Na Latou Faailogaina le Ala e Mulimuli Ai

O le aoao e uiga i isi o e na faatuatua i le Atua ma mulimuli i Ana aoaoga e musumusu mai pea i o tatou agaga, “Ina soia, ma ia outou iloa o a’u lava o le Atua.”⁵ A o latou fuafua e tausia Ana poloaiga ma faatuatua ia te Ia, sa faamanuiaina i latou. Pe a tatou mulimuli i a latou faataitaiga, o le a faamanuiaina foi i tatou i o tatou aso. E avea i latou uma ma se faataitaiga e mulimuli i ai.

Tatou te fiafia uma lava i le tala manaia ia Aperaamo ma Isaako o loo maua i le Tusi Paia. Ai lava se faigata naua ia Aperaamo, le usiusitai i le poloaiga a le Atua, ina ia ave lona atalii pele o Isaako i le nuu o Moria, e tuuina atu ai o ia iina e fai ma taulaga mu. Pe mafai ea la ona sei e manatu i le mafatia o lona agaga a o ia faaputuputu maia fafie mo le afi ma malaga atu i le nofoaga ua filifilia? O le mea moni, ai sa lutia lona tino i le tiga ma mafatia lona mafaufau a o ia “fusifusi Isaako … ma faaee ia te ia i le fata i luga o fafie.

“Ona aapa atu lea o Aperaamo lona lima i le polo, o le a fasioti lona atalii.” E maeu le matagofie o le malelega ma le matuai talisapaia o lona oo mai: “Soia le oo lou lima i le tama, aua foi e te faia se mea e tasi ia te ia: aua ua ou iloa nei ua e mata’u i le Atua, ina ua e le taofia lou atalii, o lou atalii e toatasi.”⁶

E agavaa Aperaamo e avea ma se faataitaiga o le usiusitai e le fesiligia.

Afai ua lagona e soo se tasi o i tatou ua sili atu o tatou luitau nai lo lo tatou malosi e faafetaiaia ai, ia tatou faitau e uiga ia Iopu. O le faia o lea mea, o le a tupu mai ai le lagona, “Afai e mafai e Iopu ona onosaia ma faatoilalo, o le a faapena foi au.”

O Iopu o se tagata “sa’o ma le amiotonu” o le na “mata’u i le Atua, ma ‘alo’alo ese i mea leaga.”⁷ E faaaloalo i lana amio, e tele lona tamaoaiga, sa feagai Iopu ma se tofotofoga e mafai ona faaumatia ai soo se tasi. Sa aveesea ana meatotino, sa teena o ia e ana uo, na puapuagatia o ia i le faaletino, na mafatia o ia ina ua leai lona aiga, na uunaiina o ia e “faifai i le Atua, ma oti ai.”⁸ Na ia teenaina lenei faaosoosoga ma faailoa mai le taele o lona loto mama, “Faauta, o i le lagi le molimau ia te au, o i luga foi le ua i ai le mau ia te au.”⁹ “Aua ua ou iloa o loo soifua le na te togiolaina a’u.”¹⁰

Na avea Iopu ma se faataitaiga o le onosai e le faatapulaaina. O le taimi nei, tatou te faatatauina ai i latou o e faapalepale ua latou maua le onosai o Iopu. Na ia saunia se faataitaiga mo i tatou e mulimuli ai.

“O se tagata amiotonu ma le sa’o i lana tupulaga,” o le na “feoai ma le Atua,”¹¹ o le perofeta o Noa. Na faauuina i le perisitua a o laitiiti, “na avea ma failauga o le amiotonu ma folafola atu le talalelei a Iesu Keriso, … na aoaoina atu le faatuatua, salamo, papatisoga, ma le mauaina o le Agaga Paia.”¹² Na ia lapatai mai o le toilalo e faalogo ma usitai i lana savali o le a aumaia ai le lolo i luga o i latou o e na lagona lona leo, ae latou te le’i faalogo i ana upu.

Na faalogo ma usitai Noa i le poloaiga a le Atua e fau se vaa, ina ia mafai ona faasaoina ai o ia ma lona aiga mai le faatafunaga. Na ia mulimuli i faatonuga a le Atua ina ia faapotopotoina i totonu o le vaa ia meaola ta’ilua uma pe sili atu, ina ia mafai foi ona faasaoina i latou mai le lolo.

Na aoao mai Peresitene Spencer W. Kimball (1895–1985) i le konafesi aoao ua silia ma le seneturi ma le afa ua mavae: “I lena taimi sa leai ni faailoga o ni timuga ma se lolo… . O lapataiga a [Noa] na manatu nisi e faavalevalea… . O se mea valea le fausia o se vaa i luga o le laueleele matutu atoa ma le la o loo susulu ma o loo gasolo pea le olaga e pei ona masani ai! Ae peitai na mavae atu aso ma taimi… . Na oo mai lologa. O e na le usiusitai … na malelemo. O le vavega e faatatau i le vaa na mulimuli mai i le faatuatua na faaalia i le fausiga o le vaa.”¹³

Sa ia Noa le faatuatua e le maluelue e mulimuli i poloaiga a le Atua. Ia tatou faia ia faapea. Ia tatou manatua o le atamai o le Atua e foliga mai i nisi taimi o se mea faavalevalea i tagata; ae o le lesona sili lava e mafai ona tatou aoaoina i le olaga nei, afai e fetalai mai le Atua ma tatou usiusitai, o le a sa’o pea i tatou.

O Ruta o se faataitaiga o se tamaitai atoatoa. I le lagonaina o le loto faavauvau o le tina o lona toalua o Naomi— o le sa mafatia i le maliliu o lana fanau tama uma e toalua—o lagona tiga o le tuua toatasi lea na matuai ootia ai le loto o Naomi, na memumemu atu ai e Ruta se faaupuga iloga o le faamaoni: “Aua e te finau ia te au ina ia ou tuulafoai ia te oe, ia le mulimuli atu ia te oe: aua o le mea e te alu i ai, ou te alu ai foi; o le mea e te nofo ai, ou te nofo ai foi: e fai lou nuu mo’u nuu, e fai lou Atua mo’u Atua.”¹⁴ O aga a Ruta na faaalia ai le moni o ana upu.

O le tumau pea o le faamaoni o Ruta ia Naomi, na faaipoipo atu ai o ia ia Poasa lea na avea ai o ia—o le tagataese ma se tagata Moapi ua liliu mai—ma tinamatua o Tavita, ma o se tasi, e tupuga mai ai lo tatou Faaola o Iesu Keriso.

O le a ou liliu atu nei i se perofeta maoae o le Tusi a Mamona—o Nifae, le atalii o Liae ma Sarai. Sa faamaoni ma usiusitai o ia i le Atua, sa lototele ma toa. Ina ua tuuina atu i ai le tofiga faigata o le aumaia lea o papatusi apamemea mai ia Lapana, sa le’i muimui o ia, ae na ia faailoa atu, “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga na te saunia le ala mo i latou ia mafai ai i latou ona fai le mea ua ia poloaiina ai i latou.”¹⁵ Atonu o lenei aga o le lototele na musuia ai se tasi e tusia se fuaiupu o le fautuaga mo i tatou o loo maua i le viiga “O Le Ai Uamea”:

O Nifae o se faataitaiga o le naunautai e tumau.

E le atoatoa ona faamatalaina ni faataitaiga mo i tatou e mulimuli i ai e aunoa ma le aofia ai o Iosefa Samita, le uluai perofeta o lenei tisipenisione. Ina ua faatoa 14 ona tausaga, sa alu atu ai lenei alii talavou lototele i se togavao, lea na taua mulimuli ane ua paia, ma maua ai se tali i lana tatalo faamaoni.

Ona faaauau mai ai lava lea o sauaga o Iosefa ina ua ia faamatalaina atu i isi le tala i le faaaliga vaaia mamalu na ia mauaina i totonu o lena togavao. E ui lava sa ulagia ma inosia o ia, ae sa ia tumau. Sa ia faapea mai, “Sa ou vaai i se faaaliga; sa ou mautinoa lava lena mea, ma sa ou mautinoa foi ua silafia e le Atua le moni o lena mea, ma e le mafai lava ona ou faafitia ua ou fefe e faia lena mea.”¹⁷

Sa auauai pea, le feagai ai ma faigata e toetoe a le motusia ae peitai sa taitaia pea o ia e le aao o le Alii, sa faavaeina e Iosefa le Ekalesia a Iesu Keriso o le Au Paia o Aso e Gata Ai. Na ia faamaonia le lototele i mea uma na ia faia.

I le taufaaiuiuga o lona soifua, a o taitaieseina atu o ia faatasi ma lona uso o Ailama i le Falepuipui o Karefasi, sa ia tu atu ma le lototele e tali i le mea ua iloa e aunoa ma se masalosalo o le a tupu ia te ia, ma sa ia faamaufaailogaina lana molimau i lona toto.

A o tatou feagai ai ma tofotofoga o le olaga, ia tatou faataitai pea i le lototele mausali na faaalia e le Perofeta o Iosefa Samita.

O lea ua tu mai o tatou luma i aso nei se isi perofeta a le Atua—o la tatou pele o Peresitene Gordon B. Hinckley. O loo pulefaamalumalu o ia i se aofia sili ona tele o le Ekalesia—e le gata i fuainumera ae o atunuu—i lo tatou talafaasolopito. Ua asiasi atu o ia i atunuu e le’i asiasia muamua e le Ekalesia ma ua asiasi atu foi i taitai o malo ma tagata o le Ekalesia i le lalolagi atoa. O lona alofa mo tagata ua sopo atu i papupuni o gagana ma aganuu.

Faatasi ai ma le faaaliga faaperofeta, na ia amataina ai le Tupe Faaagaga mo Aoga, lea ua fesoasoani ai i tagata ina ia o ese mai le mativa i le tele o vaega o le lalolagi ma saunia ai tomai ma aoaoga lea e faaagavaaina ai alii ma tamaitai talavou mo le mauaina o ni galuega e totogi lelei. O lenei fuafuaga musuia ua tuuina atu ai se faamoemoega ia i latou o e na lagonaina le leai o se faamoemoega mo i latou e faaleleia ai o latou tulaga ae o lea ua maua nei se avanoa mo se lumanai manuia.

Sa galue ma le le faavaivai ia Peresitene Hinckley ina ia aumaia faamanuiaga paia i tagata o le Ekalesia i le lalolagi atoa e ala lea i le sauniaina o malumalu lea e mafai ona oo uma atu i ai i latou. O loo ia te ia le malosi e siitia ai i luga i se tulaga maualuga ia tagata uma mai soo se ituaiga, e tusa lava po o le a le talitonuga faalelotu latou te auai. O ia o se faataitaiga o le faamoemoe e le toilalo, ma tatou te faaaloalogia o ia o se perofeta, tagatavaai ma se tali faaaliga.

O uiga tulaga ese o loo umia uma e nei alii ma tamaitai sa ou taua e mafai ona avea ma se fesoasoaniga taua ia i tatou a o tatou feagai ai ma faafitauli ma faigata o loo i o tatou luma atu. Ou te fia faatinoina atu i le faamatalaina lea o le mea na oo i ai le aiga o le au Pollard o Oakland, Kalefonia.

I ni nai tausaga ua mavae, a o malaga atu ia Elder Taavili Joseph Samuel Pollard i le ofisa o le misiona i le aso mulimuli o lana misiona i Zimbabwe, sa faafuaseia lava ona taavilivili le taavale a le misiona sa ia aveina ma taia i se laau. Sa mafai e se tagata na ui ane ona faasaoina le soa a Elder Pollard, ae o Elder Pollard, o le sa matapogia, sa mau ai i totonu o le taavale, lea sa talali ma mu. Sa fano ai ia Elder Pollard. Na maliu lona tina i le valu tausaga ua tuanai; ma, sa na o lona tama sa tausia toatasi le aiga. O loo i ai se uso o loo auauna atu i le Misiona a West Indies.

Ina ua taunuu atu le tala o le maliu o Elder Pollard i lona tama, sa faapea loa ona telefoni atu lenei tama lotomaualalo—o le ua maliu lona toalua—i lona atalii o loo auauna atu i West Indies e faailoa atu ia te ia le maliu o lona uso. I luga o lenei laina telefoni, sa usu faatasi ai e le Uso o Pollard ma lona atalii, e ui i le loto faavauvau, ia le pese “O Au o se Atalii o le Atua.”¹⁸ A o le’i faaiuina le talanoaga, sa faia e le tama se tatalo i le Tama Faalelagi, e faafetai atu ia te Ia mo Ana faamanuiaga ma sailia Lana faamafanafanaga paia.

Na taua mulimuli ane e Uso Pollard e faapea, na ia iloa o le a sologa lelei lava lona aiga, aua e malolosi a latou molimau i le talalelei ma le ata o le faaolataga.

O’u uso e ma tuafafine, i lenei tisipenisione ofoofogia o le atoatoaga o taimi, a o tatou faimalaga ai i le olaga ma feagai ai ma faigata ma luitau o le lumanai, ia tatou manatua ia faatulagaga a nei faataitaiga ina ia mulimuli i ai. Ia tatou maua le lotomaualalo mama o Ioane le Papatiso, le usiusitai e le fesiligia o Aperaamo, le onosai e le faatapulaaina o Iopu, o le faatuatua le maluelue o Noa, o le faamaoni e tumau o Ruta, o le naunautai e le masuia o Nifae, o le lototele mausali o le Perofeta o Iosefa Samita, ma le faamoemoe e le toilalo o Peresitene Hinckley. O le mauaina o ia uiga o le a avea ma se olo o le malosi ia i tatou i o tatou olaga atoa.

Ia taitaiina pea i tatou e le Faataitaiga silisili, a le tama a Maria, le Faaola o Iesu Keriso—o lona soifua lea ua saunia ai se faataitaiga atoatoa mo i tatou e mulimuli i ai.

Na soifua mai i se fale o manu, na tofa i se faatanoa vao, na Ia afio mai le lagi ina ia soifua i le lalolagi e pei o tagata ola ina ia faavaeina le malo o le Atua. I le taimi o Lana galuega i le lalolagi, na Ia aoaoina ai tagata i le tulafono maualuga. O Lana talalelei mamalu na toe suia ai le mafaufau o le lalolagi. Na Ia faamanuiaina e mamai; na Ia faasavavali i pipili, faapupula i tauaso, ua faalogo e na tutuli. Na Ia toefaatuina mai foi le oti ina ia ola.

O a ni uiga sa faaalia i Lana savali o le alofa mutimutivale, i ana afioga poto, i Ana lesona e uiga i le olaga? E toaitiiti i latou sa talisapaia o Ia. Sa latou mulumulu Ona aao. Sa latou aoao i Lana afioga. Sa latou mulimuli i Lana faataitaiga.

E i ai foi i latou na faafitia o Ia. Ina ua fesiligia e Pilato, “Se a foi le mea ou te faia ia Iesu o le ua igoa ia Keriso?”¹⁹ sa latou alalaga, “Faasatauro ia te Ia.”²⁰ Sa latou faatauemu ia te Ia. Sa latou avatu le vineta ia te Ia e inu ai. Sa latou upuleaga ia te Ia. Sa latou ta ia te Ia i le u. Sa latou tuufeanu ia te Ia. Sa latou faasatauroina o Ia.

Mai lava i le gasologa o augatupulaga, e tutusa lava le savali na tuuina mai e Iesu. Ia Peteru ma Aneterea i auvai o le Vai matagofie o Kalilaia na Ia fetalai atu ai, “Mulimuli mai ia te au.”²¹ Ia Filipo o anamua na oo mai i ai le valaau, “Mulimuli mai ia te au.”²² I le sa Levi o le sa aoina lafoga na oo mai i ai le faatonuga, “Mulimuli mai ia te au.”²³ Ma, ia te oe ma au, afai ta te faalogo lelei, o le a oo mai i ai lea lava valaaulia e tasi, “Mulimuli mai ia te au.” Tau ina ia tatou faapea uma ona faia ma selesele i taui e faavavau ua faapolopoloina mo i latou o e mulimuli i le ala na Ia faailogaina e ala i Lona soifuaga o faataitaiga.

A uma ona e suesue ma le agaga tatalo i lenei savali, ona fetufaai atu lea e faaaoga ai se metotia e uunaia ai le auai o tagata o loo e aoaoina. O ni nai faataitaiga nei:

1. Tuu atu i tagata o le aiga e taumafai e tusi se mea e le masani ai (mo se faataitaiga, o se faafanua o se atunuu mamao po o se fugalaau tulagaese). Ona aumai lea o se ata o lea mea, ona latou toe tusiaina lea. E faapefea ona fesoasoani ia faataitaiga ia i tatou? Ia faamatala atu saunoaga a Peresitene Monson i le faaaogaina o perofeta o ni faataitaiga mo le olaga. Ia faasoa atu se aafiaga patino e faailoa ai le auala na fesoasoani ai se faataitaiga a se perofeta ia te oe.

2. Fesili atu, “O ai o loo mulimuli i ai tagata o le lalolagi i aso nei? O a ni uiga o i ai i nei alii ma tamaitai?” Ia faatusatusa ia faataitaiga amiotonu o loo taua i le tusiga i faataitaiga a le lalolagi. Ia luiina le aiga e filifili ma mulimuli i se auala faaleagaga na faataitaiina e nei alii ma tamaitai amiotonu.

3. Afai e i ai ni tamaiti laiti i le aiga, tuu atu ia i latou e faataitai i au taga. Patipati ou lima, luelue lou ulu, ma isi lava. Ia talanoaina le uiga o le mulimuli i faataitaiga a se tasi. Fai atu i tagata o le aiga e mafaufau i ni faataitaiga amiotonu, ma ia faaaoga le tusiga e faafetaui i ai a latou tali. Ia faaiu i le molimau a Peresitene Monson e uiga ia Iesu Keriso o le faataitaiga silisili e mulimuli i ai.