E Le O Iinei O Ia, A Ua Tu

O le taimi nei, ua na o mea na faaleagaina o loo totoe o Kapanaumi, o lena aai i tala ane o le vaituloto, o le totonugalemu o le galuega a le Faaola i Kalilaia. O iina sa Ia talai atu ai i totonu o sunako, aoao atu i luga o matafaga, ma faataunuu faamalologa i totonu o fale.

I le amataga o Lana galuega, sa tauaveina ai e Iesu se anotusi mai le Isaia: “Ua i o’u luga le Agaga o le Alii o Ieova, aua ua faauuina au e Ieova e talai le tala lelei i e ua tigaina; ua ia auina mai au e fufusi i e loto momomo, e talai le saolotga i le tafeaga, ma le matua tatalaina oe ua fusifusia” (Isaia 61:1; tagai foi Luka 4:18)—o se folafolaga aloaia manino o se fuafuaga paia e laveai i atalii ma afafine o le Atua.

Ae peitai o le talaiga a Iesu i Kalilaia sa na o le amataga lea. Ua leva lava ona i ai se nofoaga taufaamatau na atofaina e tatau ona tausisia i luga o se mauga na ta’ua o Kolokota.

Na pu’e faapagotaina i le Faatoaga i Ketesemane ina ua mae’a le Tausamaaga Mulimuli, tuulafoaia e Ona soo, sa tuufeanu i ai [tagata], faamasinoina, ma faalumaina, sa tautevateva Iesu ona o le mamafa o Lona satauro e agai atu i Kalevaria. Sa faasolo mai o ia mai le manumalo i le faalataina, sauaina, ma le maliu i luga o le satauro.

I upu o le pese “O Le Aai Paia”:

Sa tuuina mai e lo tatou Tama Faalelagi Lona Alo mo i tatou. Na tuuina mai e lo tatou Uso Ulumatua Lona soifua mo i tatou.

O le taimi mulimuli, sa ono mafai lava e le Matai ona toe foi. Ae peitai, na te le’i faia. Sa oo o Ia i mea uma ina ia mafai ona Ia laveaiina mea uma lava: o le aiga o tagata, le lalolagi, ma mea uma sa ola ma ainā ai.

E leai ni upu a atunuu Kerisiano e sili atu ona anoa ia te a’u nai lo na upu na fai atu ai le agelu ia Maria le Makatala ma le isi Maria a o fetagisi, ina ua la taunuu atu i le tuugamau e asi le tino o lo laua Alii: “Se a le mea tou te saili ai le ua soifua i e ua oti? E le o iinei o ia, a ua tu” (Luka 24:5–6s).

Faatasi ai ma lenei folafolaga aloaia, o i latou o e sa ola ma ua maliliu, o e o loo ola nei ma o le a maliliu i se aso, ma i latou o e e lei fananau mai ma e lei maliliu ua faatoa laveaia lava.

O se taunuuga o le manumalo o Keriso i le tuugamau, o le a tatou toe tutu uma ai. O le faaolataga lenei o le agaga. Sa tusia e Paulo:

“E i ai … tino faalelagi ma tino faalelalolagi: a e ese le matagofie o le faalelagi, ese i lo le faalelalolagi.

“E ese le pupula o le la, ese foi le pupula o le masina, ese foi le pupula o fetu: aua ua ese le pupula o le tasi fetu i lo le tasi fetu.

“E faapea foi le toe tutu mai o e ua oti” (1 Korinito 15:40–42).

O le mamalu selesitila lea tatou te sailia. O le afioaga o le Atua lea tatou te mananao tatou te nonofo ai. O le aiga e faavavau lea tatou te mananao e avea ai i tatou.

O Ia o le na faasaoina mai i tatou taitoatasi mai le oti e le gata, ou te molimau atu o Ia o se matai o le upu moni—peitai e sili atu o Ia nai lo o se matai. O Ia o le faataitaiga o le olaga atoatoa—peitai e sili atu o Ia nai lo na o se faataitaiga. O Ia o le fomai sili—peitai e sili atu o Ia nai lo o se fomai. O Ia o le Faaola moni o le lalolagi, le Alo o le Atua, le Alii o le Filemu, o Le Paia o Isaraelu, o le Alii toetu lava, o le na fetalai mai, “O a’u lē muamua ma lē mulimuli; o a’u o lē o loo ola, o a’u o lē na fasiotia, o a’u o lo outou fautua i le Tama” (MFF 110:4).

“O lea, ou olioli ai: ‘Ou iloa o Ia soifua mai!’”²

Ou te molimau atu ai i nei mea.