Rokui el Tekoi el kirel a Klungioled

Chelechal sils el longelolem el sils ra Ongeua el buil, sel kelsel a Jesus Kristo ra lolutii a Ikelesia er Ngii— ea ongingil tial temel a Baskua, sel doldeu a rengud e douchais e ra cherungel el klengar ra Jesus Kristo, uldersel er a tngakireng, ma klebokel el Lokisel ra Kodall.

A cheldecheduch e ra Sina a omuchel el ngelekel a chad a metik e ra klebokel el uos.

“Ng ngeltengat,” a re tonari melekoi.

“Hall e domes,” ng melekoi ngil chad.

Ea ngelekel a reubet e ra uos e di mirekong el telmall a bedengel.

“Ng mekereior,” a re tanori melekoi.

“Hall e domes,” ng melekoi ngil chad.

A re ngelitel el soldau a dilum engdi dimlak el nguu ngkal telmall el ngelekel.

“Ng ngeltengat,” a re tonari melekoi.

“Hall e domes,” ng melekoi ngil chad.

Tial chetituokel el beluulechad a blechoel lomelchesiu el ngara ongarem, diak el klebechel, bebil ra taem eng ngeltengat e—dirrek el blechoel—mekerior. Meng uaisei, lokiu er tial beluulechad ra uldikel,¹ “kede medengei el kmo a rokui el tekoi a dmak loureor el kirel a klungiolir tirkel betik a rengrir ra Dios.”² Ngultebechel, sel dorael ngara lemalt e medengei a telbiled, “a rokui el tekoi a dmak loureor el kirel a klungioliu.”³

Rokui el Tekoi el kirel a klungioled.

Kmal ungil iaksok! Melchesuar e ra ongelaod el ngara Dios! Ngokiu ongasireng el teletael, esel moktek e ra Blebelel ma blekerdelel a Dios, a mo medengelii a uchelel ma ulebengelel,⁴e lokeed a ikel rokui el kirel a mo klungioled, e mo sebelid e kobkellid sel bode cheledaol e mechedaol lokiu ra krasia ma Tngakireng e ra Jesus Kristo.

Tngakireng e ra Jesus Kristo a sebechel ngosukid e osebelid ra klengit. Ngdi a Jesus Kristo a dirrek lungil medengei a rokui el ringeled, ongarem, sechered,⁵ klengit el reng, klakeakl. Chelechal taem ma diak a ulebengelel, Ngii a mlo mesisiich e ra kodall ma ongarem meng kutmokl a rokui el tekoi el mo melmalt.⁶ Ngii a olngeseu lomekungir ra re metacherbeserir ma re delnguul, omak a rengrir a rubang a ngaschereng e blibii, mengelaod ra re di tiltang e cheloit, melisiich er tirkel lomdedenger e olngesonges, e okeed a ongasireng el di sebechel morngii e lokiu ra Dios.

Kede mengitakl a hallelujah e oldiu lou hosanna! Lokiu a diak a ulebengelel klisiich ma klungiaol, sel moktek er a Dios el kirel a deureng a kmo rokui el tekoi a oureor kirel a klungioled. Ng sebeched el chemau a klengar el klou a rengud e diak de medakt.

Sel di kid, eng diak ke dodengelii a ungil kired. Sel “Ngak a melilt er ngak,” e ak dirrek el melilt a ikel mo ngosengesak, chelitechetuk, ngesengesek. Engdi, a bo doruul a betokl lungil tekoi, eng kired el lungil.⁷ Leng diak a ngodech eng di a Dios a ungil,⁸ kede osiik elmo cherrungel lultuil e ra Jesus Kristo.⁹ Kede mo nguu sel merang e ungil teleteled dilmerekmo de becherei sel klechad el soal a beluulechad a re sechal ma redil e dimo ua ea kekerel ngalek er medal a Dios.

Me kede oumerang me a klaumerang er kid el ngara Dios, e a ongarem ma ringel a mo mechedaol kired. A Josef, el mlo terau el mlo sibai ra Egypt, a uriul a ulsobel e ra telungalk er ngii ma rechad. A Profet Joseph Smith ra le kelbus ra Liberty Jail a siluub a ikakid el tekoi “aika el tekoi a mo meskau a decham e mo klungiolem.”¹⁰ A klengar lokiu ra klaumerang, ongarem ma omelenget el diak el soad a sebechel lomekngeltengat er kid ma rebebil lokiu a teletael el diak kede bdaseu¹¹

Kede melketek ra klaumerang e moumerang e ra Rubak el kmo a rokui el tekoi a dmak louedikel el kirel a klungioled sel bocha domes ra diak a ulebengelel;¹² bleketakl ongarem el me rekid el di kedeb el taem”;¹³ medenge ringel a mo mechedaol el mo klungioled;¹⁴ kongei el kmo a aksidents, bkais emrungel kodall, mekngit el secher malechub eng rakt a tebedechel a klengar; e oumerang el kmo a Demad ra Babeluades a diak lomeskid ongarem leng mengelbus malechub eng ngoukerekeriil. Ngii a diak el bol nguu a bad el msa chad lolengit a blauang, makal bersoich el mora chad e lolengit a ngikel.¹⁵

Sel le borngii ongarem, eng ngoumesind el soad a tara chad a lorenges el keed er kid.¹⁶ Seikid el taem, e domelekl a selaod el tekoi a diak a le ngesuir, altang eng mle ungil a moktek. A le bebil ra taem e kede oureng ra chad melou mekikngit el reng, chouarem, el langel lobengked; me dotobed a kengtil a rengud, ma chetid, molmuut ra ngesechel a rengud; e le kengei lobengked ra tekoi el diak ke dodengei.

Sel doumerang ra Dios ma beltkil a rengul el kired, eng molmuut ra ikal kmal meklou rengelel a rengud a sebechel, er sel lulebongel el mo dmak e oureor el kirel a klungioled.

Ak medengelii sel sils e ra knguu a tekoi el kirel a kmal meringel el aksident el bla rengii a rechad el betik a renguk er tir. A uaikal taem, el de ngara ringel e doumerang, eng di kired e lotirakl a le dilung a Job, “A Rubak a mileskid, me a Rubak meng ngosur er kid; ngeltengat a ngklel a Rubak.”¹⁷

Sel cherrengelel a Ikelesia ra beluulechad el rokir, eng bekord el ledei el telael ma eiim el dart el stakes ma districts ma bekord el lokedei el telael el ward ma branch a olngeseu el mesebechakl e mengkar el kirel a ses el yolt.¹⁸ Ngdi chelsel a ikal stake ma ward, e te betok el mekedung el telungalk ma rechad a obangel a chetiteuokel el ongarem, molmuut ra lodengei el kmo (dirkak el bo lodengei el lokerang) a tekoi a mo dmak el loureor el kirel a klungiolir.

Ngara Huddersfield, England, ea Odam ra Samuel Bridgstock a le biltik er ngii el smecher ra kasinoma ruchei e ra okedong el kirel a beches el stake president. Meng ngarngii tial meringel el rektel, eng ngoker ra bechil ra Anna, el ngerang meng kirel bo longedecheduch er ngii.

“Leng,”a odos Bridgstock a melekoi, “kau a bo lomekedong er kau el mo stake president.”

siasing/Llecheklel

Telungalek er a Bridgstock.

Meng mlo terkokl el tal rrak malechub eng erung el sebechel ngar, a President Bridgestock (el ngar tiang er chelechang) a ngara ongeua el rrak er ngii el mesiou. Ng ngarngii a ungil ma meringel el sils er ngii. A stake er ngii a di melketek elmo mesisiich loba klaumerang, omesiou, ma beltik el reng. Ng diak el beot, ngdi bechil ma telungalk er ngii a kiei el ngara klaumerang, omereng el saul, ma bleketakl el klengit el reng e loumerang el kmo ngmo diak a ulebengelel deurreng a le nguu e lokiu ersel Tngakireng er a Jesus Kristo el mo mecherungel.¹⁹

Mesel de meklou a rengud, kltmokl, e dongull, e kede melchesuar ra klebekelel, moktek, ma budech er sel telbiil el oeak sel loldars er ngii Rubak. Ma ikel chedaol taem, Ngii a mo mechikid me kede mesang sel klou el diak a ulebengelel el siasing el luchul a klengar er kid a telkib er ngii, el ngarngii a mekekerei ma beot el tekoi e loureor el dmak el kirel a klungiolir a mesiou ma re siungel.

Rebekah, el ngelekel ngkel mle kot el mission president er ngak, a uluchais ra lokerang a Rubak e ra longer a nglunguchel el kirel ongelaod el kora mle bkais chemrungel el techall el mlo ngoseuir a nglunguchel a tara chad.

siasing/Llecheklel

A Rebekah a ngiluu el msang ngkal redil a mle kloklel a delal el mesil el douteliil er ngii.

Tara kesus, ea Rebekah, ngara klengit el reng leng delal el dirke mlad, a mle bleketakl e ra uldesuel elmo mechar a kasoring ra mlil. Sera le bora station, eng milsang a cheuodel redil meringel outeliil lobang a klou el tank er a eolt. Nguriul, ea Rebekah a mlo sebechel msang ngkal redil a mle kloklel a delal el beot el dongetakl er ngii el mesil douteliil er ngii. Ngkal sister a ulureng a sulel meng dilul kmo, “Ke mla lmuut el meskak a tara techall.” A tekoi a dmak loureor el kirel a klungiaol sel dosiou el uai ea Jesus Kristo.

A chedam el mlungerachel ngii ma ngelekel sechal el rekil a mlamo sensei me te kaukledem el mesiou a silodii, “A mesiou sel ki blem tonari lomesterir a kukis el mora loumerang er tir el sechelirir, te omuchel el oldingel lokiu reng.” A telbiil e lultuil ra Jesus Kristo a mengelaod, oldak, e omeklengeltengat.

Molmuut ra kereor, ea reng el keltmokl a sebechel lotkid ra Demad ra Babeluades el mle medengei a teletael el dulmelchesiu el mechitechuit e di kid el tang. Ea okesiu, a telungalk el ngelekir a milngai ra ambulance el mora ospitar ra uriul a mlo kie rengrir le te liletkii a Chedaol Reng el sibedeterir ruchei ra ngara mo dubech.

A bebil ra taem ea meklou el diak a ulebengelel klemerang el Rubak a mechikid me kede melchesuar a uldimukl er tirkel chedad el ngara belurir a rdeleb. A odos a ngiluu a deurreng e lulkiu ra lobult el mora Jesus Kristo ra mla moluut el ebangkelio. El mle eru el meklou el kerior a dilubech er a klengar er ngii—milsa aksident er a chert e ma delal mlad, el di mle ngii el nguu a klengar er ngii.

siasing/Llecheklel

A odos a mlo mesisiich er a dektel e mlo metecholb.

Ngdi ngkal odos a ultekangel el mo mesisiich ra dektel ra ralm meng mlo sebechel mo metecholb. Ea rirelii a kmal mlo klebokel el sils, ng mle sioning ra tara chad, el mlo mtechei ra delal mla mad, el metecholb e ra templo. “A techolb chelid ra templo a mlo omekungil ra delak, e tiakid mak mlo mimokl,” ngika el odos a milkingang. “Ng mlo kot el taem el kulchesuar ra budech sera le mad a delak.”

A ikal chedaol el ongak er kid a omelekl el kmo Ngii a omeklatk el kmo a rokui el tekoi a dmak el loureor el kirel a klungioled.

A Babier ra Mormon a ochotel el kmo kid a sebeched el lorekedii ra chimad el kmo a Jesus ea Kristo ea Dios a Ngii a oltaut a ulochel. Ng miluches lokiu ra rulekrael el profet el milsa tial sils el de ngarngii, a Babier ra Mormon a diomuchel el ngarsel merenglel a klechad—a telungalk el ngarngii a meklou e kakerous el mondelngir. Meng uaisei, esel dosuub e domtab ra 1 Nephi 1 el mora Moroni 10, e kede mo kmeed e ra Jesus Kristo loba mesisiich el klaumerang el kmo a dilubech er sel taem a sebechel lomekngeltengat er kid er tiang er chelechang.

Ma Rubak, lokiu ra re ngar el profet er Ngii, loltobed a lmuut el betok el blil a Rubak el mo kmeed er kid ra betok el basio, e kid a mes a klengeltengat e ra templo e loureor el dmak el kirel a klungioled. Kid a mei lokiu ra telbiil ma chedaol lureor el mora Dios el Demad ma Jesus Kristo e nguu a diak a ulebengelel ues ra klengar. Tang ma tang, ngakl me a ngakl, kede msa techall a re telungalek—rebladek—a chedaol ureor ma klengeltengat er a telbiil lokiu a teletelel a Rubak er a lolsobel er a le ngara Mount Zion.²²

Ma ikal templo sel lolkeed el me rekid ra betok el basio, e dodersid el mora templo e dosiik elmo mechedaol e ra blil a Rubak sel de blechoel el mong. Ng mlamo betok el rrak, e aki mla koreker, melib, e melenget a klengar er kemam el mora templo. Chelechang, sel blol lungil besul, kiolengit me mei el blechoel el mera chedaol el blil a Rubak. Bol mekedekudem a omengull ra templo ma omesiou lomekngeltengat, mesebechakl, e lomekrael er kau ma telungalk er kau—a telungalk er kau er chelechang ma telungalk er kau el morngii er a tara klebesei.

siasing/Llecheklel

Chedil el mechas el ngara ikrel a templo.

E dirrek, sel bo lungil besul, kulengit mesa sel klengeltengat el ngarngii a bilem ra templo.²³ A chedil el ngara ungil el telungalk a dilu el ulekum meng ngarngii a ngidil tekoi er tial beluulechad, el kot el soal a sel le ngarngii a bilel ra templo. A ngelekel sechal a dilu el kmo, “A chedil a milngululau el kmo, ‘Ak mo mesiou el loubail a ikal bilek ra templo, esel kmad, ak medakl e loubail.’” Me sera le mei sel taem, eng mildakl lobail.

Ma President Russell M. Nelson a ulsisechakl, “Bekl el tekoiel doumerang ma bekl el tekoiel telbiil el Dios a mla kutmokl el mora rechedal ra telbiil a di mo tang a medal ra elsel a templo.”²⁴

Me tial klengar el mora diak a ulebengelel, esel moktek e ra Ulebeob ma teletelel Ngii el Dios a okeed a rokui el tekoi el kirel a klungioled.

Tiaikid a diak a ulebengelel el moktek ra Rubak. Ngii ea Osengel el diak a ulebengelel. Ng Telbilel el diak a ulebengelel.

Sel sekum ma klengar a cheremetai e diak a ungil moktek, e kau a soam el kiei ra ungil klengar ngdi diak modengei el kmo ke mekerang, kulengit e mei ra Dios el Demad ma Jesus Kristo. Moumerang el kmo Te ngar, betik a rengrir er kau, e sorir a rokui el tekoi bol klungiolem. Ak kuchais el kmo Te uaisei, el di melmolm el diak a ulebengelel, el ngara chedaol ngklel a Jesus Kristo, amen.