Kapai Kan en Tehnpas Sarawi

I lemeleme me sohte wasahkis nan sampah me I kin pehm me I karanih Kauno likin nan ehu Sapwellime tehnpas sarawi kan. Pwehn oaralapiada ngihs pwoat:

Kauno mahsanih:

“Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie:

“A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie:

“Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.”¹

Ong towe kan en Mwomwohdiso en Sises Krais en Souleng en Imwin Rahn Akan, tehnpas sarawi wia wasa me keieu sarawi pohn sampah. Iei nan tehnpas en Kauno, oh duwehtehte me ntingo ni likin tehnpas sarawio kasalehda, tehnpas sarawio iei “sarawi ong Kauno.”

Nan tehnpas sarawi, koasoandi keneinei en Koht kin padahk. Iei nan tehnpas sarawi me inou sarawi soutuk kan kin wiawihda. Tehnpas sarawi kin pwekkitailda, kesepwilkitailda, kesihnen ni duwen dengki pwe koaros en kilang, oh kin idihieng kitail kilohri celestial. Iei tehnpas en Koht. Koaros me kin wiawi loalen dihd kan en tehnpas sarawi kin wia mehkot me kin pwekada oh kihieng soaren aramas.

Tehnpas sarawi iei ong peneinei kan, ehu kisakis keieu kesempwal me kitail ahniki nan mour wet. Kauno inenen kin sansal ni eh kin ketin mahsen ong kitail pahpa kan, kasalehda me kitail ahniki pwukoa en poakohng atail pwoud kan ni mohngiongitail unsek oh en apwalih irail oh neitail serihkan. E ketin kasalehda me doadoahk me keieu kesempwal me kitail kak wia ni atail wia pahpa nohno iei me kin wiawi nan imwatail kan, oh imwatail kan kak wia nanleng, ahpw ni mehlelo ansou me atail kapwopwoud kan kin katengteng nan tehnpas en Koht.

Elder Matthew Cowley me melahr, me wia towe en Pwihn en Wahnpoaron Ehk-riemeno, koasoaiahda ehu ansouo irair ehu en pahpa kahlap men mwurin souwas en Rahn Kaunop ni eh kol pehn nein nah emen serepein oh kamwamwaitih ong ah ipwidi—kaidehn wasahn kilang mahn de kasdo ahpw ni wasa lingan kan likin tehnpas sarawio. Ni ara alehdi mweimwei sang me kin apwalih wasao, ira riemeno aluhlahng wenihmw lapala ko en tehnpas sarawio. Ohlo ndahieng serepeino en kihieng peho ni dihd kehlailo oh mwuri ni wenihmw lapalao. Ni ngihl meleilei e ndahieng serepeino, “Tamataman me rahnwet ke doahke tehnpas sarawio. Ehu rahn ke pahn pidolong.” Kisakis me e kihieng me tikitiko kaidehn kirahka de ais kirihm ahpw irair ehu me kesempwalsang douluhl oh me wereisang—kalahnganki tehnpas en Kauno. E doahkehdi tehnpas sarawio, oh tehnpas sarawio sair ih.

Ni atail pahn doahke tehnpas sarawi oh poakohng tehnpas sarawi, atail mour pahn kasalehda atail pwoson. Ni atail pahn kohla ni tehnpas sarawio, ni atail pahn taman atail inou sarawi kan me kitail kin wiahda loale, kitail pahn kakehng kahpwal koaros oh powehdi kasongosong koaros. Tehnpas sarawio kin kihieng kahrepen atail mour kan. E kin wahdo popohl ong ngenitail kan—kaidehn popohl me kin kohsang rehn aramas ahpw popohl me inou sang Iehros en Koht ni ansou me E mahsanih, “I kihieng kumwail popohl, pein ei popohl me I kihong kumwail: I sohte kihong kumwail nin duwen me sampah wet kin wia. Kumwail dehr nsensuwed, oh pahtou, oh masak.”²

Mie pwoson laud rehn Souleng en Imwin Rahn Akan. Kauno kin ketkihieng kitail ansou mwahu kan en kilang ma kitail pahn idawehn Sapwellime kosonned akan, ma kitail pahn idawehn ahl me Sises en Nasaret ketin idawehn, ma kitail poakohng Kauno ni mohngiong, ngoang, madamadau oh kehlail koaros, oh poakohng mehn mpatail kan duwehte pein kitail.³

I kamehlele lepin padahk audapan “Likih Kauno ni mohngiongomw unsek; dehr koapworopworki mehkan me ke pein lemeleme me ke ese. Tamanda Kauno ni omw wiewia kan koaros, oh e pahn ketin kasalehiong uhk ahl me pwung.”⁴

Iei duwen me kin wihwiawi sangete mahs; oh iei duwen me pahn pweida erein. Ma kitail pahn wia atail pwukoa oh likih douluhl Kauno, kitail pahn audehla Sapwellime tehnpas sarawi kan, kaidehnte ni atail pahn wia tiahk sarawi kan ong pein kitail, ahpw kitail pahn pil ahniki ansou mwahu en wia doadoahk wet ong mehteikan. Kitail pahn poaridi ni pei sarawi kan pwehn wia weliepen me pahn katengtengdi nan katengteng kan en ohl oh lih pwopwoud oh neirail serihkan erein. Mwahnakapw oh peinakapw warohng kan me sounpar 12 kak wia weliepen me melahr akan me sohte ahniki kapai kan en pepdais. Met iei me Sahm Nanleng ketin kupwurki ong kowe oh ngehi.

Sounpar tohto samwalahro, emen patriark me karakarahk oh pwoson, Brother Percy K. Fetzer, alehdi malipilip en kihda kapai kan en patriark ong towe kan en Mwomwohdiso me kin kousoan palio Iron Curtain.

Brother Fetzer kohla nan sapwen Poland nan mwehi rotorot pwuko. Wasa kan en pidohisang nan sahpwo ritidi, oh sohte tohn sahpwo me mweimwei en kohkohla. Brother Fetzer tuhweng Souleng kan en Sehmen me tengala wasao ansou me lain en sahpwo wekidekla mwurin Mahwin Keriauo oh sahpw me irail mihmi loaleo wiahla kisehn Poland.

Me kaun nanpwungen Souleng en Sehmen kan koaros iei Brother Eric P. Konietz, me kin kousoan wasao rehn ah pwoud oh nah serihko. Brother Fetzer kihieng Brother oh Sister Konietz oh seri laud ko kapai kan en patriark.

Ni ansou me Brother Fetzer pwurodo nan United States, e ekerie oh peki ma e kak kohdo mwemweit rehi. Ni ah mwomwohd nan ahi ohpiso, e tepida sengiseng. Dene, “Brother Monson, ni ansou me I kihda pehika pohn moangen towe kan en peneinei en Konietz, I wiahda inou kan me sohte pahn kak pweida. I inoukihieng Brother oh Sister Konietz me ira pahn ehu rahn pwurala nan sapwarail Germany, me irail sohte pahn wie senselki koasoandi mwahl kan en wehi kan me powehdi irail oh me irail pahn katengtengpene duwen peneinei nan tehnpas en Kauno. I inoukihieng neira pwutako me e pahn kapwaiada papah nan misin, oh I inoukihieng neira serepeino me e pahn kapwopwoud nan tehnpas sarawi en Koht. Komwi oh ngehi ese me pwehki sahpwo eh ritidi, ira sohte pahn kak alehdi pweidahn kapai pwuko. Dah me I wiadahr?”

I ndahieng, “Brother Fetzer, I eseikomwi mwahu oh ese me komw wiahier dah me Samatail Nanleng ketin kupwurki ken wia.” Kiht riemeno kelepwikihdi limwahn ahi tehpelo oh widekihiei audepen mohngiongit kan ong Sahm Nanleng, oh kasalehda me inou kei kohieng peneinei loaloapwoat ehu me pid tehnpas sarawi en Koht oh kapai teikan me ansou wet irail sohte kak alehdi. Ihte kelehpw me kak kihda manaman me se anahneo.

Manamano pweida. Inou ehu miehda nanpwungen kaun kan en wein Poland oh kaun kan en Federal Republic en Germany, me mweidehng mehn Sehmen me tengala nan wasao en kak uhd kousoanla nan West Germany. Brother oh Sister Konietz oh neira serihko kousoanla West Germany, oh Brother Konietz wiahla pisop en ward en wasa me re kousoanla ieo.

Peneinei en Konietz pwon kohla nan tehnpas sarawi en Switzerland. Oh ihs me wia president en tehnpas sarawi me kasamwo ira nan likou pwetepwet ni peh kan eh kapapeseng? Sohte emen likin Percy Fetzer—patriark me kihieng ira inouo. Met, nan ah pwukoa en president en Tehnpas Sarawi en Bern Switzerland, e kasamwoh iraildo nan tehnpas en Kauno, pwehn kapwaiada inouo, oh katengehdi ohlo oh liho oh neira serihko ong ira.

Neira serepeino pil kedekedeo pwopwoudila nan tehnpas en Kauno. Neira mwahnakapwo alehdi ah malipilip oh kapwaiada ehu misin.

Ong ekei kitail, atail seiloak ong tehnpas sarawio me inenen keren. Ong ekei tohrohr, re anahne kotehla sehd kan oh mwail kan mwohn arail kak pidolong nan tehnpas sarawi en Koht.

Pahr kei samwalahro, mwohn ehu tehnpas sarawi nan South Africa eh pahn nekila, ni ansou me I iang towehda ehu tiepene en district nan wasa me ansouo kahdaniki Salisbury, Rhodesia I tuhweng president en district, Reginald J. Nield. Ih oh ah pwoud oh neira serepein kaselel kan tuhweng ie ni ansou me I pidolongala nan ihmw sarawio. Irail kawehwehiengie me irail kin wie nekinekid neirail sent kan oh kaukaunop ong rahno me irail pahn kak seiloaklahng tehnpas sarawi en Kauno. Ahpw, mehlel, tehnpas sarawio me inenen doh mehlel.

Ni keimwseklahn aht mihtingo, serepein kaselel pahmeno kapeidekihie duwen tehnpas sarawio: “Ia mwomwen tehnpas sarawi? Ihte me se kilangehr iei kilele.” “Dah me se pahn pehm ni ansou me se pahn pidolong nan tehnpas sarawio?” “Dah me se pahn keieu tamataman?” Erein awa ehu I ahniki ansou mwahu en koasoakihieng serepein pahmeno duwen tehnpas sarawi en Kauno. Ni ahi mwesellahng nan wasahn pihrdahn sounpihro, irail oaloahl, oh serepein me keieu tikitiko nda, “Kitail nek tuhpene nan tehnpas sarawi!”

Pahr ehu mwurin mwo I ahniki ansou mwahu en kasamwo peneinei Nield nan Tehnpas Sarawi en Salt Lake. Nan ehu perehn katengteng meleilei I ahniki ansou mwahu en kapwopwoudih Brother oh Sister Nield ong mour poatoapoat, oh iangahki erein ansou wet. Eri wenihmw ko ritida, oh serepein pahmen kaselel ko, irail koaros likawih likou pwetepwet mwakelekel, pidolong nan pereo. Irail pwoalehdi nohno, mwuri pahpa. Pilen mesarail dirada, oh mohngiongirail direki kaping kalahngan. Se inenen karanih nanleng. Emenemen irail kakete nda, “Eri met kitail wialahr peneinei ehu erein.”

Iei kapai kaselel wet me kin awiawih irail akan me kin kohdo ni tehnpas sarawi. Kitail en koaros momour pwehn warohng, ni peh mwakelekel oh mohngiong mwakelekel, pwe tehnpas sarawi en kak sair atail mour kan oh atail peneinei kan.

Ia uwen doh en nanleng? I kadehde me nan tehnpas sarawi kan e sohte mwahn doh—pwe iei nan wasa sarawi pwukat me nanleng oh sampah kin tuhpene oh Samatail Nanleng kin ketkihieng Sapwellime serihkan Sapwellime kapai keieu lap akan.