Antap long Hae Graon, Wan Lukluk I Kamdaon

Olsem wan yut mi bin gat plante janis blong mekem ol baptaes blong olgeta dedman long San Diego Kalifonia Tempol. Nomata we mi stap gat wan gudfala eksperiens oltaem, wan trip i bin defren tumas long ol narafala trip.

Mi bin gat 16 yia, mo smol sista blong mi i jes gat 12 yia nomo mo i stap mekem fas trip blong hem blong i mekem ol baptaes blong olgeta dedman. From hemia i fas taem blong hem, mifala i bin go wokbaot aotsaed long tempol afta we mifala i bin finis.

Ol tempol graon ia oli gat sam naesfala poen o ples blong lukluk ples, long wanwan saed blong hem, mekem se mifala i bin wokbaot i go long ol poen ia nao. From se San Diego Tempol hem i stap narasaed long wan bisi rod, taem yu stanap long wan poen blong lukluk ples, yu save lukluk stret i go daon long bigbigfala rod.

Taem mi stanap long ol hae graon blong tempol we i hae moa long dei ia, hem i bin givim long mi wan niufala lukluk long laef. Mi stap lukluk i go daon long wol wetem ol trak blong hem we oli stap spid, ol stoa senta we i fulap wetem ol man, mo ol rod saen we oli raetraet long hem.

Hem i long taem ia nao we tingting ia i bin kam long maen blong mi: “Yu no wantem blong kam pat blong hemia; laef hem i no abaot ol samting ia.” Oltaem, oli bin stap tijim mi se stamba tingting blong laef hem i blong gobak blong stap wetem Papa blong yumi long Heven mo kam olsem Hem. Mi bin save se mi no nidim ol samting blong wol ia blong kasem stamba tingting ia.

Mi tanem raon mo lukluk naesfala tempol ia, mo mi bin glad tumas from save blong gospel mo tingting we gospel i bin givim long mi. Mi save se long medel blong ol samting we i mekem man i konfius mo long medel blong wan giaman wol, mi bin faenem hae graon we mi hae moa blong stanap long hem.

Long dei ia long tempol, mi bin promesem Papa blong mi long Heven se bae mi stanap oltaem long saed blong Hem mo i no long saed blong wol. Nomata wanem wol i sakem i kam long yumi, yumi save winim ol samting ia taem yumi kipim ol kavenan we yumi bin mekem mo taem yumi stanap long ol tabu ples (luk long D&C 87:8).