Buokaia Naake A Keiaki n Totokoa Taanakin Raoia ni Mwaine
Te kairake ni mwaane ae kakateke ae ai uabwi tabun inano ana ririki e tekateka ni kaitaraai. Iai moangarena ae kareke, e ngae ngke e aki bati ni moangare inanon tain ara marooro. Tera te bwai ae reke nanou iai bon te maraki ae oti ni matana.
“I aki ataia ngkana N na teimatoa n riki bwa kaain te Ekaretia,” e taku. “I taku bwa I aki kororaoi.”
“E aera bwa ko na aki kororaoi?” I titiraki.
“I taatana te mwaane.”
I kakoaua bwa e taku bwa N na kubanako. Ma I aki. “Ao … ?” I titiraki.
E kaoti te ota ke te taobaraaki iaon ubuna ngke e nora nanou bwa I reitaki. “I aki taania aine. I taania mwaane. I kataia ni kabuai namakin aikai ke ni biti, ma …”
E katinakoa te ang. “E aera I riki n arou aei? A bon koaua namakin aikai.”
I toki moa teuana, imwiina I taku, “I tangira teutana riki te rongorongo imwaain ae N na anganiko te ibuobuoki. N na tuangko bwa, taanakin raom ni mwaine bon tiaki te bure, ma te mwakuri iaon namakin aikai e—na bon titebo naba ma namakin n taanakin kaitaraam. Ko urua tuan te Itiaki?”
E ioioa atuna. “I aki, I bon tuai.”
I rara nako moa ma n taku, “Ko rabwa ibukin kainnanoan te boraraoi ma aei. E bon anaa te ninikoria, ao I kamoamoako ibukin kawakinam bwa ko na itiaki.
“Ngkai ibukin ae e aera bwa ko namakina ae reke iroum, I aki kona ni kaeka te titiraki anne. E rawata bwaai aika a na irekereke iai, ao a kona ni kakaokoro ngkai a kakaokoro naba aomata. Tabeua bwaai, ni ikotaki ma reken am namakin akanne, ti aki kona n atai n te maiu aei. Ma ataakin ae e aera ko namakina ane e reke iroum e aki kakaawaki n ai aron ataakin ae ko tuai riaon te bure. Ngkana e nakoraoi maium ma taian tua, ngkanne ko bon kororaoi ni beku inanon te Ekaretia, ni kimwareirei n te iraorao ae bwanin ma kaain te ekaretia, n nako nakon te tembora, ao ni karekei kakabwaia ni kabane n Ana Mwakuri ni Kamaiu te Tia kamaiu.”
E tekateka ni kainetia riki. I reitinako, “Ko bon aki akoa arom ngke ko kuneko n ti te aekakina man taraakin arom ni kaitataan. Tiaki tii anne oin anuam, ngaia are tai katinanikua kaboraoan tararuaakina. Bon ngkoe te moan ao te nati te mwaane ae moan te kakaawaki iroun te Atua, ao E tangiriiko.
“Tera ae kakaawaki riki, I tangiriko. Tariu nako inanon te Mataniwi ni Kabuta a tangiriko. I kauringaki n ana taetae Beretitenti Boyd K. Packer are e karaoia ngke e taetae nakoia ake a taania raoia ni mwaine. ‘Ti bon aki totokoi ngkami,’ e taku. ‘… Ti aki kona n totokoi ngkami, bwa ngkami naati mwaane ao aine iroun te Atua. Ti na bon aki totokoi ngkami, ibukina bwa ti tangiri ngkami.’”1
Ti marooro ibukin 30 riki te miniti ke e nako riki. N ataakin ae tiaki ngai te tia ibuobuoki ibukin oin ana kangaanga, ma I tuanga kawaina nakoia ana taan kairiiri n te nakoanibonga n ana tabo. Imwiina ti maenako. I taku bwa I kona ni kina inanon matana reken te kaantaninga irouna ake a aki mena ikekei mai mwaina. E ngae ngke e kaaitara ngkai ma taian kakaewenako bwa e na mwakuri iaoia—ke n teimatoa iai—iai au namakin bwa e na kona ni kaitarai ma te nakoraoi.
E Tangiria Natina te Atua
Ngke e taekina te titiraki te anera nakon Nibwaai iaon te Atua, e kaeka Nibwaai, “I ataia bwa e tangiriia natina; I aki atai nanon bwaai ni kabane” (1 Nibwaai 11:17). Ngai naba I kamatoa bwa E tangiriia natina ni kabane te Atua ao I kakaitau nakon titiraki aika bati akanne, ni ikotaki ma ake a irekereke ma taanakin raoia ni mwaine, a riai n taninga te kaeka n taai aika a na roko, tao n te maiu are i mwiina.
Ma te kananokawaki, tabeman aomata a kakoaua bwa a karekei ni kabane taian kaeka ngkai ao a taetaekin aia koaua n taabo nako. Ma te kakukurei, bwa tabeman aomata a aki taetae ibukin Ana Ekaretia Iesu Kristo Ibukiia Aika Itiaki Ni Boong Aika Kaitira.
E ngae ngke I kakoauaa bwa kaain te ekaretia a ingainga n anga aia karaunano nakoia ake a kaokoro ma ngaiia, ma bon anuan te aomata bwa ngkana ti kauntabaaki ma te waaki ae ti aki ota iai, ao ti a baka naba n teiraroa mai iai. Aio kanga e bon koaua n taanakin raoia ni mwaine. Ti karekea ae uarereke iaon rongorongon ni ibuobuoki iaona ai ngaia are naake a tangiria ni ibuobuoki a tiku ma namakinan teutana te aki rau. I kaota aki taun au atatai n te itera aei ma ngkai I tangiria ni kan ibuobuoki, kariaia bwa N na anga au iango tabeua bwa e na buokiia naake iai aia utu nako ke raoraoia ake a taania raoia n mwaine.
Ana Babaire ni Kakukurei Tamara are I Karawa
Te Moan, ti riai n rangi ni mataata raoi bwa tera ae tangirira raoi te Atua ibukira n tatabemanira nako. E tangiria bwa ti na karekei kakabwaia ni kabane n te maiu ae akea tokina. E tangirira bwa ti na riki n ai Arona. Ni buokara bwa ti na karaoa anne, E a tia n anganiira te babaire. Te babaire aei e boboto iaon koaua aika akea tokia ao e aki bibitaki ni kaineti nakon waaki aika riki inanon taai aikai.
Teuana mai buakon mwakoro aika kakaawaki aikai bon karikaia ataei, teuana mai buakon te kabanea ni kakaawaki ibukin oin kitanan te Onaroka are Eten irouia Atam ma Ewa (tara 2 Nibwaai 2:19–25; Moses 5:10–12). A anganaki te tua bwa a na “kariki uaa, ao ni kabatiaia” (Moses 2:28), ao a rineia ni kawakina te tua anne. Ti katotongia ni iein ao ni karekei rabwata ibukiia natin Tamara are i Karawa n tamnei. Ni kamataatana raoi, te kareketangira n taanakin raom ni mwaine e bon kaitara te babaire aei. N akean te buumwaane ao te buuaine ao aia kariki, e na bon akea te utu ( n te tai aei ao n te maiu ae akea tokina) ao e na bon akea te tibwanga ni kona n riki n ai aron Tamara are i Karawa.
Ibukin aanga aika mwaiti, te mare ao ataei a aki kona n reke nakoira ni kabane n te tai ae waekoa. Tao e na akea te nano ni kan mare ma temanna. Tao imwiin te mare e na akea te kona ni karikiia ataei. Ke tao e na aki reke tain taanakin tiaki raom ni mwaane/aine. Tera nako bukina, te kabanea ni kaubwai ni kakabwaia mairoun te Atua e na bon reke n taainako nakoia Natina ni kabane ngkana a itiaki ao ni kakaonimaki.
Rinanon kamwakuran te onimaki, te kekeiaki iroun temanna ma temanna, ao te katantan iaon mwaakan te Mwakuri ni Kamaiu, tabeman a kona n tokanikai iaon taanakin raoia ni mwaane/aine n te maiu n rabwata ao a mare. Tabeman, e ngae n anne, a kona ni bon aki kainaomataki man taanakin raoia ni mwaine in te maiu aei.
Ngkai raomi aika kaain te Ekaretia, utu, ao raao, ti kainnanoia bwa ti na ataia bwa te koraki ake a taania raoia ni mwaine a kaitara ma te memere ae onoti ni kaineti ma kabwarabwaraan aia namakin. Ngkai taanakin raoia ni mwaine e bon riki, e na bon akea otaran rabwataia n aia namakin n te kaitataan aei. Tangiran kakukureian te rabwata e aki anga te kariaia ni karaoan te bure iroun temanna, n aki warekana taraakin arom ni kaitaatan. Ma namakin a kona ni korakora, ma a bon aki rangi ni matoatoa n aron ae ko katika nanon temanna bwa e na rinea kairan maiuna ae kororaoi.
N taekinan aei, kariaia bwa N na kamataata bwa te kaitaatan n tii ngaia, e kona ni aki karau n aron ae a kona, ma a aki karaoa temanna bwa e aki kororaoi. E a tia ni katerea te Moan Beretitentii, “Iai te kaokoro imarenan iango ao namakin aika bubuaka ao mwakurian taanakin te mwaane ao te aine ke katei nako n taanakin kaitaraam.”2 Ngkana ko aki mwakuri taian kariri ao ko karaoi am kabanea ni kona n totokoi, ko a tia n aki riaon te tua.
Te kabwaka n noran te kaokoro anne e kariri n tabetai nakon te bwarannano. I kairoroia te koraki ake a aki ataia bwa ni kabane kakabwaia ake e anga te Atua a bon tauraoi n reke iroun temanna are e ongeaba nakon tuua ni kaineti nakon aekan kakabwaia ake a boboto iaoia (tara D&C 130:20–21). Akea ae maiuakina te eungakerio ae riai ni bwarannano. Te kantaninga ao te rau e roko mai roun te Tia Karaunano, ao te kaeka nakon te bwarannano bon kaoakin te Tamnei ae Raoiroi nako nanon maiura.
Kawai ni Ibuobuoki
Kariaia bwa angkoa ngkoe ana utu ke raoraon temanna ae iai taanakin raona ni mwaine irouna ae roko nakoim ibukin buokana. Tera ae ko na taekinna? Tera ae ko kona ni karaoia?
N na moanna man kinaakin te ninikoria are e uotaarake natim te mwaane, natim te aine, kanoam, te rao nakoim. I kina te onimaki are e anganiko te aomata anne. Marooroakinan te bwai teuana ma temanna ae iai onimakinana bon te moan mwaneka ae nakoraoi n tabeakinan namakin aika kamangaongao, ao e bon bongana bwa a na kaitaraaki moan mwaneka aikai ma te nanoanga.
Imwiina, ngkana ngkoe te karo iroun temanna ae iai taanakin raona ni mwaine, tai karaoia bwa angkoa ngkoe ae karekea te aekaki n namakin aikai. Akea temanna, ni ikotaki ma are e karekei kangaanga, e riai ni kataia n taui bukinakina. Akea temanna ae riai ni bukina temanna—ni ikotaki ma te Atua. Nakonako inanon te onimaki, ao buoka am koraki are ko tangiria ni karaoi mwakuri ma ngaia n aron ana kabanea n tamaroa teuanane ke neienne n te kataaki anne.
Ni karaoakin anne, tara te mare bwa tiaki katokan te kangaanga are e na kaaitarai kangaanga ni kabane. Taanakin raom ni mwaine e bon reitinako kangaangana, ao kataakin kairoroan te karekenano n taanakin te mwaine e bon aki kona ni bitia. Ti na rangi ni kakatonga ngkana iai temanna ae kekeiaki n totokoi kangaanga aikai ao ni kona ni mare, ni kaikawaiia natina, ao ni karakea kakukurein te utu. Ma kakatai tabeua a tia ni mwiinaki ma naano ao mweenga aika uruaki.
Iaon bwaai ni kabane, tatauraoi n tataetae nakon te aomata aei. Te reitaki imarenaia kaaro ao naati bon kamataatan kaotan te tangira, ao te tangira ae itiaki, ae karauaki raoi ni katabangakaki, ae kona ni biti aron irekereken ara utu. Ma te tangira ibukin temanna kaain te utu e aki karababa kateimatoan kangaanga ibukin katei aika aki raoiroi. Natimi a rangi ni butimwaeaki bwa a na tiku inanon mweengami, eng, ma iai inaomatam ni katuka mai inanon mronronin am utu te katei ae kaitara Tamnein te Uea.
Ana Tua te Onaroka
Imwiina, iangoa te tua ae reiakinaki inanon te ununiki. A taku tabemwaang bwa ngkana ti ununiki n te onaroka ma kora aika raoiroi, e na aki rangi ni bwain kamarauan te tano. Ti tebo ma, ngkana ti kanoai maiura n ana kanuai te tamnei, ti kona ni kai karekea te taubangiaki iaon baika a tangiri nanora. E nanonaki n aei ae karaoakin maekara inanon mweengara bwa e na tamaroa n te aro bwa e na korakora iai ana kairiiri te Tamnei. Te maeka ae tamaroa e karika te taromauri ae teimatoa karaoana n ae onoti ao n ae tabangaki, te tataro, aki mamatam, warekan koroboki aika tabu, ao kaungaan te marooro ae kakukurei, te katangitang, reiakinan te wareware ao te koroboki, ao rongorongo riki tabeua.
Te aekaki ni maeka ae ai aron aei e kauka te kawai nakon namakin n te taromauri. Tabeman ake iai taanakin raoia ni mwaine a tia n aki katokaki maakuia ao n namakina te totokoaki n te taromauri ngkana bon akea te iango n totoko. N te itera are teuana, tabeman kaain te ekaretia a katinanikuia ake a okoro ma ngaiia man aia kamronron raoraoia. Ngkana ara mwakuri ke ara taetae a kataorikaaka temanna man karekean bwaninin kakukurein kaainakin te Ekaretia, ti kabwakaia—ma te Uea. E na kamatoatoaaki te Ekaretia ngkana ti kairiia kaain nako te Ekaretia ao ni kamatoatoaira iroura n tatabemaniira inanon te mwakuri ni ibuobuoki ao te tangira (tara D&C 84:110).
Ko na kona n namakina te kairaki bwa ko na kaunga nanon temanna are ko kataia ni buokiia ni kawaria ma te tia kairiiri n te nakoanibonga are iai kingin te reirei mai karawa irouna. Taiaoka ni karaoia, n ataia bwa e a tia te Moan Beretitentii ni bubutiia taan kairiiri n te Ekaretia bwa a na marooroakin kangaanga aikai ma te nano korakora ao ma tamnein katotongan ana tangira Kristo.3
Ni Bain te Uea
N aki maan n nako ao I karekea te reta mairoun te mwaane ni moan ana katenibwi ae e iwai ma reken taanakin raona ni mwaine. E aki rangi ni bebete ana iwai, ao e tuai naba ni iein. Ma, e koroboki, “e a tia te Uea ni buokai ni kaitarai mwiin kangaanga ake a riki ngkai, ao I kukruei ni karaoa au kabanea n tamaroa ao ni katuka maiu inanon Baina.”
I tang ma te kukurei ao te karinerine n ana onimaki ao ninikorian te mwaane ae e maeka ma te kataaki ae I tuai ma ni kaitara ma ngaia. I tangiria ma aomata aika tengaa mwaitia, te mwaane ke te aine, ae “buaka n te buaka ae raoiroi” (1 Timoteo 6:12). I taekina anuana nakoia te koraki ni kabane ake a kekeiaki n totoko ma—ke naake a buokiia tabeman ake a kekeiaki n totokoa—taanakin raoia ni mwaine.
Reitan te ibuobuoki
E a tia te Moan Beretitentii ao aia Kooram Abotoro ake Tengaun ma Uoman ni katauraoa te Boki ae Uarereke ibukiia te koraki ake iai taanakin raoia ni mwaine. E atuanaki n E Tangiriia Natina te Atua (aitam nambwa 04824). Ngkana iai ae tauraoi ae e a tia n rairaki nakon am taetae, ko kona ni karekea te katoto n am tienta n tibwatibwa n am tabo ke n anaia man te www.lds.org/same -gender-attraction.