Au kurabui sara ga niu sa mai wilika ni me tekivu ena Janueri 2010 sa na dua tiko na noda Liaona, vou. Na mekesini oqo sa bau noqu itakele tu ena kosipeli, vakatekivu mai na gauna au a papitaiso kina niu a se yabaki 17. A vaqaqacotaki cake kina na noqu ivakadinadina malumalumu niu dau wilika na veika era sotava na lewenilotu kau kila ni sega ni yaco duadua ga vei au. Au dau taleitaka vakalevu na mekesini au sa kumuna rawa, ka ni ra tiko kina na itukutuku sa vakalou ka dau vukei au niu sotava na veika dredre kei na leqa eso.

Ia oqo dou sa solia mai e dua na Liaona e kaukauwa cake ka rabailevu, ka dina talega me vakataka na kena imatai au a wilika ena 1992. Mai na vu ni yaloqu mai loma au sa vakavinavinaka vei kemudou.

Na Liaona sa dua dina na veivakalougatataki levu kau kune marau kina. E vukea na noqu sotavi ira taucoko na lewenilotu e vuravura, kila na veika e baleta na nodra matanitu kei na itovo vakavanua, ka vakamamautaki mai na nodra vakabauta. Na mekesini sa dua na ivurevure ni veika vakayalo e levu kei na kaukauwa, ka vukei au meu vinaka cake sara.

E sega soti sara na veisiko ka lutu sobu sara na lako i valetabu ena neitou tabanalevu. Me vaka niu iliuliu ni veisiko ki na vuvale ka daucakacaka e valetabu, au a masu me sa yaco e dua na veisau. Au a vakayagataka na vosa ni koniferedi nei Elder Richard G. Scott, “Sokalou e Valetabu: Na iVurevure ni Kaukauwa kei na Qaqa ena Gauna ni Leqa” (Liaona, Me 2009, 43) meu vosa ena soqoni ni sakaramede kei na iSoqosoqo ni Veivukei. E tarai na yalodra na lewenilotu ena noqu tabanalevu. Sa voleka sara ga ni 100 na pasede na veisiko ki na veivuvale, ka vuqa era sa gole tiko ki valetabu ka vakayacora na ituvatuva a vakamacalataka o Elder Scott ena nona vosa. Sa udolu na vakavinavinaka vei Elder Scott ena nona vosa momona ka vakakina vei kemudou ena vuku ni Liaona.