Karaoa te Tembora bwa Iteran Maium

Kairake n ataeinimwaane ao kairake n ataeinnaine aika a tau aika 12 aia ririki ke iaona a kona ni kawara te tembora ni bwabetitoaki ibukiia aia bakatibu ake a tia ni mate n aki bwabetitoaki. Beretitenti Thomas S. Monson e taetae ibukin te kimwareirei n te mwakuri n ibuobuoki aei are e na uotia:

“Te moaningabong teuana ngke I nakonako nakon te tembora, I nooria kurubu aika kairake n ataeinnaine aika, moantaai n te ingabong anne, a karaoa te mwakuri ni bwabetito ibukiia te koraki ake a kaman mate. A mwaimwai irain atuuia. E takiakia momoangareia. A onrake nanoia n te kimwareirei. Temanna te ataeinnaine e tanrikaaki ni kaitaraa te tembora ao e kabwarabwara ana namakin. ‘Aio te kabanea ni kakukurei ni bong inanon maiu,’ e taku.”¹

Tebwi ma tenua ana ririki ni maiu Jessica Hahn mai Daphne, Alabama, e bwabetitoaki ibukiia ana bakatibu n te Atlanta Georgia Tembora. E ngae ngke e kabanea nimaua te aoa ni mwananga nakon te tembora, e taku bwa te bwai ae e a tia n rinanona e bon kakukurei. “Ibukin au konaa ni kabonganai kunnikai aika a mainaina aika a itiaki ao ni bwabetitoaki ibukiia au bakatibu e anganai te namakin ae rangin korakora,” e taku. “I namakinna bwa I a kinaiia ngkai.”

Nakon te tembora ni mwaitin te tai are ko konaa. Ikekei ao kona rinanon te kimwareirei ni buokaia tabeman ni karekei kakabwaia man te bwabetito.

A mwaiti kawai ni boutoka te mwakuri n te tembora, e ngae ngke ko aki kona n nakon te tembora. Ko kona n reiakina rongorongoia am bakatibu ao n taraia bwa taian otenanti n te tembora a karaoaki ibukiia. Ko kona n anga am ibuobuoki n tararuaiia ataei bwa aonga ni kona n nakon te tembora aia karo. Ibukina bwa te mwakuri ni ibuobuoki n te tembora e boboto riki iaoia taian utuu, ko kona ni mwakuri ni kakorakora oin am utu. Ao ko kona n tibwaua am koaua ma tabeman bwa te tembora bon ana auti te Uea ni koaua.

Ibukina bwa te tembora bon te tabo ae tabu, te Uea e a tia ni katauraoa te kainibaire bwa ti na maiuakinna imwaain ae ti na rin inanona. Beretitenti Dieter F. Uchtdorf e kamataata bwa “te kainibaire are e a tia ni katauraoaki iroun te Uea iaon titiraki ibukin te kariaiakaki n rin n te tembora bon ti tebo naba ma taian kainibaire ake a kuneaki i Ibukin Kakorakoraakiia te Roronrikirake. Inanon taai n rau ma inanon naba taai ni karirii aika a korakora, kainibaire aikai ao ana kairiri te Tamnei ae Raoiroi e na buokiko ni karaoi rinerine aika a eti. … Arom ni maiuakin kainibaire aikai e na kaota arom bwa antai ngkoe ao tera are ko ukoria bwa kona riki iai.”²

Maiuakina ana kainibaire te Uea, ao kona konaa n tau n rin n te tembora. Karekean am iango bwa kona rin n te tembora n taai aika ana roko e kona ni buokiko n tannako man te karirii n te bong aei. “E anganiko bukina ibukina bwa kona teimatoa n tau,” e taku Marlon Ruiz, ana ririki 16, mai Sunrise, Florida. “Ngkai ko karekea te kouru anne, ko aki toki ni iangoa te bwai ae ko karaoia ibukina bwa ko aki kona n nakon te tembora ngkana ko aki tau.”

“I noora te tembora ao n iangoa are I a mareaki ikekei n te bong teuana,” e taku Annika Reithmeier, ana ririki 16, mai Oslo, Norway. “I kakoaua bwa taian berita ake ko karaoi n te tembora bon berita ma te Uea. Bwaai ake ko reakinaki ikekei aki kona ni ibitaki ke ni mauna.”

Kaawakina tamnein te tembora n taabo are ko kona n nooria iai n taai nako,ao kakantaninga te bong are ko kona iai ni karekea oin am otenanti n te tembora.

Ngke 14 ana ririki ni maiu neie, Jody Hazelbaker man te tabo ae bwenaua America, Utah, e kawara Mount Timpanogos Utah Tembora n tain te kaukuki ao te kaneweaba. “Ngke I tabe n nakonako rinanon ana ruu te tia mare te aine, I tei teutana te tai ao ni kamwataua raoi n taraa te kiraati,” e kauringai. “Ngke I taraia, I aki kona n noorai n taai aika ana roko, ni kunnikainai n te kunnikai ni mare ae tamaroa ma te moangare ae bubura. I kakoaua bwa aio te tabo are N na bon mareaki iai, n te tembora, ni kaan nakon Tamara are i Karawa.”