Paglab-ot sang Gahum sang Dios paagi sa mga Kasugtanan

Sang nagligad nga Nobyembre, may pribelihiyo ako nga idedikar ang Belém Brazil Temple. Kalipay ko nga makaupod ang dedikado nga mga miyembro sang Simbahan sa norte sang Brazil. Sang amo to nga panahon, nahibal-an ko nga ang Belém amo ang alagyan pakadto sa rehiyon nga nagalakip sang pinakamabaskog nga suba sa kalibutan, ang Amazon River.

Wala sapayan sa kusog sang suba, kaduha kada tuig daw may nagakatabo nga indi kinaandan. Kon magtadlong ang adlaw, bulan, kag duta, may mabaskog nga balod nga nagapasaka sa suba, nga kontra sa natural nga ilig sang tubig. Mga balod nga nagalab-ot 6 metros ang kataason¹ nga nagapasaka sang mga 50 kilometros² pailaya ang narekord. Ini nga hitabo, nga nakilal-an bilang tidal bore, ginatawag sang mga tumandok nga pororoca, ukon “dako nga ngurob,” tungod sang gahod nga ginatuga sini. Masiling naton sang husto nga bisan ang mabaskog nga Amazon nagapaidalom sa langitnon nga mga gahum.

Pareho sang Amazon, may natural kita nga ilig sa aton kabuhi; ginahimo naton kon ano ang natural nga nagaabot. Pareho sang Amazon, upod ang diosnon nga bulig, mahimo naton ang daw indi kinaandan nga mga butang. Sa matuod, indi natural para sa aton nga magpaubos, magpailob, ukon nagapasugot nga ipaidalom ang aton mga pagbuot sa Dios. Pero amo lang ini ang paagi nga magliwat kita, nga makapauli sa presensya sang Dios, kag malab-ot ang aton wala katapusan nga kapalaran.

Indi pareho sang Amazon, pwede naton pilion kon magpaidalom kita sa langitnon nga gahum ukon “magpaanod sa ginahimo sang kadam-an.”³ Siguro mabudlay ang maghimo sang lain sangsa ginahimo sang tanan. Pero kon magpaidalom kita “sa mga pagpangganyat sang Espiritu nga Balaan” kag kakason ang pagkamaiyaiyahon sang kinaugali nga lalaki ukon babayi,⁴ mabaton naton ang nagapabag-o nga gahum sang Manluluwas sa aton mga kabuhi, ang gahum sa paghimo sang mabudlay nga mga butang.

Gintudloan kita ni Pangulong Russell M. Nelson kon paano ini himuon. Nagpromisa sia, “Ang tagsa ka tawo nga nagahimo sang mga kasugtanan sa mga tulugmawan sa bunyag kag sa templo—kag nagatuman sang mga ini—may mas dako nga ikasarang sa paglab-ot sang gahum ni Jesucristo … [para alsahon] kita sa pagbutong sining ginlaglag nga kalibutan.”⁵ Sa iban nga pulong, malab-ot naton ang gahum sang Dios, kon makig-angot lamang kita sa Iya paagi sa sagrado nga mga kasugtanan.

Antes gintuga ang duta, nagpahamtang ang Dios sang mga kasugtanan bilang mekanismo nga maangot naton, nga Iya mga anak, ang aton mga kaugalingon sa Iya. Base sa wala katapusan, wala nagaliwat nga layi, nagplastar Sia sang indi mabali nga kondisyones kon paano kita mabag-o, maluwas, kag mapahitaas. Sa sining kabuhi, ginahimo naton ining mga kasugtanan paagi sa pagpartisipar sa mga ordinansa sang priesthood kag pagpromisa nga himuon ang ginapangayo sang Dios nga himuon naton, kag bilang balos, nagapromisa ang Dios sa aton sang partikular nga mga bugay.⁶

Ang kasugtanan isa ka panumpa nga dapat naton handaan, intiendihon sing maathag, kag tahuron sing lubos.⁷ Ang paghimo sang kasugtanan upod sa Dios lain sangsa kaswal nga paghimo sang promisa. Una, nagakinahanglan ini sang awtoridad sang priesthood. Ikaduha, ang pawala nga promisa wala sang naangot nga kusog para alsahon kita pasaka sa natural nga ginahimo sang kadam-an. Nagahimo lang kita sang kasugtanan kon ginadedikar gid naton ang aton kaugalingon nga tumanon ini.⁸ Mangin mga anak kita sang Dios sa kasugtanan kag mga manunubli sang Iya ginharian, labi na kon ginahimo naton nga sentro sang aton mga kabuhi ang aton mga kasugtanan.

Ang termino nga dalan sang kasugtanan nagatumod sa serye sang mga kasugtanan kon diin nagapalapit kita kay Cristo kag nagaangot sa Iya. Paagi sa sining kaangtanan sa kasugtanan, malab-ot naton ang Iya wala katapusan nga gahum. Ang dalan nagasugod sa pagtuo kay Jesucristo kag paghinulsol, nga ginasundan sang bunyag kag pagbaton sang Balaan nga Espiritu.⁹ Ginpakita ni Jesucristo kon paano magsulod sa sina nga dalan sang Sia ginbunyagan.¹⁰ Suno sa mga panaysayon sa Ebanghelyo ni Marcos kag Lucas sa Bag-ong Katipan, ang Amay nga Langitnon naghambal sang direkta kay Jesus sa Iya bunyag, nga nagasiling, “Ikaw ang akon hinigugma nga Anak. Nalipay gid ako sa imo.” Kon magsulod kita sa dalan sang kasugtanan paagi sa bunyag, ginahunahuna ko ang Amay nga Langitnon nga nagasiling sang pareho sina sa kada isa sa aton: “Ikaw ang pinalangga ko nga anak nga nanamian ko gid. Padayon lang.”¹¹

Sa bunyag kag kon mag-ambit kita sang sakramento,¹² nagasaksi kita nga handa kita nga dalhon sa aton mga kaugalingon ang ngalan ni Jesucristo.¹³ Sa sini nga konteksto, hunahunaon naton ang sugo sa Daan nga Katipan, “Indi mo paggamiton sa wala sing pulos ang ngalan sang Ginuo nga imo Dios.”¹⁴ Sa aton moderno nga palamatin-an, daw pagbawal ini sa paggamit sang ngalan sang Ginuo nga wala sing pagtahod. Nalakip ina sa kasugoan, pero mas masangkad ini nga kasugoan. Ang tinaga nga Hebreo nga ginlubad nga “paggamit” nagakahulugan sang “pag-alsa” ukon “pagpas-an,” nga daw pareho sa bandera nga nagaangot sang nagakarga sa isa ka grupo ukon indibidwal.¹⁵ Ang tinaga nga ginlubad nga “wala sing pulos” nagakahulugan sang “wala unod” ukon “nagapatalang.”¹⁶ Ang kasugoan nga indi paggamiton ang ngalan sang Ginuo sa wala kapuslanan nagakahulugan gali nga, “Indi mo pag-ipakilala ang imo kaugalingon bilang disipulo ni Jesucristo luwas lang kon tuyo mo nga irepresentar Sia sing husto.”

Mangin Iya kita mga disipulo kag marepresentar Sia sing husto kon hungod kag amat-amat naton nga ginadala sa aton kaugalingon ang ngalan ni Jesucristo paagi sa mga kasugtanan. Ang aton mga kasugtanan nagahatag sa aton sang gahum nga magpadayon sa dalan sang kasugtanan tungod nabag-o ang aton relasyon kay Jesucristo kag sa Amay nga Langitnon. Nangin konektado kita sa Ila paagi sa kaangtanan sang kasugtanan.

Ang dalan sang kasugtanan nagapakadto sa mga ordinansa sang templo, pareho sang endowment sa templo.¹⁷ Ang endowment regalo sang Dios nga sagrado nga mga kasugtanan nga mas nagaangot pa gid sa aton sa Iya. Sa endowment, nagapakigsugot kita una, nga tinguhaan naton nga tumanon ang mga kasuguan sang Dios; ikaduha, nga maghinulsol nga may masinulub-on nga tagipusuon kag mahinulsulon nga espiritu; ikatatlo, nga ipangabuhi ang ebanghelyo ni Jesucristo. Ginahimo naton ini paagi sa pagpakita sang pagtuo sa Iya, paghimo sang mga kasugtanan upod sa Dios sa pagbaton naton sang mga ordinansa sang kaluwasan kag pangkahitaasan, pagtuman sinang mga kasugtanan sa bilog naton nga kabuhi, kag pagtinguha sa pagpangabuhi sang duha ka dako nga mga sugo nga palanggaon ang Dios kag isigkatawo. Ikaapat, nagapakigsugot kita nga tumanon ang layi sang kaputli kag, ikalima, idedikar ang aton kaugalingon kag ang tanan nga ginabugay sang Ginuo sa aton sa pagpauswag sang Iya Simbahan.¹⁸

Sa paghimo kag pagtuman sang mga kasugtanan sa templo, mas matun-an naton ang mga katuyuan sang Ginuo kag mabaton ang kabug-osan sang Balaan nga Espiritu.¹⁹ Makabaton kita sang direksyon sa aton mga kabuhi. Nagahamtong kita sa aton pagkadisipulo para indi kita magpabilin nga ignorante nga mga anak hasta mientras.²⁰ Kundi, nagakabuhi kita nga may wala katapusan nga perspektibo kag mas ganado nga magserbisyo sa Dios kag sa iban. Makabaton kita sang mas dako nga ikasarang sa pagtuman sang aton mga katuyuan sa kabuhi. Protektado kita sa malain,²¹ kag makabaton kita sang mas dako nga gahum para batuan ang tentasyon kag maghinulsol kon magsala kita.²² Kon magsala kita, ang handumanan sang aton mga kasugtanan sa Dios ang magabulig sa aton nga magbalik sa dalan. Paagi sa pag-angot sa gahum sang Dios, mahimo kita nga mangin aton kaugalingon nga mga pororoca, nga makasarang nga magbato sa ilig sang kalibutan, sa bilog naton nga kabuhi kag tubtob sa mga wala katapusan. Sa ulihi, ang aton mga kapalaran maliwat tungod ang dalan sang kasugtanan nagapadulong sa pangkahitaasan kag kabuhi nga wala katapusan.²³

Ang pagtuman sang mga kasugtanan nga ginhimo sa bunyag kag sa mga templo nagahatag man sa aton sang kusog nga mabatuan ang mga pagtilaw kag kapaslawan sang kabuhi.²⁴ Ang doktrina nga kaupod sining mga kasugtanan nagapahapos sang aton alagyan kag nagahatag sang paglaum, kaumpawan, kag kalinong.

Ang akon mga lolo nga sanday Lena Sofia kag Matts Leander Renlund nakabaton sang gahum sang Dios paagi sa ila kasugtanan sa bunyag sang nangin miyembro sila sang Simbahan sang 1912 sa Finland. Malipayon sila nga mangin parte sang una nga branch sang Simbahan sa Finland.

Napatay si Leander sa tuberculosis pagligad sang lima ka tuig sang nagabusong si Lena sang ila ikapulo nga bata. Ina nga bata, ang akon tatay, nabata duha ka bulan pagkatapos nga mapatay si Leander. Sang ulihi ginlubong ni Lena indi lang ang iya bana kundi hasta ang pito sang iya pulo ka kabataan. Bilang pigado kaayo nga balo, grabe ang iya kabudlayan. Sa sulod sang 20 ka tuig wala gid sia sang maayo nga tinulugan. Sa adlaw, nagabaka-baka sia sa pagpangita sang pagkaon para sa iya pamilya. Sa gab-i, ginaatipan niya ang tagumatayon niya nga mga miyembro sang pamilya. Kabudlay hunahunaon kon paano niya nasarangan.

Nagpadayon si Lena tungod nakahibalo sia nga ang iya napatay nga bana kag kabataan mangin iya tubtob sa wala katapusan. Ang doktrina sang mga bugay sang templo, lakip na inang parte sa wala katapusan nga mga pamilya, naghatag sa iya sang kalinong tungod may pagsalig sia sa gahum sang pagselyo. Samtang nagakabuhi, wala sia makabaton sang iya endowment ukon maselyohan kay Leander, pero nagpabilin si Leander nga dako nga impluwensya sa iya kabuhi kag sa iya dako nga paglaum sa palaabuton.

Sang 1938, nagsumite si Lena sang mga rekord para maobra ang mga ordinansa sa templo para sa nagkalamatay na niya nga mga miyembro sang pamilya, ang iban sini upod sa pinakauna nga mga ginsumite halin sa Finland. Sang mapatay sia, ang mga ordinansa sa templo ginhimo sang iban para sa iya, kay Leander, kag sa iya napatay na nga kabataan. Paagi sa proxy, na-endow sia, ginselyohan si Lena kag Leander sa isa kag isa, kag ang ila napatay na nga kabataan kag ang akon tatay ginselyohan upod sa ila. Pareho sang iban, si Lena “[napatay nga nagatuo, nga wala mabaton ang mga ginsaad pero gikan sa malayo], … ila nakita kag ginpaabot ini.”²⁵

Nagkabuhi si Lena nga daw naghimo na sia sining mga kasugtanan sa iya kabuhi. Nakahibalo sia nga ang iya mga kasugtanan sa bunyag kag sa sakramento nagaangot sa iya sa Manluluwas. Ang iya “matam-is nga handum sa duog nga balaan [sang Manunubos] sa [iya] dughan nagdala sang paglaum.”²⁶ Ginkabig ni Lena nga isa ka dako nga kaluoy sang Dios nga matun-an niya ang parte sa wala katapusan nga mga pamilya antes maeksperiyensyahan ang mga trahedya sa iya kabuhi. Paagi sa kasugtanan, nabaton niya ang gahum sang Dios nga magpadayon kag magpangibabaw sa masubo nga pagbutong sang iya mga hangkat kag mga kabudlayan.

Sa inyo pagpanglakaton sa dalan sang kasugtanan, halin sa bunyag pakadto sa templo kag sa bilog nga kabuhi, ginapromisa ko sa inyo ang gahum nga makontra ang natural nga hilig sang kalibutan—ang gahum nga magtuon, gahum nga maghinulsol kag mangin balaan, kag gahum nga makakita sang paglaum, kaumpawan, kag bisan kalipay samtang ginaatubang ninyo ang mga hangkat sang kabuhi. Ginapromisa ko sa inyo kag sa inyo pamilya ang proteksyon batok sa impluwensya sang kaaway, labi na kon ginahimo ninyo ang templo nga mayor nga tutok sang inyo kabuhi.

Sa inyo pagpalapit kay Cristo kag pag-angot sa Iya kag sa aton Amay nga Langitnon paagi sa kasugtanan, nagakatabo ang daw indi kinaandan. Nagaliwat kamo kag mangin perpekto kay Jesucristo.²⁷ Mangin anak kamo sang Dios sa kasugtanan kag manunubli sang Iya ginharian.²⁸ Ginahunahuna ko Sia nga nagasiling sa inyo, “Ikaw ang pinalangga ko nga anak nga nanamian ko gid. Nakapauli ka na.” Sa ngalan ni Jesucristo, amen.