Nomu Vakavakarau Vakayalo

“Na kena dina, kevaka e sega ni vavaku titobu vinaka na noda vakabauta kei na ivakadinadina tudei ni ka dina, ena dredre ni da vorata rawa na cagilaba kei na cagi batabata ni veika butobuto ena dau yaco mai vei keda.

“Oqo na bula ni veivakatovolei, na gauna meda vakadinadinataki keda kina ni da sa kilikili me da lesu vua na Tamada Vakalomalagi. Na noda vakatovolei, eda na sotava kina na bolebole kei na veika dredre. Oqo ena rawa ni voroki keda, ka rawa ni kakaca ka kasere na iubi ni yaloda—oqori, kevaka e sega ni vavaku titobu vinaka na noda vakabauta, ka sega tu ni vakayavutaki dei vei keda na noda ivakadinadina.”¹

“Ni da vakasaqara na veika eda vinaka duadua kina, e vica na ka eda na taroga kina na noda vakanananu: Sa kequ ituvaki dina beka au gadreva oqo? Au sa volekata sara beka na iVakabula mai na kena e nanoa? Au na voleka cake sara beka e ni mataka? Au sa yaloqaqa tiko beka meu vinaka cake sara? …

“Era yaco mai na veiyabaki ka ra sa sivi yani, ia sa ka uasivi duadua tikoga na kena gadrevi e dua na ivakadinadina ni kosipeli. Ni da toso yani ki na veisiga ni mataka, meda sa kakua ni guilecava na veika eda sa vulica mai na veika sa yaco oti.”²

“E nomu duadua ga na veivakalougatataki ni peteriaki ka nomu vakataki iko ga. Ena rawa ni leleka se balavu sara, rawarawa se bibi. Na veivakalougatataki vakapeteriaki e sega ni vakatau ki na kena balavu se vosa e cavuti kina. E vosa tiko kina na Yalotabu me baleta na kena ibalebale dina. Na nomu vakalougatataki e sega ni dodonu me laki lobiki ka laki vunitaki tu. E sega ni dodonu me vakawaqataki se tabaki vakaivola. Ia, me wiliki. Me na karoni. Me na vakamuri. Na nomu veivakalougatataki vakapeteriaki ena vakararamataki iko ena veibogi buto sara. Ena dusimaki iko ena veigauna rerevaki ni bula oqo. … Na veivakalougatataki vakapeteriaki sai koya na nomu Liaona me vakatakilakilataka vei iko na nomu ilakolako ka dusimaka na nomu salatu. …

“Sa gadrevi meda vosota tiko ni da vakaraica, waraka, ka cakacakataka tiko e dua na veivakalougatataki sa yalataki tu me yaco mai.”³

“Mo nanuma tiko ni ko sega ni lako duadua tiko. … Ni ko lako curuma na bula oqo, mo na lako tikoga ena rarama, ka ra na yali yani e dakumu na iyaloyalo buto ni bula oqo. …

“Niu dau wilika na ivolanikalou meu vakauqeti kina, e dua na vosa sa dau tudei tu ga ena veigauna kece sara. O ya na vosa ‘lako mai.’ E kaya na Turaga, ‘Dou lako mai vei au.’ A kaya o Koya, ‘Dou vuli vei au.’ A kaya talega o Koya, ‘Lako mai, mo muri au.’ Au taleitaka dina na vosa oqo, lako mai. Sa noqu vakamamasu meda sa lako yani vua na Turaga.”⁴