Buokan Kamwarakeaia ana Tiibu te teei te Tia Kamaiu

E a tia n tauraki Te Tia Kamaiu ao ni manga uti. A tia n nako Ana Reirei nako Kariraia. A tabe n akawa ni karokoa ae e a bong, bon akea konaia ae e reke. Ngke a roko irarikin taari, n te bwakantaai, aki te roko ni kinaa ae Ngaia. E weweteia, n tuangiia te tabo are ana kabwakaa iai aia karaun, ao ngke a karaoia, a onrake taian karaun. A kawaekoaia n nako ni Kamauria i taari.

A kunea te ai ae kanaeaki ma te ika ae e kukanaki ao te kariki. Ngkanne E anganiia te tua are e a tei ibukira n tatabemanira nako.

“Ao ngke a tia ni katairiki, e taku Iesu nakon Timon Betero, Timon, natin Iona, ko tangirai riki nakon baikai? E taku nakoina, Eng, te Uea, kona ataia bwa I tangiriko. E taku nakoina, Kamwarakeia au tiibu” (Ioane 21:15).

Ana aomata te Atua Aika A Itiaki a mena n taai nako iaan te berita n nabea temanna ma temanna n te maiu n tamnei, ai moarara riki ake a marau nanoia n te eungkerio.

Te ataei e kona ni karaoi bwaai ake e na nabea aia onimaki temwangina. Ataei a kona ni kaoa temanna ae e a tibwa rairaki n roko ma ngaia nakon bootakin te aro. Ataei a kona ni moangare ao ni kamaura kain te aro ae e boou are e rin n te tabo n taromauri ke inanon te kiraati. Ao ngkana ti karaoia, te Tamnei ae Raoiroi ena bon riki bwa raoraora.

Taian taeka ake ti taekin e kona ni kakorakora ke ni kamamara te onimaki. Ti kainnanoa ana ibuobuoki te Tamnei n taekinii taeka are ena kamwarakeira ao ni kakorakoraira.

Ti kona man te ongeaba ae e bebete ni buoka te Uea ni kairiia ana tiibu, Ana tiibu, nako Nanoni bain mweengana nakon Tamaia ao Tamara.

I kakoaua bwa Iesu bon te Kristo. I ataia bwa E maiu. I kakoaua bwa E kairiira n te mwakuri aei—Ana mwakuri—ni kakoroa bukin te maiu are akea tokina nakoia natin Tamara are ikarawa.