Usa ka adlaw ako nagpuasa tungod ako nasamok sa daghang mga kalisud, ug akong giukab ang Hulyo 2007 nga isyu sa Liahona. Ako mihukom nga basahon ang Gikan sa Kinabuhi ni Presidente Spencer W. Kimball, ang yugto nga giulohan og “Batoki ang Dautan nga mga Impluwensya,” diin dili nako kasagaran basahon tungod anaa kini sa seksyon alang sa mga bata. Kini nga istorya mitabang kanako sa pagpalayo gikan sa mga dautan nga mga impluwensiya nga mialirung kanako nianang adlawa, ug ako nalig-on pinaagi sa mensahe. Ako nag-awhag sa matag usa sa pagbasa sa tanang mga seksyon sa Liahona.

Ang Liahona usa ka kahayag ug proteksyon para kanako. Mao kini ang unang himan nga akong gigamit sa pagsangyaw sa ebanghelyo ngadto sa akong mga higala.

Arlette Azi, Ivory Coast

Usa ka adlaw samtang ako nag-amdam sa leksyon para sa Batan-ong mga Babaye, ako nakaamgo nga adunay mga bahin sa leksyon nga nagkinahanglan og dugang nga tabang. Kana mao ang higayon nga ako mopakli sa labing maayong pagkatago nga sekreto sa mga inilang mga lider sa kabatan-onan—angMga Giya sa Kapanguhaan sa Aaronic Priesthood ug Young Women. Kini nga mga giya naglangkub sa mga pakisayran alang sa mas bag-o nga mga istorya ug mga artikulo gikan sa mga propeta ug uban pang mga Kinatibuk-ang Kadagkoan nga mahimong idugang ngadto sa mga leksyon alang sa mga Batan-ong mga Lalaki ug Batan-ong mga Babaye aron sa pagtabang sa mga kabatan-onan sa pag-atubang sa mga problema karon.

Kini nga mga kapanguhaan dakong makapahupay kanako isip usa ka lider tungod kay ako nasayud nga ang mga istorya ug mga artikulo gikan sa hustong mga tinubdan ug naglangkob sa tinuod nga mga doktrina. Kini libre nga magamit isip tabang, apan dili sa pag-ilis, sa mga leksyon.

Genell Wells, Utah, USA

Kini usa ka dako nga panalangin nga makaangkon niining talagsaon nga publikasyon, ang Liahona. Salamat niining magasin, kami makahimo nga makadawat sa mga pulong sa propeta ug makakat-on sa espiritwal nga mga kasinatian sa atong mga kaigsoonan sa tibuok kalibutan. Ang akong paborito nga seksyon sa magasin mao ang Mga Tingog sa mga Santos sa Ulahing mga Adlaw. Dili kini kanunay mahitabo nga dili mabati ang Espiritu kon ako magbasa niining talagsaong mga istorya.

Sa akong kompyuter akong gibutang ang mga bersyon sa PDF niini nga magasin nga makita diha sa Church Web site. Sa dili pa nako sugdan ang akong adlaw, ako magbasa og usa ka artikulo aron mapuno ako uban sa Espiritu. Salamat sa Liahona.

Oscar Javier Álvarez Gómez, Colombia

Ako nasayud nga ang Liahona usa ka epektibo nga himan tungod nagtugot kini kanato nga makakat-on kabahin sa mga pagpamatuod ug mga kasinatian sa mga miyembro sa tibuok kalibutan. Ako usab ganahan makadungog og mga istorya gikan sa ubang mga miyembro og ingon man sa pagdawat og mga tambag gikan sa atong mga lider. Ang ilang mga pulong nagsilbi isip usa ka tinuod nga giya. Ang magasin usab usa ka pamaagi diin kita makapasalamat sa paglambo ug pagtubo sa Simbahan sa tibuok kalibutan.

Darice Adolphe, Réunion Island

Sa daghang mga higayon ako gusto nga mosulat ngadto sa Unang Kapangulohan ug mga Kinatibuk-ang Kadagkoan ug mangutana kanila, “Giunsa ninyo sa pagkasayud?” Sa matag panahon samtang ako maminaw ug dayon mobasa sa mga pakigpulong sa komperensya, kini ingon og ang Ginoo direkta nga nakigsulti ngari kanako kabahin sa akong piho nga mga kabalaka. Gikan niining mga kasinatian ako nakakat-on kon unsa ang Langitnong Amahan nahigugma kanako ug buot motabang kanako nga mahimong mas maayo nga tawo. Ang mga mensahe sa komperensya moabot kanako kon bisan hain ako, bisan ngadto sa layo nga mga lugar. Usahay ang mga mensahe usa ka tawag ngadto sa paghinulsol, usahay sa paggiya, ug usahay sa paghupay. Kanunay nakong bation nga ako ang mora og paboritong anak sa Langitnong Amahan ingon sa akong nakita kon unsa ka mainampingon Siya nga nagbantay kanako pinaagi niining mga mensahe.

Charleen Crenshaw, Montana, USA