Pe a i ai i Roma … Fai e Pei ona Faia e Nei Tagata Roma
Ua tutu malosi le autalavou i Roma, Italia e tetee atu i osofaiga a faatosinaga o le lalolagi.
E femaulu atu i totonu ma o mai i fafo tagata mai faleoloa ma talotalo atu i uo i le taulaga tumutumu. O nisi tagata e talanoa i pisinisi a o agai atu i galuega, a o isi e fefaasoaai manatu e uiga i upufai. E taaalo tamaiti, ma fiafia i le la o le taeao.
Atonu o foliga na o se aso masani i Roma anamua.
O le Malo o Roma o se atunuu malosi i lana fitafita ma lona tamaoaiga. Ia o ai na mafaufau e toilalo?
Ae na toilalo lava. Mai i totonu, o le toilalo o le malo na faatupuina e le matapeapea o tagata mo le pule ma le oa ma lo latou lafoai o le ola amiotonu. Mai i fafo, na osofaia ai le malo ua vaivai ma faatoilaloina e atunuu tuaoi.
O aso nei, ua tutu malosi ai alii ma tamaitai talavou o le Siteki a Roma Italia, e pei ona sa faia e le malo. Ae o nei talavou o loo pipii mausali e tetee atu i osofaiga o faatosinaga a le fili ma faamalolosia lo latou faaleagaga e ala i le ola amiotonu.
Faifeautalai Roma
I se tusi i tagata Roma, na faapea atu ai le Aposetolo o Paulo, “Aua ou te le ma i le tala lelei ia Keriso” (Roma 1:16). O le autalavou a le Au Paia o Aso e Gata Ai i Roma i aso nei e le maasiasi i le talalelei, pe latou te manaomia foi le uunaiga ina ia mafai ai ona latou tutu atu mo o latou talitonuga, e ui o nisi taimi atonu e faigata ai.
Fai mai Arianna Hibo, 15, “E i ai nisi o au uo e le tutusa o matou manatu, ae e faaaloalo lava i taimi uma ia te au.”
Na faaopoopo foi i ai Dalila Vardeu, 15, “E i ai au uo e faalogo mai ia te au ma taumafai e malamalama i lou ituaiga tagata.”
Ma o le a le ituaiga tagata e i ai o ia? O a ni uiga e faamatalaina ai nai nei talavou o le Au Paia o Aso e Gata Ai o loo i ai i le taulaga pisi o Italia? Faamaoni, tuuto, faauo, amiotonu, ma faamaoni i lo latou naunau e ola ma faasoa atu le talalelei.
Na auauna atu Sami Pace, 16, o se peresitene o le korama a tiakono i le taimi sa na o ia ai le tagata o le korama. “Na ou aoaoina le taua o le galuega faafaifeautalai, e tusa lava pe ana oo mai i le aso e leai ni taunuuga ua ou maua,” na ia fai mai ai. “E na o au lava le alii talavou i le matou eria e auai i le ekalesia. O aso uma lava ou te malamalama ai i se mea e sili atu e uiga i le galuega faafaifeautalai.”
O loo vaaia e Denise De Feo, 15, se faataitaiga i lona tuagane matua: “O loo faamisiona o ia i le taimi nei, ma o loo ona mauaina ia aafiaga uma lava. E le o aafiaga uma e lelei, ae o taimi uma lava e i ai lava se mea na te aoaoina atu. O se faamafanafanaga lena ia te au.”
Ua iloa e le autalavou e tusa lava pe foliga mai e faatauvaa ia galuega auauna atu po o le galuega faafaifeautalai e mafai ona i ai se aafiaga lelei i isi. Fai mai Davide Bosco, 17, “I tusitusiga paia, ua fetalai mai le Alii ia tatou faasusulu atu (tagai Mataio 5:16)—ae le o le faia o galuega tetele, ae o mea iti lava.”
Mo Le Malosi o le Autalavou Italia
O loo susulu atu tagata talavou o le Ekalesia i Roma, ma o loo latou faia e ui i le matuai eseese ma le toatele o tagata Roma anamua o i latou na taliaina amiogaletonu na faapea ona fesoasoani i lo latou toilalo. Nai lo lena, o le autalavou i aso nei o loo latou faasusuluina atu le Malamalama o Keriso ma faamalosia o latou faaleagaga e ala i le faatumauina o le maualuluga o tulaga faatonuina ma o atu i le malumalu.
Ua iloa e Denise o le ola i le talalelei e maua ai se toomaga mai le tele o faatosinaga o le lalolagi i aso nei. E fesoasoani foi le talalelei na te iloa ai le ala e filifili ai le mea tonu. “O mea o loo fai e au uo e le o taimi uma o ni mea lelei e tatau ona ou faia,” o lana tala mai lea.
Ae ua faamamafa mai e Riccardo Celestini, 14, le taua o le i ai o le lagolago a o taumafai e fai ia filifiliga sao: “O nisi foi taimi ou te manaomia ai le fesoasoani a lou aiga po o se isi fesoasoani aua e le mafai ona ou tu toatasi.”
O nisi o isi fesoasoani e mai le tamaitusi Mo Le Malosi o le Autalavou. E fesoasoani nei tamaitusi i le autalavou i auala eseese. E le alu Andrew Bishop, 13, i ana aoga pasiketipolo ma taaloga pe afai e fai i Aso Sa.
E mulimuli foi Arianna i le fautuaga o le tausia o le Aso Sapati. O ia o se tagata tamoe ma e tele lava ina fai tautuuga i le Aso Sa. Mulimuli ane, na ia iloaina e tatau ona ia faia se filifiliga. “Sa ou tatalo, ma e ui ina sa faigata ona ou filifili, ae sa ou filifili lava ou te alu i le lotu,” o lana tala lea.
Mo Davide ma Riccardo, na aoga lava le fautuaga o le faamaoni. “E i ai le avanoa matou te le faamaoni ai i le aoga ma kopi mai meaaoga mai se isi tagata,” o le tala lea a Davide. “Ae o le le faia o lena mea o le a faia ai se eseesega o i matou ma isi tagata.” Na fai mai o ia, o le faamaoni “o se tasi o mataupu faavae atonu e te manatu e le taua tele, ae o le mea lena e faia le eseesega.”
Ua iloa e Riccardo o le faamaoni i taaloga e taua foi: “Afai e te taalo faamaoni, ua e iloa na e faia le mea sili na e mafaia ae le o le le faamaoni. O le a e maua le loto malie i mea ua e faia.”
Lata Mai ma Mamao
E i ai se mea e tasi e le o faamalieina nei talavou, o le aofaiga o taimi e mafai ona latou auai atu ai i le malumalu. O le leai o se malumalu i Italia, e malaga atu ai tagata o le Ekalesia i Roma pe tusa ma le iva itula (i le na o le alu) i le Malumalu o Bern Suitiselani. O malaga mo le faia o papatisoga mo e ua maliliu e seasea lava ona faia. Ae e ui ina mamao le malumalu, e faalatalata atu lava e nei talavou [le malumalu] i o latou loto e ala i le taumafai e taofimau i lagona faapitoa latou te maua pe a latou auai atu.
“A ou i ai i le malumalu, ou te lagona ua ou i lo’u aiga moni,” o le tala lea a Sami. “O taimi uma lava ou te tuputupu ae teisi ai.”
“O le vaega e sili ona ou fiafia i ai e uiga i le malumalu, e malosi lava lou lagonaina ai o le Agaga,” na fai mai ai Andrew. “Ou te iloa o loo faafetai mai o tatou tuaa ia i tatou mo le fesoasoani atu ia i latou. Tatou te tuuina atu ia i latou se meaalofa.”
E ioe foi i ai Dalila. “E manaia le lagonaina o loo talia e tagata le mea o loo tatou faia mo i latou. O se aafiaga matagofie tele.”
Na aoteleina e Arianna ia manatu a ana uo: “O mea uma lava ua latou taua e moni. O le malumalu o se nofoaga paia i luga o le fogaeleele, ma e le afaina pe o i ai le malumalu i Suitiselani po o Sepania. E tutusa lava le Agaga i taimi uma, ma e mafai ona tatou tuputupu ae i taimi uma.”
O Roma i aso nei ua otaota i mea e taei ma gaui o fale anamua, auala o fogafale ma faaofuofu o—o mea laiti o fale na avea ma fale tetele ua faaleagaina e autau e malolosi atu. Ae o le autalavou i Roma, i se isi itu, ua faaaogaina mea laiti o o latou olaga—o le talalelei, tusitusiga paia, aiga, tulaga faatauaina, o le malumalu—ma atiina ae ni molimau mausali e mafai ona tatalia aafiaga le lelei o le lalolagi.
E tasi lava le fautuaga a Sami mo le mauaina o lena malosiaga: “Aua nei fiu. Ia tatou agai i luma.”