Mme Edidiↄŋ eke Patriarch Fo—Ndinen Nda-usuŋ otode Ete ke Heaven
Edidiɔŋ eke patriarch mi ama anwam mi ndifiɔk ata ndaha mi—se ami nkenehede ndi ye owo emi ami nkemede ndidi.
Ami nkokpon ke ubↄk nti ete emi ekemade ekenyuŋ ekpepde nnyin, nditↄ mmↄ, gospel ke usuŋ mbuↄtidem. Ke ndioↄk-iso, ndima ete ye eka mi ema enyene mfina ke ndↄ mmↄ ke ediwak isua. Ami nkedi eyen Primary ini ema etiŋ enↄ mi ke mmↄ ekeme ndisuana ndↄ usen-kiet ndien ke nditↄ eka mi ye ami iyemek ewe ke otu mmↄ ndiduŋde kiet. Ke ediwak isua, nkodu ke ↄkpↄsↄŋ ekikere; edi, enↄ okotode Ete ke Heaven ama ↄkpuhↄre kpukpru nkpↄ ↄnↄ—akam edidiↄŋ eke patriarch mi.
Ke isua 11, etiene ↄkpↄsↄŋ mfina kabaŋa ndↄ mme ete mi, mma nehede nyom ndibↄ edidiↄŋ eke patriarch mi. Mma mfiↄk ke Ete mi eke Heaven ↄfiↄk mi ↄfↄn onyuŋ ↄfiↄk ata ndaha mi. Ami nko mamfiↄk ke ami nyebↄ ndausuŋ otode Enye. Ke isua 12 mi ekebede, mma mbↄ edidiↄŋ eke patriarch mi. Oro ekedi mbahade isua ikie kiet ebede, edi mmenehede nti odot-ukpono nkpo-ntibe oro.
Ke inemesit, nnyin imenyene ndinen nda-usung abangade mme edidiong eke patriarch onode ke General Handbook ufok-Abas:
“Ofuri ikot ufↄk-Abasi emi edotde, emnyuŋ eduↄkde mmↄŋ enyene unen ndibↄ edidiↄŋ eke patriarch, emi ↄnↄde ndinen nda-usuŋ otode Ete ke Heaven.”
Owo ufↄkabasi ana “etim okpon man enyene mbufiↄk abaŋa ufↄn ye edisana uduot edidiↄŋ oro” onyuŋ “ↄdiↄŋↄ akpan edinam gospel.”
“Ke akpan ana owo esehe ekem man ediwak nti uduak ke uwem osuk odu ke-iso. … Mme ada-ibuot itie-oku inaha ebiere mkpri-nkaha isua emana enim enↄ owo man ↄbↄ edidiↄŋ eke patriarch. …
“Edidiↄŋ eke patriarch edi ŋkpↄ-edisana, enyene uku, onyuŋ enyene owo kiet. …
Owo emi ↄbↄde edidiↄŋ eke patriarch ana okpono mme iko esie, etim ekere mmↄ, onyuŋ odu uwem odotde ndibↄ mme edidiↄŋ ekenwↄŋↄde ke uwem emi ye ke nsinsi.”1
President Russell M. Nelson kpukpru ini ekpep abaŋa akpan ufↄn otode edidiↄŋ eke patriarch,2ete ke enye ↄnↄ owo kiet-kiet ebↄde “usiak ubon afiak edem ekesim Abraham, Isaac, ye Jacob”3 nko ke edidiɔŋ kiet kiet “edi saŋa-saŋa ŋwed-Abasi ↄnↄ fi.”4
Edidiↄŋ eke patrairch me ekedi ata akpan ↄnↄ mi kini ami nkedide ekpri ke mme ediwak ntak. Akpa, otode ke odudu eke Edisana Spirit, edidiↄŋ eke patriarch mi anam mi ndiↄŋↄ mbiet nsinsi mi—owo ami nkedide ye owo ami ndidide. Enye anam mi ndiↄŋↄ, nte President Nelson ekpepde, ette ke ami nkedi “ eyen Abasi,” “ eyen ediomo,” ye “ mbet Jesus Christ.”5 Ami mma-ndiↄŋↄ nte ke Ete mi ke Heaven ye Andinyaŋa ema mi ndien ke Mmↄ ke Idem-mmↄ ema enyene ebuana ke uwem mi. Emi anamde nyene udↄŋ ndisik nkpere Mmↄ nyuŋ menere mbuↄtidem ye iberedem mi ke Mmↄ.
Edima ufan kiet emi okodukde ufↄk-Abasi nte akparawa akabuana emi: “Ke ini patriarch okodoride ubↄk esie ke ibuot mi onyuŋ etiŋ enyiŋ mi, kpukpru ŋkpↄ ama okpuhore, … ikidihe ini oro kpↄt edi ke kpukpru ini uwem mi. Ami mmandiↄŋↄ ini-kiet—etiene odudu emi enye akadade etiŋ—ema ediↄŋↄ mi ntotuŋↄ-ntotuŋↄ. Mme ikↄ oro enye eketiŋde ama oduk kpukpru idem mi. Ami mma-ndiↄŋↄ ke Ete ke Heaven ↄdiↄŋↄ mi, esit ye anwa.
Ndidiↄŋↄ owo emi ami nkenehede ndi anam mi ndiↄŋↄ nyuŋ nnyene udↄŋ ndinam se Abasi oyomde mi nam.6
Emi ama anam mi nkekpep mme ediomo nkanamde ye mme edidiↄŋ ekenwↄŋↄde ke ediomo Abasi ye Abraham.7 Oro ama ↄnↄ mi akamba ntat-enyin emi akanamde mi nnim ediomo mi ↄyↄhↄ-ↄyↄhↄ.
Ami mma nsisↄp mkpep edidiↄŋ eke patriarch mi, ediwak ini ke usen, emi akanamde mi nyene inem-inem, odudu ukpeme Edisana Spirit, emi anwamde ndisuhↄre mfina mi, nte ntienede nda-usuŋ Esie. Emi ama edibede udↄŋ mi ndiyom unwana, akpanikↄ, ye Edisana Spirit ke ndikpep ikↄ-Abasi nnyuŋ mbↄŋ akam kpukpru usen ye ndikpep nnyuŋ ntiene ukpep-ŋkpↄ mme prophets ye apostles Abasi. Edidiↄŋ eke patriarch mi ama anwam mi nko ndinyene udↄŋ ke ndisuk-ibuot nnↄ uduak Ete ke Heaven, ndien ntiŋ-enyin oro anam mi nkop inemesit, ↄkpↄsuk edi nyenede mme mfina.8
Mma nsibↄ odudu spirit kpukpru in nkotde mme edidiↄŋ eke patriarch mi. Ke ini mme ete mi ekesuanade ndↄ ke akpatre, edidiↄŋ eke patriarch mi, nte President Thomas S. Monson ekekpepde, ama ededi “ediye ye anana-ekom-urua inyene mi,” nte “okim Liahona.”9
Idahaemi, mbↄk kop mi ↄfↄn. Ami nkↄfↄnke-mma. Mma nnam ediwak ndudue. Nsi nsi ada nsaŋa mi ekeme nditiŋ ke ami ke nanam oro. Edi edidiↄŋ eke patriarch mi anam mi nyom ndinam ↄfↄn nnyuŋ ndu eti- uwem.10 Ediwak ini ndikot mme edidiↄŋ eke patriarch mi edibede udↄŋ mi ndidiↄŋↄ nnyuŋ nkan idiomo. Enye anam mi nnyene udↄŋ ye uko ndikpↄŋ idiↄk ido, ndien edikabare esit aka-iso okpon ediwↄrↄ edinam idara.
Ekedi akpan-ŋkpↄ ↄnↄ mi ndibↄ edidiↄŋ eke patriarch mi ke in nkedide uyen ye ke ini iko-ntiense mi ↄkↄsuk okoride. Ami nyosuk nnemesit koro mme ete mi ye bishop ema ediↄŋↄ ke udↄŋ mi ↄkↄwↄrↄ ke mmebeŋe-idem.
Ini nkedide isua 12, ererimbot ikitimekede ikinyuŋ ibiarake nte ererimbot mfin emi. President Nelson abat mfin “nte ata ↄkpↄsↄŋ ini ke mbuk ererimbot,” ererimbot emi “idiↄkido-ↄyↄhↄde” ye “mma-idem.”11 Ke mfↄniso mme mkpri owo nnyin mfin enehede ediↄŋ-idem ekan nte nkedide ke isua 12, mmↄ nko enyuŋ enyene akpan ŋkpↄ ndinam ke ini mmↄ edide mkpri! Mmↄ nko ana ediↄŋↄ owo emi mmↄ enehede edi , nko, ke Abasi ama mmↄ onyuŋ ↄdiↄŋↄ mmↄ ↄyↄhↄ-ↄyↄhↄ.
Idihe kpukpru owo ediyom edidiↄŋ eke patriarch ini ami nkoyomde. Mmebeŋe nte mbon emi mmibↄhↄ kanga edidiↄŋ eke patriarch mmↄ eyom ndidiↄŋↄ ke akam ini emi mmↄ ebeŋede idem. Ami mmↄnwↄŋↄ, nte afo ebeŋedeidem ke spirit, se afo edikutde, nte okim, eyedi odot-ukpono ono fi. Mmebeŋe nko nte mbon emi ema ekebↄ edidiↄŋ eke patriarch mmↄ ekpekot enye enyuŋ ema enye. Ndima edidiↄŋ eke patriarch mi ↄdiↄŋ mi ye uko ke ini nkememde-idem, ifure ke ini nkokopde ndik, emem ke ini nkokopde nyomo-nsia, idorenyin ke ini nkokopde unana-idorenyin, ye idara ke ini ukpↄŋ mi oyomde enye akan. Edidiɔŋ eke patriarch mi ama anwam ndikɔri mbuɔtidem mi nyuŋ nim Ete eke mi Heaven ye Andinyaŋa mi ke akpan ikɔ. Enye nko ama anam ima mi ye mmɔ ɔkɔri—nko osuk ananam.12
Ami mmↄnↄ ikↄ-ntiense ke mme edidiↄŋ eke patriarch ↄnↄ nti nda-usuŋ otode Ete ke Heaven. Mmↄnↄ ikↄ ntiense mi mbaŋa odu-uwem akpanikↄ abaŋade Ete nnyin ke Heaven ye Eyen Esie—Andinyaŋa nnyin, Jesus Christ, emi ↄdiↄŋↄde nnyin, amade nnyin, onyuŋ enyenede udↄŋ ke ndidiↄŋ nnyin. Ami mmↄdiↄŋↄ nko ke akpanikↄ ke President Russel M. Nelson edi prophet ke isↄŋ mfin emi. Ke enying Jesus Chrst, amen.