Na Marau ni Veivutuni

E ka titobu sara na marau ka sega ni dua ga na gauna ni vakacegu se vakilai ni marau. Na marau dina se “na reki sa sega ni mudu” (2 Nifai 8:11), ena yaco ga mai na noda vakila na kaukauwa ni Veisorovaki ni da sa veivutuni vakaidina ka da sa kila vakayalo ni da sa rawa ni vakabulai mai na noda ivalavala ca mai vua na Turaga o Jisu Karisito ka da vakaivotavota ena bula tawamudu.

A vakavulica o parofita Liai ni ituvatuva ni Tamada Vakalomalagi me baleti keda yadua o ya me da “rawata na marau” (2 Nifai 2:25) ka sa sala duadua ga me da kunea kina na marau tawamudu o ya ena Veisorovaki i Jisu Karisito.

E dina ga ni da sega ni rawata rawa na marau e taucoko ena bula oqo (raica na V&V 93:33–34), sa rawa me da na marau tiko ena veigauna eso ni da bulataka tiko na kosipeli. A vakavulica o Momani na iwalewale ni kena rawati rawa na marau ena nona kaya vei ira na Nifai yalodina, “Ia era sa daulolo ka masu vakawasoma, ka sa dei tikoga na nodra vakamalumalumutaki ira, ka sa kaukauwa sara na nodra vakabauta na Karisito, a sa vakasinaiti na yalodra ena marau kei na vakacegu; ia sa vakavoui ka vakasavasavataki na yalodra; ia sa yaco na veivakasavasavataki oqo ni ra sa solia na yalodra vua na Kalou” (Ilamani 3:35).

Ena vuqa sara na ivolanikalou era kaya tiko na parofita na kena vakilai na marau kei na vakilai ni Yalo Tabu ena iwalewale vata ga. Kena ivakaraitaki, ena ivola ni nodra Cakacaka na iapositolo eda vulica kina ni “ko ira [na tisaipeli] era sa lotu era sa sinai ena marau kei na Yalo Tabu” (Cakacaka 13:52). Ka sa yalataka tu na Turaga kivei ira era sa muri Koya, “Au sa solia vei iko na noqu Yalo Tabu, ia ena vakavukui iko ko Koya, ka vakasinaiti iko ena marau” (V&V 11:13).

Ena gauna eda sa kila vakavinaka kina ni da sa vakasinaiti ena marau eda sa vakasinaiti tiko ena Yalo Tabu, eda na qai kila kina ni marau dina ena yaco vei keda ni da sa veivutunitaka na noda ivalavala ca ka bula kilikili kaya kei na Yalotabu. Me kena ikuri, ni da sa vakila na Yalotabu, eda na kunea na marau e cecere ni da sa kila vakaikeda ni da sa vakasavasavataki e mata ni Kalou.

Na marau ka lako mai na veivutuni sa dau laurai vakalevu ena veiroka ni bula. Na kena imatai na marau kei na vakacegu e yaco mai vei koya e sa veivutuni ni sa takali yani na icolacola bibi ni ivalavala ca. Kena ikarua na vakilai mai na uto e loma na marau kei na loloma e yaco vei ira era veivuke ena cakacaka ni veivutuni. Ka kena itinitini na yalo ni marau ni sa lomani keda tikoga na iVakabula ena Nona raici keda ni da sa vakamuria tiko na Nona ivakaro ka da sa vakararavi tiko ki na kaukauwa ni veivakabulai ni Nona solibula ni veisorovaki.

Ni da bulataka na Veisorovaki ena noda bula, me da nanuma tiko na iVakabula kei na Nona isolisoli tawamudu vei keda, vakabauti Koya tiko, ka vakasaqara na veivakadeitaki vakayalo ni sa rawa Vua me vakabulai keda mai na noda ivalavala ca kecega kei na malumalumu. Eda na qai vakila kina na marau kei na vakacegu ka na vakatikora vei keda na Nona Yalo Tabu. Ena yaco vei keda na veika a yaco talega vei ira mai Saraemala: “Sa sobuti ira na Yalo ni Turaga, era sa vakasinaiti ena marau ka vakacegu na yalodra ni sa bokoci na nodra ivalavala ca, ena vuku ni nodra sa vakabauti Jisu Karisito o koya ka na lako mai” (Mosaia 4:3).

Ni oti na noda vakila na marau ka lako mai na veivakalougatataki ni Veisorovaki, ena yaco talega vei keda na marau me da veisureti yani vei ira na tani me ra lako mai vua na Karisito. Ena nona vakavulici Ilamani na luvena, e kaya kina o Alama: “Au sa daucakacaka tikoga vagumatua ka vunauci ira na tamata, me ra veivutuni ka saumaki mai; io me ra tovolea talega na marau a yaco vei au; raica au sa gadreva sara me ra sucu vou talega vua na Kalou, ka me ra vakasinaiti ena Yalo Tabu.

“Ia i na luvequ, sa vakalougatataki au vakalevu na Turaga, ka sa vuavuai vinaka na noqu cakacaka” (Alama 36:24–25).

E vakavulica vakaoqo na Turaga: “Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau ena matanitu i Tamaqu!

“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewe vuqa” (V&V 18:15–16).

Kena itinitini, sa sega tale ni dua na ka ia au sa vakasamataka ga na yalo e vakacegu sa yaco vua na iVakabula ena veigauna yadua eda veivutunitaka kina na noda ivalavala ca ka bulataka ena noda bula na Nona solibula ni veisorovaki. Sa ka dina sara na nona voqataka o Joni na inaki ni iVakabula ni a kaya: “Sa ka levu na noqu reki ena vuku ni ka e duabau ga oqo, niu sa rogoca era muria na dina ko ira na luvequ” (3 Joni 1:4). E a kaya vakaoqo na Karisito me baleti Koya ga, “Raica sa levu vakaidina na nona marautaki ira era sa veivutuni” (V&V 18:13).

Ni oti na nona vakavulici ira na Nifai me baleta na Nona Veisorovaki kei na veika me ra cakava me ra kakua ni beitaki e matana, a vakaraitaka o Jisu na lomana kivei ira ena nona kaya: “Ia sa vuabale na noqu marau ena vukumudou … ; a sa marau talega ko Tamaqu, kei ira na agilosi yalosavasava ena vukumudou kei ira na itabatamata oqo; ni na sega ni rusa e dua vei ira… . A sa vuabale na noqu marau ena vukudra” (3 Nifai 27:30–31).

Au sa vakadinadinataka ni da na marau talega ena bula oqo kei na bula e taucoko ena kena e tarava ena noda “vakaraici Jisu, o koya sa vakatekivuna ka sauma talega na noda vakabauta; o koya ena vuku ni marau sa viritu e matana sa vosota na kauveilatai, ka sa sega ni madua ni sa vakalialiai kina, a sa qai tiko sobu ko koya ena liga imatau ni itikotiko vakaturaga ni Kalou” (Iperiu 12:2; vakamatatataki).

Eda rawa ni vulica vakalevu na marau e yaco mai ni sa yaco na veivutuni dina ena noda vulica na veika e sotava na iApositolo o Paula kei Alama Lailai, e dina ga ni sega sara ni vakaitamera na veika eda sotava (raica na Cakacaka 8:1–3; 9:1–31; Mosaia 27:8–31; Alama 36:5–24). Erau tamata dauveivakauqeti o Paula kei Alama ka rau dau vakacacani ira na Yalododonu. Ena loma ni nodrau veivakacacani oqo, e a rairai vei rau yadua na italai eso mai lomalagi. E a rairai vei Alama e dua na agilosi ni Turaga, ia a qai vosa dina o Jisu vei Paula, ka taroga, “Ko sa vakacacani au ena vuku ni cava?” (Cakacaka 9:4).

Erau a bale sobu ruarua ki na qele ena vuku ni veika erau a raica ka rogoca. E a sega ni vosa rawa o Alama, ka boko ruarua na matai Paula. Na ka e bibi, e a tautauvata ga na iwalewale ni nodrau sa vakilai rau mai na ituvaki butobuto kei na veivakarusai o ya. E a kerea kina o Paula, “Kemuni na Turaga, a cava ko ni sa vinakata meu cakava?” (Cakacaka 9:6). E vakasauri ga na nona veisautaka na nona bula ki vua na iVakabula ka vakamuria na ivakaro ni Turaga ena dodonu. E vakamacalataka vakaoqo o Alama na nona veivutuni:

“Ia au sa yaluma ka rarawataka na levu ni noqu ivalavala ca; au sa qai nanuma ni a dauvunautaka ko tamaqu, ni na lako mai ko Jisu Karisito na Luve ni Kalou, me bokoca na nodra ivalavala ca na kai vuravura.

“Ia, niu sa nanuma rawa na ka oqo, au sa masuti Koya ena yaloqu taucoko ka kaya: oi kemuni Jisu na Luve ni Kalou, ni lomani au mai, raica au sa yaluma sara ka kune rarawa, ka sa vesuki au na ivesu ni mate.

“Ia, niu sa vakacabora oti na noqu masu lo oqo, sa oti mai na noqu yaluma kei na noqu rarawataka na noqu ivalavala ca.

“Raica sa tuburi au na marau, kau sa kunea na rarama sa talei sara; a sa takali vakadua na noqu rarawa ka sa vuabale sara na noqu marau!” (Alama 36:17–20; vakamatatataki).

Elder Craig C. Christensen ena Vitusagavulu.