O Le Aiga Faatulagaina Lelei

Ou te manatua le avea ai ma se matua talavou ma le faitauina o le Mataupu Faavae ma Feagaiga 93:40, lea o loo fetalai mai ai le Alii, “A ua ou poloaiina outou e taitaiina a outou fanau i le malamalama ma le upu moni.” Sa ou mafaufau, “E faapefea tonu lava ona ou faia lena mea?” Sa ou faalogo i le toatele o tagata o talanoa e uiga i aiga e le faatulagaina lelei, ae sa ou manao e tausia se aiga e faatulagaina lelei. O le a tonu lava la le aiga faatulagaina lelei?

E foliga mai ua manatu tagata, o tagata i se aiga faatulagaina lelei e atoatoa ona galulue faatasi ma e atoatoa foi ona foia faatasi faafitauli. Ioe, o le mea moni o le faaigoa o se aiga “faatulagaina lelei” e le faapea ai ua atoatoa le aiga. O aiga uma lava e feagai ma luitau i le taulimaina o uiga eseese o tagata o le aiga. Ae peitai, o se aiga e feoeoeai lelei, e iloa e tagata o le aiga e i ai o latou vaivaiga, ma latou te galulue faatasi e faaleleia o latou sootaga e ui lava i o latou vaivaiga. E moni, o le a fiafia atu tagata o le aiga pe a latou taumafai e faaaoga mataupu o le talalelei i o latou olaga ina ia faalelei atili ai sootaga faaletagata lava ia ma faaleaiga.

E ala i le tele o tausaga o galulue faatasi ai ma ulugalii i le avea ai o se faufautua faapolofesa, na ou aoaoina ai nisi o mataupu faavae ou te talitonu e fesoasoani i aiga ia feoeoeai lelei. O le tusi lenei ua na o ni nai manatu o loo talanoaina ai; e mafai ona e mafaufau i ni ou lava manatu. A o e faitauina nei mataupu faavae, faaavanoa sina taimi e mafaufau ai pe faapefea ona faaaoga ia manatu i lou aiga.

I le aiga faatulagaina lelei, e taulai atu le malosi o matua i le aoaoina o le la fanau i mataupu faavae sao ma tuu i latou e faaaoga a latou filifiliga saoloto. I le avea ai o se matua ma se matua o matua, e tuu atu lo’u mafaufau ma taumafaiga i le ofoina atu o le tele o le alofa, taimi, popolega, fesoasoani, taitaiga, ma le taulai atu i le mea ou te mafaia, ia [ou] aoao atu mataupu faavae sa’o i la’u fanau ma fanau a la’u fanau. E aofia ai le aoaoina o i latou faapea o filifiliga e i ai taunuuga—lelei ma leaga.

O nisi taimi i le avea ai ma matua, tatou te see atu ai i le tiute o se pule e taumafai e pulea a tatou fanau aua tatou te faamoemoe i se taunuuga [tatou te] manaomia. O le faafitauli i lenei faiga, e tetee e tamaiti le fai faamalosi po o le fosi, ae maise lava pe a faasolo ina matutua atu. O le a sili atu lo tatou tauaogaina i le faaitiitia o lo tatou avea e pei o ni pule, ae faateleina ona tatou avea o ni faiaoga, faufautua, ma taiala. O lona uiga tatou te aoaoina a tatou fanau i mataupu faavae sao ma, pe a faatagaina ai e lo latou matutua ma aafiaga, ia faaauau ona tuuina atu ia i latou ni avanoa sili atu e fai ai filifiliga ma selesele o latou taunuuga.

I le aiga faatulagaina lelei, o matua i se tulaga faamoemoeina e faamalolosia o latou aiga. O le uiga o lenei mea, e te mafaufau loloto e le aunoa ma na o oe lava, i manaoga o tamaiti taitoatasi ma iloilo e faatatau i manaoga tuufaatasi o le aiga. O le toatele o i tatou e tali atu e le aunoa i luitau o le olaga. O le pisi i fuafuaga ma mea e fia fai o le olaga e mafai ona faigata ai ona filifili lelei pe o le a se auala e te manao e te ola ai ma tali atu ai i manaoga ma mea e fia fai o lou aiga. O le uiga o lenei mea, e mafai e tulaga, o isi tagata, po o mausa tuai ona faatonuina ai le auala e te tali atu ai i se tulaga nai lo lou filifili pe o le a faapefea ona e taulimaina. E le tau fai atu, o na ituaiga o tali e masani ona oo atu ai i tulaga le fiafia ona ua tatou le ausia o tatou gafatia e sili ona lelei.

O se tasi o auala lelei lava e mafai e matua ona faamalosia ai o latou aiga o le faatulaga o se taimi faapitoa i vaiaso taitasi e talanoa ai pe o a mai le tulaga o le aiga. Ou te faaigoaina o le “taimi o le talanoaga faaleaiga.” O le faatulagaina o le taimi o le talanoaga faaleaiga, o le a oulua tautino atu ai ma lou toalua ia oulua manatunatu e le aunoa i manaoga o lou aiga. E te fatuina ai foi le taimi e mafaufau ai i suiga e ono moomia ona outou faia ma lo outou aiga. Afai o oe o se matua toatasi, e mafai ona e fuafuaina se taimi i vaiaso taitasi e te mafaufau loloto ai ma tatalo e uiga i lou aiga.

O le faamoemoeina o lou taulai atu i lou aiga o lona uiga foi o loo e mafaufau i le aafiaga o lau talanoa atu po o lou le talanoa atu i lau fanau. O le avea ai ma ni matua, e amata ai ona e auina atu ni savali e uiga i ou lagona i lau fanau mai le taimi e fananau mai ai. O nei savali e aofia ai au upu, amioga, ma uiga, e tusa pe na e mafaufauina pe leai. O nei savali uma e fatuina ai le vaaiga a le fanau ia i latou lava.

O faataitaiga o savali e le mafaufauina e ui ina e masani ona leaga e aofia ai le le amanaiaina po o le le faapalepale i se tamaitiiti. Afai ua e pisi tele ua le maua sou taimi faatasi ma lou atalii po o le afafine, atonu o loo e auina atu le savali “E faaletaua tele oe ia te au.” Ia, manatua, o nisi taimi e leai sau mea e mafai ona fai i le pisi, ia aua e te soona mafaufau mamafa tele i lenei mea. Ae ia manatua e taua ona auina atu ni savali fuafuaina ma le mautinoa e faafiafia ai lau fanau ma ia iloilo mai lea taimi i lea taimi po o a savali o loo e auina atu ina ia mafai ona e fetuunaia pe a manaomia.

O a ni savali e te manao e auina atu ma le iloa lelei i lau fanau? E te manao ia latou iloa e te alofa ia i latou ma o loo e mafaufau ia i latou? Afai e te fuafua mamao, e masani ona mafai ona e auina atu ni savali lelei e tusa lava pe foliga mai e faigata. Mo se faataitaiga, a faapea e tatau ona e alu e te faigaluega i aso taitasi a o lei feala lau fanau. Mafaufau i le te’i ma le fiafia o se tamaititi pe afai e te faia sina faailoga puupuu i se pepa lanu ma faapipii i vae o lona moega, ina ia avea ma se mea muamua lava e vaai i ai lau tama pe a ala ae. Atonu e faitauina faapenei le faailoga: “Talofa! E alofa Papa ia te oe! Ta feiloai nanei. O le a ta taaalo pe a ou foi mai i le fale!” O lena ituaiga savali mautinoa e mafai ona i ai sona aafiaga tumau ma mamana mo le lelei.

I le aiga faatulagaina lelei, e matuai taua ai lava sootaga. O se manatu manaia le suesue e le aunoa o le tulaga o sootaga taitasi i totonu o le aiga. E te le iloa lava se taimi atonu e aliae ai se manaoga faapitoa e le’i taulimaina, lea po o le a se mafuaaga e le’i tauina atu ai e lau fanau ia te oe. O le faalogologo ma le totoa ma ia nofouta i le Agaga, atonu o le a iloa ai le tulaga o i ai lau fanau ma po o a foi ni o latou manaoga.

O le mea moni, o lena tulaga e aliae ai se fesili: a e iloaina ua i ai se tasi o lou aiga o loo manaomia se fesoasoani a le o le lua sootaga po o se sootaga ma se isi tagata, e faapefea ona e fesoasoani ia faaleleia ia mea? E tasi le mea ua ou iloaina o sootaga e masani lava e le faafuasei ona solosolo lelei; ae, e faaleleia pe a tatou faaaogaina lena taunuuga o se mea e tatau ona faamuamua.

Taumafai e faaalu le taimi i le sootaga i ni auala e iloagofie. O nisi nei o mea sa ou taumafaia atonu o le a aoga ia te oe: talanoa faatasi; taaalo faatasi; faaalu se taimi ia na o oe ma le taitoatasi o lau fanau; auina atu ni tusi, kata, po o faamatalaga e faasoa atu ai lou alofa; tuu atu ni upu faamalo; fai se mea malie ma e lei mafaufauina; fai atu, “Ou te alofa ia te oe”; faalogo i le isi tagata; fai atu ia te ia e fesoasoani atu i sau galuega; fefaasoaai i lagona patino. O nei mea uma e manaomia ai lou aafia patino i mea o loo faia e le isi tagata. A uma lena, ia talanoa e uiga i au taumafaiga faatasi ma lou toalua i le taimi o le talanoaga faaleaiga. Atonu o le a e te’i i le tele o aafiaga e mafai ona faia e au uunaiga lelei.

I le aiga faatulagaina lelei, o matua o ni faiaoga malolosi. O Atamu ma Eva o ni faataitaiga lelei ia o matua i le avea ai ma ni faiaoga lelei. Mo se faataitaiga, “… Atamu ma Eva … sa la faailoa atu ia mea uma i o la atalii ma afafine” (Mose 5:12). Sa la aoaoina le la fanau i mataupu faavae o le talalelei, e pei o le ata o le faaolataga ma le taua ma faamanuiaga o le tausia o poloaiga. Ua ia i tatou foi lena lava tiutetauave e tasi ia aoao a tatou fanau e le gata i tomai o le olaga ae faapea foi o le talalelei. Afai tatou te tuua le aoaoina faaleagaga o a tatou fanau sei o tatou avanoa pe tuu atu i se isi tagata, ua tatou talia se tulaga matautia o le a latou le aoaoina mea o le a faapea ona aumaia ai ia i latou le fiafia moni.

O le uiga o lena mea e tatau ona tatou mafaufau po o a mea o le a tatou aoaoina atu ma o le a foi le auala e aoao atu ai. Mo se faataitaiga, a faia se taimi o le talanoaga faaleaiga, atonu e te ono fesili, “O le a se mea tatou te mananao e aoao atu i lo tatou aiga i isi masina o i luma atu? E faapefea, o afea, ma o fea tatou te mananao e aoao atu ai?” Mafaufau e tusi i lalo tali e avea o ni sini faaleaiga ma faapipii i se mea e iloagofie atu ai ina ia e manatua ai. Ona e mulimuli lea i ai ma au sini.

O le a se isi mea e te ono aoaoina atu? Soo se mea lava e te manatu e manaomia ona aoaoina e lou aiga. O nisi o autu e aofia ai le faaaloalo, faamaoni, tatalo, suesueina o tusitusiga paia, tupe ma le aloese mai le aitalafu, avafatafata i totonu o le aiga, auala e faaaoga lelei ai le taimi, auala e pulea ai lagona ita, o le taua o aoaoga, ma le manaomia e tagata uma o le aiga ona fai o latou tiute i le fale.

O aoaoga tauaogaina e mafai foi ona tupu i fafo atu o tulaga aloaia po o aoaoga tuusao. O aoaoga e le tuusaoina e tupu pe a e aoao atu e aunoa ma le faaaogaina o upu. O le mea moni, atonu e te le o i ai foi i le taimi e fai ai le “aoaoga”! Mo se faataitaiga, ou te tuuina i luga ata e faatusa i ai uiga ou te manao e mafaufau i ai la’u fanau, e pei o se ata o paionia o loo malaga i le matagi kiona e faatusaina i le le fiu pe a oo mai mea faigata. O loo i ai foi ni a matou ata taitasi e 29 o le fanau a le ma fanau o loo tautau faasolo i le puipui o le potu malolo i lo matou fale. E ui lava ina leai ni faaupuga tusitusia i nei ata, ae o aoaoga vaaia e aumai ai lava le tele o manatu. E le mafai lava ona misi e tagata. O ata e auina atu ai le savali o le fanau a le ma fanau o se vaega taua o lo maua aiga.

I le aiga faatulagaina lelei, e taitai ai matua e ala i faataitaiga. O tamaiti e vaavaai pea ma matau pea i a tatou amioga, e tusa lava pe tatou te iloaina pe leai. I lo’u tiute o se tama, e fai lava ma ou iloiloina au amioga e ala i lo’u fesili ifo ia te au lava, “Mata e mafai ona ou fautuaina atu i la’u fanau ia latou mulimuli i la’u faataitaiga i nofoaga faitele ma tulaga patino foi?” Afai o le tali o le leai, ou te faia ni faasaoga i mea o loo manaomia ai.

O nisi nei o fesili na ou fesili ai ia te au lava:

• Pe ou te manao i la’u fanau ina ia onosai? Ioe, o lea ou te taumafai ai lava ia ou onosai ia i latou i le mea e gata ai lo’u mafai.

• Pe ou te manao i la’u fanau ina ia faato’ato’a, fiafia, ma aoao ia fiafia i le olaga? Ioe, aua ou te talitonu o nei uiga e taua i le atiina ae o ni sootaga manuia ma le fiafia. Ou te taumafai ia matou maua ni taimi o mea malie ma la’u fanau i le tele e mafai ona ou faia ai.

• Pe ou te manao i la’u fanau ia faitau i tusitusiga paia ma tusi lelei? Ioe, o lea ia ou vaai ai lava o latou faitau, ma ou faitau atu ia i latou.

• Pe ou te manao i la’u fanau ina ia manatu popole i a matou sootaga faaleaiga? Ioe, o lea ou te sogi ai ma fusi ia i latou, ataata ia i latou, faalogo ia i latou, taaalo ma i latou, ma fefaasoaai ma i latou i aafiaga patino.

Manatua, e mananao a tatou fanau i o latou matua e fai se faataitaiga o se tagata o le e i ai sona mafaufau manino mo le taitaiga e uiga i mataupu faaletagata lava ia faapea ma mataupu faaleagaga. O i tatou o matua e tatau ona tatou ola agavaa mo le taitaiga a le Agaga Paia i taimi uma, ae maise lava pe a oo mai ni mea faigata.

Ma le mea mulimuli, i le aiga faatulagaina lelei, e aoao e matua a latou fanau i le faatuatua i lo tatou Tama Faalelagi ma i le Alii o Iesu Keriso. O lenei faatuatua o le a faatuina ai se faavae mautu ma mausali mo le ola ai o le aiga, lea e le mafaatusalia i se isi lava auala. Ma o se poloaiga foi mai lo tatou Tama Faalelagi. E faatatau i lo tatou tiute i a tatou fanau, ua aoao mai ai le Tupu o Peniamina “tou te aoao atu ia te i latou ia savavali i ala o le upu moni ma le faautauta; tou te aoao atu foi ia te i latou ia fealofani, ma auauna le tasi i le tasi” (Mosaea 4:15).

Atonu o le mea aupito sili ona taua o le a tatou faia i le olaga, o le aoao lea o tagata o o tatou aiga ia i ai le faatuatua ia Iesu Keriso ma Ana aoaoga ma ia tausia poloaiga. Fai mai le “O Le Aiga: O Se Folafolaga i le Lalolagi: E maua le fiafia i le olaga faaleaiga pe a faavae i aoaoga a le Alii o Iesu Keriso.”¹ Aoao lau fanau i mataupu faavae sao e ala i le upu, i faataitaiga, ma e ala i le Agaga a o e tuuina atu lau molimau ia i latou.

Manatua ia e faapalepale ia te oe lava ma tagata o lou aiga. O sootaga e masani lava ona faaleleia i vaega, ae le o le isi aso e sosoo ai. O le faamalolosia o i latou e manaomia ai le taimi ma taumafaiga. Ae ui i lea, a o e taumafai ia maua se aiga faatulagaina lelei e faavae i aoaoga a lo tatou Tama Faalelagi ma Iesu Keriso ma Lana talalelei toefuataiina, o le a e tuuina atu i lou aiga le avanoa sili e mafai ona e maua ia tutupu vavalalata faatasi ai ma ia faafetauia ai luitau ma se lagona sili o le fealofani ma le fiafia.