍ່ຮູ້ວ່າຈະເຮັດແນວໃດ, ໂຈເຊັບຈຶ່ງໄດ້ອະທິຖານຂໍການຊີ້ນຳ. ພຣະຜູ້ເປັນເຈົ້າໄດ້ບອກເພິ່ນວ່າ ບໍ່ໃຫ້ມາຕິນເອົາໜ້າເຫລົ່ານັ້ນໄປ.
ມາຕິນໄດ້ຂໍໃຫ້ໂຈເຊັບທູນຖາມພຣະເຈົ້າອີກ. ໂຈເຊັບກໍໄດ້ເຮັດ, ແລະ ຄຳຕອບນັ້ນ, ບໍ່ໜ້າແປກໃຈ, ເໝືອນເດີມ. ແຕ່ມາຕິນໄດ້ອ້ອນວອນໂຈເຊັບໃຫ້ທູນຖາມເປັນເທື່ອທີສາມ, ແລະ ໂຈເຊັບກໍໄດ້ເຮັດ. ເທື່ອນີ້ພຣະເຈົ້າບໍ່ໄດ້ກ່າວວ່າບໍ່. ແທນທີ່, ມັນຄືກັນກັບວ່າ ພຣະເຈົ້າໄດ້ກ່າວວ່າ, “ໂຈເຊັບ, ເຈົ້າຮູ້ວ່າເຮົາຮູ້ສຶກແນວໃດກ່ຽວກັບເລື່ອງນີ້, ແຕ່ເຈົ້າມີອຳເພີໃຈທີ່ຈະເລືອກ.” ເມື່ອເພິ່ນຮູ້ສຶກບໍ່ຖືກສັ່ງຫ້າມອີກແລ້ວ, ໂຈເຊັບຈຶ່ງໄດ້ຕັດສິນໃຈອະນຸຍາດໃຫ້ມາຕິນເອົາຕົ້ນສະບັບ 116 ໜ້າ ໄປໃຫ້ສະມາຊິກໃນຄອບຄົວສອງສາມຄົນເບິ່ງ. ໜັງສືທີ່ແປເຫລົ່ານັ້ນໄດ້ຫາຍໄປ ແລະ ບໍ່ສາມາດກູ້ຄືນໄດ້ອີກ. ພຣະຜູ້ເປັນເຈົ້າໄດ້ຕິຕຽນໂຈເຊັບຢ່າງຮຸນແຮງ.24
ໂຈເຊັບໄດ້ຮຽນຮູ້, ເໝືອນດັ່ງສາດສະດາຢາໂຄບໃນພຣະຄຳພີມໍມອນໄດ້ສິດສອນ: “ຢ່າພະຍາຍາມແນະນຳພຣະຜູ້ເປັນເຈົ້າ, ແຕ່ໃຫ້ຮັບເອົາຄຳແນະນຳຈາກພຣະຫັດຂອງພຣະອົງ. ເພາະ … ພຣະອົງໄດ້ແນະນຳດ້ວຍຄວາມສະຫລຽວສະຫລາດ.”25 ຢາໂຄບໄດ້ເຕືອນວ່າ ເລື່ອງຮ້າຍຈະເກີດຂຶ້ນເມື່ອເຮົາທູນຂໍສິ່ງທີ່ເຮົາບໍ່ຄວນຂໍ. ເພິ່ນໄດ້ບອກລ່ວງໜ້າວ່າ ຜູ້ຄົນໃນເຢຣູຊາເລັມຈະສະແຫວງຫາ “ສິ່ງທີ່ພວກເຂົາບໍ່ [ອາດ] ເຂົ້າໃຈໄດ້,” ເບິ່ງ “ຂ້າມເຄື່ອງໝາຍ,” ແລະ ເບິ່ງກາຍພຣະຜູ້ຊ່ວຍໃຫ້ລອດຂອງໂລກໄປເລີຍ.26 ພວກເຂົາສະດຸດຍ້ອນວ່າພວກເຂົາທູນຂໍສິ່ງທີ່ພວກເຂົາບໍ່ຄວນຂໍ ແລະ ບໍ່ສາມາດເຂົ້າໃຈ.
ຖ້າຫາກເຮົາໄດ້ຮັບການເປີດເຜີຍສ່ວນຕົວສຳລັບສະພາບການຂອງເຮົາເອງ ແລະ ສະຖານະການຍັງບໍ່ປ່ຽນແປງ, ພຣະເຈົ້າໄດ້ຕອບຄຳຖາມຂອງເຮົາແລ້ວ.27 ຍົກຕົວຢ່າງ, ບາງເທື່ອເຮົາໄດ້ທູນຂໍເທື່ອແລ້ວເທື່ອອີກເພື່ອຂໍການໃຫ້ອະໄພ. ຖ້າຫາກເຮົາໄດ້ກັບໃຈແລ້ວ, ເຕັມໄປດ້ວຍຄວາມຊື່ນຊົມ ແລະ ມີຄວາມສະຫງົບໃນຈິດສຳນຶກ, ແລະ ໄດ້ຮັບການປົດບາບ, ເຮົາບໍ່ຈຳເປັນຕ້ອງທູນຂໍອີກ ແຕ່ສາມາດໄວ້ວາງໃຈໃນຄຳຕອບທີ່ພຣະເຈົ້າໄດ້ມອບໃຫ້ແລ້ວ.28
ເຖິງແມ່ນເຮົາໄດ້ໄວ້ວາງໃຈໃນຄຳຕອບຂອງພຣະເຈົ້າກ່ອນໜ້ານີ້, ແຕ່ເຮົາຕ້ອງເປີດຮັບການເປີດເຜີຍສ່ວນຕົວເພີ່ມເຕີມ. ເຖິງແນວໃດ, ຈຸດໝາຍປາຍທາງຂອງຊີວິດສ່ວນໜ້ອຍ ຈະໄປຮອດໄປເຖິງດ້ວຍຖ້ຽວບິນຕົງ. ເຮົາຄວນຮັບຮູ້ວ່າ ການເປີດເຜີຍສ່ວນຕົວອາດໄດ້ຮັບ “ເປັນບັນທັດ, ເປັນຂໍ້ເລັກໆໜ້ອຍໆ,”29 ວ່າການຊີ້ນຳທີ່ເປີດເຜີຍສາມາດມາເຖິງເທື່ອລະເລັກລະນ້ອຍ.30
ອົງປະກອບຂອງກະຕິກາສຳລັບການເປີດເຜີຍສ່ວນຕົວແມ່ນທັບຊ້ອນກັນ ແລະ ສົ່ງເສີມກັນແລະກັນ. ແຕ່ພາຍໃນກະຕິກາ, ພຣະວິນຍານບໍລິສຸດສາມາດ ແລະ ຈະເປີດເຜີຍທຸກຢ່າງທີ່ເຮົາຕ້ອງການເພື່ອຈະບິນຂຶ້ນ ແລະ ຮັກສາແຮງຜັກດັນຢູ່ໃນເສັ້ນທາງແຫ່ງພັນທະສັນຍາ. ດັ່ງນັ້ນ ເຮົາສາມາດໄດ້ຮັບພອນໂດຍອຳນາດຂອງພຣະເຢຊູຄຣິດ ເພື່ອກາຍເປັນສິ່ງທີ່ພຣະບິດາເທິງສະຫວັນຢາກໃຫ້ເຮົາເປັນ. ຂ້າພະເຈົ້າເຊື້ອເຊີນທ່ານໃຫ້ມີຄວາມໝັ້ນໃຈທີ່ຈະທວງເອົາການເປີດເຜີຍສ່ວນຕົວສຳລັບຕົວທ່ານເອງ, ເຂົ້າໃຈສິ່ງທີ່ພຣະເຈົ້າໄດ້ເປີດເຜີຍ, ສອດຄ່ອງກັບພຣະຄຳພີ ແລະ ພຣະບັນຍັດທີ່ພຣະອົງໄດ້ປະທານໃຫ້ ຜ່ານທາງສາດສະດາທີ່ໄດ້ຮັບການແຕ່ງຕັ້ງຂອງພຣະອົງ, ແລະ ພາຍໃນຂອບເຂດ ແລະ ອຳເພີໃຈຂອງທ່ານເທົ່ານັ້ນ. ຂ້າພະເຈົ້າຮູ້ວ່າພຣະວິນຍານບໍລິສຸດສາມາດ ແລະ ຈະສະແດງທຸກຢ່າງທີ່ທ່ານຄວນເຮັດໃຫ້ແກ່ທ່ານ.31 ໃນພຣະນາມຂອງພຣະເຢຊູຄຣິດ, ອາແມນ.