Ua Valaau Mai Peresitene Monson mo ni Faifeautalai, Ma Fofogaina Mai Malumalu Fou e Lima

Novema 2010

Ua Valaau Mai Peresitene Monson mo ni Faifeautalai, Ma Fofogaina Mai Malumalu Fou e Lima

Na tatalaina e Peresitene Thomas S. Monson le Konafesi Aoao Lona 180 Faaleafatausaga a le Ekalesia, na faia i le Aso Toonai ma le Aso Sa, 2 ma le 3 o Oketopa, 2010, i le valaauina lea o nisi tagata o le ekalesia e auauna atu faamisiona ma sa fofogaina mai ai foi ma malumalu fou e lima.

Na toe tuuina mai foi e Peresitene Monson le valaau mo “alii talavou agavaa uma lava, malolosi” ia sauniuni e auauna atu; taliaina tamaitai talavou o ē mananao e auauna atu; ma sa ia faaalia ai foi le manaomia e le Ekalesia le “anoanoai o ni ulugalii matutua” e auauna atu faamisiona.

“O le galuega faafaifeautalai o se tiute faaleperisitua,” na ia saunoa ai, “o se matafaioi ua faamoemoe le Alii mai ia i tatou o ē ua tele naua mea ua tuuina mai i ai.”

Na fofogaina mai e Peresitene Monson ua fuafuaina ni malumalu fou se lima mo le fausiaina i Hartford, Connecticut, ISA; Initianapoli, Initiana, ISA; Lisbon, Potukale; Tijuana, Mexico; ma Urdaneta, Filipaina.

O malumalu fou ua atoa i ai le 23 o le aofai o malumalu ua fofogaina mai, pe o loo fausia nei. A mae’a loa, o le a atoa i ai le aofaiga e 157 o malumalu sa a le Ekalesia i le lalolagi atoa.

“E faaauau pea ona fausia malumalu,” na saunoa i ai Peresitene Monson. “… Ia tumau pea lo tatou faamaoni e o i malumalu, ia ua fausia ia latalata atu i o tatou tagata” (“A o Tatou Toe Potopoto Faatasi Ai,” Liahona ma le Ensign, Nov. 2010, 4).

O malumalu fou o uluai malumalu sa ia mo le Ekalesia i Potukale, Initiana, ma Connecticut. O le Malumalu i Urdaneta, o le lona tolu ai lea o malumalu a le Ekalesia i Filipaina, a o le Malumalu i Tijuana o le lona sefulutolu ai lea o malumalu i Mekisiko.

I le ono masina i le va o konafesi aoao ia Aperila ma Oketopa, sa faapaiaina ai e le Ekalesia ni malumalu fou se fa: O Malumalu o le The Gila Valley Arizona, Vancouver British Columbia, Cebu City Philippines, ma Kyiv Ukraine. Ua fuafuaina le Malumalu o Laie Hawaii e toe faapaiaina i le aso 21 o Novema, 2010, ina ua mae’a se faafouga tele sa faia.