Aita e Taata Maitai a‘e

Ua hinaaro noa vau ia riro mai ia Nephi: haapa‘o maitai, faaroo rahi, e te î i te varua. I roto i to‘u hi‘oraa ua riro o Nephi ei hi‘oraa rahi roa no te maitai. Te vai ra te tahi mau mea ta‘u i feruri hau atu i te hinaaro ia tupu i te paari e ia riro mai ia’na te huru – e aore râ, ia haamata noa a‘e i te farii i te hoê tuhaa o to’na maitai rahi.

I te hoê mahana ua fifi rii to‘u mana‘o, na roto i te tahi mau mana‘o huru ê. E mea rahi to‘u mau hinaaro e ta‘u mau opuaraa. Mai te huru ra râ e, aita roa e matara ra hoê a‘e ohipa. Na roto i te ta‘i o te ti‘aturi ore, ua faaite au i teie mau mana‘o i to‘u metua tane. Ua ti‘a ‘oi‘oi a‘e ra oia i ni‘a, haere atu ra i te vairaa buka, e huti maira i te hoê o ta’na mau Buka a Moromona, Ma te parau ore i te hoê parau, ua iriti i te buka i te 2 Nephi 4 e haamata a‘e ra i te tai‘o na te irava 17.

Ua parare a‘e ra te to‘eto‘e i roto i to‘u tino mai te uira te huru i to‘u faarooraa i teie mau parau mana: « Auê hoi au o te taata ati rahi e ! » Ua horo to‘u mana‘o. Nahea o Nephi, to‘u aito e te hi‘oraa maitai, i parau ai e « taata ati rahi » ? Mai te mea e taata ati rahi oia, eaha ia vau nei ?

Ua tere faahou te uira i roto ia‘u a tai‘o ai to‘u papa i te irava 28: « A ara, e ta‘u varua ! Eiaha’tu e taiâ i roto i te hara ». Mai te huru ra e, ua reva ê te mau ata pouri i roto i to‘u feruriraa e ua fâ mai te mahanahana e te hanahana o te ra‘i ninamu e o te mahana maramarama. Aita e nehenehe ia tatara i te huru o ta teie irava haamaramaramaraa i to‘u varua. Te vai ra te tahi mau irava tei faaî ia‘u i te ti‘aturi, te faaururaa e te oaoa mai ta teie irava i horo‘a mai nei.

I roto i te irava 30, ua parau o Nephi i te mau mea o ta‘u i feruri, i roto râ i te mau parau faahiahia mau: « E oaoa ta‘u varua ia oe, e ta‘u Atua , e te Mato e ora’i au ra ». Na teie irava i hopoi mai i te mana‘o no te hau e te aau mehara no te aroha e te here o te Fatu.

Ua tapiri to‘u papa i te buka e ua parau mai e, i te tahi taime, e parauhia teie mau irava te salamo a Nephi. E ua haapii maira oia ia‘u e aita atoa te taata rahi a‘e i ni‘a i te fenua nei i maitai hope roa, e mea ti‘a i teie mau taata ia ite i to ratou mau hapehape, ia ore ana‘e, e riro ïa ratou ei feia te‘ote‘o, e no reira, eita ratou e rahi.

Ua taa a‘e ra vau. E ere no te mea e, e paruparu to‘u aita ïa e ti‘a ia‘u ia riro mai ia Nephi te huru. Te iteraa i to‘u paruparu na te reira i haafatata ia‘u i te huru o Nephi. Ua riro Nephi ei taata rahi mau no te mea, taa ê noa’tu to’na haapa‘o e to’na faaroo, ua riro oia ei taata haehaa e te hinaaro ia farii i to’na mau hape.

Mai taua iteraa ra, ua tape‘a maitai au i teie mau parau a Nephi. I te mau taime atoa a tai‘o ai au i te reira, e ite au i te horiri e te faaururaa mai te taime matamua a tai‘o ai au i te reira mau parau. Te himene mai nei teie mau irava ia‘u e, e tamahine mau vau na te Atua, o te ti‘a ia farii hau atu i te mea o ta‘u e mana‘o ra. Ua ite au e, mai te mea e mea haapa‘o e e onoono vau i te haere i mua, e vai te mau haamaitairaa faahiti-ore-hia i roto i te vairaa.