Երիտասարդներին ուղղված երեք ուղերձ

Մենք խրախուսում ենք ձեզ լավ կրթություն ստանալ ու այնպիսի հմտություններ ձեռք բերել, որոնք անհրաժեշտ են հաջողությամբ աշխատանք գտնելու, ընտանիքը պահելու և հասարակության համար պիտանի մարդ դառնալու համար:

Կրթությունը և մասնագիտական ուսուցումը կարող են թանկ լինել: Սովորեք փող խնայել և իմաստուն ձևով օգտագործեք այն գումարները, որոնք մատչելի են ձեզ: Դա կօգնի նվազեցնել այն պարտքերը, որոնք հավանաբար կառաջանան, մինչև ձեր կրթության ավարտը:

Եթե դուք կրթություն եք ձեռք բերում մինչ ամուսնացած եք, անհրաժեշտ կլինի, որ դուք և ձեր կողակիցը կարողանաք ճիշտ որոշումներ ընդունել, երբ դուք զոհաբերություն եք կատարում ձեր ընտանիքի մասին հոգ տանելու համար: Ձեզ անհրաժեշտ կլինի հոգ տանել, որ ձեր ընտանիքի կարիքները, ձեր աշխատանքը և ձեր կրթությունը վտանգի չենթարկվեն:

Անկախ նրանից միայնակ եք, թե ամուսնացած, ձեզանից նրանք, ովքեր աշխատում են, պետք է մշակեն աշխատանքային լավ վարվելակարգ: Եղեք արդյունավետ, ավելացրեք ձեր աշխատանքային հմտությունները: Եղեք հավատարիմ ձեր գործատուին: Որոնեք հնարավորություններ առաջադիմելու և լրացուցիչ պարտականություններ ստանձնելու համար: Վճարեք ձեր տասանորդն ու նվիրատվությունները: Խնայեք ձեր եկամտի մի մասը և զարգացրեք խնայողության և ինքնաապահովման սովորույթ:

Ձեր կյանքի այս շրջանում մեծ դժվարություններից մեկը` փող ծախսելու հետ կապված որոշում ընդունել գիտենալն է:

Նախագահ Բրիգամ Յանգը սովորեցրել է. «Եթե ցանկանում եք հարստանալ, խնայեք ինչ որ ստանում եք: Հիմարը կարող է փող վաստակել, բայց իմաստուն մարդը խնայում է այն և տնօրինում ի օգուտ իրեն»:¹

Մեր հասարակությունում մատչելի են այնքան գրավիչ և հետաքրքիր իրեր: Դրանք հաճույք և զվարճություն են պատճառում: Դրանք թովիչ են և թվում են պետքական:

Մինչդեռ Փրկիչն ասել է.

«Ձեզ համար գանձեր մի դիզեք երկրի վրա. ուր ցեցն ու ժանկն ապականում են, և ուր որ գողերը պատը ծակում են և գողանում:

Բայց ձեզ համար գանձեր դիզեցեք երկնքումը, ուր ոչ ցեց և ոչ ժանկ չեն ապականում, և ուր գողերը պատը չեն ծակում և չեն գողանում:

Որովհետև ինչ տեղ որ ձեր գանձն է, այնտեղ կլինի և ձեր սիրտը» (Մատթեոս Զ.19–21):

Զգույշ եղեք, որ դուք անմտորեն չշրջապատեք ձեզ ֆիզիկական, աշխարհիկ խաղալիքներով, որոնք չեն կարող անհրաժեշտ լինել ձեր կյանքի այս շրջանում: Մի կարծեք, որ դուք պետք է անմիջապես ապահովեք ձեզ այն բաներով, ինչ ձեր ծնողներն ունեին, երբ դուք հեռացաք նրանց տնից: Հիմնականում ձեր ծնողներից տասնյակ տարիներ են պահանջվել ժամանակակից տան այդ հարմարությունները ձեռք բերելու համար և իրական չէ ձգտել դրանք ձեռք բերել այժմ, երբ դուք ընտանեկան ձեր նոր օջախն եք հիմնում:

Ես անձնապես կարող եմ վկայել, որ ամենաքաղցր որոշ հիշողությունները, որ կինս և ես ունենք, կապված են այն ժամանակի հետ, երբ մեր աճող ընտանիքն ապրում էր մի փոքրիկ բնակարանում, մինչ ես սովորում էի իրավաբանական համալսարանում: Մենք կյանքի շքեղություններից քիչ բան ունեինք: Բայց մենք չգիտեինք, որ աղքատ ենք, որովհետև մենք ունեինք միմյանց և ավետարանի օրհնությունները: Այդ օրհնությունները լիովին ստվերում էին թողնում ֆիզիկական ունեցվածքների բացակայությունը:

Մտքում ունենալով սուրբ գրքի այս հատվածը, թույլ տվեք նշել մի քանի գործոններ, որոնք կարող են հետաձգել ամուսնությունը:

1. Ոմանց կարող է թվալ, որ վերադարձած միսիոներներին ավելի քիչ է խրախուսվում ամուսնանալ: Եթե դա է ձեր կարծիքը, դա կեղծ ենթադրություն է: Բոլոր վերադարձած միսիոներներին պետք է խրախուսվի, երբ նրանք տուն են վերադառնում, ակտիվ մնալ Եկեղեցում, կրթություն ստանալ, տիրապետել աշխատանքային հմտությունների և ձգտել հավերժական ընկերակից գտնել:

2. Որոշ երիտասարդ տղամարդիկ այնպիսի զգացում ունեն, թե որոշ երիտասարդ կանանց սպասումները չեն կարող արդարացնել: «Բարձր պահանջներ» արտահայտությունը հաճախ օգտագործվում է նկարագրելու նրանց, ովքեր այնպիսի տպավորություն են թողնում, որ իրենք ավելին են սպասում, քան մյուսը կարող է ապահովել: Պատշաճ շփումը կարող է վերացնել այդ անվստահությունը:

3. Կրթության կամ կարիերայի վրա կենտրոնանալը կարող է ամուսնությանն ավելի քիչ կարևոր դեր հատկացնել: Ամուսնությունը, կրթությունը և կարիերան կարող են միասին քայլել: Կարիերան առանց ընտանիքի, որտեղ ընտանիքը հնարավոր է, ողբերգություն է:

4. Թույլ մի տվեք ձեր կյանքը պարզապես զվարճալի կամ եսասիրական գոյատևում դառնա: Կյանքն ավելին է, քան զվարճության զբոսայգին: Մի ընկեք ունեցվածքներ ձեռք բերելու թակարդը: Պատասխանատվություն ստանձնեք:

5. Ամուսնության բացասական ընկալումը, որը կարող է հետևանք լինել տեղեկատվական հաղորդումների կամ ընտանիքի կամ էլ ընկերների փորձառությունների, կարող են մարդուն ետ կանգնեցնել ամուսնության մտադրությունից: Ոմանք ասում են. «Ինչո՞ւ ամուսնանալ, երբ այդքան շատ ամուսնալուծություններ կան»: Ամուսնալուծության առկայությունը չի նշանակում, որ դուք չեք կարող երջանիկ և հաջողակ ամուսնություն ունենալ: Թույլ մի տվեք, որ ուրիշների գործողություններն ազդեն ձեր որոշումների վրա: Վճռեք, որ ձեր ամուսնությունը չի ձախողվի:

6. Ոմանք հետաձգում են ամուսնությունը ֆինանսական պատճառներով: Հետաձգել ամուսնությունը, մինչև բավականաչափ փող լինի ապահովելու շքեղ կյանք, իմաստուն չէ: Այդ դեպքում, միասին մաքառելու, միմյանց հարմարվելու և կյանքի դժվարությունները միասին հաղթահարել սովորելու այնքան շատ առիթներ են կորչում:

Սրանք և բազմաթիվ այլ մտահոգություններ կարող են հետաձգել ամուսնությունը: Ես միտք չունեմ պատասխանել այդ առարկություններից յուրաքանչյուրին ձեզ անձնապես բավարարելու համար: Ես պարզապես հրապարակում եմ ամուսնության վերաբերյալ Եկեղեցու վարդապետությունը, և ես հորդորում եմ ձեզ բավականաչափ հավատք ունենալ առաջ շարժվելու և ընդունելու այս ամենակարևոր որոշումը ձեր կյանքում:

Եթե ես կարողանամ ընտրել մեկ բառ, որը լավագույնս կնկարագրի ամուսնությունը հետաձգելու պատճառներից մեծ մասը, դա կլինի վախ բառը` ապագայի հանդեպ վախը, ձախողման վախը և այլն: Վախ զգալն անսովոր մի բան չէ: Վախը կարելի է հաղթահարել նախապատրաստման և հավատքի միջոցով:

Երբ հին ժամանակների Առաքյալները վախեցան, որ փոթորիկը կխորտակի իրենց նավը, Քրիստոսը «զարթնելով քամուն սաստեց, և ասաց ծովին. Լռիր, պապանձվիր. և քամին դադարեց, և մեծ խաղաղություն եղավ:

Եվ ասաց նրանց. Ինչո՞ւ այդպես վախկոտ եք. ինչպե՞ս հավատք չունեք» (Մարկոս Դ.39–40):

Պողոս Առաքյալը սովորեցրել է. «Որովհետև Աստված չտվեց մեզ երկչոտության հոգի, այլ զորության և սիրո և զգաստության» (Բ Տիմոթեոս Ա.7):

Ես ազնվորեն կարող եմ ասել, որ իմ սերնդում, երբ ընձեռվում էր ճիշտ անձնավորության հետ ամուսնանալու հնարավորություն, կրթությունը շարունակելու խնդիրը դառնում էր երկրորդական, ճիշտ անձնավորության հետ ամուսնանալու խիստ կարևոր որոշման համեմատությամբ: Երիտասարդներ, ձեզանից շատերն արդեն ընդունել են այդ որոշումը և առաջ են շարժվում իրենց կյանքում, չնայած չունեք բոլոր հարմարությունները, որոնք հակառակ դեպքում հնարավոր է ունենայիք: Բայց դուք առաջ եք շարժվում հավերժական ծրագրի և աստվածային օրինակի համաձայն, որն այս Եկեղեցին առաջարկում է բոլոր անդամներին:

Վերջերս Քույր Թինջին և ես, որ այժմ ունենք 4 երեխա և 21 թոռ, հյուրընկալություն էինք կազմակերպել մեր աղջիկ թոռների համար, որոնք նաև պետք է գիշերեին մեր տանը: Մեր թոռներից հինգը` 6-ից 14 տարեկան, եկան մեր տուն: Բացի զարմուհիներ լինելուց, նրանք շատ մտերիմ ընկերուհիներ են:

Մենք հրաշալի կերակուր ճաշակեցինք, որը պատրաստել էր Քույր Թինջին: Այնուհետև մեր թոռնիկները ձեռքի աշխատանքով զբաղվեցին, որը նույնպես Քույր Թինջին էր պատրաստել: Հետո խաղացինք նրանց սիրելի խաղերը, իսկ հետո նրանք նեկայացրեցին տաղանդների մի փոքրիկ ցուցադրում տատիկի և պապիկի համար: Տաղանդների ցուցադրման ընթացքում նրանք երգեցին մի քանի Երեխաների Միության սիրելի երգերից` հարմարեցնելով դրանք տատիկի ու պապիկի համար, ներառյալ հետևյալը.

Իմ հինգ թոռնիկները իմ գրկում էին, երբ նրանք երգեցին այս երգը, վզիս փաթաթված, շոյելով այտերս և ամուր համբուրելով:

Ահա թե ինչի մասին է խոսքը: Սա ընտանիք է: Սա ավետարանն է: Այս ամենը լիովին ստվերում է թողնում բոլոր նյութական ունեցվածքները և այն բաները, որոնք փող արժեն:

Մինչև դուք չհասկանաք, թե ընտանիքի հետ կապված ինչ է պարունակում ձեր ապագան, ձեզ համար դժվար կլինի ձեր ապագայի վրա ազդող իմաստուն որոշումներ ընդունել: Ընտանիքն ամեն ինչ է: Այն ստվերում է թողնում բոլոր մյուս հարաբերություններն ու որոշումները:

Այժմ ես գիտեմ, որ ոչ բոլորը, ովքեր ցանկանում են ամուսնանալ, կանեն դա այս կյանքում: Տիրոջ ծրագիրը կանխատեսել է դա:

Հռութի պատմությունը Հին կտակարանում պատմություն է մի կնոջ մասին, որը կորցրել էր իր ամուսնուն և հետո որոշել հետամուտ չլինել միայն իր աձնական նպատակներին: Հռութը միայնակ էր, բայց նա հավատարիմ մնաց ընտանիքին և Աստծուն:

Երբ նրա սկեսուրը` Նոեմին, հորդորեց նրան առաջ շարժվել իր կյանքով, Հռութը մեծ հավատք առաջացնող մի միտք ասաց. «Ինձ մի ստիպիր որ քեզ թողնեմ, և քեզանից ետ դառնամ. որովհետև ուր որ գնաս գնալու եմ, և ուր որ մնաս` մնալու եմ. քո ժողովուրդն իմ ժողովուրդն է, և քո Աստվածն իմ Աստվածն է» (Հռութ Ա.16):

Ինչպես հիշում եք, հետագայում Հռութը հանդիպեց Բոոսին, և նրանք ամուսնացան և դարձան Հիսուս Քրիստոսի նախնիների շղթայի մի օղակ: Տիրոջ հավատարիմ հետևորդների բոլոր օրհնությունները նրանն էին:

Ընտանիքը ավետարանի սիրտն ու հոգին է: Ընտանիքի միջոցով մենք առաջադիմում ենք դեպի հավերժություններ: Արժե ամեն ձևի ջանք գործադրել հավերժական ամուսնության ու ընտանիքի համար:

Խնդրում եմ խորհեք այս մտքերի մասին, որոնցով ես կիսվեցի ձեզ հետ: Աղոթեք դրանց մասին: Իմացեք, որ ձեր Երկնային Հայրը կօրհնի ձեզ և կօգնի ձեզ վախը փոխարինել հավատքով, եթե դուք կանչեք առ Նա:

Ես խոնարհաբար բերում եմ իմ վկայությունը, որ Եկեղեցում լինելով ակտիվ, լավ նախապատրաստվելով ձեր ապագայի համար, և կնքված լինելով ձեր կողակցին ժամանակի և ողջ հավերժության համար, կարող է օգնել ձեզ բացահայտել այն ուրախությունը, որը Հիսուս Քրիստոսի ավետարանի խոստումն է:

Եկեղեցու կրթական համակարգի հավաքի ելույթից` տրված Յուտայում, Օգդենի Կրոնի ինստիտուտում 2004թ. մայիսի 2-ին: