Tabu Tempol—Wan Saen blong Hop I Go long Wol

Ol dia brata mo sista. Mi sendem lav mo gritting blong mi long wanwan long yufala mo prea se Papa blong yumi long Heven bae i lidim ol tingting mo givim insperesen long ol toktok blong mi taem mi toktok long yufala tedei.

Bae mi stat wetem wan smol toktok long saed blong ol gudfala mesej we yumi bin harem long moning ia long Sista Olred mo Bisop Beton mo ol narawan, long saed blong Jos welfea program. Olsem we oli talem, yia ia i makem namba 75 aniveseri blong gud program ia we i bin blesem plante laef. Hem i bin janis blong mi blong save gud sam long olgeta we oli paeonia blong gudfala wok ia—ol man we oli gat lav mo sore, mo luk long fiuja.

Olsem we Bisop Beton mo Sista Olred mo ol narawan oli talem, bisop blong wod i gat responsabiliti ia blong kea long olgeta we oli stap long nid insaed long eria blong wod blong hem. Hemia i bin janis blong mi taem mi prisaed olsem wan yang bisop long Sol Lek Siti long wan wod blong 1080 memba, we i gat tu 84 wido insaed. I bin gat plante we oli nidim help. Mi glad tumas long welfea program blong Jos mo blong help blong Rilif Sosaeti mo ol kworom blong prishud.

Mi talemaot se welfea program blong Jos blong Jisas Kraes blong Ol Lata-dei Sent, hem i insperesen we i kam long God we I Gat Olgeta Paoa.

Nao, ol brata mo sista. Konfrens ia i makem tri yia stat we oli sastenem mi olsem Presiden blong Jos. I tru, oli bin ol bisi yia, wetem fulap jalenj, be tu, plante blesing. Janis we mi bin gat blong dediketem mo dediketem bakegen ol tempol, i bin wan long ol gudfala mo tabu blesing, mo hem i abaot ol tempol we mi wantem tokbaot long yufala tedei.

Long taem blong Oktoba jeneral konfrens long 1902, Presiden blong Jos, Josef F. Smit i bin talem long fas toktok blong hem, hop ia, se wan dei, bae yumi gat “ol tempol long ol defren pat blong [wol,] long ples we i gat nid blong gud blong ol pipol.”¹

Long taem blong fas 150 yia afta long oganaesesen blong Jos, stat long 1830 go kasem 1980, 21 tempol oli bildim olgeta; wetem ol tempol blong Ketlan, Ohaeo, mo Nauvu, long Ilinoa. Komperem hemia wetem 30 yia stat long 1980 i kam, i gat 115 tempol we oli bin bildim mo dediketem. Wetem anaonsmen yestedei blong 3 niu tempol, i gat antap long hem, 26 tempol we oli stap bildim naoia o oli stat blong bildim. Ol namba ia oli gohed blong go antap moa.

Gol we Presiden Josef F. Smit i bin hop from long 1902 i stap kamtru. Tingting we mifala i wantem i blong wantem mekem tempol i stap long han blong evri memba blong yumi.

Wan long ol tempol we oli stap bildim naoia, i Manaus, Brasil. Plante yia i pas, mi bin ridim abaot wan grup blong ova wan handred memba we oli aot long Manaus, we i stap long hat blong Amason bus, oli travel kasem wanem tempol we i klosap moa, we i stap long Sao Paolo, Brasil—klosap 2,500 mael (4,000 km) longwe long Manaus. Olgeta fetful Sent ia oli bin travel long bot blong fo dei long Amason Reva mo ol smol reva blong hem. Afta we oli finis long travel long wota, oli tekem bas blong tri dei moa long nogud rod, wetem smol kaekae nomo mo i no gat ples blong silip. Afta long seven dei mo naet, oli bin kasem tempol long Sao Paolo, mo oli mekem ol odinens blong taem we i no save finis. I tru, rod blong gobak i had tumas. Be, oli bin kasem ol odinens mo ol blesing blong tempol, mo nomata paos blong olgeta i bin emti, olgeta ia, olgeta oli bin fulap wetem spirit blong tempol, mo wetem tangkyu from ol blesing we oli bin kasem.² Naoia, plante yia afta, ol memba blong yumi long Manaus oli glad taem oli luk tempol blong olgeta i stap stanap long saed reva blong Rio Nigro Reva. Ol tempol oli tekem glad i go long ol fetful memba blong yumi, long weples oli stap bildim olgeta.

Ol ripot blong ol sakrifaes we oli mekem blong kasem ol blesing we oli faenem nomo long ol tempol blong God, oltaem oli tajem hat blong mi mo tekem wan niu tingting blong talem tangkyu from ol tempol.

Bae mi serem, long yufala, stori blong Tihi mo Tararaina MuTam mo tenfala pikinini blong tufala. Ful famle i bin joenem Jos eli long ol yia 1960 taem ol misinari oli bin go long aelan blong olgeta, we i bin stap samples 100 mael (160 km) Saot long Tahiti. I no longtaem, oli stat blong wantem kasem ol blesing blong wan famle we i no save finis we i sil long tempol.

Long taem ia, tempol we i stap kolosap moa long MuTam famle, i Hamilton Niu Silan tempol, we i stap moa long 2, 500 mael (4, 000 km) long Saot Wes, we oli save kasem nomo long plen we tikit i sas tumas. Bigfala MuTam famle, we i kasem smol samting nomo long smol plantesen blong olgeta, oli no gat mane blong pem tikit blong plen, i no gat janis blong faenem wok long Pasifik Aelan blong olgeta. Mekem se Brata MuTam mo boe blong hem, Jerar, i mekem had desisen ia blong joenem wan nara pikinini we i stap wok long nikel maen long Niu Kaledonia, samples 3,000 mael (4,800 km) long Wes. Masta i pem tikit blong ol wokman blong hem i go long maen, be i no pem tikit i gobak hom.

Ol tri man blong MuTam famle oli bin wok blong fo yia long ol tropikol maen, oli digim mo hivimap ol hevi ston. Brata MuTam hemwan i stap gobak hom blong wan sot visit, wan taem long wan yia, i livim ol boe blong hem long Niu Kaledonia.

Afta fo yia blong strong wok, Brata MuTam mo ol boe blong hem oli bin sevem naf mane blong tekem famle i go long Niu Silan Tempol. Evriwan i go be wan gel nomo i stap. Oli bin sil blong taem naoia mo taem we i no save finis, wan gudgudfala eksperiens we toktok i no save talem.

Brata MuTam i bin aot long tempol i go stret long Niu Kaledonia, mo hem i bin wok blong tu moa yia blong pem tikit blong wan moa gel ia we i no bin sil long tempol wetem olgeta—wan gel we i mared, mo pikinini mo hasban blong hem.

Long ol yia afta, Brata mo Sista MuTam i bin wantem blong givim seves long tempol. Long taem ia, oli jes bildim Papete Tahiti Tempol mo oli dediketem, mo tufala i bin mekem 2 misin long ples ia.³

Ol brata mo sista blong mi. Ol tempol oli moa bitim ston mo simen. Oli fulap wetem fet mo fasin blong livim kakae. Oli bildim wetem ol tes mo ol testemoni. Oli kam tabu tru long sakrifaes mo seves.

Fas tempol we oli bildim long dispensesen ia, i bin tempol blong Ketlan, long Ohaeo. Ol sent long taem ia, oli pua, mo yet, Lod i bin givim komanmen blong bildim wan tempol, mekem se oli bildim wan. Elda Hiba K. Kimbol i raetem, “Lod i save nomo ol taem we yumi pua, gat hadtaem, mo lusum hop we yumi stap gotru long hem blong mekem hemia i hapen.”⁴ Mo afta, afta we evri samting i finis wetem hadwok, olgeta Sent oli mas aot long Ohaeo mo tempol we oli laekem. Nao oli faenem wan ples blong haed—nomata i blong smol taem—long saed reva blong Misisipi long stet blong Ilinoa. Oli singaotem ples blong olgeta, Nauvu, mo oli bin glad blong givim, wan moa taem, evri samting wetem strong fet blong olgeta, oli bildim wan nara tempol long God blong olgeta. Fasin blong agens i kam, be, wetem Nauvu tempol we klosap i finis, oli mas aot long hom blong olgeta wan moa taem, mo lukaotem ples blong haed long wan ples we i drae we i no gat man i stap long hem.

Hadtaem mo sakrifaes i stat bakegen taem oli bin wok blong 40 yia blong leftemap Sol Lek tempol we i stanap mo naes long graon we i stap Saot long yumi we yumi stap ia tedei long Konfrens Senta.

Oltaem i gat sam sakrifaes i go wetem taem blong bildim tempol, mo taem blong go long tempol. Plante we oli no save kaontem oli bin wok mo traehad blong kasem, blong olgetawan mo blong famle blong olgeta, ol blesing ia we oli faenem insaed long ol tempol blong God.

From wanem i gat plante we oli wantem givim plante blong kasem ol blesing blong tempol? Olgeta we oli andastanem ol blesing we i no save finis we i kam long tempol, oli save se i no gat sakrifaes we i bigwan tumas, i no gat praes we i hae tumas, i no gat hadwok we i had tumas blong kasem olgeta blesing ia. I neva gat tumas kilometa blong travel long hem, i no gat tumas samting i blokem rod, o tumas had samting blong gotru long hem. Oli bin andastanem se ol odinens we i sevem man, we yumi kasem insaed long tempol, we i letem yumi gobak wan dei long Papa blong yumi long Heven long wan famle rilesensip we i no save finis, mo, blong yumi endao wetem ol blesing mo paoa we i kam long heven, i go stret wetem evri sakrifaes mo evri hadwok.

Tedei, plante long yumi i no nid blong safa long bigfala hadtaem blong save go long tempol. Eiti faef pesen blong membasip blong Jos, naoia i stap insaed long distens blong 200 mael (320 km) long wan tempol, mo long plante long yumi, tempol i stap kolosap moa.

Yufala i bin go long tempol blong yufalawan, mo sapos yufala i stap kolosap lelebet long tempol, sakrifaes blong yufala i blong mekem taem long bisi laef blong yufala blong go oltaem long tempol. I gat plante samting blong mekem long tempol blong yumi long bihaf blong olgeta we oli stap wet long narasaed long vel. Taem yumi stap mekem wok blong olgeta, bae yumi save se yumi bin mekem wanem we olgeta oli no save mekem blong olgetawan. Presiden Josef F. Smit, long wan strong toktok i bin talem: “Tru long ol hadwok blong yumi long bihaf blong olgeta, ol jen blong slef bae oli brok, mo tudak we i raonem olgeta bae i kam klia, blong laet i saen long olgeta mo bae oli harem, long spirit wol, abaot wok we ol pikinini blong olgeta oli bin mekem long bihaf blong olgeta, mo bae oli glad wetem yufala from ol wok we yufala i bin mekem.”⁵ Ol brata mo sista blong mi. Wok ia, i blong yumi nao blong mekem.

Long famle blong mi, sam long ol eksperiens we i moa tabu mo mifala i tingbaot, oli ol taem ia taem mifala i joen tugeta long tempol blong mekem ol siling odinens blong ol bubu we oli ded.

Sapos yu no go yet long tempol, o sapos yu bin go, be yu no kwalifae blong gat wan tempol rekomen, i no gat wan moa impoten gol blong yu i stap, bitim blong wok blong stap klin inaf blong go long tempol. Sakrifaes blong yu, ating i blong mekem laef blong yu i stret wetem wanem i nid blong mekem blong kasem wan rekomen, ating i blong livim fogud sam nogud fasin we i mekem se yu no kwalifae. Ating i blong gat fet, mo disiplin blong pem taeting. Nomata wanem i stap, kam kwalifae blong go insaed long tempol blong God. Tekem wan tempol rekomen mo lukluk long hem olsem samting we i moa sas we yu gat, from hem i olsem.

Kasem taem yu go insaed long haos blong Lod mo kasem evri blesing we i stap wet long yu long ples ia, yu no kasem evri samting we Jos i gat blong givim. Evri impoten mo gud blesing blong stap memba blong Jos, oli ol blesing we yumi kasem insaed long ol tempol blong God.

Naoia, ol yang fren blong mi we yufala i yangfala yet. Oltaem gat tempol i stap long fored blong ae blong yufala. No mekem eni samting we bae i mekem yu no save pasem doa blong hem mo tekem pat long ol tabu blesing we i no save finis we i stap insaed. Mi presem yufala we yufala i go finis long tempol oltaem blong mekem baptaes blong olgeta we oli ded, blong girap long eli eli moning blong tekem pat long ol baptaes ia bifo skul i stat. Mi no save tingting long wan nara gud wei blong statem wan dei.

Long yufala, ol papa mo mama blong ol yangfala pikinini, bae mi serem wetem yufala sam waes advaes we i kam long Presiden Spensa W. Kimbol. Hem i talem: “Bae hem i wan gud samting tumas sapos … ol papa mo mama oli gat long evri bedrum blong haos blong olgeta, wan pikja blong tempol, blong mekem se ol pikinini blong olgeta, stat long taem oli smol pikinini, oli save luk long pikja ia evri dei kasem taem i kam pat blong laef blong olgeta. Taem oli kasem yia we oli nidim blong mekem ol impoten desisen long saed blong go long tempol, bae oli mekem desisen ia finis.”⁶

Ol pikinini blong yumi long Praemeri oli singsing:

Mi askem strong yufala blong tijim long pikinini blong yufala, se tempol i impoten.

Wol i save kam wan ples we i gat jalenj mo i had blong laef long hem. Plante taem, wanem i raonem yumi, i pulum yumi go daon. Taem yu mo mi, i go long ol tabu haos blong God, taem yumi stap tingbaot ol kavenan we yumi mekem insaed, bae yumi save tekem isi moa evri tes, mo winim wanwan temtesen. Long tabu haos ia, bae yumi faenem pis; bae yumi kam niu mo strong moa.

Naoia, ol brata mo sista blong mi. Bae mi save tokbaot wan moa tempol bifo mi endem toktok. Long fiuja we i no longwe tumas, taem ol niu tempol oli stap stanap raon long wol, wan bae i stanap long wan siti we i bin stap ova long 2,500 yia i pas. Mi tokbaot tempol we oli stap bildim naoia long siti blong Rom, Itali.

Evri tempol i wan haos blong God, we i mekem ol semfala wok mo i gat ol semfala blesing mo odinens. Tempol long Rom, Itali, i spesel. Oli bildim long wan graon we i pat blong histri long wol, wan siti we ol Aposol blong bifo, Pita mo Pol, tufala i bin prijim gospel blong Kraes mo wanwan long tufala i bin ded from.

Las Oktoba, taem mifala i kam tugeta long wan graon long Not Is kona blong Rom, hem i bin janis blong mi blong mekem wan dedikesen prea taem mifala i rere blong brekem graon. Mi bin filim blong singaotem Senata blong Itali, Lusio Malan mo Deputi Meya blong Rom, Giusipi Tsiadi, blong stap long medel blong olgeta fas man blong savelem graon. Tufala i bin pat blong desisen ia blong letem mifala i bildim wan tempol long siti blong olgeta.

Dei ia, i bin gat smol klaod be ples i wom, mo nomata i luk se bae i ren, i no gat wan wota i bin foldaon. Taem naesfala kwaea i bin singsing, long lanwis blong Itali long singsing ia “Spirit olsem Faea,” wan i bin filim olsem se heven mo wol i bin joen long wan hym blong givim pres mo tangkyu long God we I Gat Olgeta Paoa. I had blong holemtaet wota blong ae.

Long wan dei we bae i kam, olgeta fetful long siti ia, Siti we I No Save Finis, bae oli kasem ol odinens we i no save finis long wan tabu haos blong God.

Mi talemaot tangkyu blong mi we i no save stop, long Papa blong yumi long Heven, from tempol we oli stap bildim naoia long Rom, mo from evri tempol blong yumi, long weples oli stap. Wanwan i stanap olsem wan saen we i go long wol, blong talemaot testemoni blong yumi se God, Papa blong yumi we I No Save Finis i laef, se Hem i wantem blong blesem yumi, mo, i tru, i wantem blesem ol boe mo gel blong evri jeneresen. Wanwan long ol tempol blong yumi i blong talemaot testemoni blong yumi se, laef afta long gref i hapen semmak olsem laef blong yumi long wol ia.

Ol brata mo sista we mi lavem. Bae yumi mekem ol sakrifaes we i nid blong go long tempol mo gat spirit blong tempol long hat mo hom blong yumi. Bae yumi folem ol step blong Lod mo Sevya blong yumi, Jisas Kraes, we i bin mekem bigfala sakrifaes ia from yumi, blong yumi gat laef we i no save finis, mo kam olsem wan god long kingdom blong Papa long Heven. Mi prea olsem, long nem blong Jisas Kraes, amen.