Ngaahi Fakakaukau Makehe ki he Taimi Fe‘inasiʻaki ‘o Sānuali 2008

Ko ha ngaahi fakakaukau ʻeni ʻe lava ke fakaʻaongaʻi ʻe he kau taki ʻo e Palaimelí fakataha mo e Taimi Feʻinasiʻaki ʻoku paaki atu ʻi he Liahona ʻo Sānuali, 2008. Ko e lēsoni, ngaahi fakahinohino mo e ʻekitivitī fekauʻaki mo e ngaahi fakakaukau ko ʻení, vakai ki he “Ko ʻEku Moʻuí ko ha Meʻaʻofa: Ko ʻEku Moʻuí ʻOku ʻi ai Hano Palani” ʻi he peesi K4 mo e K5 ʻo e konga ʻa e fānaú ʻi he makasini ko ʻení.

Fehuʻi ki he fānaú hono ʻuhinga ʻo e loto-toʻá. Fokotuʻu ange ha ngaahi foʻi lea ngāue ʻoku nau fakafofongaʻi ʻa e loto-toʻá hangē ko e muimui, ngāue, tauhi, talangofua, falala mo e hā fua. Lau fakataha ʻa e 2 Nīfai 10:23. Akoʻi ange kau ki he meʻaʻofa ʻo e tauʻatāina ke filí. Aleaʻi hono ʻuhinga ʻo e loto-toʻa ʻi heʻetau fakamoʻoni kia Sīsū Kalaisí.

ʻAi ha tatau ʻo e foʻi vaʻinga ko e “Teuteu ki he Hāʻele Mai ʻa Sīsuú” ʻi he tafaʻaki ki mui ʻo e tohi lēsoni Palaimeli 2. Teuteuʻi ha fanga kiʻi laʻi pepa ʻe 12. Tohiʻi ha fika ʻi he laʻi pepa taki taha, ʻo ngāueʻaki tuʻo ua ʻa e 1 ki he 6. Peluki e ʻū laʻi pepá pea faʻo ʻi ha faʻahinga meʻa. Fai e foʻi vaʻingá ʻaki hano fekau e fānaú ke nau ʻalu atu ʻo toho ha fika pea hiki e fakaʻilongá ʻo fakatatau ki he lahi ʻo e foʻi tapafā ʻoku totonu ke hiki aí. Lau e tohi he foʻi tapafaá. Kapau ʻokú ne fakamatalaʻi ha fili totonu, fehuʻi ange hono ʻuhinga naʻe hoko ai ʻeni ko ha fili ʻi he loto-toʻá. Kapau ʻokú ne fakamatalaʻi ha fili ʻoku hala, fehuʻi ange e founga ʻe lava ke fili ai e fānaú ke nau loto-toʻá. Fai e foʻi vaʻingá ʻo fakatatau ki he lahi ʻo e taimí. Fakaʻosiʻaki hoʻo fakamoʻoni ki hono mahuʻinga ʻo e loto-toʻá ʻi heʻetau fakamoʻoni kia Sīsū Kalaisí.
Teuteuʻi e ngaahi fakatātā 1–1 ki he 1–25 mei he sila fakatātā ʻa e Palaimeli 1. Fakaafeʻi e fānaú ke nau tokoni atu ʻi hono fai ʻo e talanoa ki hono Fakatupu ʻo e Māmaní ʻo ngāueʻaki ʻa e ngaahi fakatātā ne kosí. Fakahā hoʻo houngaʻia ʻi he foʻi māmani fakaʻofoʻofa kuo fakatupu ʻe Sīsū Kalaisi maʻatautolú.

Fakaʻaliʻali e Fakatātā fika 101 ʻo e Ngaahi Fakatātā ʻo e Ongoongoleleí (ʻĀtama mo ʻIvi). Tokoni ki he fānaú ke nau kumi hake ʻa e Mōsese 5:4, pea lau ʻa e kupuʻi lea “Pea naʻe ui atu ʻe ʻĀtama mo ʻIvi ko hono uaifí, ki he huafa ʻo e ʻEikí.” Mou aleaʻi e ʻuhinga ʻo e kupuʻi leá ni. Fakaʻaliʻali ʻa e fakatātā 1–34 (Ko hono akoʻi ʻe ʻĀtama mo ʻIvi ʻena fānaú) mei he sila fakatātā ʻa e Palaimeli 1 pea lau ʻa e Mōsese 5:12. Fehuʻi ange, “Ko e hā e meʻa naʻe fai ʻe ʻĀtama mo ʻIvi ke tokoni ki heʻena fānaú?”

Fehuʻi ange ki he fānaú ʻa e founga ʻoku akoʻiʻaki ʻe heʻenau mātuʻá e ongoongoleleí kiate kinautolú. Ka fie maʻu pea ke ʻoange ha ngaahi sīpinga, hangē ko e hoko ko ha faʻifaʻitakiʻanga leleí mo e fai ʻo e efiafi fakafāmili ʻi ʻapí. Hivaʻi ha foʻi hiva pe himi kau ki he fāmilí. Fai hoʻo fakamoʻoní naʻe fakatupu ʻe Sīsū Kalaisi ʻa e māmaní pea ko ʻĀtama mo ʻIvi ʻa e ʻuluaki ongo mātuʻa ʻi he māmaní.

Maʻá e fānau lalahi angé: Teuteuʻi ha laʻi pepa kuo hiki ai ha lisi ʻo e ngaahi foʻi lea kehekehe ʻoku nau fakamatalaʻi e ngaahi meʻa naʻe hoko ʻi he Fakatupu ʻo e māmaní (maama, ʻaho, poʻuli, ʻatā, kelekele mōmoa, musie, ʻakau, maama lahi angé, maama siʻi angé mo e hā fua). Kole ki he fānaú ke nau huke ki he Sēnesi 1, kumi ʻa e ʻaho ne hoko ai e meʻa taki taha pea hiki mo e fakamoʻoni fakafolofolá. (Ko e fakatātā ʻeni: Māmá—ʻuluaki ʻahó, Sēnesi 1:3–5.)
Hivá: “Fānau Au ʻa e ʻOtuá” (Tohi Hiva ʻa e Fānaú, 2–3). Tokanga taha ki hono tokoniʻi e fānaú ke nau ʻiloʻi pea mahino kiate kinautolu hono mahuʻinga ʻo e ngaahi tokāteline ʻoku akoʻi ʻi he foʻi hiva ko ʻení. Fakaafeʻi e fānaú ke nau fanongo kae tā ʻe he tokotaha tā pianó ʻa e fasi ʻo e taú pea ke nau tuʻu ki ʻolunga ʻi he lava ke nau tala ʻa e foʻi hivá. Ko ʻene tokolahi pē fānau kuo tuʻu ki ʻolungá pea kole ange ke nau fanafana atu e hingoa ʻo e foʻi hivá. Hivaʻi e taú ki he fānaú. Kole ki he fānaú ke nau hivaʻi fakataha mo koe ʻa e taú pea nau fakafanongo ki he ngaahi lea ngāue ʻoku nau fakamatalaʻi e meʻa ʻoku nau loto ke fai ange ʻe ha taha maʻanautolú. Hivaʻi e taú pea hiki e ngaahi talí ʻi he palakipoé (taki, tataki, ta ō mo au, tokoni, akoʻi). Fehuʻi ange: “Ko hai ʻokú ne tataki kitautolú? Ko e fē taimi ʻe mahuʻinga ai ke ʻi ai ha taha ke ne tataki kitautolu? Ko e hā ka fie maʻu ai ha taha ke ō mo koe? Ko e hā ka ke fie maʻu ai ha taha ke tokoni atu ke ke ʻilo ʻa e halá? Ko e hā ha ngaahi meʻa kuo pau ke tau fai ke tau nofo ai mo e Tamai Hēvaní ʻi ha ʻaho?” Toe hivaʻi e taú peá ke fakamoʻoni ki he ngaahi tāpuaki ʻo ʻetau maʻu ha mātuʻá, kau faiakó, kau takí, kau palōfitá mo e folofolá ke tokoni mai ke tau ʻilo ʻa e hala ke foki ai ki he Tamai Hēvaní.

ʻI hoʻo akoʻi mo toe fakamanatu e ngaahi veesi ʻo e foʻi hivá, fakaʻaongaʻi e ngaahi foʻi lea pe kupuʻi lea mahuʻinga ʻe tokoni ke manatuʻi ai ʻe he fānaú e ngaahi tokāteline ko ia ʻoku akoʻi mai ʻi he veesi takitaha. Hangē ko ʻení: veesi 1—ngaahi meʻaʻofá (ʻapi mo e mātuʻa ʻi he māmaní); veesi 2—folofolá (ʻEne ngaahi folofolá); veesi 3—ngaahi tāpuakí; veesi 4—ʻOku pau ʻEne ngaahi palōmesí.