Te Ora nei Oia !
Te iteraa papû o te mau Peropheta no te mau mahana hopea nei
« E i teie nei, i muri mai i te mau parau faaite e rave rahi o tei horo‘ahia no’na ra, o teie hoi te parau faaiteraa hopea roa ra, o ta maua e faaite atu nei no’na ra : Oia hoi te ora nei oia ! » (PH&PF 76:22).
«Te ora nei Oia » O te faaiteraa ïa a te peropheta Iosepha Semita no ni‘a i te Faaora ia Iesu Mesia. Ma taua huru haapapûraa ra, ua faaite te taatoaraa o te mau peresideni i muri mai no te Ekalesia a Iesu Mesia i te Feia Mo‘a i te mau Mahana Hopea nei – tei paturuhia ei mau peropheta, ei mau hi‘o e e mau heheu parau – no te vairaa mau, te huru Atuaraa, te Taraehara e te Ti‘a-faahou-raa o te Faaora.
Peresideni Gordon B. Hinckley
« Ua ite au e ere o vau te upoo no teie nei Ekalesia. O te Fatu râ o Iesu Mesia to’na ra upoo. Ta‘u misioni, ta‘u hopoi‘a tumu, to‘u hanahana rahi o te faaite hanahanaraa ïa e te ora mau nei Oia. O Iesu Mesia te Tamaiti a te Atua, tei farii i te pou mai i roto i teie nei ao ati, aroraa e te mauiui, no te haaputapû e ia maitai te aau o te taata, no te haapii i te e‘a o te ora mure ore, e no te horo‘a Ia’na iho ei tusia no te mau hara a te taata nei. O Oia ‘ te Arii o te mau Arii e te Fatu o te mau Fatu, e e faatere arii Oia e a muri noa’tu’ (Handel’s Messiah)… Te faaite hanahana nei au e te ora nei Oia e te ti‘a nei Oia i te rima atau o To’na ra Metua ».1
Peresideni Howard W. Hunter (1907-95)
« Te mauruuru nei au… no to‘u amuiraa’tu i te hoê nunaa taata e e iteraa papû to ratou e e te ora nei te Atua, e o Iesu te Mesia; e te faaite nei au ia outou e te aamu no te aiû tei fanauhia i roto i te vairaa maa animara i Betelehema e ere ïa i te hoê aamu no mutaa ihora, tera râ o taua Iesu ra, te Tamaiti a te Atua tei fanauhia e Maria i roto i te oraraa tahuti nei; e ua ora Oia i rotopu i te mau taata; e ua pohe i ni‘a i te satauro e ua ti‘afaahou mai; e te ora mau nei Oia i teie nei mahana; e e taata mau Oia e o Oia te Faaora no te ao nei ».2
Peresideni Ezra Taft Benson (1899-1994)
« Ua anihia i te tahi mau taime te uiraa, ‘e mau keresetiano anei te mau momoni ?’ Te faaite nei matou i te huru atuaraa o Iesu Mesia. Te faariro nei matou Ia’na o Oia ana‘e te tumu no to tatou ora. Te tutava nei matou i te ora i Ta’na mau haapiiraa, e te tia‘i nei matou i te taime e ho‘i faahou mai ai Oia i ni‘a i te fenua nei no te faatere arii ei Arii no te mau Arii e te Fatu no te mau Fatu. Na roto i te mau parau a te hoê peropheta no te Buka a Moromona, te parau nei matou i te mau taata i teie nei mahana, ‘Aita’tu e i‘oa, aita hoi e e‘a, aita hoi e rave‘a e faaitehia mai, e tae mai ai te ora i te tamarii a te taata nei, i roto ana‘e râ, e na roto ana‘e hoi i te i‘oa o te Mesia, te Fatu Puai Hope’ » (Mosia 3:17).3
Peresideni Spencer W. Kimball (1895-1985)
« Te tuu nei matou ia [Iesu Mesia] i ni‘a i te hoê taahiraa teitei hau atu i te tahi atu pŭpŭ taata ta‘u i ite. No matou nei, e ere ana‘e Oia te Tamaiti a te Atua, e Atua atoa râ oia e tei raro a‘e matou ia’na…
« Noa’tu eaha te rahiraa o ta tatou e parau no ni‘a Ia’na, e mea iti noa â ïa.
« E ere noa Oia te Tamuta, te taata no Nazareta, te taata no Galilea, o Iesu Mesia râ, te Atua no teie nei fenua, te Tamaiti a te Atua, e hau atu râ i te faufaa rahi, to tatou ïa Faaora, to tatou ïa Taraehara…
« Te apiti atu nei au i to‘u iho iteraa papû. Ua ite au e o Iesu Mesia, o te Tamaiti ïa a te Atua ora e ua faasataurohia Oia no te mau hara o to te ao nei.
« O Oia to‘u hoa, to‘u Faaora, to‘u Fatu, to‘u Atua ».4
Peresideni Harold B. Lee (1899-1973)
« I muri a‘e i te hoê arui roa no te imiraa e te mau mahana no te faaineineraa i te pae varua i muri mai, ua noaa ia‘u te hoê iteraa hau atu i te ite mataraa, e tae noa’tu ua nehenehe ia‘u ia faaite papû maitai ma te feââ ore, e ua ite au i roto i to‘u tino atoa e o Iesu te Mesia, te Tamaiti a te Atua ora, e ua ora Oia, ua pohe Oia, ua ti‘afaahou mai Oia, e i teie nei mahana te peresideni nei Oia i te ra‘i, ma te faatereraa i te mau ohipa no teie nei ekalesia, tei topahia i To’na ra i‘oa no te mea te poro nei te reira i Ta’na haapiiraa. Te faaite papû nei au i te reira ma te haehaa e te vaiiho nei au ia outou to‘u iteraa ».5
Peresideni Joseph Fielding Smith (1876-1972)
« Tei roto i te Mesia te Ora. E tae mai te reira na roto i te taraehara faito ore e te mure ore ta’na i faatupu na roto i te haamaniiraa i to’na ra toto. O Oia te Tamaiti a te Atua, e ua haere mai oia i te ao nei no te faaora i te taata mai te pohe pae tino e pae varua tei tae mai na roto i te mea ta tatou i pii o te hi‘araa.
« Na roto i to’na maitai e to’na aroha e ti‘afaahou mai ïa te taata atoa mai raro mai i te menema, ia haavâhia mai te au i te mau ohipa i ravehia ra i te tino nei…
« Ua ite au e te ora nei Oia, e te faatere arii nei Oia i te ra‘i i ni‘a e i raro i ni‘a i te fenua, e e vai noa mai â ta’na mau opuaraa. O Oia to tatou Fatu e to tatou Atua. Mai Ta’na iho i parau atu ia Iosepha Semita ra : ‘O te Fatu ra o te Atua ïa, e aita’tu e Faaora maori râ o Oia ana‘e’ » (PH&PF 76:1).6
Peresideni David O. McKay (1873-1970)
« ‘Nahea hoi matou e ite ai i te e‘a ?’ ani atura o Toma, a parahi ai oia e to’na mau hoa aposetolo e to ratou Fatu i te iri amuraa maa i muri a‘e i te tamaaraa i taua aru‘i mo‘e-ore-hia no te haavareraa; e te pahonoraa hanahana a te Mesia : ‘O vau te e‘a, te parau mau e te ora…’ (Ioane 14:5-6). E o Oia mau ihoa ! O Oia te tumu no to tatou maitai, te faaûruraa i to tatou nei oraraa, te tumu no to tatou ora mure ore. Mai te mea e hinaaro tatou i te ite i to tatou auraa e te Atua, e haere tatou ia Iesu Mesia ra. Mai te mea e hinaaro tatou i te ite i te parau mau o te oraraa tahuti ore o te aau, ua faahoho‘ahia mai ïa te reira i roto i te ti‘a-faahou-raa o te Faaora…
«… O Oia ana‘e ra te Taata Maitai roa‘e o tei haere na ni‘a i te fenua; te hoho‘a hope roa no te hanahanaha; te natura Atuaraa; tei maitai i roto i to’na here; to tatou Taraehara; to tatou Faaora; te Tamaiti viivii-ore a to tatou Metua Mure Ore; te Maramarama, te Ora, te E‘a ».7
Peresideni George Albert Smith (1870-1951)
« I pohe na te Faaora ia nehenehe ia tatou ia ora. Ua haavî Oia i te pohe e te menema e te horo‘a nei oia i te mau taata atoa o te haapa‘o i Ta’na ra mau haapiiraa, te ti‘aturiraa no te hoê ti‘a-faahou-raa hanahana ».8
« Ua ite au e rave rahi mau taata i te ao nei tei ore i ite e te ti‘aturi nei tatou i te misioni hanahana a to tatou Fatu, e ua arata‘ihia vau i te parau hau atu i te hoê noa taime e aita’tu e feia i te ao nei o tei taa maitai i te misioni hanahana a Iesu Mesia, tei ti‘aturi hohonu ia’na ei Tamaiti a te Atua, o tei papû i teie nei taime e te parahi ra Oia i ni‘a i te terono i te rima atau o to’na ra Metua, mai te feia mo‘a i te mau mahana hopea nei ».9
Peresideni Heber J. Grant (1856-1945)
« I te mau melo atoa o te Ekalesia i te ao atoa nei, e i te feia atoa e here nei i te parau no te hau i te mau vahi atoa, te parau atu nei matou e, eiaha e hi‘o noa i teie Taata no Galilea mai te hoê Orometua rahi, eiaha ho‘i mai te hoê Taata Arata‘i faahiahia, ei Arii râ no te Hau, te Tumu no te Ora, i ô nei e i teie nei, oia te Faaora mau o te Ao nei!
«… O Iesu te Faaora o te ao nei, te Faaora o te taata, tei haere mai i te fenua nei no te hoê misioni hanahana ia pohe no te faaoraraa i te taata nei. E Tamaiti mau o Iesu Mesia na te Atua, te Fanau Tahi i te tino nei. O Oia to tatou Faaora, e te haamori nei tatou ia’na ».10
Peresideni Joseph F. Smith (1838-1918)
« Ua paraparau te Varua Mo‘a o te Atua ia‘u nei – eiaha na roto i te tari‘a, eiaha na roto i te mata, na roto râ i to‘u varua, to‘u nei tuhaa ora e te mure ore – e ua heheu mai ia‘u nei e o Iesu te Mesia, te Tamaiti a te Atua ora. Te faaite nei au ia outou e ua ite au e te ora nei to‘u Faaora. Hau atu i te reira, ua ite au e e ite mata atu ïa vau Ia’na i ni‘a i teie fenua, e e ite ïa vau Ia’na mai to’na iho huru… Ua heheu mai te Fatu i te reira ia‘u. Ua faaî oia i to‘u varua atoa e teie iteraa, e tae noa’tu e aita e feââraa ».11
Peresideni Lorenzo Snow (1814-1901)
« Taua taata ra tei parahi na i te ra‘i, tei faatere arii na i reira hou a vai mai ai te ao nei, tei hamani i te fenua, e tei haere mai i raro i te afa ti‘a o te mau tau ra, no te haamaitai e no te faaora i te taata Ta’na i hamani, ua fâ mai ïa i te taata nei i teie nei tau ».12
« Te faaite nei matou i to te ao atoa nei e ua ite matou, na roto i te heheuraa no te ra‘i mai, e na roto i te mau faaiteraa a te Varua Maitai, e o Iesu te Mesia, te Tamaiti a te Atua Ora, e ua heheu mai oia ia’na iho ia Iosepha Semita mai ta’na i na reira i ta’na mau aposetolo i mutaa ihora, i muri a‘e i to’na ti‘a-faahou-raa mai te menema ra, e ua faaite atu ia’na i te mau parau mau no te ra‘i e nehenehe ai i te taata ia faaorahia ».13
Peresideni Wilford Woodruff (1807-98)
« Te fâ a te misioni a te Mesia i te fenua nei o te pûpûraa ïa ia’na iho ei tusia no te faaoraraa i te taata nei i te pohe mure ore… Ua haa maite Oia mai te au i te hinaaro o te Metua i roto i te mau mea atoa mai te haamataraa, e ua inu oia i te au‘a avaava tei horo‘ahia’tu ia’na. Na roto ia’na i hopoihia mai ai te maramarama, te hanahana, te tahuti ore, e te ora mure ore, e taua aroha ra tei hau atu i te rahi i te faaroo aore râ te ti‘aturiraa, no te mea ua rave te Arenio a te Atua i te reira no te taata o te ore roa hoi e nehenehe ia rave no’na iho…
« Aore roa e taata tei ia’na ra te mana no te faaora i te mau varua o te taata e no te horo‘a ia ratou te ora mure ore maori râ te Fatu ra o Iesu Mesia, i raro a‘e i te faaueraa a To’na ra Metua ».14
Peresideni John Taylor (1808-87)
« Ma te faatahinuhia i te mono‘i o te oaoa hau atu i to’na ra mau hoa, ua aro Oia e ua upooti‘a i ni‘a i te mau mana amui o te taata e te diabolo, te fenua e o hade; e ma te tauturuhia e teie mana teitei a‘e o te Atua, ua re ia’na te pohe, o hade e te menema, e ua ti‘a ei Tamaiti na te Atua, te Metua Mure Ore, te Mesia, te Tamaiti Arii o te hau, te Taraehara, te Faaora o to te ao nei; ua oti hope roa te ohipa no te taraehara, ta To’na Metua i faaue Ia’na ia rave ei Tamaiti na te Atua e na te taata nei ».15
Peresideni Brigham Young (1801-77)
« Te faaite nei au e o Iesu te Mesia, te Faaora e te Taraehara o te ao nei; ua haapa‘o vau i ta’na ra mau parau, e ua noaa ia‘u ta’na fafauraa, e to‘u ite no ni‘a ia’na, eita ïa e noaa i te paari o teie nei ao i te horo‘a, e i te rave ê atu…
« To tatou Fatu ra Iesu Mesia – te Faaora, tei faaora i te ao nei e te mau mea atoa i roto, o te Fanau Tahi ïa a te Metua i roto i te tino nei… Ua ite Oia i te pohe no te mau taata atoa, e ua aufau i te tarahu tei topa i ni‘a iho ia tatou na roto i to tatou mau metua matamua ».16
Te peropheta Iosepha Semita (1805-44)
« E o teie hoi te evanelia, te parau oaoa, ta te reo no roto mai i te mau ra‘i i faaite mai ia maua –
« Ua haere mai Oia i te ao nei, oia o Iesu, ia faasataurohia no te ao nei, e ia hopoi i te mau hara no te ao nei, e ia haamo‘a i te ao nei, e ia tamâ atu i te reira i te parau-ti‘a ore atoa ra;
« Ia ora na roto ia’na o ratou atoa ta te Metua i tuu atu i roto i to’na ra mana e o tei hamanihia hoi e ana » (PH&PF 76:40-42).