Parau poro‘i na te Peresideniraa Matamua, Fepuare 2010
Ia vai ineine noa i te pae varua
E a‘o na to tatou peropheta
E niu no te faaroo
« Mai te mea e aita to tatou e niu hohonu no te faaroo e te hoê iteraa papû pautuutu maitai no te parau mau, ua riro ïa ei fifi no tatou i te aroraa i te mau vero ino e i te mau mata‘i to‘eto‘e o te ati o te tae mau mai i ni‘a ia tatou tata‘itahi.
« Ua riro te tahuti nei ei tau no te tamataraa, ei taime no te faaite i to tatou iho ti‘amâ no te ho‘i i mua i te aro o to tatou Metua i te Ao ra. Ia tamatahia tatou, e ti‘a ia tatou i faaruru i te mau faatioraa e i te mau fifi. E nehenehe te reira e faaturori ia tatou, e te vairaa o to tatou varua ia haaafafa e ia topa ti‘a’tu – te reira, mai te mea aita to tatou niu no te faaroo, to tatou iteraa papû no te parau mau i mau maite i roto ia tatou ».1
A haapii mai i te mau haapiiraa no te tau i ma‘iri
« I roto i te imiraa no to tatou iho maitai, e rave rahi mau uiraa e arata‘i nei i to tatou feruriraa : Ua riro anei au ei taata o ta‘u i hinaaro ia riro mai ? E mea fatata anei au i te Faaora i teie mahana i to nanahi ra ? E fatata hau atu anei au ananahi ? E rohi anei au no te taui ia maitai roa ?
« Ua tae mai te mau matahiti e ua reva ê te mau matahiti, tera râ te hinaaro no te hoê iteraa papû o te evanelia te vai tamau noa ra ïa. A haere noa ai tatou i mua i roto i te tau, eiaha tatou e haamo‘e i te mau haapiiraa no te tau i ma‘iri ».2
To outou iho Liahona
« No outou e no outou ana‘e to outou haamaitairaa patereareha. E mea poto anei e aore râ e mea roa anei, e mea ohie e aore râ e mea hohonu anei. Te haamaitairaa patereareha, e ere ïa tei te roa e aore râ, tei te reo. Na te Varua râ e horo‘a i te auraa mau o te reira. Eiaha to oe haamaitairaa ia tufetu-maitai-hia e a hunahia ai. Eiaha te reira ia tuuhia i roto i te vairaa hoho‘a e aore râ ia nene‘ihia. Ia tai‘ohia râ te reira. Ia herehia te reira. Ia peehia te reira. Ia ite to outou haamaitairaa patereareha ia outou na roto i te pô uriuri. E arata‘i te reira ia outou na roto i te mau fifi o te oraraa. … Ua riro to outou haamaitairaa patereareha ei Liahona no outou iho no te reniraa i to outou haere‘a e te arata‘iraa i to outou e‘a …
« E titauhia te faaoroma‘i a hi‘o ai, a tia‘i ai, e a ohipa ai no te hoê haamaitairaa tei fafauhia ia tupu mai ».3
Haere mai Ia’na ra
« Eiaha ia mo‘ehia e aita outou e haere ra outou ana‘e. … A haere noa ai outou na roto i te oraraa nei, a haere noa na te maramarama, e e ma‘iri ti‘a’tu te mau ata o te oraraa nei i muri ia outou…
« A huri ai au i ni‘a i te mau papa‘iraa mo‘a no te titauraa i te faaururaa, ua fâ noa mai te hoê ta‘o taa ê i te mau taime atoa. Oia ho‘i te ta‘o ra ‘haere mai.’ Ua parau te Fatu, ‘haere mai ia‘u nei.’ Ua parau Oia, ‘haere mai e haapii no‘u nei.’ Ua parau faahou atu Oia, ‘haere mai, e a pee mai ia‘u.’ E mea au na‘u teie ta‘o, haere mai. Ta‘u piiraa oia ho‘i ia haere tatou i te Fatu ra ».4
© 2009 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/09. Parau faati‘a no te iritiraa : 6/09. Iritiraa no First Presidency Message, February 2010. Tahitian. 09362 895
Haapiiraa no roto mai i teie parau poro‘i
Haapiiraa, Aita e Piiraa Hau A‘ete vai ra : « Aita te hoê orometua haapii maitai e feruri e,… Eaha râ ta‘u e haapii i teie mahana ? tera râ e mea hau a‘e ‘nahea vau ia tauturu i ta‘u mau piahi ia ite i te mau mea o ta ratou i hinaaro ia ite ?’ » (1999, 61). No te tauturu i te mau taata ia haapiihia na roto mai i teie tuhaa, a feruri i te horo‘a’tu ia ratou i te tahi api parau e te mau peni tara e ia vaiiho ia ratou te taime no te tai‘oraa i te mau parau a te peresideni Monson e ia papa‘i i te mau parau mau i itehia e ratou no ni‘a i te ineineraa ratou i te pae varua. No te mau tamarii apî e nehenehe ta ratou e papa‘i i te mau hoho‘a no te mea o ta ratou i haapii mai. A ani ia ratou ia faaite mai i te mea o ta ratou i papa‘i e aore râ i faahoho‘a mai.