Ia Uwen Pahn Laud en Amwail Peren

Malaulau peren nan mour me kaperensang oh wereisang ese me komw sewesehier mehteikan alehda rongamwahu en Sises Krais nan mohngiongirail kan. Ahniki peren wo iei ansou mwahu en towe koaros en Mwomwohdiso. Ni ansou me kitail kin pepdaisla, kitail inouki me kitail pahn “uh ni duwen sounkadehde kan en Koht ni ansou koaros oh nan mehkoaros, oh nan wasa koaros me [kitail] pahn mihie, lao lel mehla, pwe [kitail] en kak doandoarla sang Koht, oh iang wadawad rehn irail akan en iasada keieuo, pwe [kitail] en kak ahniki mour soutuk” (Mosiah 18:9).

Towe kan koaros alehda ekis en pwukoa me kohieng Mwomwohdiso en wahla rongamwahu en Sises Krais ong sampah, sohte lipilipil wasa oh erein arail mour. Kauno ketin mahsanih ni sansal me e ketin kadarkitail ong kadehde oh kaperih aramas, oh e konehng aramas koaros me alehdi kaweid wet en kaperih mehn mpe (Tehk D&C 88:81). Misineri kan me kin kalohk rahn koaros ahniki manaman en padahkih irail akan me saikinte wia tohn Mwomwohdiso. Towe kan en Mwomwohdiso pahn ahniki manaman en rapahkihda irail akan me Kauno ketin kaunopadahr pwe misineri kan en padahkih.

Kitail anahne doadoahngki atail pwoson me Kauno ketin kaunopadahr aramas limwahtail mehn padahkih. E ketin mwahngih ihs irail oh ni ansou me re onop, oh E kak ketin kaweid kitail ong irail sang ni manaman en Ngehn Sarawi oh ketkihieng kitail lepin mahsen kan en luke irail en ale padahk. Inou me Kauno ketikihieng misineri men nan 1832 iei pil inou me E ketikihieng kitail nan atail pwukoa en rapahki aramas me onopehr en ale padahk sang misineri kan: E mahsanih me e pahn ketikihieng Sounkaloalamwahu, me pahn padahkihieng ih mehlel oh ahl me en weid loale; oh ma e pahn loaloapwoat, E pahn pwurehng kamwarehki kadoken wahn pilawa. (Tehk D&C 79:2–3).

Oh inou en peren lap ong misineri loaloapwoat iei pil atail ni duwen towe loaloapwoat kan me kin kihieng mohngiongitail ong doadoahk en misineri:

Kauno mahsanih me ma atail peren pahn laud pwehki emen aramas me kitail wadohng nan wehi en Seme, ia uwen pahn atail peren ma kitail pahn wahdohng aramas tohto!

Kitail kolokol sapwellime rongamwahuo, sapwellime paip, oh sapwellime komour.

Ma kitail peki rehn Sahmo ni mware, ni pwoson kamehlele me kitail pahn alehdi, kitail pahn ahniki Ngehn Sarawi, me pahn kasalehda soahng koaros me kesempwal ong serihkan en aramas (tehk D&C 18:16–18).

Me pil patehng Ngehn Sarawi en sewese kitail kasawiada oh luke irail akan me onopehr en ale padahk, Kauno ketin malipehier oh kaiahnehdahr kaun kan en kaweid kitail. Nan kisin likou ehu me ntingda ni Pepweri 28, 2002, Presidensi Keieu kalaudehla pwukoa en doadoahk en misineri ong pisop kan oh ward kan.¹ Sang ni sawas en konsel en ward de prans, priesthood executive committee kin kaunopada pilahn en misineri ong pwihn de unit-o. Nan pilahno mie kaweid kan me pid duwen towe kan ahr kak diar irail akan me onopehr en ale padahk sang misineri kan. Mie aramas emen me malipilip en wia kaun en misin en ward de prans. Kaun en misin wo kin kalapw tuhweng misineri kan me kin kalohk rahn koaros oh neirail sounropirop kan.

Mie wiepe tohto en ahpwete kapwaiada pein ahmw pwukoa en rapahki aramas me misineri kan kak padahkih. Wiepe me keieu mengei me keieu mwahu.

Kapakapki en ahniki kaweid sang Ngehn Sarawi. Koasoaieng kaun kan oh misineri kan nan amwail wasa, peki ren kihda arail iren madamadau kan oh inoukihieng irail ahmw sawas. Kangoange irail akan me kin iang uhk nan doadoahk wet. Oh ansou koaros wia sounkadehdeni me ke kin nda oh wia me Sises Krais iei Krais oh me Koht kin ketin sapeng kapakap kan.

I kadehde me Ngehn Sarawi pahn kaweid komwi ong irail akan me raparapahki mehlelo ni omw pahn kapakap oh doadoahk pwehn alehdi kaweid wo. Oh I ese sang ni irair me I lelohngehr me amwail peren pahn werei rehn irail akan me pilada en alehieng rongamwahuo nan mohngiongirail oh eri dadaurete ni pwoson.