Iren Mahsen en Padahk en Pas, SENWERI 2010
En Uhtohrada
Padahngki iren pwuhk sarawi oh lepin mahsen pwukat de, ma mie anahnepe, ehu padahk tohrohr me pahn kapaiada lih akan me komw kin pwarek. Kihda kadehde en padahko. Luke irail akan me komw kin pwarek en ehukihda soahng kan me re pehmehr oh sukuhlkidahr.
Dahkot Uhtohrohr?
“‘Uhtohrohr wehwehki en doadoahngki atail pai kan koaros sang Samatail Nanleng en apwalih pein kitail oh atail peneinei kan oh en pein apwaliala atail kahpwal kan.’ Emenemen kitail ahniki pwukoa en nantihieng wetsang kahpwal kan mwohn arail leledo oh en esehla powehdi kahpwal kan me kin leledo. …
“Ia duwen atail kin uhtohrada? Kitail kin uhtohrada sang ni alehdi wehwe me mwahu oh itar, sukuhl, oh esehla wadawad oh nting; sang ni epwel mwahu en mwohni oh pai kan, sang kehlail en pali ngehn, kaunop ong mwekid karuwaru kan oh kahpwal teikan; oh sang ni ahniki roson mwahu en paliwar oh pali en ehuong aramas oh pali en madamadau.”1
Julie B. Beck, President lap en Pwihn en Sawas en Lih.
Pwukoa nan Rongamwahuo
“Ni atail kin apwalih mwahu atail mour oh kalaudehla atail kisakis kan oh koahiek kan, kitail kin ahpwete kak uhtohrada sang mahs. Uhtohrohr iei en pwukoahki pein atail keirda en pali ngehn oh paliwar oh pil pwukoahki irail kan me Sahm Nanleng ketkihieng kitail en apwalih. Ihte ma kitail uhtohrohr me kitail pahn kak en uhdahn alasang Sounkomouro ni papah oh kapaida mehteikan.
“E kesempwal kitail en wehwehki me uhtohrohr iei wiepe me pahn elehieng atail lella wasa me kitail men kohla ie. Me kitail keieu nannantihieng iei en duwehla Sounkomouro, oh met pahn pweida ni atail pahn kin papah mehteikan ni sohpeikasal. Atail koahiek en papah kin laudla de tikitikila sang ni uwen atail uhtohrohr.”2
Elder Robert D. Hales en Pwihn en Wahnpoaron Ehk-riemeno.
“Uhtohrohr iei wahn atail doadoahk oh iei me wia poahsoan en koaros mwekid en sawas de welfare. E wia ehu pali kesempwal en atail roson en pali ngehn oh pil paliwar. Me pid padahk wet, President Marion G. Romney[1897–1988] mahsanih: ‘Kitail koadoahkiada dah me kitail anahne. Kitail apwalih pein kitail oh uhtohrada. Komourla sohte pil kak alahldi sang ehu wiepe de padahk tohrohr. Komourla wia mehkot me pid emenemen, oh kitail anahne pein koadoahkiada komourpatail ni soahng kan me pid paliwaratail oh pil pali ngenitail.’ …
“President Spencer W. Kimball [1895–1985] pil padahngki met me pid uhtohrohr: ‘Epwel mwahu en aramas emen me pid pali en ehuong aramas, pali en madamadau, pali ngehn, paliwar, de pali en mwohni wia pein ah pwukoa, keriau pwukoahn ah peneinei, oh kesiluh pwukoahn Mwomwohdiso ma e wia emen towe me loaloapwoat.’”3
President Thomas S. Monson.
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen Visiting Teaching Message, January 2010. Pohnpeian. 09361 885