Tausiga o le Lafu: Aoaoina Atu o Tomai Faaletaitaiga i Tupulaga Talavou

O le aoao atu o tomai faaletaitaiga i le aiga, e mafai ona faia i tulaga e aupito sili ona faigofie, e pei o le taimi e saunia ai e se matua se meaai a le aiga, pe lipeaina foi se mea o le fale, na saunoa ai Elder Ballard.

“I la’u faamasinoga, e leai se mea e suitulaga i tama po o tina i lo latou aveina o se tamaitiiti—tusa lava pe laitiiti—ma faaali atu i le tamaitiiti pe o a mea o latou faia, ae pe faapefea foi ona fai. E ola a’e le tamaitiiti ua ia iloa le tele o mea e uiga i le olaga, ma le ala e fai ai i le na o le i ai i tafatafa o lona tama po o le tina. E fesoasoani ai foi i le tamaitiiti na te lagonaina ai, o ia foi o se vaega o le faagasologa o le aufono faaleaiga.

“E i ai tulaga e leai ai se tama ma se tina i le aiga. Ua tatou malamalama lelei i lena mea. Peitai, o loo i ai se tagata o loo tausia i latou, ma o lena tagata e numera tasi i le aoaoina o i latou e faia mea ma le ala e taitai ai.”

E mafai ona faia aoaoga faaletalalelei i totonu o le aiga tusa lava pe o le autalavou o ni tagata o le Ekalesia, ae le lolotu o latou matua, na saunoa ai Elder Uchtdorf. E mafai e taitai o uarota ma paranesi ona valaaulia matua—tusa lava pe o matua o ni Au Paia o Aso e Gata Ai pe leai—ina ia aofia ai i gaoioiga faaleEkalesia a a latou fanau. O nisi o metotia aupito sili, e ala lea i meafaigaluega o loo i ai nei.

“E mafai e taitai ona faaaoga lelei ia meafaigaluega faavae o i ai i le Ekalesia—o le tamaitusi Mo Le Malosi o le Autalavou ma polokalama o le Tiute i le Atua ma le Alualu i Luma o le Tagata Lava Ia. O le Tusi Taiala mo Matua ma Taitai o le Autalavou o loo faamatala mai ai le ala e mafai ai ona tatou fesoasoani i o tatou talavou, ina ia faamanuiaina i nei polokalama ma atiina ae ai tomai faaletaitaiga,” na saunoa ai Elder Uchtdorf. “Aveatu na meafaigaluega i aiga o tupulaga talavou. Valaaulia matua e fesoasoani ia latou fanau, ina ia ausia sini ma galuega ma isi mea lelei o loo tuuina atu ai.

“O le a manaomia ai i lenei taumafaiga faapitoa le pitolaau a taitai, peitai o le a fesoasoani ai i nei matua e faavae le agavaa faaletaitaiga lea e faavae i le aiga. O le a faailoa atu ai foi ia i latou mea ua tatou talitonu i ai ma mea ua tatou taumafai ina ia ausia. O le a ta’u atu ai foi ia i latou e faafesootai e le Ekalesia ia aiga, ma e tuuina atu ai uiga taua matagofie—o uiga taua e atili ai ona tatou faapei o Keriso. O le a ta’u atu ai i nei matua tatou te ‘tautalatala ia Keriso, tatou te olioli ia Keriso, tatou te tala’i atu Keriso, tatou te vavalo atu foi ia Keriso … ina ia iloa e a tatou fanau le mea latou te faamoemoe ai mo le faamagaloina o a latou aga-sala’ (2 Nifae 25:26). Afai tatou te faaaogaina ia polokalama ua uma ona faatulagaina, e mafai ona tatou fesoasoani i o tatou tupulaga talavou uma lava ia avea ma taitai.”

Ua silafia e Elder Ballard e le o se mea e le masani ai le tauaveina e taitai matutua o tiutetauave o le autalavou. “E tuputupu ae le taitaiga i le autalavou pe a fefautuaai ma le faaeteete ia taitai ma a latou faalapotopotoga,” na ia saunoa ai. “Mo se faataitaiga, faapea la o se korama a tiakono e toalima tamaiti e toaaga ae toatolu e le toaaga mai. O le tiutetauave la o ai le toe aumaia o le toatolu lea e le o toaaga mai? Ua matua toatele naua taitai o le a faapea mai, o la latou matafaioi.”

Ae, e tatau i se taitai ona aumaia le mataupu i totonu o se fonotaga a le aufono e i ai uso o le au peresitene o le korama ma fesili, “O le a se mea tatou te faia, e faapefea ona tatou faia, ma o ai o le a faia lea mea ma lea mea?” na saunoa ai Elder Ballard.

“Afai e vaai atu le autalavou i se epikopo po o se isi taitai na te faia mea uma lava, e le faaaofia ai ma isi, ma na te le aumaia foi i le aufono ana punaoa po o risosi uma o i ai, o le a manatu le autalavou, o le mea lena e fai e se taitai. O se matuai mala pagā lava pe a mafaufau se epikopo, ‘O la’u uarota lenei, ma o le a tatou faia i la’u auala,’ ma galo ai o le uarota a le Alii. E ao ina tatou saili ia iloa mea e finagalo o Ia tatou te faia, ma pe o le a foi le ala e finagalo o Ia tatou te tuufaatasia ai punaoa ina ia faataunuu ai.”

O le i ai o avanoa e aoao atu ai—tusa lava pe o nai avanoa laiti e pei o le tuuina atu o se molimau, faia o se mafaufauga i se mau, po o le puipuia o mataupu faavae o le talalelei i nai faatalatalanoaga laiti—e talafeauga lava mo tupulaga talavou, na saunoa ai Elder Uchtdorf. Na ia faaopoopo mai e faapea, o le aoao atu o se vaega taua lea o le avea ma taitai.

“E tele taimi na pau tagata lotu e i ai i aoga o o tatou tupulaga talavou, o lea e manaomia ai lo latou iloa e matua taua moni lava i latou, ma e latou te iloa foi lo latou talitonuga faalelotu. E manaomia ona latou malamalama pe o a lava mea o loo latou fai, o la lava latou te aoao atu. Afai tatou te saunia ni avanoa faafaiaoga mo o tatou tupulaga talavou, ma faamalosiau atu ia te i latou ia aua nei matamumuli i le talalelei, o le a tele la tatou fesoasoani atu ia te i latou.”

O le faatulagaga o le Ekalesia e maua ai avanoa e le gata mo le tuputupu ae faaleagaga ae faapena foi i isi itu. Na saunoa Elder Uchtdorf e uiga i lana galuega i vaalele, “O mea uma lava sa fesoasoani ia te au e faataunuu ai mea sa ou faia i lo’u olaga galue faapolofesa, sa ou aoaoina mai i le Ekalesia.”

Fai mai a ia ua ia vaaia foi i le taimi nei le mea lava lea e tasi o loo tupu i tagata o lona aiga. “E lauiloa atalii o la’u fanau o ni tagata o le Ekalesia, ma ua iloa lelei foi o i latou o ni tagata e sili ona lelei a latou faatinoga i totonu o vasega. Aisea? Aua sa latou aoaoina nei tomai i le fale ma le Ekalesia. E le faapea ua latou iloa lena ituaiga o aoaoga—ua tupu fua lava.”

Ina ua 20 ma ona tupu tausaga o Elder Ballard, sa tofia o ia e avea ma epikopo. “Sa ou matuai faatu tele,” na ia toe tomanatu ai. “Ou te lei epikopo lava muamua. O o’u fesoasoani uma e toalua e matutua ma onomea ona avea ma o’u tamā. Sa ou mafaufau i o’u epikopo uma sa i ai ma sa ou taumafai e faaaoga mai a latou faataitaiga ni mea sa ou faananau i ai, ma sa ou manatu e aoga. Peitai o le faia lava o le tofiga, po o le a lava, e fesoasoani ia te oe e faatoilalo ai le fefe.”

O le fefe o se vaega masani o se tofiga fou, na faaopoopo mai ai Elder Ballard. “O se alii e 12 tausaga le matua, e avea ma peresitene o le korama a tiakono, o le a i ai sina popolevale. Atonu e taumanatunatu, ‘E faapefea ona ou taitaia se fonotaga?’ Ia, e faasino atu ia te ia le faiga. Atonu o le a i ai ni sasi, ma atonu foi e faigata. Ae a mavae ni nai taimi, ona ia iloa lea e mafai ona ia faia. Ua ia faia se la’a tele i luma. A e iloa loa lava ona fai se mea, e te’i lava ua mafai ona e taitai e aunoa ma se fefe.”

E maua le talitonuga mautinoa pe a malamalama pe o ai oe, na faaopoopo mai ai Elder Uchtdorf. “Manatu ia Mose i le Penina Tau Tele. Na ia aoao faapea na faia o ia i le faatusa o le Atua, ma o loo i ai le galuega a le Atua mo ia e fai. A e iloa o loo e i ai i le feau a le Alii, ua ese. O le mafuaaga lena e manaomia ai e o tatou tupulaga talavou ona iloa pe o ai i latou, ma o le a faatasi le Alii ma i latou.

“A o ou talavou, sa faiaoga se faifeautalai i le matou vasega aua e laitiiti le matou paranesi. O se tasi o mea na ia fai mai ai sa matua taugā lava ia te au: ‘A faatasi le Atua ma oe, o ai se faasagatau atu ia te oe?’ O lena ituaiga o talitonuga mautinoa, e te maua ai le mana e faia ai mea tusa lava pe e te fefe, tusa lava pe e te lagona e te le agavaa e fai.”

Atonu e tau lilifa atu lava taitai e taitaia, saunia musika, pe tatalo i faeasaite a le autalavou po o isi fonotaga, ae e tatau ona avea i latou ma “taitai e tutu i tua atu,” ma vaavaaia le autalavou o e o loo faatinoina nei tofiga, na saunoa ai Elder Uchtdorf.

“E mafai ona avea lenei mea ma se luitau mo matua ma taitai aua ua latou iloa atonu e mafai ona vave ma lelei atu pe a latou faataunuuina. E manaomia le onosai e tuu atu ai i le autalavou latou te faia. O nisi taimi e aofia ai le tuu o i latou e tauto’ai. Fai mai le mau, ‘Ina ia aoaoina atoatoa lo’u nuu, ina ia lagona, ma iloa atoatoa la latou tiute, ma mea ou te manaomia mai ia i latou’ (MFF 105:10; ua faatusilima mea e faamamafa).

“E te faia le faataitaiga ona tuu atu lea ia latou aoao ai. Manatu i le Faaola. Ua Ia tuuina mai ia i tatou e faia Lana galuega iinei i o tatou valaauga eseese. O loo onosai o Ia ia i tatou. O le mea lena e manaomia ona tatou faia mo o tatou tupulaga talavou.”

Na faamatala e Elder Ballard e avea o se faataitaiga se mea na la faia ma le atalii o lona atalii ua foi mai lana misiona, ma sa manao o ia e faatautau ni mea i luga o le puipui malo o le fale sa mautotogi ai o ia. Na alu Elder Ballard i le fale na mautotogi ai le atalii lea o lona atalii, e faasino le viliina o pu ma tuu i ai ni mea e lalago ai.

“Na ou faia le tasi ona fesili atu lea i ai po o fea e manao e tuu ai le isi. Sa ia faasino maia ia te au ma sa ou fai atu i ai, ‘Ia, tuu la’ia iina. Na sa e vaai mai ia te au o fai. Tago laia o oe e fai. Le auvili lea.’ O lea na ia faia ai. Ma sa ia faia isi mea uma na totoe. Sa ia faia lemu aua sa po’epo’evale. Semanu e faaluaina le vave pe ana ou faia. Ae o lea ua ia iloa nei. Na fausia ai le talitonuga mautinoa. Afai e toe manao e tautau i luga se isi mea, o le a na o le sau lava e faanoi atu le meafaigaluega. Ou te faamoemoe na te toe faafoi maia!”

E taua le faamatala i le autalavou e faapea, o se tasi o mafuaaga ua talosagaina ai i latou ina ia usiusitai ma auauna atu, aua o le a o latou taitaia aiga ma le Ekalesia i le lumanai. Ae o lo latou usiusitai ma le auauna atu, o le a tele atu mea e faia nai lo le na ona saunia o i latou mo o latou tiutetauave mo aiga i le lumanai ma le Ekalesia; o le a saunia ai foi i latou e faataunuuina a latou misiona patino o le olaga.

O le tulimatai atu i le vaaiga aoao e faamanuia ai e le gata i le autalavou ae faapea foi i o latou taitai, na saunoa ai Elder Uchtdorf. “O nisi taimi ou te mafaufau ai ua matua tele naua lo tatou tulimatai atu i mea taitasi. Afai e tuuina mai e o tatou taitai matutua le vaaiga aoao o lo tatou faamoemoega ma mea tatou te mafaia i loto ma mafaufau o o tatou tupulaga talavou, o le a faigofie foi ona faafoe mea taitasi.”

O le malamalama ma fesootai manino ma le agalelei i le autalavou e matua taua foi, na ia faaopoopo mai ai. “Ina ua 13 o’u tausaga, sa tofia au e fai ma peresitene o le korama a tiakono. Mo ni nai minute sa sailia ai e le peresitene o la matou paranesi se potu, i se mea e ese mai le faapaologa, ma te fono ai ma faamatala mai mea e manaomia ona ou faia. Sa ia tuuina mai ia te au ni faatonuga matagofie e uiga i mea ua faamoemoeina mai ia te au, e le gata ia te ia ae faapena foi i le Alii.

“Tou te silafia e toafia tiakono sa i ai i le matou vasega? E toalua. Ae na ia faaavanoaina lava le taimi e saunia ai ia lava ma saunia ai foi au. Ua 50 tausaga talu ai, ae ou te manatuaina pea le ala na pa’i mai ai i lo’u loto. Na manao o ia ina ia ou manuia. Sa ia tuuina mai lona lava taimi ma lana gauai. Na ia tuuina mai ni faatonuga agalelei ae tuusa’o, ma sa ia tulitulitataoina foi.”

E le manaomia e le Alii ni tagata e na ona sa’afi; Na te manaomia tagata e mulimuli ai ma fai, o le saunoaga lea a Elder Uchtdorf. “E te aoao ina ia avea o se taitai e ala i le aoao muamua e avea ma se tagata e mulimuli ai ma fai. Fai mai le mau ia ‘filifili mo i latou lava,’ ae le o le ‘tau galueaiina’” (2 Nifae 2:26).

“O le isi laasaga o le toe tulitatao. O le mea lena tatou te aoaoina mai i le malumalu—le mataupu faavae o le toe foi-ma-lipoti atu. Peitai, o nisi o o tatou taitai e fefefe e tuuina atu ni faatonuga, e avatu ai se savali alofa ae manino i le mea o loo faamoemoeina, ona toe tulitatao ai lea. O le a le atoatoa lelei le faiga o mea, ae a taumafai le autalavou, ia faamalosiau atu ia te i latou. O le a manatua e le autalavou lena mea. Atonu latou te le manatuaina upu, ae o le a latou manatuaina ia lagona.”

Ina o avea Elder Ballard ma se epikopo talavou, sa i ai se tamaitiiti ulavale e iva tausaga sa matua faapopoleina lava le faiaoga o le Peraimeri. Ina ua mavae ni nai vaiaso, sa taitai atu e le faiaoga le tamaitiiti i le ofisa o le epikopo ma fai atu, “Epikopo, tasi lea o lau lafu. Vaai faalelei.”

Sa le mautonu Epikopo Ballard po o le a le mea o le a fai. Ae i sina minute, sa oo mai le uunaiga: fai i le tamaitiiti e lipoti mai i vaiaso uma lava lana amio i le Peraimeri. Sa tuuina atu e Epikopo Ballard lena lu’i, ma sa suia ai le uiga faaalia o le tamaitiiti. Sa iloa e le tamaitiiti, e mafai ona ese se isi faiga na te faia ai mea.

“Ou te lei mafaufau i le manatu lena o le tali atu mo au lava ao lei taunuu o ia i le faitotoa o lou fale,” o le saunoaga lea a Elder Ballard. “Ae o le Alii, e ala i le mana o le Agaga, na musuia se faiaoga po o se taitai agavaa ma amiotonu ia iloa le mea e fai ma tautala ai e faaalia ai mea e sili ona lelei mai se tagata, ae maise o o tatou tagata talavou.”

Mo le silafia, o lena alii e iva tausaga na iloa mulimuli ane o se alii “lelei tele,” na saunoa ai Elder Ballard. Sa auauna o ia i se misiona, faaipoipo i le malumalu ma avea ma se taitai maoae.

O sauniuniga faaleagaga e manaomia mo le musumusuga e manaomia ai le galue, o le saunoaga lea Elder Uchtdorf, ae e taua tele. Sa ia aoaoina se lesona faapena i le taimi na faigaluega ai o se pailate. O le aveina o vaalele 747 e ese le malie, o lana tala lea, ae o sauniuniga na manaomia ai ni galuega se tele. “Mo se faiaoga po o se taitai, o le vaega o le galue o le tatalo ma le iloa o manaoga o alii po o tamaitai talavou taitoatasi. E tatau foi i taitai ona mautinoa ia le na o taimi o mea malie ma taaloga ia polokalama a le autalavou, ae o se fuafuaga matagofie ma fiafia e fesoasoani ai ia i latou ia alualu i luma i o latou olaga talavou ma ia avea ai ma tagata e tatau ona avea ai i latou.”

O lea, taitai—ae maise lava o au epikopo—e tatau ona nafa i latou ma le fautuaina lelei ma le aoaoina o matua i mea o loo faia i le autalavou a le uarota. E le tatau i epikopo ma peresitene o paranesi ona faailoa atu mataupu patino ma lē faalauaiteleina, ae e mafai ona latou aoaoina faalauaitele ni atugaluga lautele.

“Ana o au o se epikopo i le taimi lenei,” o le saunoaga lea a Elder Ballard, “ou te talitonu o le a ou le faatuai ona alu atu i le talanoaga a le au perisitua ma le Aualofa i le Aso Sa lona lima ma talanoa atu i matua e uiga i nisi o atugaluga o loo i ai e uiga i le autalavou. Ou te tau atu ia i latou, o ‘Mea ua ou iloa e uiga ia outou talavou o se taunuuga o faatalanoaga sa ou faia ma i latou i le aluga o tausaga, ma ua latou iloaina lena mea. O le a ou le faalataina o latou faatuatuaga. Ae o lona aotelega o loo i ai sa tatou faafitauli. E tatau ia te outou o matua ona silafia ma ia taulimaina… .’ O nisi o matua atonu o le a fefefe e faalogo i tulaga moni o loo tutupu. Ae e tatau ona latou silafia.”

“Ua tatou siitia le fua faatatau,” o le saunoaga lea a Elder Ballard. “Ae e le faapea ai la e na o le autalavou ua siitia ai. Ua siitia ai foi mo matua, o e ua i ai le tiutetauave autu o le aoao atu o mataupu faavae i a latou fanau. Ua siitia ai foi mo taitai. Ua siitia ai foi mo faiaoga. E tatau ia i tatou uma ona laa i luma i se lalolagi ua vave ona lofia i le amioleaga e pei o lenei.

“Ua tatou iloa latou te alolofa i le Alii,” sa ia faaauau ai. “Manatua e alofa o Ia ia i latou. I totonu o le tino laitiiti o lena alii talavou po o le tamaitai talavou, o lau aoaoga o se agaga e faavavau. O nei tagata talavou e a lo tatou Tama Faalelagi, ma e popole tele o ia i olaga o Lana fanau uma lava. E tatau ona tatou faatumauina le mumu o le afi o lena molimau ia i latou.”

Mai se faatalanoaga ma Peresitene Dieter F. Uchtdorf, Fesoasoani Lua i le Au Peresitene Sili, ma Elder M. Russell Ballard o le Korama a Aposetolo e Toasefululua