Kōjeram̧m̧an ko an Tampeļ

Ij maron̄ kememej wōt ke jinō im jema rar bōk baam̧le eo am n̄an Tampeļ eo ekāāl em̧ōj kalōke, m̧oktata ilo Europe, n̄an erom juōn baam̧le n̄an indeeo. Iaar 16 dettan innām im diktata iaan emen ajri ro. Kōm̧ kar bukelōlō ippān doon ilo ļokatok n̄an liāp ioon laļ in jān kajoor eo an priesthood, ippān juōn kalim̧m̧ur eo eaiboojoj bwe kōm maron̄ liāp n̄an indeeo. Ij jamin naaj meļo̧kļo̧k iien in eaiboojoj.

Āinwōt juōn ļaddik ikar bwiļōn̄ ke kōm̧ kar kijoone tōrere ko n̄an liāp āinwōt juōn baamļe. N̄an n̄a ej kōkkaleik iaļen jerbal ko an Tampeļ ipeļaakin kōta ko ilo laļ in n̄an boktok kōjeram̧m̧an ko n̄an indeeo n̄an aolep armej ro rej jukjuk im amn̄ak ioon laļ in. Tampeļ ko an Kabun̄ eo an Jisōs Kraist im Armej ro Rekwojarjar ilo Raan ko Āliktata rej lukkuun in kalōki n̄an jipan̄ aolep laļ eo, laļ eo jej jokwe ie, manit eo, ak kien eo imminene kake.

Tampeļ ko rejjab bōk eddo in kam̧ool bwe men ko rem̧m̧an renaaj waļo̧k. Būreejtōn George Q. Cannon (1827–1901), Rikakpilōklōk eo Kein Kajuōn ilo Būreejtōnji eo Kein Kajuōn, eaar ba, “Aolep pedped in dōkā me ej pād n̄an juōn Tampeļ, im aolep Tampeļ ko rededeļo̧k … kadikļo̧k kajoor eo an Satan ioon laļ in, im kōlapļo̧k kajoor eo an Anij im ko āinwōt Anij.¹

Ilo tōre eo kajjojo tampeļ rej kōļapļo̧k kareel ko an men ko rejimwe ioon laļ in, kōjeram̧m̧an ko rem̧m̧an, aet rej itok n̄an ro rej etal n̄an tampeļ eo. Ijo im jenaaj bōk eļōn̄ ļo̧k meram im jeļāļo̧kjeņ im kōm̧m̧ane bujen ko me, eļan̄n̄e ļoore, jipan̄ kōj etetal ilo ial in rikaļoor. Ilo kōkaduki im kalikare, tampeļ eo ej katakin kōj kōn kōttōpar ko rekwojarjar an mour im jipan̄ kōj bōk tōl ilo jetōb im kanniōk.

Jej jab etal n̄an tampeļ eo n̄an kōj make wōt, ijo wōt ke. Kajjojo iien jej deļōn̄e em̧ kein reļļap im kwojarjar, jej kōm̧mane juōn waanjon̄ok ilo kwojarjar, jerbal in pinmuur kōn lo̧mo̧r kar kōm̧m̧an bwe pojak n̄an aolep ajri ro nejin Anij āinwōt juōn tōpōrakin Pinmuur eo an eo Emake wōt Jitōn Bōro nejin Jemed. En̄in ej juōn jerbal in jab watōk im jerbal in jipan̄ ekwojarjar im juōn eo me ej kōtlok kōj bwe jen bōk koņaad ilo jerbal in aiboojoj im erom rilo̧mo̧r ilo Toļ Zaion.

N̄an ro rejjab maron̄ etal n̄an tampeļ ko kiiō kōn jabdewōt wūn ko, Ij rojan̄ eok n̄an kōm̧m̧ane aolep men kōn kajoor eo am̧ n̄an dāpij juōn peba in mālim an tampeļ ekāāl. Peba in mālim an tampeļ ej juōn kōkkale kōn ad lukkuun tōmak im kile ko n̄an jerbal n̄an Irooj. Ej juōn kōkkaļe in ad iakwe n̄an Irooj, āinwōt an kar Jisōs katakin, “Eo kien ko Aō ippān,im ej kōjparoki, e in ej iakwe Eō. Im eo ej yokwe Eō Jema enaaj yokwe e im inaaj yokwe e im Inaaj kwaļok Eō n̄an e.” (Jon 14:21).

Ilo tōre eo laļ ej wōnm̧aanļo̧k n̄an aer erom aiboojoj kōn em̧ kein rekwojarjar kōm̧m̧ane n̄an Irooj, en̄in ej jar eo aō bwe jenaaj kōm̧m̧ane ijo koņaad ilo kepaaktok lan̄ bwe en epaaktoke n̄an laļ in jen ad mour erreo n̄an kabwijer juōn peba in mālim an tampeļ im kōjerbale. Ilo ad kōm̧m̧ane menin, wāppen enaaj lukkuun ļapļo̧k jab wōt ilo mour ko ad im m̧oko m̧ōd ak ilo jukjukin pād ko ad im aolepen laļ in.