Me Tiki ni Nomuni Bula na Valetabu

O ira na cauravou kei na goneyalewa bula kilikili yabaki 12 lako cake sa rawa ni ra lako ki na valetabu ka papitaiso ena vukudra na tubudra era sa mate ka se bera ni papitaiso. E tukuna o Peresitedi Thomas S. Monson na reki ena yaco mai ena vuku ni veiqaravi oqo:

“Ena dua na mataka niu taubale yani ki na valetabu, au raica e dua na ilawalawa goneyalewa, ka ra a vakaitavi tiko ena mataka caca o ya ena papitaiso ena vukudra o ira era sa takali yani. E suasua na uludra. E serau na nodra matadredredre. E vakasinaiti na yalodra ena reki. E vuki lesu ki na valetabu e dua na goneyalewa ka vakaraitaka na lomana. ‘Oqo na siga marautaki duadua ena noqu bula,’ e kaya.”¹

O Jessica Hahn yabaki tinikatolu mai Daphne, e Alabama, a papitaiso ena vukudra eso na tubuna ena Valetabu na Atlanta Georgia. E dina ni taura e lima na auwa na lako ki na valetabu, e kaya ni vakasakiti na veika a sotava kina. “E kauta mai e dua na vakacegu levu ki yaloqu ni rawa meu vakaisulu vulavula ka papitaiso ena vukudra na tubuqu,” e kaya o koya. “Au vakila ni vaka meu sa kilai ira tu oqo.”

Lako ki na valetabu ena kena levu ga o rawata. E kea e rawa ni o vakila kina na reki e kauta mai na noda veivuke ena nodra ciqoma tale eso na veivakalougatataki ni papitaiso.

E vuqa tu na sala me tokoni kina na cakacaka ni valetabu, kevaka sara mada ga e sega ni rawa ni o lako wasoma ki na valetabu. E rawa ni o vulica na veika me baleti ira na tubumu ka raica me caka na nodra cakacaka vakalotu ni valetabu. E rawa ni o raici ira tiko na gonelalai ni ra lako na nodra itubutubu ki na valetabu. Me vaka ni vakanamata vakalevu na cakacaka ni valetabu ki na matavuvale, e rawa ni o cakacakataka mo vaqaqacotaka na nomu matavuvale. Ka na rawa talega ni o wasea vata kei ira tale eso na nomu ivakadinadina ni vale dina sara ni Turaga na valetabu.

Me vaka ni sa rui vanua tabu na valetabu, sa virikotora kina na Turaga na veivakatagedegede cecere me da bula kina ni bera ni da qai rawa ni curu kina. E vakamacalataka o Peresitedi Dieter F. Uchtdorf ni ivakatagedegede e virikotora na Turaga ena taro ni ivolatara ni valetabu e viavia tautauvata ga kei na ivakatagedegede o ni na kunea ena Me iSakisaki ni iTabagone. Ena veigauna vinaka ka vakatalega kina ena gauna ni veivakatovolei levu duadua, na ivakatagedegede eso oqo kei na veidusimaki ni Yalo Tabu ena vukei iko mo digidigi vakadodonu. … Na ivakarau o bulataka kina na ivakatagedegede eso oqo ena tukuni iko kei na vanua o vinakata mo yacova.”²

Bulataka na nona ivakatagedegede na Turaga, o na kilikili kina mo curuma na valetabu. Na nomu gadreva mo curuma na valetabu ena dua na gauna mai muri e rawa ni vukei iko nikua mo gole tani mai na veivakatovolei. “E solia vei iko na vuna mo bula kilikili tikoga kina,” e kaya o Marlon Ruiz, yabaki 16, mai Sunrise, Florida. “Ni o sa vakadavora na takete o ya, o na dau vakasamataka tikoga na veika mo cakava baleta ni sega ni rawa ni o lako ki na valetabu kevaka o sega tu ni kilikili.”

“Au dau raica na valetabu ka vakasamataka meu na vakamau kina ena dua na siga,” e kaya o Annika Reithmeier, yabaki 16, mai Oslo, Norway. “Au kila ni yalayala o vakayacora ena valetabu era yalayala vua na Turaga. Na veika o vulica mai kea ena sega ni veisau ga se yali yani.”

Maroroya toka e dua na iyaloyalo ni valetabu ena dua na vanua mo dau raica wasoma kina, ka vakanamata ki na siga sa na rawa kina mo ciqoma na nomu cakacaka vakalotu ni valetabu.

Ni se qai yabaki 14, a lako o Jody Hazelbaker, mai na American Fork, e Utah, ki na Valetabu na Mount Timpanogos Utah ena gauna a dolavi raraba kina. “Niu curuma na rumu ni yalewa vakawati, au a tu vakadua vakalailai ka tirova na iloilo,” e nanuma lesu. “Niu rai yani, au rawa ni raici au ena gauna sa bera mai, niu daramaka tu e dua na ivinivo totoka ni vakamau kau matadredredre. Au kila oqo na vanua au na vakamau kina, ena valetabu, voleka vei Tamaqu mai Lomalagi.”